Chapter 149

śrīnārāyaṇa uvāca |
śṛṇu lakṣmi raivatasthatīrthāni kathayāmyaham |
yātrāphalasuyuktāni bhuktimuktipradāni ca || 1 ||
[Analyze grammar]

vastrāpathasya tīrthāni yāni yena kṛtāni ca |
tānyapi te kathayiṣye svargamokṣapradāni ca || 2 ||
[Analyze grammar]

pūrve kṛtayuge kānyakubje bhojanṛpo'bhavat |
tasmai vanāt samabhyetya vanapālabravīdidam || 3 ||
[Analyze grammar]

āścaryaṃ bhramatā rājan mayā dṛṣṭaṃ vanedhunā |
mṛgayūthagatā nārī mayā dṛṣṭā mṛgānanā || 4 ||
[Analyze grammar]

tatastu bhojarājaḥ saḥ senādhyakṣamuvāca ha |
idānīmeva gantavyaṃ yatra sā yuvatī sthitā || 5 ||
[Analyze grammar]

sā'śvāśca pattayo yāntu veṣṭayantu vanaṃ girim |
strīveṣadhāriṇī nārī vaśaṃ neyā mṛgī hi sā || 6 ||
[Analyze grammar]

giriṃ saṃveṣṭayāmāsa bhojaḥ sainyapadātibhiḥ |
plavamānā tu sainyena vidhṛtā hariṇānanā || 7 ||
[Analyze grammar]

nārīdehāṃ samāninye kānyakubje mṛgīṃ nṛpaḥ |
dṛṣṭvā''ścaryaṃ tu sarveṣāṃ jāyate nṛpamandire || 8 ||
[Analyze grammar]

rājā tāṃ snāpayāmāsa divyagandhānulepanaiḥ |
ekānte nirjane rājā babhāṣe samalaṃkṛtām || 9 ||
[Analyze grammar]

kā tvaṃ kasya sutā kena hetunā ca mṛgānanā |
iti pṛṣṭhāpi novāca na bhuṃkte na papau tathā || 10 ||
[Analyze grammar]

tadā bhojastu daivajñān mantrajñān bhiṣajastathā |
tāntrikān sunamaskṛtya babhāṣe paśyata dvijāḥ || 11 ||
[Analyze grammar]

nārīdehā kathaṃ nveṣā kathaṃ ca hariṇā''nanā |
manuṣyavāṇīvadanā kathameṣā bhaviṣyati || 12 ||
[Analyze grammar]

viprāḥ prāhuḥ kurukṣetre sārasvatākhyabhūsuraḥ |
jānāti sa ca vṛttāntaṃ yathātathaṃ sa vakṣyati || 13 ||
[Analyze grammar]

bhojo jagāma taṃ vipraṃ tapantaṃ tapa ityamum |
namaskṛtyopaviṣṭaṃ taṃ bhojaṃ prāha sa bhūsuraḥ || 14 ||
[Analyze grammar]

gacchāmo yatra sā nārī vakṣyati svayameva tat |
ityāgatā yatra nārī tataḥ sārasvato dvijaḥ || 19 ||
[Analyze grammar]

upalipya ca bhūbhāgaṃ svastikaṃ sanniveśya ca |
sajalaṃ kalaśaṃ nyasya cāgnikāryaṃ nidhāya ca || 16 ||
[Analyze grammar]

indraṃ devāṃśca dikpālān kalaśe sanniveśya ca |
hutvā'gniṃ ca caruṃ kṛtvā grahapūjāmakārayat || 17 ||
[Analyze grammar]

abhiṣekaṃ svayaṃ cakre tāṃ nārīṃ cābhiṣecayat |
tāvatā divyadṛṣṭyā sā babhāṣe prāgbhavān bahūn || 18 ||
[Analyze grammar]

bhoja tvaṃ saptame pūrve janmani bhvāṃ mayā saha |
kaliṃgadeśanṛpatirahaṃ patnī ca baṅgajā || 19 ||
[Analyze grammar]

duṣṭātmā tvamanācāro dayādharmavivarjitaḥ |
gobhūvipraguruvedadevaśāstravināśakṛt || 20 ||
[Analyze grammar]

militvā ca prajābhistvaṃ hato lokavirodhakaḥ |
mṛtaṃ kānta gṛhītvā'gnau praviṣṭā'haṃ mṛtā saha || 21 ||
[Analyze grammar]

mṛtaṃ kāntaṃ samādāya bhāryā'gnau praviśed yadi |
mahīyete hyubhau svarge yāvadābhūtasamplavam || 22 ||
[Analyze grammar]

tatastu mālave deśe viprastvaṃ nāstiko'bhavaḥ |
ahaṃ tu brāhmaṇī bhaktimatī bhāryā'bhavaṃ tava || 23 ||
[Analyze grammar]

tvayā'rjitaṃ dhanaṃ svarṇaṃ tyaktvā''ptaṃ maraṇaṃ yadā |
sahā'haṃ na mṛtā lobhāt kintu kālāntare mṛtā || 24 ||
[Analyze grammar]

śvetasarpo'bhavastvaṃ vai viprakanyā'bhavaṃ tvaham |
pariṇītā'nyavipreṇa vipraṃ tvamadaśaśca tam || 25 ||
[Analyze grammar]

ahantu vidhavā jātā sarpastvaṃ mārito janaiḥ |
vaidhavyaṃ mama datvā tu dvijasarpāvubhau mṛtau || 26 ||
[Analyze grammar]

tvaṃ mṛtvā makaro jāto godāvaryāṃ tadā'pyaham |
tīrthaṃ bhīmeśvaraṃ draṣṭuṃ samāyātā janaiḥ saha || 27 ||
[Analyze grammar]

yāvat snātuṃ praviṣṭā'hamākṛṣṭā makareṇa vai |
lokaiḥ kuntādighātena makaro vinipātitaḥ || 28 ||
[Analyze grammar]

ahaṃ makaradaṃṣṭrābhistadānīṃ ca mṛtiṃ gatā |
tvaṃ tato lubdhako jāto'haṃ śabaryabhabadvane || 29 ||
[Analyze grammar]

agnerjalācca sarpācca gajāt siṃhāddhayādapi |
roṣādvisphoṭakānmṛtyuryeṣāṃ te narakaṃgamāḥ || 30 ||
[Analyze grammar]

ātmahā bhrūṇahā strīghno brahmaghnaḥ kūṭasākṣiṇaḥ |
kanyāvikrayakartā ca mithyāpavādadāyakaḥ || 31 ||
[Analyze grammar]

vikrīṇāti kratuṃ yastu madyaṃ pāti dvijastu yaḥ |
rājadrohī svarṇacauro brahmavṛttivilopakaḥ || 32 ||
[Analyze grammar]

goghnaśca nikṣepaharo grāmasīmaharastu yaḥ |
sarve te narakaṃ yānti yā ca strī pativañcakī || 33 ||
[Analyze grammar]

śabaryahaṃ mṛtā rogāt krauṃcī jātā vane tadā |
kvacit krauṃcena kāmena krīḍitumudyatā'bhavam || 34 ||
[Analyze grammar]

tāvadvyādhena sa krauṃco bāṇena vinipātitaḥ |
krauṃcena ca tadā śaptaḥ krūro bhava mahāvane || 35 ||
[Analyze grammar]

strīhīnaḥ śārdūlarūpo duḥkhī bhava punaḥ punaḥ |
tatastvaṃ śārdūlarūpo raivate ca girābabhūḥ || 36 ||
[Analyze grammar]

mṛtā daivavaśāt krauṃcī mṛgyabhūd raivate girau |
bhaveśvarātpaścime tu svarṇarakṣānadījalam || 37 ||
[Analyze grammar]

pātuṃ cāhaṃ samāyātā dṛṣṭā kesariṇā tadā |
utplutā tadbhayāccāhaṃ patitā cā'paraṃ taṭam || 38 ||
[Analyze grammar]

tāvat siṃhaḥ samutplutya madagre patito balāt |
ahaṃ yāvatparāvṛtyotplavitumupacakrame || 39 ||
[Analyze grammar]

pārśvasthakīcakastambe jalasthe mama mastakam |
dvayoḥ kīcakayormadhye plavane pāśavat hyabhūt || 40 ||
[Analyze grammar]

śarīraṃ jalamadhye me mastakaṃ vaṃśamadhyagam |
siṃhena saṃdhṛtaṃ kaṇṭhāddaṃṣṭrābhiśca viyojitam || 41 ||
[Analyze grammar]

yāvat siṃho'pi me varṣma jalamadhyād vikarṣati |
tāvat saibalayogena padbhyāṃ sṛptvā jale'patat || 42 ||
[Analyze grammar]

agādhācca jalāt śaivālabāhulyātsamantataḥ |
na nirgantuṃ śaśākā'sau mṛtimāpat sa kesarī || 43 ||
[Analyze grammar]

svarṇarakṣājale siṃho mṛto bhojo'bhavannṛpaḥ |
tasya tīrthaprabhāveṇa nṛpatvaṃ samajāyata || 44 ||
[Analyze grammar]

idaṃ hi saptamaṃ janma rājābhojeti viśrutam |
lambate me śiro vaṃśe śarīraṃ jalamadhyagam || 45 ||
[Analyze grammar]

svarṇarekhājale tatra viśīrṇaṃ mama tadvapuḥ |
na tu vaktraṃ nipatitaṃ tvaṅmāṃsaṃ śirasi sthitam || 46 ||
[Analyze grammar]

tato'haṃ hariṇīgarbhe jātā mānuṣarūpiṇī |
jātaṃ vaktraṃ mṛgīṇāṃ me yasmānna patitaṃ jale || 47 ||
[Analyze grammar]

nā'haṃ hariṇakanyā'sti kintūddālakasanmuneḥ |
kanyā'smi caikadā svarṇarakṣāyāṃ snātumāgataḥ || 48 ||
[Analyze grammar]

sa tadānīṃ ca tatraiva yoginyaḥ snātumāgatāḥ |
yoginībhistadā tatra muniḥ parīkṣito muhuḥ || 49 ||
[Analyze grammar]

kīdṛśo'yaṃ brahmacārī dṛḍho vā'dṛḍha ityamum |
gṛhītvā kaṇṭhapāśaiśca samāśliṣya muhurmuhuḥ || 50 ||
[Analyze grammar]

krīḍayanti bahurītyā ṛṣirna vikṛtiṃ gataḥ |
athaikā yoginī nāmnā kāmadāhā'bhidhā tadā || 51 ||
[Analyze grammar]

uddālakasya dehe'ntaḥpraviṣṭā yogasadbalāt |
tāvatkāmo'bhavadbhīto vidudrāva ṛṣestanoḥ || 52 ||
[Analyze grammar]

anyathā dagdhatāṃ kuryād yoginī sā''ntarasthitā |
kāmadevasya vidrāvād yoginyā uṣṇatāvaśāt || 53 ||
[Analyze grammar]

yauvanodbhedavegācca sahakrīḍanakādikāt |
stambhito'pi tadā dhāturvegācca patito jale || 54 ||
[Analyze grammar]

pravāheṇa saha dhāturnārāyaṇahrade gataḥ |
tatraikā hariṇī vāri papau taddhātumiśritam || 55 ||
[Analyze grammar]

tadgarbhe mama vāso'bhūt pūrvakarmānusārataḥ |
ahamuddālakaṛṣeḥ putrī jātā mṛgānanā || 56 ||
[Analyze grammar]

yoginībhirvardhitā'smi yoginīnāṃ sutā yataḥ |
yoginyasmi mṛgīmukhā divyā'pi mānuṣī tathā || 57 ||
[Analyze grammar]

rājaṃstava tathā me'pi saptamaṃ janma vidyate |
jānātyayamṛṣiḥ sārasvato yogabalāddhi tat || 58 ||
[Analyze grammar]

praviśyā'gnau mṛtā pūrve tvayā sārdhaṃ tu saptame |
tvāṃ vinā me patirmā bhūnmaraṇe yācitaṃ mayā || 59 ||
[Analyze grammar]

tadā'ntarīkṣe rājendra vāguvācā'śarīriṇī |
rājā'sau duṣṭakarmā'sti hiṃsraḥ krūro'tilubdhakaḥ || 60 ||
[Analyze grammar]

na vedaśāstrakuśalo dayādharmavivarjitaḥ |
kāmī mānī mahākrodhī satyācāravivarjitaḥ || 61 ||
[Analyze grammar]

na devaṃ na guruṃ viprānna jānāti durāśayaḥ |
na sādhūnna ca sādhvīṃśca pūjayatyatimānavān || 62 ||
[Analyze grammar]

asatyavādī duṣṭātmā yajñadharmavināśakaḥ |
palalāśī ca vai viṣṇornindako vṛttihārakaḥ || 63 ||
[Analyze grammar]

veśyāgāmī snānadānadharmakarmavivarjitaḥ |
caṇḍālatāmayaṃ prāptastasya pāpaṃ kiyadguṇam || 64 ||
[Analyze grammar]

gaṇayituṃ na śakyeta tādṛśaḥ pāpavānayam |
yadyapi tvaṃ satī nārī dagdhā bhavasi tena vai || 65 ||
[Analyze grammar]

tatastvaṃ saptajanmāni sahayuktā bhaviṣyasi |
kintu cā'sya mahāpāpaiḥ svargaṃ nā'sya bhaviṣyati || 66 ||
[Analyze grammar]

ādau pāpaphalaṃ bhuktvā paścād rājyaṃ bhaviṣyati |
aṣṭamaṃ cāsya sajjanma devajanma bhaviṣyati || 67 ||
[Analyze grammar]

tadā tvaṃ mānuṣī bhūtvā paścātsvargaṃ gamiṣyasi |
ityuktvā sā virarāma sarvaṃ smarāmi yogataḥ || 68 ||
[Analyze grammar]

api me mastakasyāsti kharparaṃ vaṃśasaṃsthitam |
yadi vastrāpathe gatvā śiraḥ kaścid vimuñcati || 69 ||
[Analyze grammar]

svarṇarakṣājale rājan mānuṣaṃ syānmukhaṃ mama |
asmyahaṃ mānuṣavaktrā dṛśyate'nyairmṛgānanā || 70 ||
[Analyze grammar]

pāpacchāyāvṛtaṃ caitanmṛgākṛtimukhaṃ mama |
śrutvaitadbhojarājena pratīhārastu tatsthalam || 71 ||
[Analyze grammar]

preṣitastena dṛṣṭaṃ tat svarṇarekhājalopari |
vartate tanmṛgaśiro vaṃśaprotaṃ mahāvane || 72 ||
[Analyze grammar]

gṛhītvā pātitaṃ yāvat svarṇarekhājale tadā |
bhojarājagṛhe tasyā mukhaṃ candrasamaṃ śubham || 73 ||
[Analyze grammar]

mānuṣa cā'bhavad divyaṃ padmapatrasulocanam |
suśobhanaṃ dīrghakeśaṃ dīrghakarṇaṃ śubhadvijam || 74 ||
[Analyze grammar]

kambugrīvaṃ padmagandhaṃ sarvalakṣaṇasaṃyutam |
na devī na ca gāndharvī nā''surī na ca kinnarī || 75 ||
[Analyze grammar]

yādṛśī sā tadā jātā tīrthabhāvena sundarī |
pariṇītā tu sā tena bhojarājena sundarī || 76 ||
[Analyze grammar]

mṛgānaneti vikhyātā devī sā bhojasundarī |
kutā'sau paṭṭamahiṣī bhojarājena dhīmatā || 77 ||
[Analyze grammar]

deśānāṃ pravaro deśo girīṇāṃ pravaro giriḥ |
kṣetrāṇāmuttamaṃ kṣetraṃ vanānāmuttamaṃ vanam || 78 ||
[Analyze grammar]

gaṃgāsarasvatīrevāḥ svarṇarekhājale sthitāḥ |
brahmā viṣṇuśca sūryaśca sarve rudrādayaḥ surāḥ || 79 ||
[Analyze grammar]

nāgā yakṣāśca gandharvā asmin kṣetre vyavasthitāḥ |
svarṇarakṣānadīvārṣu snātvā nārāyaṇe hrade || 80 ||
[Analyze grammar]

mṛgītīrthe tathā snātvā kuṇḍe dāmodarābhidhe |
tathā ca revatīkuṇḍe snātvā svarmokṣamāpnuyāt || 81 ||
[Analyze grammar]

gaṃgā sarasvatī puṇyā yamunā svarṇarūpiṇī |
nadyāmāgatya tiṣṭhanti dṛśyante svarṇapatrikāḥ || 82 ||
[Analyze grammar]

sarasvatī svarṇarūpā gaṃgā rajatapatrikāḥ |
yamunā tāmrapatrāṇi nadyapsu pracakāsati || 83 ||
[Analyze grammar]

evaṃ suvarṇarakṣākhyā svarṇarekhābhiranvitā |
sarit sā raivate bhūdhre vartate mokṣadāyinī || 84 ||
[Analyze grammar]

brahmaghnaśca surāpaśca bhrūṇahā gurutalpagaḥ |
svarṇarekhājale snātvā mucyate sarvapātakaiḥ || 85 ||
[Analyze grammar]

ye ca kīṭapataṃgādyāḥ svarṇarekhājale mṛtāḥ |
vṛkṣavallītarugulmāste'pi yānti parāṃ gatim || 86 ||
[Analyze grammar]

bhojaḥ sārasvataṃ vipraṃ stutvā vacanamabravīt |
brahmā viṣṇurharaḥ sūryaṃ indro'gnirmarutāṃ gaṇāḥ || 87 ||
[Analyze grammar]

brahmacaryeṇa tapasā tvayā santoṣitāḥ prabho |
tvayā saha mayā cāpi yātrārthaṃ raivate girau || 88 ||
[Analyze grammar]

kṛpā cet tarhi gantavyaṃ kṛtārthaśca bhavāmyaham |
kiṃ grāhyaṃ kiṃ ca bhoktavyaṃ kiṃ deyaṃ kiṃ na dīyate || 89 ||
[Analyze grammar]

tīrthopavāsaḥ snānaṃ ca sandhyāsnānavidhikramaḥ |
pūjā nidrā japo rātrau sarvaṃ saṃkṣepato vada || 90 ||
[Analyze grammar]

iti sārasvataḥ pṛṣṭho bhūbhṛtā prāha tadvidhim |
dānādikaṃ phalaṃ sarvaṃ prāha vipro yathātatham || 91 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pūrvakṛtayuge bhojākhyarājñastatpatnyāśca mṛgānanāyāḥ saptajanmavṛttāntamukhena svarṇarakṣānadyā māhātmyavarṇananāmonapaṃcāśadadhikaśatatamo'dhyāyaḥ || 149 ||
[Analyze grammar]