Chapter 94

śrīlakṣmīruvāca |
nārāyaṇaṃ bhavantaṃ vai tyaktvā gaṇeśapūjanam |
prathamaṃ vai kathaṃ kena kadā klṛptaṃ taducyatām || 1 ||
[Analyze grammar]

śrīnārāyaṇa uvāca |
śṛṇu lakṣmi  kathāṃ ramyāṃ śrīkṛṣṇātmakabodhadām |
sa cāṃśaḥ kṛṣṇacandrasya tathaivā'yonisaṃbhavaḥ || 2 ||
[Analyze grammar]

mahālakṣmīḥ svayaṃ māyā dakṣakanyā babhūva ha |
sā ca nāmnā satī śaṃbhornindayā dakṣajanyayā || 3 ||
[Analyze grammar]

dehaṃ tyaktvā menakāyāṃ himālayāttu pārvatī |
jātā tāṃ parvataḥ putrīṃ śaṃkarāya dadau mudā || 4 ||
[Analyze grammar]

tāṃ gṛhītvā mahādevo jagāma vijanaṃ vanam |
gārhasthyayogyakuṭyāṃ tu sadā nivasatostayoḥ || 5 ||
[Analyze grammar]

sahasravarṣaparyantaṃ śṛṃgāro hyabhavat sukhaḥ |
devānāṃ garbhato janma putrāṇāṃ naiva jāyate || 6 ||
[Analyze grammar]

putrā'labdhyā tu pārvatyāḥ sukhaṃ kiñcinna jāyate |
dine dine gate tasyāḥ putraspṛhā vyavardhata || 7 ||
[Analyze grammar]

rateḥ phalaṃ sukhaṃ putro hyubhayaṃ saṃbhavatyapi |
putraphalaṃ vinā''nando vārdhakye duḥkhado bhavet || 8 ||
[Analyze grammar]

putraśūnyaṃ ratimātraṃ bhāvyudvegāya kalpyate |
vinā'patyaṃ striyā kālakṣepaḥ kāryastu kena vai || 9 ||
[Analyze grammar]

patyā samaṃ rateḥ kālakṣepo bhavati svalpakaḥ |
tadanyakālagamakaṃ striyo'patyaṃ bhavediha || 10 ||
[Analyze grammar]

lālane pālane tasya krīḍanakādikarmaṇi |
samayo'tyeti nārīṇāṃ sa eva svarga ucyate || 11 ||
[Analyze grammar]

svāmisukhaṃ prathamaṃ ca svargaṃ dvitīyamaṃgajam |
apatyasukhakṛtsvargaṃ tṛtīyaṃ dhanadhānyajam || 12 ||
[Analyze grammar]

caturthaṃ tu bhavetsvargamārogyaṃ paṃcamaṃ yaśaḥ |
ityetānyeva saukhyāni svargāṇi laukikāni hi || 13 ||
[Analyze grammar]

iti cintānvitā nityaṃ reme svasvāminā saha |
śaṃbhurvijñāya tadhārdaṃ tāṃ papraccha pativratām || 14 ||
[Analyze grammar]

kimicchasi priye  nityaṃ kiṃ te manasi vartate |
kiṃ vai cintayase ratyāṃ brūhi kriye tavepsitam || 15 ||
[Analyze grammar]

pārvatī prāha deveśa  kiṃ me nyūnaṃ tavāntike |
sarvadaḥ sarvalokānāṃ kartā labdho mayā yataḥ || 16 ||
[Analyze grammar]

yatra bhagavato vāsastatra syuḥ susamṛddhayaḥ |
na nyūnaṃ nā'pyaśāntiśca nā'lābhaḥ preṣṭhavastunaḥ || 17 ||
[Analyze grammar]

ṛtūttaraṃ tu nārīṇāṃ preṣṭhaḥ patistataḥ sutaḥ |
mayā patistrilokeśaḥ prāpto'pi nāsti me sutaḥ || 18 ||
[Analyze grammar]

putreṣaṇā hṛdaye me jāgarti tava darśane |
yadā yadā tu deveśa paśyāmi tvāṃ tadā tadā || 19 ||
[Analyze grammar]

saṃkalpo jāyate mohād balena cāgrapūjayā |
patidevasamāno me kadā putro bhavediti || 20 ||
[Analyze grammar]

kāntānāṃ kāntavicchedaḥ prathamaṃ duḥkhamucyate |
kāntasattve yadyaratidvitīyaṃ duḥkhamucyate || 21 ||
[Analyze grammar]

duḥkhātirekiduḥkhaṃ ca tṛtīyamanapatyatā |
trailokyakāntaṃ kāntaṃ tvāṃ labdhvāpi na ca me sutaḥ || 22 ||
[Analyze grammar]

yā strī putravihīnā'syā jīvanaṃ tannirarthakam |
janmāntarakṛtaṃ puṇyaṃ tapodānajapādibhiḥ || 23 ||
[Analyze grammar]

tadā putraḥ prajāyeta paratreha sukhapradaḥ |
suputro nijapitraṃśaḥ pitṛtulyasukhapradaḥ || 24 ||
[Analyze grammar]

kuputrastu kulāṃgāro manastāpāya kevalam |
prārthayanti janāstasmāt suputro me bhavediti || 25 ||
[Analyze grammar]

svāmī svāṃśena sustrīṇāṃ garbhe janma labhed dhruvam |
sādhvī strī mātṛtulyā ca satataṃ hitakāriṇī || 26 ||
[Analyze grammar]

asādhvī vairitulyā ca śaśvatsaṃtāpadāyinī |
kimupāyaṃ kariṣyāmi vada putraphalaprada || 27 ||
[Analyze grammar]

ityuktvā pārvatī devī tūṣṇīmāsa yadā tadā |
prahasya śaṃkaro devo bodhayāmāsa pārvatīm || 28 ||
[Analyze grammar]

śṛṇu pārvati  vakṣyāmi tava bhadraṃ bhaviṣyati |
prayatnataḥ kāryasiddhiḥ sarveṣāṃ khalu jāyate || 29 ||
[Analyze grammar]

sarvasiddhipradaṃ hṛdyamupāyaṃ kathayāmi te |
harerārādhanaṃ kṛtvā vrataṃ kuru varānane || 30 ||
[Analyze grammar]

puṇyakavratasaṃjñaṃ tad varṣamekaṃ kariṣyasi |
manorathakalpataruṃ sukhadaṃ putradaṃ vratam || 31 ||
[Analyze grammar]

sarvavratānāṃ saṃśreṣṭhaṃ harestatpuṇyakaṃ vratam |
yathā gaṃgā saritśreṣṭhā yathā deveṣu vai hariḥ || 32 ||
[Analyze grammar]

vaiṣṇaveṣu yathā cāhaṃ devīṣu tvaṃ mahāsatī |
yathā varṇeṣu vipro vai śreṣṭhastīrtheṣu puṣkaraḥ || 33 ||
[Analyze grammar]

puṣpeṣu pārijātaṃ ca patreṣu tulasīdalam |
tithiṣvekādaśī śreṣṭhā vāreṣu raviruttamaḥ || 34 ||
[Analyze grammar]

māseṣu mārgaśīrṣaśca sarvartuṣu vasantakaḥ |
saṃvatsaro vatsareṣu kṛtaṃ yugeṣu cottamam || 35 ||
[Analyze grammar]

pūjyeṣu ca yathā vidvān mātā gurujaneṣu ca |
patnī yathā hitakṛtsu viśvasteṣu hṛdantaram || 36 ||
[Analyze grammar]

yathā dhaneṣu ratnāni priyeṣu ca patiryathā |
yathā bandhuṣu satputro vṛkṣeṣu kalpapādapaḥ || 37 ||
[Analyze grammar]

tathā harervrataṃ śreṣṭhaṃ sarvavrateṣu puṇyakam |
phaleṣvāmraphalaṃ śreṣṭhaṃ vane vṛndāvanaṃ yathā || 38 ||
[Analyze grammar]

yathā strīṣu śatarūpā hyurvaśyapsarasāṃ yathā |
yathā mātṛṣu kamalā sūryastejasviṣūttamaḥ || 39 ||
[Analyze grammar]

āhlādakeṣu candraśca sundareṣu ca manmathaḥ |
śreṣṭhāḥ śāstreṣu vedāśca siddheṣu kapilo yathā || 40 ||
[Analyze grammar]

kīrtideṣu yathā vidyā vyāpakeṣu prabhuryathā |
śreṣṭhaṃ cakṣuryathāṃgeṣu satyaṃ puṇyeṣu cottamam || 41 ||
[Analyze grammar]

tapassu śrīhareḥ sevā gavyeṣu ghṛtamuttamam |
śreṣṭhamamṛtaṃ bhakṣyeṣu śuddheṣu ca hutāśanaḥ || 42 ||
[Analyze grammar]

taijaseṣu yathā svarṇaṃ miṣṭeṣu priyabhāṣaṇam |
patattriṣu ca garuḍaḥ kariṣyairāvato yathā || 43 ||
[Analyze grammar]

tathā harervrataṃ śreṣṭhaṃ sarvavrateṣu puṇyakam |
devarṣiṣu nāradaśca yogiṣu sanakādayaḥ || 44 ||
[Analyze grammar]

gandharveṣu citrarathastattveṣu cetano yathā |
kavane jīvane śukraḥ kṣamāvatsu yathā ca bhūḥ || 45 ||
[Analyze grammar]

śreṣṭhā lābheṣu vai muktiḥ sampatsu bhaktiruttamā |
pavitreṣu yathā sādhurvarṇeṣu praṇavo yathā || 46 ||
[Analyze grammar]

mantreṣu śrīharermantro goṣu kāmadughā yathā |
vedeṣu sāmavedaśca tṛṇeṣu kuśa uttamaḥ || 47 ||
[Analyze grammar]

sukhadeṣu yathā jñānaṃ sarpeṣu vāsukiryathā |
akṣareṣu akāraśca yathā tāto hitaiṣiṣu || 48 ||
[Analyze grammar]

catuṣpātsu yathā siṃhaḥ śālagrāmaśca mūrtiṣu |
yathā buddhiḥ karaṇeṣu śaktimatsu hariryathā || 49 ||
[Analyze grammar]

nāśavatsu dvayaṇukaśca dadhīcirdātṛṣūttamaḥ |
brahmāstraṃ tu yathā'streṣu cakreṣu ca sudarśanam || 50 ||
[Analyze grammar]

sarvasāro yathā kṛṣṇo vrateṣu puṇyakaṃ tathā |
vrataṃ kuru mahādevi  śīghraṃ sveṣṭapradāyakam || 51 ||
[Analyze grammar]

sarvaśreṣṭhastu putraste vratādeva bhaviṣyati |
vratārādhyo hariḥ kṛṣṇo golokādhipatiḥ prabhuḥ || 52 ||
[Analyze grammar]

prasannaḥ sarvadātā sa bhuktimuktiprado bhavet |
jano yatsevayā bandhānmucyate pitṛkoṭibhiḥ || 53 ||
[Analyze grammar]

uddhṛtya koṭipuruṣān goloke sukhamṛcchati |
bhrātṝnbhṛtyānsahāyāṃścāśritānnārīsutādikān || 54 ||
[Analyze grammar]

kṛṣṇabhaktaḥ samuddhṛtya sukhaṃ yāti hareḥ padam |
tasmād gṛhāṇa girije  harermantravrataṃ param || 55 ||
[Analyze grammar]

kuru vrataṃ japa mantraṃ śīghraṃ siddhirbhaviṣyati |
ityuktvā jalamādāya devyai mantravaraṃ dadau || 56 ||
[Analyze grammar]

śaṃbhurvāme girijāyāḥ karṇe mantraṃ jajāpa |
pārvatī taṃ dīyamānaṃ mantraṃ dadhyau hṛdi tvimam || 57 ||
[Analyze grammar]

oṃ namo harikṛṣṇāya patirūpadharāya ca |
bījāya garbharūpāyā'patyarūpāya śaṃbhave || 58 ||
[Analyze grammar]

saṃkalpagarbhahṛdyāya namaḥ putrapradāya ca |
vijetre'grā'rcyarūpāya namo dehi suputrakam || 59 ||
[Analyze grammar]

sarvavijayinaṃ dehi sarvāgrā'rcyaṃ ca me sutam |
puṇyakaṃ te vrataṃ kṛṣṇa kriyate prītaye tava || 60 ||
[Analyze grammar]

nirvighnaṃ saphalaṃ tatsyāt putrātman sutado bhava |
tvatsamaṃ me sutaṃ dehi ciraṃjīvi namo namaḥ || 61 ||
[Analyze grammar]

itimantraṃ haradattaṃ gṛhītvā pārvatīṃ sati |
jagāma jāhnavītīraṃ śaṃbhunā saha pāvanam || 62 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne pārvatyai putrajijñāsamānāyai śaṃkarapradattabahudṛṣṭāntasamanvitakṛṣṇamantrapradānapradarśananāmā caturnavatitamo'dhyāyaḥ || 94 ||
[Analyze grammar]