Chapter 93

śrīnārāyaṇa uvāca |
asurā garjamānāste ākṣipanto raṇe surān |
śatakoṭipramukhyāśca balena balinā saha || 1 ||
[Analyze grammar]

pradudruvuḥ surāṃste vai mahābalaparākramān |
svāni rūpāṇi bibhrantaḥ samāpeduḥ sahasraśaḥ || 2 ||
[Analyze grammar]

kecidvyāghrakṛtasvārāḥ kecinmahiṣapṛṣṭhagāḥ |
kecidaśvasamārūḍhā dvipapṛṣṭhasthitāḥ pare || 3 ||
[Analyze grammar]

siṃhārūḍhāstathā kecitkeciccharabhavāhanāḥ |
kecidgṛdhrasamārūḍhāḥ kecicchārdūlapṛṣṭhagāḥ || 4 ||
[Analyze grammar]

kecitkuliṃgamayūrahaṃsakākādivāhanāḥ |
anye makarakūrmoṣṭraśvā'śvajambūkapṛṣṭhagāḥ || 5 ||
[Analyze grammar]

evaṃ paśuklṛptavāhāḥ pakṣipṛṣṭhāptavāhanāḥ |
jalākāśādisaṃcāriprāṇipṛṣṭhāsanāstathā || 6 ||
[Analyze grammar]

rathayantraśakaṭādivahrivimānasaṃsthitāḥ |
pādātyā bahavastatra khaḍgaśaktyṛṣṭipāṇayaḥ || 7 ||
[Analyze grammar]

paṭṭiśapāśaparighaśūlamudgalapāṇayaḥ |
bhūśuṇḍīchurikākhaḍgagadācakraśarāyudhāḥ || 8 ||
[Analyze grammar]

vimānānāṃ gajānāṃ ca rathānāṃ vājināṃ tathā |
padgānāṃ tatra sainyāni balimukhyāni koṭiśaḥ || 9 ||
[Analyze grammar]

spardhamānāstato'nyonyaṃ garjamānā bhaṭā mithaḥ |
bahukruddhā durādharṣā yoddhukāmā vyavasthitāḥ || 10 ||
[Analyze grammar]

vadanti sma ca viśvāso na kāryo durhṛdāṃ kvacit |
na viśvasetpūrvavirodhiṣu svārthijaneṣvapi || 11 ||
[Analyze grammar]

yo viśvasedarātau sa kleśābdhiṃ mastake vahet |
pūrvaṃ paricitā devā bahuvāraṃ tu dānavaiḥ || 12 ||
[Analyze grammar]

tatra punaḥ punaḥ śāṭhyaṃ kṛtavantasta eva tu |
sudhā na pāyitā'smabhyaṃ manāgapi na dīyate || 13 ||
[Analyze grammar]

tasmādyuddhena nāśastu teṣāṃ kāryastato'mṛtam |
svargarājyaṃ ca bhokṣyāmo vayaṃ yuddhārjitaṃ svakam || 14 ||
[Analyze grammar]

dhvajaiśchatraiḥ patākaiśca raṇabhūmimamaṇḍayan |
cāmaraiḥ paṭahaiḥ śaṃkhaistūryaiśca dvigalaistathā || 15 ||
[Analyze grammar]

tadvat sarve surāścendrapramukhā raṇagāminaḥ |
pītvā'mṛtaṃ mahābhāgā vāhānāruhya daṃśitāḥ || 16 ||
[Analyze grammar]

svasvabalasamāyuktā daityānprati samutkaṭāḥ |
gajārūḍho mahendraśca sūryaścoccaiḥśravaḥsthitaḥ || 17 ||
[Analyze grammar]

śaśārūḍhaḥ śaśī tadvad yamo mahiṣamāsthitaḥ |
nairṛtaḥ pretapṛṣṭhastho varuṇo makare sthitaḥ || 18 ||
[Analyze grammar]

pavanastu mṛgārūḍho vṛṣārūḍhaḥ śivastathā |
kuberaḥ puṣpakārūḍho devāścānye balānvitāḥ || 19 ||
[Analyze grammar]

vimānasthā lakṣalakṣāḥ pakṣisthāḥ koṭiśastathā |
paśumṛgādivāhasthā hyarbudā devakoṭayaḥ || 20 ||
[Analyze grammar]

svasvābhimānasaṃyuktāḥ sarve devāstvarānvitāḥ |
chatracāmarasaṃvītāḥ śobhitā vijayaśriyāḥ || 21 ||
[Analyze grammar]

viṣṇuṃ praṇamya saṃgrāme raṇe daityānupasthitāḥ |
bhīmāstatrā'surāḥ sarve surāśca bhīmavikramāḥ || 22 ||
[Analyze grammar]

teṣāṃ ghoramabhūd yuddhaṃ daityadānavanākibhiḥ |
mahāghoraṃ mahānāśaṃ sarvabhūtabhayāvaham || 23 ||
[Analyze grammar]

bāṇavarṣi śastraghāti cā'strakṣepi bhayānakam |
śabdā hṛnnāśakā jātāḥ śarapātāstathā'bhavan || 24 ||
[Analyze grammar]

tīratomaranārācairāhatāstvapatan bhuvi |
vadhyamānāstathā kecitsamādhiṃ tatra lebhire || 25 ||
[Analyze grammar]

bhallairbhagnā nipatitā nārācaiḥ śakalīkṛtāḥ |
kṣuraiḥ prahāritāḥ kecinmudgaraiśca vipothitāḥ || 26 ||
[Analyze grammar]

śastraghātaiḥ prabhinnāśca chinnāśca bāṇapātanaiḥ |
daityasainyaṃ mahāmārairbhagnaṃ devāśca prahṛṣuḥ || 27 ||
[Analyze grammar]

śaṃkhanādānprakurvāṇāḥ sūcayāṃcakrire jayam |
devānprati kṛtāmarṣā dānavāste mahābalāḥ || 28 ||
[Analyze grammar]

baliprabhṛtayaḥ sarve saṃśrameṇotthitāḥ punaḥ |
vimānaiḥ sūryasaṃkāśairanekaistvarayā'nvitāḥ || 29 ||
[Analyze grammar]

dvandvayuddhamabhūtteṣāṃ surāṇāmasuraiḥ saha |
balinā dānavendreṇa mahendro yuyudhe tadā || 30 ||
[Analyze grammar]

yamo namucinā sārdhaṃ nairṛtaḥ praghasena ca |
kuṃbhena saha varuṇo nikuṃbhena samīraṇaḥ || 31 ||
[Analyze grammar]

sudaṃṣṭreṇa kuberastu śeṣaiḥ śeṣā vavalmire |
rāhuṃ ketuṃ samāyāntau dṛṣṭvā devāḥ palāyitāḥ || 32 ||
[Analyze grammar]

ketunā vyomasadṛśaṃ mukhaṃ svasya prasāritam |
devānāṃ vai bhakṣaṇārthaṃ devāḥ pradudruvustadā || 33 ||
[Analyze grammar]

keciddhariṃ smaranti sma kecidbhaktyā vināyakam |
kecid durgāṃ tathā śaṃbhuṃ brahmāṇaṃ cā'pare'mṛtam || 34 ||
[Analyze grammar]

rāhuśiraḥ puraskṛtya daityā jayonmukhāḥ surān |
tāḍayāmāsuratyugrāḥ śastrāstraprastarādibhiḥ || 35 ||
[Analyze grammar]

devāḥ palāyitā daityā jayaṃ samāpnuvaṃstadā |
keturādau mukhaṃ svaṃ vai vyādāya grasituṃ harim || 36 ||
[Analyze grammar]

candraṃ śaktaṃ tathā sūryaṃ taṃ taṃ samīpamāgatam |
udyukto'bhūdamṛto'sau vajreṇāpi na naśyati || 37 ||
[Analyze grammar]

tadā candro mahādevamastaut dhāvan kṛtāṃjaliḥ |
tvaṃ śaṃbho trāhi māṃ deva śaraṇāgatarakṣaka || 38 ||
[Analyze grammar]

devāṃstrāhi tathā sarvān ketuduḥkhaṃ vināśaya |
evamabhyarthitaḥ śaṃbhurmā bhaiṣṭetyavadatsutān || 39 ||
[Analyze grammar]

ketustatrā'gamaccandraṃ grasituṃ yāvadeva hi |
dhṛtaśca śaṃbhunā keturmuṇḍamālāsu gumphitaḥ || 40 ||
[Analyze grammar]

ketū rūpadvayaṃ kṛtvā jagāma divi tatsthalāt |
śaṃbhuṃ tadā puraskṛtya devā yuddhe mano dadhuḥ || 41 ||
[Analyze grammar]

surairdaityā hanyamānāḥ śastrāstrabāṇatomaraiḥ |
nipeturbahavastatra kṣatā bhagnāśca kartitāḥ || 42 ||
[Analyze grammar]

cakrurbhuvaṃ mṛtā daityā māṃsaśoṇitakardamām |
nadyo bhayāvahāstatra vahanti mṛtadānavān || 43 ||
[Analyze grammar]

dhvajayantrapatākā'nogajavājiśirāṃsi ca |
agādhāḥ śoṇitodāśca pravahanti raṇāṃgaṇe || 44 ||
[Analyze grammar]

tathā tasminmahāraudre surāsurasamāgame |
śaktyā jaghāna devendraṃ vairocaniramarṣaṇaḥ || 45 ||
[Analyze grammar]

śaktiṃ tāṃ vaṃcayitvendro baliṃ vajreṇa tatkṣaṇam |
jaghāna bāhuṃ ciccheda bhūmāvapātayad baliḥ || 46 ||
[Analyze grammar]

vajreṇa ca punarvṛṣaparvāṇamapyapātayat |
tatrāpi śatadhāreṇa vajreṇaiva punaḥ punaḥ || 47 ||
[Analyze grammar]

anyena hetinā cendro dānavānavadhīdraṇe |
śirāṃsi kartitānyevendreṇa prakupitena vai || 48 ||
[Analyze grammar]

yamena vāyunā caiva varuṇena tathā'gninā |
nairṛtena kubereṇa śaṃbhunāpi vidāritāḥ || 49 ||
[Analyze grammar]

ityevaṃ kadanaṃ dṛṣṭvā kālanemimahāsuraḥ |
siṃhastho daṃśitaścograḥ triśūlena samanvitaḥ || 50 ||
[Analyze grammar]

daityānāmarbudenaiva siṃhārūḍhena saṃgataḥ |
siṃhasthāṃ daityasenāṃ tāṃ dṛṣṭvā cendrapurogamāḥ || 51 ||
[Analyze grammar]

kiṃ kurmo'dya vayaṃ sarve jeṣyāmaḥ kathamāsurān |
vinā viṣṇuṃ nā'sya jetā kaścidanyo hi lakṣyate || 52 ||
[Analyze grammar]

iti viṣṇuṃ smarantaścā'stuvannārāyaṇaṃ harim |
namastubhyaṃ bhagavate namaste viśvanāyaka || 53 ||
[Analyze grammar]

śrīnivāsa namastubhyaṃ suratrātre namo namaḥ |
trātumarhasi daityendrakālanemibhayādiha || 54 ||
[Analyze grammar]

śrutvā stotraṃ hariḥ śīghramāruhya garuḍe svakam |
cakrapāṇiḥ samāyāto devānāṃ vijayāya vai || 55 ||
[Analyze grammar]

hariṃ dṛṣṭvā kālanemiḥ prahasyovāca roṣataḥ |
kastvaṃ kathaṃ samāyāto mama śastrasya bhojanam || 56 ||
[Analyze grammar]

hariḥ prāha tadā daityaṃ yuddhārthaṃ samupāgataḥ |
devānāṃ mūlabhūto'haṃ sthiro bhava sumṛtyave || 57 ||
[Analyze grammar]

sapakṣasiṃhasainyena kālanemirvihāyasā |
yuyudhe sagaruḍena śāṅgapāṇisuviṣṇunā || 58 ||
[Analyze grammar]

garuḍena tadā tuṇḍapakṣanakhādihetibhiḥ |
siṃhā daityāḥ pāṭitāśca khaṇḍitāśca vināśitāḥ || 59 ||
[Analyze grammar]

viṣṇunā svīyacakreṇa nihatāḥ śakalīkṛtāḥ |
triśūlenā'hanadviṣṇuṃ kālanemiḥ pratāpavān || 60 ||
[Analyze grammar]

vāmahastena saṃgṛhya triśūlaṃ tattu līlayā |
tenaiva ca triśūlena kālanemiṃ jaghāna ha || 61 ||
[Analyze grammar]

mūrchitaḥ patitaścāthotthāyonmīlya svalocane |
dhṛtvā khaḍgaṃ samadhāvadviṣṇuṃ tāvattu viṣṇunā || 62 ||
[Analyze grammar]

cakreṇa kartitaṃ tasya mastakaṃ tatkṣaṇāt khalu |
anye daityāstu devaiśca hatā naṣṭā kṣayaṃ gatāḥ || 63 ||
[Analyze grammar]

kālanemirhato daityo devā jātā hyakaṃṭakāḥ |
tirodhānaṃ gato viṣṇurindrastatrā'karod dayām || 64 ||
[Analyze grammar]

patitaklībarūpāṇāṃ bhagnānāṃ bhītacetasām |
muktakacchaśikhānāṃ ca cakre svāsthyakriyāṃ hariḥ || 65 ||
[Analyze grammar]

āyāt triviṣṭapaṃ cātha surasenānvito hariḥ |
babhūvurmuditāḥ sarve yakṣagandharva kinnarāḥ || 66 ||
[Analyze grammar]

devarṣayo brahmarṣayaḥ procurindro'bhiṣicyatām |
sa evendro'marāvatyāmabhiṣiktaḥ śacīyutaḥ || 67 ||
[Analyze grammar]

tadā mahotsavo lakṣmi  devaloke paro'bhavat |
śaṃkhapaṭahamṛdaṃgamurajānakagomukhāḥ || 68 ||
[Analyze grammar]

bherīdundubhitūryāṇi neduḥ svarge gṛhe gṛhe |
jaguśca gāyakāḥ sarve gandharvāḥ kinnarāstathā || 69 ||
[Analyze grammar]

tuṣṭuvuśca tadā siddhagandharvacāraṇarṣayaḥ |
nanṛtuścāpsarogaṇā utsavo'bhūtsthale sthale || 70 ||
[Analyze grammar]

śukrācāryo daityagurustapo'rthaṃ mānasottaram |
gato'bhūt kṣayamāśrutya jagāma samarāṃgaṇe || 71 ||
[Analyze grammar]

saṃjivanyā vidyayā sa mṛtadaityānajīvayat |
nidrāpāyagatā yadvadutthitāste tadāsurāḥ || 7 ||
[Analyze grammar]

te'pi sarve nivāsārthaṃ pātālamagaman sukham |
sudhāpānapralābhena devā naivā'mriyanta ha || 73 ||
[Analyze grammar]

vāhanādīni bhagavān saṃkalpenā'pyajīvayat |
iti devi  samudrasya manthanaṃ tvabhavatpurā || 74 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne sudhāpānabhedajanyadevā'surasaṃgrāmendrābhiṣekādinirūpaṇanāmā trinavatitamo'dhyāyaḥ || 93 ||
[Analyze grammar]