Chapter 99

śrīnārāyaṇa uvāca |
śṛṇu lakṣmi  tadā loke bhayā'bhaye babhūvatuḥ |
devānāmudyamaṃ jñātvā prabalastārakāsuraḥ || 1 ||
[Analyze grammar]

asurasainyakṛtkoṭyā yayau yoddhuṃ surānprati |
asurā rākṣasā daityā dānavāstatra saṃgatāḥ || 2 ||
[Analyze grammar]

ākrośanto mahādarpā niryayuryuddhavāṃchayā |
tāḍakasya mahatsainyaṃ tvāgataṃ devasannidhau || 3 ||
[Analyze grammar]

tadā devānnabhovāṇī prāha prasannatā'nvitā |
skandaṃ vijayinaṃ cāgre kṛtvā yāntu jayo bhavet || 4 ||
[Analyze grammar]

vijayārthaṃ tu pārvatyā putraḥ sa prakaṭīkṛtaḥ |
yeṣāṃ skandogrago yuddhe teṣāṃ vai vijayo dhruvaḥ || 5 ||
[Analyze grammar]

śrutvā devā jahṛṣurvai yoddhukāmāśca nirbhayāḥ |
brahmaṇā tatra tāvadvai noditaikā kumārikā || 6 ||
[Analyze grammar]

mṛtyoḥ putrī samāyātā mṛtyusenā'bhidhā tadā |
varaṇārthaṃ kumārasya tapaḥ paramamāśritā || 7 ||
[Analyze grammar]

śatrūṇāṃ mārayitrī sā sundarī varamālayā |
kumāra kārtikaṃ tatra varayāmāsa mārtyavī || 8 ||
[Analyze grammar]

tayā yuktastadā skandaḥ senāpatiriyāya vai |
raṇāṃgaṇe tadā ghorā raktottejakagomukhāḥ || 9 ||
[Analyze grammar]

mahādundubhayo nedurḍiṇḍimānyadbhutāni ca |
raṇakarkaśatūryāṇi mṛdaṃgapaṭahā'nakāḥ || 10 ||
[Analyze grammar]

kharaśrṛṃgāṇi śaṃkhāśca bheryo'vādyanta utkaṭāḥ |
aikapadyena cottasthuryoddhukāmāḥ surā'surāḥ || 11 ||
[Analyze grammar]

kumāraṃ gajamāropya devendro hyagrago'bhavat |
surasainyena mahatā lokapālaiḥ samāvṛtaḥ || 12 ||
[Analyze grammar]

yamo'pi svagaṇaiḥ sārdhaṃ marudbhiśca samīraṇaḥ |
yādobhirvaruṇastatra kubero guhyakairvṛtaḥ || 13 ||
[Analyze grammar]

śaṃkaraḥ pramathaiḥ sārdhaṃ nairṛto vyādhibhiḥ saha |
antarvedyāṃ sthitāḥ sarve gāṅgayāmunamadhyagāḥ || 14 ||
[Analyze grammar]

pātālāśca samāyātāstārakasyopajīvinaḥ |
daityāśca dānavāścaiva rākṣasā asurāśca ye || 15 ||
[Analyze grammar]

gajā uṣṭrā eḍakāśca hayā aśvatarāḥ khagāḥ |
syandanāni vicitrāṇi vimānāni ca bhūriśaḥ || 16 ||
[Analyze grammar]

padātayo bahavaścā'śobhanta sāyudhāstadā |
khaḍgatomaranārācaiḥ pāśamudgarapaṭṭiśaiḥ || 17 ||
[Analyze grammar]

bāṇaparighacakraiśca śaktiśūlaparaśvadhaiḥ |
taiḥ suyukte tadā sainye daityānāṃ ca divaukasām || 18 ||
[Analyze grammar]

śuśubhāte mahākālavakradṛṣṭyā nirīkṣite |
yuddhāraṃbhadhvajau dṛṣṭvā mumucuḥ sāyakāṃstadā || 19 ||
[Analyze grammar]

bāṇānvavarṣurātīkṣṇān kṣuradhārānsamantataḥ |
śikhānardhacandrāṃśca tridhārānpaṃcadhārakān || 20 ||
[Analyze grammar]

bāṇairācchāditaṃ vyomā'vidhyanta viśikhairbhaṭāḥ |
praphullakiṃśukā yadvad rājante kartitā bhaṭāḥ || 21 ||
[Analyze grammar]

sainye parasparaṃ bāṇaiśchanne garjanti tadbhaṭāḥ |
bhūmau ca patitāḥ kecitkecinmuṇḍā luṭhanti vai || 22 ||
[Analyze grammar]

keṣāṃcidbāhavachinnāḥ kaṃdharāśca vidāritāḥ |
hṛdayāni vinirbhinnānyanyeṣāṃ cūrṇitā kaṭiḥ || 23 ||
[Analyze grammar]

pāśairbhallairaṃkuśaiśca kuntaiśca ṛṣibhistathā |
bhaṭāśca bahavastatra bhūśayyā hyabhavankṣaṇāt || 24 ||
[Analyze grammar]

sadaṃśauṣṭhaśirāṃsyācchādayadvai raṇamaṇḍalam |
nṛtyamānakabandhāni dhāvantvanyajighṛkṣayā || 25 ||
[Analyze grammar]

bhaumaścaivā''ntarikṣaśca saṃgrāmo dāruṇo'bhavat |
nāste paricayastatra śastrapātanakarmaṇi || 26 ||
[Analyze grammar]

jalpantaṃ śatrumādāya cūrṇayanti gadādibhiḥ |
nadyaḥ pravartitā raktapravāhinyaḥ śavastarāḥ || 27 ||
[Analyze grammar]

rakte raṇāṃgaṇe raktaśchinnā bhinnā bhaṭāstadā |
dvandvayuddhaṃ ca kurvanto jayāya bahavo hatāḥ || 28 ||
[Analyze grammar]

kujaṃbho vāyunā sārdhaṃ jaṃbhaḥ sārdhaṃ yamena vai |
varuṇena balaścātha kubereṇa saha tripāt || 29 ||
[Analyze grammar]

agninā saha saṃhrādo naiṛtena mahāhanuḥ |
īśena saha meghābha indreṇa saha tārakaḥ || 30 ||
[Analyze grammar]

yakṣāḥ piśācī uragāḥ pataṃgāḥ pitarastathā |
vyādhayaḥ sannipātāśca jvara bhūtāśca guhyakāḥ || 31 ||
[Analyze grammar]

yuyudhuḥ pramathā astraśastraiśca bahubhistadā |
evaṃ yuddhe sutumule devadānavasaṃkule || 32 ||
[Analyze grammar]

tārakeṇaiva devendraḥ śaktyā paramayā hataḥ |
sadyaḥ papāta nāgādvai pṛthivyāṃ mūrchito'bhavat || 33 ||
[Analyze grammar]

svastho drāgeva saṃbhūtvā vajramādāya vegataḥ |
vivyādha tārakaṃ vakṣasthale daityo'patad bhuvi || 34 ||
[Analyze grammar]

mūrchitaśchinnahṛdayo bhinnapṛṣṭhā'sthidaṇḍakaḥ |
śukreṇa sandhinīvallībalena sandhitaḥ punaḥ || 35 ||
[Analyze grammar]

utthitaśca jaghānendraṃ brahmāstraṃ prāṇanāśakam |
viṣṇurnārāyaṇastadvai jagrāsa jihvayā drutam || 36 ||
[Analyze grammar]

indrastato mahāroṣānmahākālā'stramādadhe |
viṣṇuḥ prāha tadā tvindraṃ mā mā māraya taṃ hare || 37 ||
[Analyze grammar]

tasya hantā kumāro'yaṃ samudbhūtaḥ śivātmajaḥ |
tasmādbhavadbhiḥ sthātavyaṃ bālena yudhyatā saha || 38 ||
[Analyze grammar]

senānītāḍakau cograu yuddhayamānau mahābalau |
śuśubhāte'tisaṃrabdhau prahārairjarjarīkṛtau || 39 ||
[Analyze grammar]

mahāṃstatra gaṇo vīro vīrabhadro ruṣānvitaḥ |
gaṇaiḥ subahubhiryuktastārakaṃ hantumudyataḥ || 40 ||
[Analyze grammar]

triśūlairṛṣṭibhiḥ prāsaiḥ khaḍgaiḥ parighapaṭṭiśaiḥ |
jaghnatuḥ samare'nyonyaṃ surā'suravimardane || 41 ||
[Analyze grammar]

tārako vīrabhadreṇa triśūlena hato bhṛśam |
papāta sahasā tatra kṣaṇaṃ mūrchāmavāpa ca || 42 ||
[Analyze grammar]

utthāya ca muhūrtādvai śaktyā tu tārako balī |
śivasyā'nucaraṃ śūlaṃ vīrabhadraṃ jaghāna ha || 43 ||
[Analyze grammar]

triśūlena tu ghoreṇa vīrabhadro'pi tārakam |
jaghāna hṛdaye vegāttārakaḥ pothito bhuvi || 44 ||
[Analyze grammar]

hariḥ prāha tadā vīrabhadraṃ tu tārako'suraḥ |
kārtikeyasya vadhyo'sti mā kuru tvaṃ pariśramam || 45 ||
[Analyze grammar]

na rocate'sya tadvākyaṃ tārakasya vadhaṃ prati |
vīrabhadro ruṣāviṣṭo jagarja jaladopamaḥ || 46 ||
[Analyze grammar]

atārakāṃ mahīṃ cā'dya kariṣye nā'tra saṃśayaḥ |
tāvatkapardino'neke jaṭājūṭavibhūṣitāḥ || 47 ||
[Analyze grammar]

vṛṣārūḍhā daśahastāḥ śūrāḥ krūrāstrilocanāḥ |
pañcāsyā nīlakaṇṭhāśca gaṇā vai candraśekharāḥ || 48 ||
[Analyze grammar]

yuyudhuste mahādaityaistārakāsurajīvibhiḥ |
devadānavadaityānāṃ sannipāto mahānabhūt || 49 ||
[Analyze grammar]

aśvavārāśca vājisthān gajino gajinastathā |
jaghnū rathasthān rathino vyomagā vyomagāminaḥ || 50 ||
[Analyze grammar]

vīrabhadrastārakaṃ saṃgṛhya vai pādayostadā |
bhrāmayitvā'ntarīkṣe'tha pothayāmāsa bhūtale || 51 ||
[Analyze grammar]

kṣayaṃ praṇītā bahavo'pare yātā rasātalam |
palāyamānā bahavo bhītāḥ prāṃjalayo'pare || 52 ||
[Analyze grammar]

śaraṇyāśca raṇādbhagnā mṛtāḥ kecidbhuvastale |
nipetuḥ śikharāṇīva vīrabhadrādināśitāḥ || 53 ||
[Analyze grammar]

evaṃ bhraṣṭaṃ svakaṃ sainyaṃ dṛṣṭvā vai tāḍa़kāsuraḥ |
bhujānāmayutaṃ kṛtvā hantuṃ devagaṇān yayau || 54 ||
[Analyze grammar]

viṣṇuḥ prāha tadā skandaṃ nā'nyo hantā'sti kartika |
tasmāt tvayaiva netavyastārako yamasādanam || 55 ||
[Analyze grammar]

tārakeṇa purā vīra  tapastaptaṃ bhayāvaham |
tapasā tena cogreṇa hyajeyatvamavāptavān || 56 ||
[Analyze grammar]

jitā indrādilokeśāstrailokyaṃ ca jitaṃ tathā |
tasmāt tvayā nihantavyaḥ śāntiḥ syācca tadā parā || 57 ||
[Analyze grammar]

ityāśrutya tadā skaṃdaḥ śaktimādāya pāragām |
adhāvattārakaṃ tāvattārakaḥ śaktimādade || 58 ||
[Analyze grammar]

provāca daityo garviṣṭho devānavigaṇayya tu |
indraḥ palāyito'thāpi yūyaṃ devā gatatrapāḥ || 59 ||
[Analyze grammar]

kumāraṃ yatpuraskṛtya raṇāgre'tra vyavasthitāḥ |
maruto ghātitā garbhe dharṣitā gautamapriyā || 60 ||
[Analyze grammar]

viśvarūpo hato vipro vṛtro yena niṣūditaḥ |
kārayituṃ kumārasya ghātaṃ kva pragato hariḥ || 61 ||
[Analyze grammar]

dakṣayajñe tvanekeṣāṃ viprāṇāṃ nāśako hyayam |
na bālo vai vīrabhadraḥ sannidhau mama tiṣṭhatu || 6 ||
[Analyze grammar]

vīraṃ cendraṃ kumāraṃ ca nayāmi yamasādanam |
uktvaivaṃ tu tadā śaktitrayaṃ jagrāha tārakaḥ || 63 ||
[Analyze grammar]

tāvadindro bahudhāraṃ vajraṃ cikṣepa tārake |
patito'pi samutthāya śaktyendraṃ prāharadruṣā || 64 ||
[Analyze grammar]

patitaṃ cendramālokya gatvā padā nipīḍya ca |
vajraṃ tasyā'haratpaścādyāvadindraṃ jighāṃsati || 65 ||
[Analyze grammar]

tāvat triśūlamudyamya vīrabhadreṇa tāḍitaḥ |
patitaścāsuro bhūmau drāgeva punarutthitaḥ || 66 ||
[Analyze grammar]

prajaghāna triśūlena vīravakṣasi vegataḥ |
vīrabhadrastataḥ kruddhastriśūlena jighāṃsati || 67 ||
[Analyze grammar]

kumāreṇa niṣiddho yat mama nāśyo hyayaṃ tviti |
atho jayetyabhiprokto devairākāśasaṃsthitaiḥ || 68 ||
[Analyze grammar]

jagarja ca mahātejāḥ kārtikeyo mahābalaḥ |
mūrdhni kaṇṭhe codare'pi jānvoścaiva kaṭibhramau || 69 ||
[Analyze grammar]

vakṣasi pṛṣṭha urasi tvanyonyaṃ pravijaghnatuḥ |
na vavau ca tadā vāyurniṣprabho'bhūddivākaraḥ || 70 ||
[Analyze grammar]

cacāla vasudhā sarvā saśailabahukānanā |
himālayādayaḥ sarve parvatāśca cakampire || 71 ||
[Analyze grammar]

kumāraḥ prāha pāpiṣṭha devānāṃ duḥkhadāyaka |
ghātayāmi mahāśaktyā smara sveṣṭaṃ sthiro bhava || 72 ||
[Analyze grammar]

iti kṣiptā mahāśaktistīkṣṇāgrā'ṣṭapradhārikā |
tārake vakṣasi śīrṇe pāraṃ pṛṣṭhe jagāma sā || 73 ||
[Analyze grammar]

tārakaṃ viddhamādāya pṛthvyāmardhā viveśa sā |
viśīrṇastārakaścāyaṃ punaḥ skandena māritaḥ || 74 ||
[Analyze grammar]

dadṛśustaṃ suragaṇāḥ ṛṣayo guhyakāḥ khagāḥ |
kinnarāścāraṇāścāpi siddhāścāpsarasāṃ gaṇāḥ || 75 ||
[Analyze grammar]

parameṇa praharṣeṇa tuṣṭuvustaṃ kumārakam |
vidyādharyaśca nanṛturgāyakāśca jagustathā || 76 ||
[Analyze grammar]

devā nirāmayā jātāḥ santuṣṭāśca śivādayaḥ |
girijā harṣamāpannā svāṃkamāropya cātmajam || 77 ||
[Analyze grammar]

pariṣvajya śubhāśīrbhiryuyoja jayinaṃ sutam |
pariśramaṃ kṣataṃ dehe sphāṭitaṃ vā praphullitam || 78 ||
[Analyze grammar]

pārvatī svakarasparśānnīrujaṃ tvakarotkṣaṇāt |
devāḥ kalyāṇarūpāya namaścakrustadā mudā || 79 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mṛtyuputryā senayā vṛṇītena kārtikeyena yuddhe tārakāsuro hata ityabhivarṇananāmā navanavatitamo'dhyāyaḥ || 99 ||
[Analyze grammar]