Chapter 108

śrīnārāyaṇa uvāca |
śṛṇu lakṣmi  jaganmātā pārvatī bahuharṣitā |
snuṣādvayaṃ bhaviṣyanme cakre tat bahumaṃgalam || 1 ||
[Analyze grammar]

etasminnantare tatra viśvarūpaḥ prajāpatiḥ |
dve putryau svasya dānārhe nītvaiva vidhinoditaḥ || 2 ||
[Analyze grammar]

ekā varāya dātavyo gaṇeśāya guṇābdhaye |
anyā skandāya dātavyā yadvā kanyāmataṃ matam || 3 ||
[Analyze grammar]

dṛṣṭvā skandaṃ vadhūyuktaṃ vavrāte na dvayaṃ tu tam |
gaṇeśaṃ kanyake dṛṣṭvā vavrāte rūpasadguṇam || 4 ||
[Analyze grammar]

siddhirbuddhirubhe patnyau gaṇeśasya babhūvatuḥ |
mahotsavo vivāhasya tadā jāto'tiharṣakṛt || 5 ||
[Analyze grammar]

devagāndharvavidyādhrakinnarāguhyakādayaḥ |
santuṣṭāśca trilokasthāstadvivāhe samāgaman || 6 ||
[Analyze grammar]

sahadharmaṃ caretāmityādipurohitasya vāk |
saphalā tatra saṃjātā gaṇeśasya vivāhane || 7 ||
[Analyze grammar]

gaṇeśastu sadā saukhyaṃ tābhyāṃ vai prāptavān param |
loke sāpatnaśatrutvaṃ duḥkhadaṃ khalu jāyate || 8 ||
[Analyze grammar]

yasya bhāgyaṃ bhaved bhagnaṃ loke'sya strīdvayaṃ bhavet |
dvibhāryastu naraścārdhaṃ mṛto'styeva viniścayaḥ || 9 ||
[Analyze grammar]

na vai taṃ śatravo ghnanti dvibhāryastu mṛto yataḥ |
ekā svapiti yāvadvai dvitīyā dveṣṭi vai krudhā || 10 ||
[Analyze grammar]

anyā sevāṃ karotyatra prathamā cerṣyati krudhā |
kṣaṇe kṣaṇe dvibhāryasya krodhāgāraṃ gṛhaṃ matam || 11 ||
[Analyze grammar]

ekayā putrasampattyā dvitīyāṃ tu ghṛṇāyate |
dvitīyā dhanasampattyā prathamā vai tṛṇāyate || 12 ||
[Analyze grammar]

ekayā rūpasampattyā dvitīyā notsavāyate |
dvitīyā snehasampattyā prathamāṃ kutsitāyate || 13 ||
[Analyze grammar]

śayane bhojane yāne vilāse vastradhāraṇe |
hāve bhāve tathā māne cotsave narakaṃ dvayam || 14 ||
[Analyze grammar]

tatrāpi kākajātīye śvajātīye yayā striyau |
tadā sākṣāttu vai kuṃbhīpākākhyaṃ narakaṃ hi te || 15 ||
[Analyze grammar]

yadi bhārye kuṭumbinyau suniṣekabhave tadā |
kleśo naiva bhavet tatra svargavācyaṃ gṛhaṃ matam || 16 ||
[Analyze grammar]

parasparaṃ sahāyinyau sukhaduḥkhasamakriye |
parasparapradāyinyau naikāṃ vihāya tiṣṭhataḥ || 17 ||
[Analyze grammar]

nā'nyonyā'ntarabhedinyau dyekakriyaikamānase |
parasparopakāriṇyau samaśīlavratā'rthike || 18 ||
[Analyze grammar]

apatyeṣvekabhāvinyau tathopakaraṇaikate |
svargasukhaṃ patistatra bhuṃkte tābhyāṃ pramoditaḥ || 19 ||
[Analyze grammar]

siddhirbuddhiśca tādṛśyau patnyau śaṃde babhūvatuḥ |
kiyatā caiva kālena gaṇeśasya mahātmanaḥ || 20 ||
[Analyze grammar]

siddhergaṇeśapatnyāstu kṣemanāmā'bhavatsutaḥ |
buddherlābhābhidhaḥ putraḥ samajāyata śobhanaḥ || 21 ||
[Analyze grammar]

atha śrīnāradaścāyāt skandasya gṛhamadbhutam |
prāha vacmi matsarānna nā'satyaṃ na chalena ca || 22 ||
[Analyze grammar]

pitṛbhyāṃ te kṛtaṃ yādṛk tādṛk nānyaḥ kariṣyati |
niṣkāsya tvāṃ prādakṣiṇye miṣamutpādya tadvidham || 23 ||
[Analyze grammar]

gaṇeśasya varo'kāri vivāhaḥ strīdvayena yat |
palayordvayorgaṇeśo'sau lebhe putradvayaṃ śubham || 24 ||
[Analyze grammar]

mātāpitrormatenaiva sukhaṃ bhuṃkte nirantaram |
bhavatā pṛthivī krāntā tayorvai chalakarmaṇā || 25 ||
[Analyze grammar]

yadi mātā ca vā tātaśchaladharmeṇa putrakam |
vañcayatyanyalokasya kā vārtā chaladharmaṇi || 26 ||
[Analyze grammar]

asamyagvai kṛtaṃ tābhyāṃ tvatpitṛbhyāṃ hi karma tat |
vicāryatāṃ tvayā'pīha maccitte na śubhaṃ matam || 27 ||
[Analyze grammar]

dadyād yadi garaṃ mātā vikrīṇīyād pitā yadi |
rājā harati sarvasvaṃ ko'nyo rakṣākaro bhavet || 28 ||
[Analyze grammar]

yenaivedaṃ kṛtaṃ karma svaputre pakṣapātajam |
kaḥ śāntimān sudhīḥ putrastādṛktātagṛhe vaset || 29 ||
[Analyze grammar]

iti nītirmayā proktā yathecchasi tathā kuru |
ityuktvā nāradastasmād yayau satyapuraṃ tataḥ || 30 ||
[Analyze grammar]

skandaḥ śokaṃ samudvegaṃ samāpanno gṛhāttataḥ |
vinirgatya ca pitarau praṇamya krodhapūritaḥ || 31 ||
[Analyze grammar]

jagāma parvataṃ kraucaṃ pitṛbhyāṃ vārito'pi san |
yadyevaṃ kapaṭaṃ prītinapahāya kṛtaṃ mayi || 32 ||
[Analyze grammar]

gaṇeśasya sulagnasya kāryaṃ sāralyataḥ kṛtam |
ahantu ghorapanthārthaṃ gṛhānniṣkāsitastataḥ || 33 ||
[Analyze grammar]

mayā nā'tra gṛhe yāvajjīvaṃ sthātavyameva hi |
mayūraṃ svaṃ samāruhya senāṃ tyaktvā piturgṛhe || 34 ||
[Analyze grammar]

yayau krauṃce mahāśaile nārāyaṇaparāyaṇaḥ |
paramo vaiṣṇavo bhūtvā bhajatyaniśamacyutam || 35 ||
[Analyze grammar]

svāmitvaṃ sa samāpannaḥ sādhutāmagrahīttataḥ |
brahmavrate sadā tiṣṭhan vartate sādhuśīlavāt || 36 ||
[Analyze grammar]

kārtikasvāmināmā'sau pūjyate krauṃcaparvate |
kārtikyāṃ tu sadā devā ṛṣayaśca satīrthakāḥ || 37 ||
[Analyze grammar]

darśanārthaṃ kumārasya gacchanti ca munīśvarāḥ |
athomā duḥkhamāpannā skandasya virahe sati || 38 ||
[Analyze grammar]

uvāca śaṃkaraṃ dīnā tatra gaccha mayā saha |
tatsukhārthaṃ svayaṃ śaṃbhurgataḥ svāṃśena parvate || 39 ||
[Analyze grammar]

mallikārjunanāmā sa śaṃbhuḥ satyā sahā'vasat |
kārtikastadravrataṃ jñātvā virajyā'nyatra gacchati || 40 ||
[Analyze grammar]

tāvad devādibhistatra prārthito hyavasat khalu |
yojanatrayamutsṛjya sthitaḥ skandaḥ suśīladhṛk || 41 ||
[Analyze grammar]

putrasnehāturau tau vai śivau parvaṇi parvaṇi |
darśanārthaṃ kumārasya snehilau cāpi gacchataḥ || 42 ||
[Analyze grammar]

amāvāsyādine tatra svayaṃ śaṃbhuḥ prayāti hi |
pūrṇimāyāṃ svayaṃ yāti pārvatī senayā yutā || 43 ||
[Analyze grammar]

ityevaṃ śrīgaṇeśasya siddhirbuddhiśca vai priye |
kṣemo lābhaśca putrau dvau saha taiḥ pūjanaṃ kriyāt || 44 ||
[Analyze grammar]

etadākhyānamanaghaṃ yaśasyaṃ sukhavardhanam |
āyuṣyaṃ svargyamatulaṃ śivabhaktivivardhanam || 45 ||
[Analyze grammar]

kathitaṃ te mahālakṣmi mātṛsevāvivardhanam |
apavargapradaṃ proktaṃ kimanyacchrotumicchasi || 46 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne viśvarūpaprajāpatinā siddhibuddhināmakakanyādvayaṃ śrīgaṇeśāya vivāhavidhinā'rpitaṃ tataḥ kṣemo lābhaśceti putrotpattiḥ kārtikeyasya krauṃcādriṃ prati sadā gamanamityādikathananāmā'ṣṭādhikaśatatamo'dhyāyaḥ || 108 ||
[Analyze grammar]