Chapter 100

śrīśvetavyāsa uvāca |
evaṃ suśikha  sannaṣṭaṃ tārakaṃ lokahārakam |
naṣṭaṃ śrutvā svayaṃ lakṣmīrnārāyaṇamuvāca ha || 1 ||
[Analyze grammar]

śrīlakṣmīruvāca |
nārāyaṇa mahāviṣṇo daityaḥ sa tārakāsuraḥ |
ka āsīcca kathaṃ kasmādvaraṃ prāpto'tra me vada || 2 ||
[Analyze grammar]

śrīnārāyaṇa uvāca |
śṛṇu caikahṛdā devi  vajrāṃgasutatārakam |
mānaso brahmaṇaḥ putro dakṣo nāma prajāpatiḥ |
tena kanyā ditirdattā kaśyapāya mahātmane || 3 ||
[Analyze grammar]

tasyā garbhe marutdevā mahendreṇa vikartitāḥ |
ekonapañcāśajjātā devāste maruto matāḥ |
kintu ditisturāṣāho vināśāya tapo'karot || 4 ||
[Analyze grammar]

daśavarṣasahasrāṇi tena vajrāṃgadaḥ sutaḥ |
samutpanno janmataḥ sa vajrasāramayāṃ'gakaḥ || 5 ||
[Analyze grammar]

jātamātro mahāyoddhā śastraśāstraprapāragaḥ |
uvāca mātaraṃ bhaktyā mātaḥ kiṃ karavāṇyaham || 6 ||
[Analyze grammar]

mātā prāha surendreṇa sutā me bahavo hatāḥ |
teṣāmapacitiṃ cikīrṣāmi śakravadhādaham || 7 ||
[Analyze grammar]

bāḍhamityevamuktvā sa jagāma tridivaṃ tadā |
pādenā''kṛṣya caivendraṃ māturantikamānayat || 8 ||
[Analyze grammar]

brahmā tāvatkaśyapaśca procaturmuñca vajriṇam |
avamānaṃ mṛtyurasya tvayā māturvacaḥ kṛtam || 9 ||
[Analyze grammar]

tathā piturvacaḥ kāryaṃ muñcā'muṃ tu sureśvaram |
natvā sa pitroścaraṇe taṃ mumoca śatakratum || 10 ||
[Analyze grammar]

vajrāṃgadastato yāto vane kartuṃ tapo mahat |
brahmaṇā ca tadānīṃ tu varāṃgī kanyakā'rpitā || 11 ||
[Analyze grammar]

tāṃ patnīṃ tu samādāya vajrāṃgo hyagamadvanam |
ūrdhvabāhuḥ sa daityendro'tiṣṭhadabdasahasrakam || 12 ||
[Analyze grammar]

tāvannadhomukhaḥ kālaṃ tāvatpaṃcāgnisādhakaḥ |
tataḥ so'ntarjale cakre tapo varṣasahasrakam || 13 ||
[Analyze grammar]

tatpatnī sarasastīre tapastepe pativratā |
indro vibhīṣaṇāścakre bhūtvā vai markaṭaḥ svayam || 14 ||
[Analyze grammar]

jalakuṃbhaṃ babhaṃjā'syā meṣarūpo bhayaṃ dadau |
sarparūpastato bhūtvā babandha caraṇāvubhau || 15 ||
[Analyze grammar]

gomāyūśca tato bhūtvā rauti sannidhimāgataḥ |
agnirūpastato bhūtvā tasyā dadāha vastrakam || 16 ||
[Analyze grammar]

vāyurbhūtvā cakarṣaināṃ siṃho bhūtvā hyabhīṣayat |
tāvadvarṣasahasraṃ tu vyatītaṃ ca pitāmahaḥ || 17 ||
[Analyze grammar]

āyayāvatha vajrāṃgo dharmavṛttiṃ tato'vṛṇot |
evamastviti datvā tadvaraṃ brahmā tirodadhe || 18 ||
[Analyze grammar]

śokārtāṃ svāṃ striyaṃ rājā vajrāṃgo'paśyadāha ca |
kiṃ te kāryaṃ dadāmīha mā śokaṃ kuru bhāmini || 19 ||
[Analyze grammar]

patnī prāha kṛpā cenme putraṃ duḥkhasya tārakam |
dehi cendraḥ sadā māṃ tu trāsaṃ dadāti cetyataḥ || 20 ||
[Analyze grammar]

vajrāṃgastu virakto'pi hyanukampyā priyeti yat |
matvā tatheti jāyāyai punastapaścakāra ha || 21 ||
[Analyze grammar]

yāvadabdasahastraṃ vai nirāhāraṃ tapo'karot |
brahmā prāha punastasmai kathaṃ vidhīyate tapaḥ || 22 ||
[Analyze grammar]

prāha daityo dehi putraṃ gīrvāṇadarpanāśakam |
brahmovāca tava patnyāṃ putro vai duḥkhatārakaḥ || 23 ||
[Analyze grammar]

devasīmantinīnāṃ yo dhammilakavimokṣakaḥ |
bhaviṣyatīti tatsthānāt daṃpatī tau prajagmatuḥ || 24 ||
[Analyze grammar]

svāśramaṃ cātha sā garbhaṃ ditirdadhāra tārakam |
pūrṇaṃ varṣasahasraṃ tu dadhārodara eva vai || 25 ||
[Analyze grammar]

tato jāte suputre tu pracacāla vasundharāḥ |
celurdharādharāḥ sarve vavurvātāḥ prabhīṣaṇāḥ || 26 ||
[Analyze grammar]

sūryādyāśca jahuḥ kāntiṃ nīhārācchāditā diśāḥ |
viṣaṇṇamanaso devā dānavāstu mahotsavāḥ || 27 ||
[Analyze grammar]

jātamātrastu daityendro hyabhiṣikto'surādibhiḥ |
mahārājye'tha sarvānsa prāha surajigīṣayā || 28 ||
[Analyze grammar]

surāstu śatravo'smākaṃ jayyāste tapaso balāt |
tapaḥ kartuṃ tu gacchāmi pāriyātragirerdarīm || 29 ||
[Analyze grammar]

tatra gataḥ śivaṃ dhyātvā śivamantraṃ jajāpa saḥ |
nirāhāraḥ pañcatapāstathāvarṣā'yutaṃ gatam || 30 ||
[Analyze grammar]

tataḥ svadehādutkṛtya karṣaṃ karṣaṃ dine dine |
māṃsasyā'gnau juhāvaiva tato nirmāṃsatāṃ gataḥ || 31 ||
[Analyze grammar]

dehaścāgnimayo jātastena bhūtāni jajvaluḥ |
brahmā tasmai varaṃ dātuṃ suprasanno jagāma ha || 32 ||
[Analyze grammar]

brahmovācottiṣṭha putra  varaṃ vṛṇīṣva cepsitam |
tārakaḥ prāñjalirbhūtvā varaṃ vavre tadepsitam || 33 ||
[Analyze grammar]

jātivaireṇa devāstu sarvadā trāsayanti naḥ |
ato daityasamuddhartā bhaveyamiti me matiḥ || 34 ||
[Analyze grammar]

avadhya sarvabhūtānāmastrāṇāṃ ca mahaujasām |
syāmahaṃ cā'maraścaiṣa varo deyo madīpsitaḥ || 35 ||
[Analyze grammar]

brahmā prāha ca taṃ mṛtyumṛte dehī na jāyate |
jātasya hi dhruvo mṛtyustasmādanyad vṛṇu priyam || 36 ||
[Analyze grammar]

mohito'pi sa daityendraḥ śiśorāsaptavāsarāt |
vavre mṛtyuṃ tathetyāha brahmā śaṃkaravākyataḥ || 37 ||
[Analyze grammar]

daityo jagāma rājye sve mahārṇavataṭottare |
sarvasmṛddhipariṣvakto modate sa sabhājitaḥ || 38 ||
[Analyze grammar]

sarvā'strajñaśca śastrajño yuddharītiviśāradaḥ |
sarvāndaityāndānavāṃścā'surānnītvā svarāyayau || 39 ||
[Analyze grammar]

dikpālān lokapālāṃśca jitvā devāngrahāṃstathā |
trilokyāśca svayaṃ rājyaṃ cakre devān vyavāsayat || 40 ||
[Analyze grammar]

svayamindro nimirvahniḥ kālanemiryamo'pi ca |
jambhaśca niṛtisthāne mahiṣo varuṇastathā || 41 ||
[Analyze grammar]

meṣo vātā'dhikāraśca kujaṃbho dhanado'bhavat |
anyeṣāṃ cādhikārāṃśca daityebhyastārako dadau || 42 ||
[Analyze grammar]

evaṃ viprakṛtā devā mahendrasahitāstadā |
yayuḥ svāyaṃbhuvaṃ dhāma tuṣṭuvuḥ parameṣṭhinam || 43 ||
[Analyze grammar]

namo jagatprasūtyai te hetave pālakāya ca |
saṃhartre ca namastubhyaṃ tārakād rakṣaṇaṃ kuru || 44 ||
[Analyze grammar]

brahmā prāha tadā sarvān jāne yuṣmān vivāsitān |
tasya hantā ca nādyāpi sa jāto bhuvane pumān || 45 ||
[Analyze grammar]

sa ca vavre vadhaṃ daityaḥ śiśutaḥ saptavāsarāt |
sa vai saptadino bālaḥ skandākhyaḥ śaṃkarodbhavaḥ || 46 ||
[Analyze grammar]

kālarātrirmama tanuḥ dakṣaputrī satī ca yā |
tanuṃ tyaktvā punaḥ sā ca pārvatī saṃbhaviṣyati || 47 ||
[Analyze grammar]

vivāhaḥ śaṃbhunā tasyā bhaviṣyati yadā tadā |
skandākhyaḥ khalu putro yo bhaviṣyati mahābalaḥ || 48 ||
[Analyze grammar]

saptadino haniṣyati senānīstārakāsuram |
prāpte tu samaye sarvaṃ bhaviṣyati harīcchayā || 49 ||
[Analyze grammar]

ityanenāgate kāle senānyā ca raṇāṃgaṇe |
hato vai tārako daityaḥ śāntimāpustadā surāḥ || 50 ||
[Analyze grammar]

atha senānyanujasya gaṇeśasya ca tāṃ kathām |
śṛṇu vacmi tato lakṣmi  śrīkṛṣṇasmārikāṃ śubhām || 51 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne tārakāsurasya brahmaṇo varadānajanmādikathananāmā śatatamo'dhyāyaḥ || 100 ||
[Analyze grammar]