Chapter 148

śrīlakṣmīruvāca |
payovratamavaidhavyavrataṃ ca kīdṛśaṃ katham |
kartavyaṃ yena putrā''ptiḥ patyuryogaḥ sadā bhavet || 1 ||
[Analyze grammar]

śrīnārāyaṇa uvāca |
brahmaṇā prathamaṃ proktaṃ kaśyapāya mahātmane |
tena patnyai tato'dityabhidhāyai kathitaṃ tataḥ || 2 ||
[Analyze grammar]

hiraṇyākṣādiputravatyaditiḥ sambabhūva ha |
tadvrataṃ dvādaśāhaṃ tu kāryaṃ keśavatoṣakṛt || 3 ||
[Analyze grammar]

phālgunasya site pakṣe vratametatprakīrtitam |
pratipaddinamāramya yāvacchuklatrayodaśī || 4 ||
[Analyze grammar]

brahmacaryamadhaḥsvāpaḥ snānaṃ triṣavaṇaṃ caret |
satyaṃ vadet tyajedbhogānuccāvacāṃstu rājasān || 5 ||
[Analyze grammar]

drohaṃ hiṃsāṃ tyajennityaṃ kārayetpūjanaṃ hareḥ |
nṛtyavāditragītaiśca stutibhiḥ svastivācanaiḥ || 6 ||
[Analyze grammar]

ṣoḍaśopacārakaiśca kathābhirbhajanaistathā |
śaktito brāhmaṇān pañca nityaṃ vai bhojayet tathā || 7 ||
[Analyze grammar]

ārambhe tu hyamāvāsyādine madhyāhnato gṛham |
saṃlipya goṣakṛtā ca mṛdā ca śuddhatāṃ nayet || 8 ||
[Analyze grammar]

svayaṃ prakṣālya vastrādi nārī śuddhiṃ samācaret |
sāyaṃkāle śuddhamṛdā''lipya snāyād vrataṃkarī || 9 ||
[Analyze grammar]

mṛttikāmānayet kṣetrājjalasrotasa eva vā |
udāharenmṛdādāne mantraṃ svabhāṣayā vadhūḥ || 10 ||
[Analyze grammar]

tvaṃ devi śrīvarāheṇa pṛthvīrūpā samuddhṛtā |
uddharāmi namastubhyaṃ pāpmānaṃ me vināśaya || 11 ||
[Analyze grammar]

ityuccārya samunneyā mṛttikā'tha tato gṛhe |
snātvā saṃpūjayed viṣṇuṃ nārāyaṇaṃ niśādime || 12 ||
[Analyze grammar]

niśāraṃbhe ṣoḍaśopacāraiḥ saṃpūjayeddharim |
saṃkalpayecca śvodināt kariṣyehaṃ payovratam || 13 ||
[Analyze grammar]

putrasya prāptaye tanme pūrṇaṃ te kṛpayā bhavet |
dvādaśāhe vrate tatra brahmacaryādikān yamān || 14 ||
[Analyze grammar]

pālayiṣye bhojayiṣye dvyavarān brāhmaṇān sadā |
dvādaśāhaṃ tava pūjāṃ kariṣye ṣoḍaśarddhibhiḥ || 16 ||
[Analyze grammar]

arcāyāṃ sthaṇḍile sūrye jale vahnau gurāvapi |
patyau vā śrīhariṃ nityaṃ pūjayed bhaktibhāvataḥ || 16 ||
[Analyze grammar]

bhāṣayā ca stutiṃ kuryādarthasandarbhitāṃ śubhām |
namo bhagavate tubhyaṃ parapuṃse namonamaḥ || 17 ||
[Analyze grammar]

sarvāntaḥkṛtavāsāya vāsudevāya sākṣiṇe |
namo'vyaktāya sūkṣmāya vyaktapuṃse namonamaḥ || 18 ||
[Analyze grammar]

caturviśatitattvāya vikṛtihetave namaḥ |
namo dvimūrdhne tripade catuḥśṛṃgāya sūtriṇe || 19 ||
[Analyze grammar]

saptahastāya kratave veṭatrayātmane namaḥ |
mahādevāya rudrāya vṛṣabhāya namo namaḥ || 20 ||
[Analyze grammar]

yāvadvidyā'dhiṣṭhitāya prāṇināṃ pataye namaḥ |
namo hiraṇyakośāya jagatprāṇātmane namaḥ || 21 ||
[Analyze grammar]

yogasiddhyaiśvaryavate yogakartre ca te namaḥ |
namaḥ sarvādidevāya namaste cātmavartine || 22 ||
[Analyze grammar]

namaste harikṛṣṇāya naranārāyaṇarṣaye |
namaḥ indīvaraśyāmavapuṣe śrīmate namaḥ || 23 ||
[Analyze grammar]

namaste keśavā'nanta pītavastravate namaḥ |
varadātā vareṇyaśca tvaṃ janābhīṣṭadaḥ prabhuḥ || 24 ||
[Analyze grammar]

upāsitā mokṣadā vai tava pādādireṇavaḥ |
devāstvāmanuvartante sthitā śrīstava pādayoḥ || 25 ||
[Analyze grammar]

spṛhayāmi kṛpā''modaṃ bhagavanme prasīdatām |
iti saṃstūya taṃ kṛṣṇamāvāhayejjagadgurum || 26 ||
[Analyze grammar]

pādyamarghyamācamanamāsanaṃ dāpayeddharim |
sutailārkādi saṃmṛdyaṃ tataḥ pañcāmṛtaṃ diśet || 27 ||
[Analyze grammar]

payodadhighṛtamadhuśarkarāsnānamarpayet |
śuddhodakajalasnānamabhiṣekaṃ ca kārayet || 28 ||
[Analyze grammar]

vastreṇa mārjanaṃ kṛtvā śubhavastrāṇi cārpayet |
yajñasūtraṃ kaustubhaṃ ca tailasārārkamarcayet || 29 ||
[Analyze grammar]

kuṃkumābīragulālākṣatairdevaṃ samarcayet |
candanakusumadhūpadīpanaivedyamarpayet || 30 ||
[Analyze grammar]

bhūṣāhetimukuṭādi tilakādi ca dhārayet |
jalamārārtrikaṃ dadyānmukhe tāmbūlakaṃ tathā || 31 ||
[Analyze grammar]

phalaṃ dadyājjalaṃ dadyāt kuryānnamaḥ sadaṇḍavat |
pradakṣiṇaṃ dakṣiṇāṃ ca dadyādarthyaṃ nivedayet || 32 ||
[Analyze grammar]

dvādaśāhaṃ tava pūjāṃ kariṣye dehi putrakam |
ūṃ namo bhagavate vāsudevāyeti saṃjapet || 33 ||
[Analyze grammar]

aṣṭottaraśataṃ japtvā dugdhapāko'nyadeva vā |
ghṛtaśarkarasampūrṇaṃ juhuyājjapavidyayā || 34 ||
[Analyze grammar]

niveditaṃ dugdhapākaṃ miṣṭānnamanyadeva vā |
svalpaṃ svalpaṃ tu bhaktebhyo dadyātprasādabhāvataḥ || 346 ||
[Analyze grammar]

svayaṃ bhuñjīta putrārthaṃ stuvīta stutibhiḥ prabhum |
tajjalaṃ śirasi dhṛtvā tato devaṃ visarjayet || 36 ||
[Analyze grammar]

dvayavarān brāhmaṇāṃstatra bhojayetpāyasena ca |
bhuñjīta tairanujñāto vratī vratakarī ca vai || 37 ||
[Analyze grammar]

niśāraṃbhe prasaṃsādhya svapyādatha bhuvi vratī |
svapyād rātrau brahmacārī śvobhūte prathame dine || 28 ||
[Analyze grammar]

brāhme muhūrte vidhivat snātvā coktavidhānataḥ |
snapayitvā ca vidhivannityaṃ prātaḥ prapūjayet || 29 ||
[Analyze grammar]

devaṃ nārāyaṇaṃ kṛṣṇaṃ yāvadvratasamāpanam |
ekabhaktaṃ prabhuñjīta dugdhapākaṃ na cetarat || 40 ||
[Analyze grammar]

divasaṃ kṣapayed bhaktyā rātriṃ japena nidrayā |
nityaṃ saṃjuhuyādagnau brāhmaṇāṃścāpi bhojayet || 41 ||
[Analyze grammar]

evaṃ pratidinaṃ kuryād dvādaśāhaṃ payovratī |
payobhakṣavratamidaṃ careddharyarcanānvitaḥ || 42 ||
[Analyze grammar]

harerārādhanaṃ homaṃ pūjanaṃ sādhubhojanam |
pratipaddinamārabhya yāvacchuklatrayodaśī || 43 ||
[Analyze grammar]

kṛṣṇaparāyaṇaḥ kuryāt patiḥ patnī hyubhāvapi |
trayodaśyāṃ prabhāte vai śrīhareḥ snapanādikam || 44 ||
[Analyze grammar]

kārayed vidhinā sarvaṃ brāhmaṇairvidhikovidaiḥ |
mahāpūjāṃ prakurvīta vittaśāṭhyaṃ na cācaret || 45 ||
[Analyze grammar]

śrapayitvā caruṃ dugdhapākasyā'gnau havārthini |
tena śṛtena ca vahnimukhaṃ kṛṣṇaṃ yajeta saḥ || 46 ||
[Analyze grammar]

nārāyaṇāya naivedyaṃ dadyāt subahutuṣṭidam |
ācāryaṃ śrotriyaṃ jñānasampannaṃ toṣayed bahu || 47 ||
[Analyze grammar]

dhenvābharaṇavastrādyaiḥ ṛtvijaścāpi toṣayet |
bhojayettāṃśca bahubhirmiṣṭānnaiḥ dakṣiṇādibhiḥ || 48 ||
[Analyze grammar]

anyān viprāṃstathā sādhūn sādhvīṃśca bhojayenmudā |
viprācāryagurusādhusādhvībhyaśca yathārhataḥ || 49 ||
[Analyze grammar]

dadyācca dakṣiṇāṃ śreṣṭhāṃ tathānyān samupāgatān |
abhyāgatānatithīṃścā''śvapākān prīṇayedapi || 50 ||
[Analyze grammar]

annajalādidānena dīnāndhakṛpaṇādikān |
teṣāṃ tṛpto bhavedviṣṇostṛptiśceti vicārayan || 51 ||
[Analyze grammar]

gośvapipīlikādīṃśca dattvā bhuñjīta bandhubhiḥ |
nāmaprakīrtanaiḥ kṛṣṇakathābhiḥ stavanairjapaiḥ || 52 ||
[Analyze grammar]

dinaṃ śeṣaṃ kṣapayed yatpuruṣārādhanaṃ param |
payovratamidaṃ proktaṃ mayā te samudāhṛtam || 53 ||
[Analyze grammar]

dugdhapāke taṇḍulā vā nivārā vā matāḥ śubhāḥ |
śākāhāro na kartavyaḥ śyāmalaḥ śākajo bhavet || 54 ||
[Analyze grammar]

dugdhapākaśca bhoktavyastenā'patyaṃ balojjvalam |
vratapūrṇāhutau paścād yugmāsu rātriṣu svayam || 55 ||
[Analyze grammar]

patnī tu saṃviśet tena jāyeta śaktimānsutaḥ |
ayugmāsu viśet patnīṃ kanyā jāyeta siddhidā || 56 ||
[Analyze grammar]

tapaḥsāramidaṃ lakṣmi vrataṃ putrapradaṃ śubham |
patyā patnyā hyubhābhyāṃ ca kartavyaṃ tatphalapradam || 57 ||
[Analyze grammar]

nānyathā phaladaṃ vai syāt sandigdhaphalavattu tat |
avaidhavyavrataṃ cāpi kathayāmi śṛṇu priye || 58 ||
[Analyze grammar]

raivatasya gireḥ putrī raivatī raivatācale |
dāmodarāt paścimāyāṃ diśi tiṣṭhati nityadā || 59 ||
[Analyze grammar]

tatra vai raivatīkuṇḍo vartate pāpanāśakaḥ |
avaidhavyaṃ ca nārīṇāṃ tathā santānakāraṇam || 60 ||
[Analyze grammar]

saubhāgyaṃ sarvanārīṇāṃ sampādayati tajjalam |
tatra snātvā bhavennārī bahuputradhanānvitā || 61 ||
[Analyze grammar]

na vaidhavyaṃ bhavet tasyāḥ saubhāgyamatule bhavet |
snātvā phalāni deyāni kuṃkumaṃ ca sakajjalam || 62 ||
[Analyze grammar]

gaurīsūtraṃ pradātavyaṃ tāmbūlaṃ puṣpamityapi |
pītaṃ vastraṃ pradātavyaṃ kaṃcukaṃ yaṣṭikā tathā || 63 ||
[Analyze grammar]

phalāni vaṃśapātreṣu bhṛtvā miṣṭānnamityapi |
strīṇāṃ tu sādhvīnāṃ satīnāṃ ca sadakṣiṇam || 64 ||
[Analyze grammar]

prātaḥ snātvā pradātavyaṃ raivatīdarśanaṃ tataḥ |
pūjanaṃ ca ṣoḍaśopacāraiḥ kartavyameva ca || 65 ||
[Analyze grammar]

stutiṃ putrārthamevā'vaidhavyārthamapi ca kriyāt |
sadā kṛpāvati devi raivati me kṛpāṃ kuru || 66 ||
[Analyze grammar]

avaidhavyaṃ sadā me'stu putrapautravatī tathā |
dhanadhānyavatī ca syāṃ dehi me vāṃchitaṃ śubhe || 67 ||
[Analyze grammar]

iti stutvā namaskṛtya dāmodarasya darśanam |
kṛtvā kārtika śukle vai pañcadaśadināvadhim || 68 ||
[Analyze grammar]

gantavyaṃ svagṛhe nityaṃ bhojyaṃ dugdhānnamityapi |
miṣṭānnaṃ vyañjanaṃ cāpi ghṛtapakvādikaṃ tathā || 69 ||
[Analyze grammar]

sahavāsaśca patinā kāryo na tu niṣidhyate |
nopavāsastathā kāryo nānyā pūjā'pyapekṣate || 70 ||
[Analyze grammar]

vratī kuṇḍasnapanaṃ raivatīstutidarśane |
uktaphalādidānaṃ ca dāmodarasya darśanam || 71 ||
[Analyze grammar]

pañcadaśadinaprātaḥkṛtaṃ saubhāgyavardhakam |
iti tubhyamavaidhavyakaraṃvrataṃ tu darśitam || 72 ||
[Analyze grammar]

athā'nyat tvaṃ mahālakṣmi kiṃ mattaḥ śrotumicchasi |
lakṣmīḥ prāha kṛpāsindho tīrthāni raivate girau || 73 ||
[Analyze grammar]

tatpārśve ca yadanyāni vasanti tāni me vada |
kiyatsāmarthyavantyeva śrotumicchāmi keśava || 74 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne putraprāptidaṃ payovratam avaidhavyavrataṃ ceti nirūpaṇanāmā'ṣṭacatvāriṃśadadhikaśatatamo'dhyāyaḥ || 148 ||
[Analyze grammar]