Chapter 107

śrīlakṣmīruvāca |
gaṇeśasya śrutā nātha  kathā citraparākramā |
bhādre kṛṣṇe caturthyāṃ tu candrodayā''dyayāmake || 1 ||
[Analyze grammar]

gaṇeśastu samutpannastadā tasya vrataṃ matam |
sāṃgadevo niraṃgo vā pūjyaḥ kiṃ tattu me vada || 2 ||
[Analyze grammar]

śrīnārāyaṇa uvāca |
patnīputravāhanaiśca sahito'rcyo gaṇeśvaraḥ |
mātṛpitṛsamaścāpi sadā pūjyo gaṇeśvaraḥ || 3 ||
[Analyze grammar]

skando gaṇapatiścaitau mātāpitroḥ sukhau sutau |
tayorvivāhakāryārthaṃ śivāśaṃbhū samūcatuḥ || 4 ||
[Analyze grammar]

vivāhaśca kathaṃ kāryaḥ putrayorubhayoḥ śubhaḥ |
ṣaṇmukhaḥ senayā''ptaśca gaṇeśo me priyojjhitaḥ || 5 ||
[Analyze grammar]

gaṇeśasya vivāhārthaṃ yatnaḥ kāryaḥ śubho mataḥ |
kārtikeyasya vāñcchā'sti vivāhāya punastathā || 6 ||
[Analyze grammar]

hārdaṃ kanyāpradānāya viśvarūpaprajāpateḥ |
dvābhyāṃ kanyādvayaṃ deyaṃ vartate'tastathā bhavet || 7 ||
[Analyze grammar]

kintu deyaṃ gaṇeśāya kanyāratnadvayaṃ varam |
kadācittau samāhūya kathayāmāsatustadā || 8 ||
[Analyze grammar]

śṛṇutaṃ susutau prītyā kathayāvo yathārthakam |
ekaḥ sadāro jyeṣṭho'si gaṇeśo dāravarjitaḥ || 9 ||
[Analyze grammar]

yuvayorvai vivāhasya sukhado niyamaḥ kṛtaḥ |
samau dvāvapi satputrau viśeṣo nā'tra labhyate || 10 ||
[Analyze grammar]

tasmātpaṇaḥ kṛtaḥ śaṃdaḥ putrayorubhayorapi |
yaścaiva pṛthivīṃ sarvāṃ krāntvā pūrvamupāvrajet || 11 ||
[Analyze grammar]

tasyaiva prathamaṃ kāryo vivāhaḥ śubhalakṣaṇaḥ |
śrutvaitadvacanaṃ pitroḥ kārtikeyo mahābalaḥ || 12 ||
[Analyze grammar]

jagāma mandirāttūrṇaṃ śikhivāhanasaṃsthitaḥ |
pṛthivyāstu bahuvegāt parikramaṇahetave || 13 ||
[Analyze grammar]

gaṇanāthastu tatraiva saṃsthitaḥ suvicārya vai |
vāhanaṃ mama tu pṛthvyāṃ gatimannaiva dhāvati || 14 ||
[Analyze grammar]

vyomamārgeṇa gantā kva kvāhaṃ pṛthivīmārgagaḥ |
kiṃ kartavyaṃ kva gantavyaṃ svayaṃ sthūlaśarīrakaḥ || 15 ||
[Analyze grammar]

krośamātraṃ gate cāgre śramādgantuṃ na śakyate |
kiṃ punaḥ pṛthivīṃ krāntvā vijayāśā viḍambyate || 16 ||
[Analyze grammar]

ityevaṃ suvicāryaiva gṛhaṃ snātvā praviśya ca |
praṇamya pitarau devo gaṇeśaḥ samuvāca tau || 17 ||
[Analyze grammar]

mātā pṛthvī pitā svargaṃ gaustu brahmāṇḍamucyate |
mātā me pārvatī devī pitā me śaṃkaraḥ prabhuḥ || 18 ||
[Analyze grammar]

gaustayorvāhanaṃ cāsti vṛṣabho'yaṃ sudharmarāṭ |
gaustu pṛthvīsvarūpā me mātā'pīlāsvarūpiṇī || 19 ||
[Analyze grammar]

pitā me śaṃkarastasya śarīraṃ vasudhā matā |
pūjā trayāṇāṃ kartavyā mayā yātrāsusiddhaye || 20 ||
[Analyze grammar]

āsane sthāpite cātra pūjārthaṃ bhavatostathā |
atiṣṭhataṃ gurū cātra pūrayataṃ manogatam || 21 ||
[Analyze grammar]

itiśrutvā vacastasya tatpūjāgrahaṇāya tau |
asthātāmāsane tau ca pupūja gaṇanāyakaḥ || 22 ||
[Analyze grammar]

pradakṣiṇaṃ tayoḥ saptavāraṃ putreṇa satkṛtam |
praṇāmāścāpi vihitāḥ sapta evārpitaṃ tataḥ || 23 ||
[Analyze grammar]

gaṇeśaḥ prāha mātarme śīghraṃ vivāhanaṃ kuru |
mātā prāha drutaṃ putra pṛthvīpradakṣiṇāṃ kuru || 24 ||
[Analyze grammar]

kumārātpūrvamāyāhi vivāhaḥ prathamo bhavet |
gaṇeśaḥ prāha re mātaḥ śrūyatāṃ vacanaṃ mama || 25 ||
[Analyze grammar]

mayā tu pṛthivī krāntā saptavāraṃ punaḥ punaḥ |
mātā prāha kadā putra tvayā krāntā vasundharā || 26 ||
[Analyze grammar]

gaṇeśaḥ prāha bhavatoḥ kṛtaṃ pradakṣiṇaṃ mayā |
tena vai sā samudrāntā mayā pradakṣiṇīkṛtā || 27 ||
[Analyze grammar]

mātā dharā pitā dyauśca dvayordharmasvarūpatā |
vṛṣabho vāhanaṃ dharmastasya vāmādharka tu gauḥ || 28 ||
[Analyze grammar]

ityuktvā vṛṣabhaṃ tātaṃ mātaraṃ ca pradakṣiṇām |
cakre tena tadā jātaṃ pṛthvīpradakṣiṇaṃ tataḥ || 29 ||
[Analyze grammar]

pitarāvūcatuḥ hṛṣṭau bāḍhaṃ putra tvayā kṛtam |
prāptaṃ tena samagrāyāḥ pṛthvyāḥ pradakṣiṇāphalam || 30 ||
[Analyze grammar]

śraddhayā'vāpyate dharmaḥ śraddhayā'vāpyate hariḥ |
śraddhayā'vāpyate siddhiḥ śraddhayā'vāpyate phalam || 31 ||
[Analyze grammar]

mātā pitā gṛhe tīrthaṃ gaṃgā tu gṛhiṇī sadā |
yadi śraddhā na tatrā'sti vyarthaṃ sarvaṃ kṛtaṃ bhavet || 32 ||
[Analyze grammar]

pitrostu pūjanaṃ kṛtvā prakrāntiṃ ca karoti yaḥ |
tasya vai pṛthivīkrāntijanyaṃ sampadyate phalam || 33 ||
[Analyze grammar]

apahāya gṛhe yo vai pitarau tīrthamāvrajet |
na tīrthaphalabhāgī syādasevādoṣabhāg bhavet || 34 ||
[Analyze grammar]

putrasyātra mahattīrthaṃ pitroścaraṇapaṃkajam |
idaṃ sannihitaṃ tīrthaṃ sulabhaṃ dharmasādhanam || 35 ||
[Analyze grammar]

patnyāstīrthaṃ patiḥ proktaḥ putrasya pitarau tathā |
patyuḥ pativratā patnī tīrthāni tārakāṇi vai || 36 ||
[Analyze grammar]

yadi satyaṃ śāstradṛṣṭaṃ sadā pṛthvīpradakṣiṇam |
jātaṃ prāha gaṇeśo me na cecchāstramasatyakam || 37 ||
[Analyze grammar]

pitṛbhaktirasatyā syāt sarvā sā niṣphalā bhavet |
mātṛbhaktirgavāṃ bhaktiḥ sarvathā niṣphalā bhavet || 38 ||
[Analyze grammar]

tasmāt pradakṣiṇaṃ pṛthvyāḥ sarvathā'tra mayā kṛtam |
śīghraṃ ca bhavitavyo me vivāhaḥ kriyatāṃ śubhaḥ || 39 ||
[Analyze grammar]

iti śrutvā vacastasya prasannau pitarau ca tam |
prāhatuḥ putra śāstrajña buddhiste śāstragāminī || 40 ||
[Analyze grammar]

kairapi śāstramaryādā'nyathākartuṃ na śakyate |
upasthite tvagamye vai kārye śraddhā tu śāstrajā || 41 ||
[Analyze grammar]

yujyate ca tathā duḥkhe yasya buddhirviśiṣyate |
tasya duḥkhaṃ vinaśyettu buddhiprajñāprabhāvataḥ || 42 ||
[Analyze grammar]

buddhiryasya balaṃ tasya nirbuddhestu kuto balam |
kūpe siṃho madonmatto gomāyunā nipātitaḥ || 43 ||
[Analyze grammar]

samyak kṛtaṃ tvayā putra pṛthvīpradakṣiṇaṃ kṛtam |
gomātṛpitṛkramaṇāt kṛtaṃ dharmasya pālanam || 44 ||
[Analyze grammar]

kārtikastu na cāyāti parādhāvati vegataḥ |
mārge tvagre mūṣakasthaṃ yāntaṃ paśyati cānujam || 45 ||
[Analyze grammar]

yato gaṇeśaḥ pitrostu yadā'karotpradakṣiṇām |
tasya puṇyasya lābhena gaṇeśasyā'nyarūpakam || 46 ||
[Analyze grammar]

bhūtvā dhāvati cāgre vai kārtikeyasya vegataḥ |
kārtikeyastu taddṛṣṭvā śuśoca paramaṃ tadā || 47 ||
[Analyze grammar]

aho'yamunduruḥ svalpastatra sthūlo gaṇeśakaḥ |
kīdṛśena ca vegena tvagre prāgre pradhāvati || 48 ||
[Analyze grammar]

mayā mayūrabarhāṇi kaśayā vāyunā tathā |
pātitāni hi sarvāṇi vegārthaṃ tāḍito muhuḥ || 49 ||
[Analyze grammar]

mayūro'pi tathā yāvadbalenoḍḍīyate'dhunā |
tathāpi na gaṇeśaṃ vai saṃprāpnomi krameta kaḥ || 50 ||
[Analyze grammar]

ullaṃghanaṃ prāggamanaṃ svapne'pi naiva dṛśyate |
tasmānnā'yaṃ vivāho'nyo mayā kāryaḥ śape tviti || 51 ||
[Analyze grammar]

iti kṛtvā parāvṛtyā'gacchad yatra gṛhaṃ svakam |
śānto bhūtvā praviśya senayā śramamapānudat || 52 ||
[Analyze grammar]

gaṇeśasya vivāhārthaṃ pitarāvudyatau tadā |
kārtikeyasya mārgaṃ ca pratīkṣantau pratiṣṭhataḥ || 53 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne gaṇeśakārtikeyavivāhe gaṇeśena pṛthivīpradakṣiṇāphalārthaṃ mātāpitṛgopradakṣiṇā kṛtetyādinirūpaṇanāmā saptādhikaśata |
tamo'dhyāyaḥ || 107 ||
[Analyze grammar]