Chapter 69

śrīnārāyaṇa uvāca |
śṛṇu lakṣmi  pravakṣyāmi tava cihnāni me priye |
paśya nābhiṃ dakṣiṇāvartāṃ te gāmbhīryaśālinīm || 1 ||
[Analyze grammar]

aromāṃ trivalīṃ paśya hṛtstanau romavarjitau |
madhyāṃśaṃ sarvaśaktyāḍhyaṃ paśyā'ntardṛḍhakuṇḍalam || 2 ||
[Analyze grammar]

nābhyadhaḥ paśya rekhāṃ tu svarṇabāṇasya piṃgalām |
vāmasakthni tathā paśya pādukācihnamagrataḥ || 3 ||
[Analyze grammar]

vakṣasi stanayormadhye pādarekhāṃ vilokaya |
lalāṭe mukuṭākārāṃ gaṇḍe binduṃ ca lokaya || 4 ||
[Analyze grammar]

urasī paśya viṣṇuṃ māṃ rekhārūpacaturbhujam |
vāme bhuje gadācihnaṃ cā'valokaya me priye || 5 ||
[Analyze grammar]

hṛdaye vaijayantyāstu rekhāṃ paśya prapauraṭīm |
gajaṃ karatale dakṣe sapadmaṃ paśya cā'naghe || 6 ||
[Analyze grammar]

dakṣiṇe tu pade paśya śaṃkhacihnaṃ sumaṃgalam |
aṃgulyā mūlake paśya rekhāṃ vimānasadṛśīm || 7 ||
[Analyze grammar]

kaniṣṭhāyāḥ paśya mūlādhastvaṃ naukāṃ surekhayā |
tathā śaṃkhagadārekhāḥ paśya makaralekhanam || 8 ||
[Analyze grammar]

tathā madhye suśikhararekhāṃ nibhālaya priye |
paśya pārṣṇau matsyarekhāṃ madhye tāmbūlavallikām || 9 ||
[Analyze grammar]

paśya vāmāṃguṣṭhamūle yavacihnaṃ surekhayā |
tadadhastu mahāntaṃ vai prāsādaṃ paśya rekhayā || 10 ||
[Analyze grammar]

chatraṃ paśya tadadhastu yutaṃ taccordhvarekhayā |
kamalarekhāṃ phaṇake dhvajarekhāṃ prapaśya ca || 11 ||
[Analyze grammar]

aṃkuśacihnaṃ kumudaṃ paśya śrīphalamityapi |
sthalīyapadmarekhāṃ ca ghaṭarekhāṃ nibhālaya || 12 ||
[Analyze grammar]

dvitīyāyāścandrarekhāṃ daśacakrāṇi paśya ca |
svarṇarekhāṃ phaṇopari bhāle tāntikalekhanām || 13 ||
[Analyze grammar]

cibuke bindukaṃ paśya stane vāme tu cakrakam |
dakṣe stane hastarekhāṃ kaṇṭhe hāraṃ supiṃgalam || 14 ||
[Analyze grammar]

jaghane tu suvarṇāṃ vai dhanūrekhāṃ prapaśya ca |
svastikaṃ dakṣiṇe hastatale matsyaṃ dhvajaṃ tathā || 15 ||
[Analyze grammar]

dhanurvaṃśīmatsyarekhāḥ paśya kalaśarekhikām |
aṃkuśaṃ maṇḍalaṃ cakraṃ paśya dakṣe kare tale || 16 ||
[Analyze grammar]

paśya prākārarekhāṃ ca tatra toraṇamityapi |
paśya lāṃgalacihnaṃ ca tatraiva phaṇake priye || 17 ||
[Analyze grammar]

gūḍha śukaṃ paśya lakṣmi  āraktāvadharau tathā |
haste dakṣe cordhvarekhāṃ paśya vāme tathaiva ca || 18 ||
[Analyze grammar]

pādatalayostūrdhvarekhāḥ prapaśya mama priye |
pāde tu vājinaṃ caiva kuṃjaraṃ śrīmahādrumam || 19 ||
[Analyze grammar]

yūpaṃ bāṇaṃ yavaṃ caiva tomaraṃ paśya rekhayā |
haste ca mālikārekhāṃ paśya dīpaṃ ca cāmaram || 20 ||
[Analyze grammar]

paśya śailaṃ kuṇḍalaṃ ca vedikāṃ paśya rekhayā |
mukhanetrabhrūlalāṭauṣṭhanāsikākapolakān || 21 ||
[Analyze grammar]

paśya vibhrājamānāṃste gaurān svarṇamanoharān |
tattaccihnaistathā devyo bhavanti bhagavatpriyāḥ || 22 ||
[Analyze grammar]

bhaktimatyaśca me nāryo lakṣmīrūpā bhavanti vai |
mamopāsanasāmarthyāt karomi kamalālayāḥ || 23 ||
[Analyze grammar]

brahmalokanivāsinyo golokabhūkṛtālayāḥ |
vaikuṇṭhavāsamāpannāḥ śvetadvīpagatāśca yāḥ || 24 ||
[Analyze grammar]

amṛtadhāmasthāyinyo vahnimaṇḍalamadhyagā |
sūryalokanivāsinyaḥ candramaṇḍalasaṃsthitāḥ || 25 ||
[Analyze grammar]

satyalokanivāsinya īśvarasṛṣṭisaṃbhavāḥ |
pitṛsargagatā yāśca ṛṣipatnyastathā ca yāḥ || 26 ||
[Analyze grammar]

devyaścātha manuṣyāṇyo'devyo nāgādisaṃpriyāḥ |
sarvāstu māṃ parābhaktyā samāsādyā'bhavan śriyaḥ || 27 ||
[Analyze grammar]

tāścā'haṃ naikalokeṣu nārāyaṇasvarūpakaḥ |
ramayāmi mahālakṣmi  yathā tvāmatra dhāmani || 28 ||
[Analyze grammar]

mana bhaktyā tu sarvāstā lakṣmyo jāyanta eva hi |
yāśca māṃ na bhajantyanyāḥ tāstu pāpena karmaṇā || 29 ||
[Analyze grammar]

gacchanti vividhākārakhaniṣvatra paratra ca |
yamaloke mahāduḥkhānyanubhūyāpi janmani || 30 ||
[Analyze grammar]

jāyante nahi śubhadā duḥkhāya saṃbhavanti tāḥ |
yamapuryāstu yā nāryo yātanā anubhūya ca || 31 ||
[Analyze grammar]

pāpaleśājjanmavatyo duḥkhadā eva kīrtitāḥ |
śṛṇu tā api saṃkṣepātprasaṃgātpravadāmi te || 32 ||
[Analyze grammar]

kaniṣṭhikā'nāmikā vā yasyā na spṛśate mahīm |
aṃguṣṭhaṃ vā gatā'tītya tarjanī kulaṭā ca sā || 33 ||
[Analyze grammar]

romaśe cātimāṃse ca jaṃghe cātiśirālake |
vāmāvartaṃ nimnamalpaṃ guhyaṃ yasyā hi duḥkhadā || 34 ||
[Analyze grammar]

grīvayā hrasvayā niḥsvā dīrghayā ca kulakṣayaḥ |
pṛthulayā pracaṇḍā ca bhavatyeva na saṃśayaḥ || 35 ||
[Analyze grammar]

kekare piṃgale netre śyāme lole tu cā'satī |
smite kūpe gaṇḍayośca sā dhruvaṃ vyabhicāriṇī || 36 ||
[Analyze grammar]

pralambinī lalāṭe tu devaraṃ hanti cāṃganā |
udare śvaśuraṃ hanti patiṃ hanti sphicordvayoḥ || 37 ||
[Analyze grammar]

yā tu romottarauṣṭhī syānna śubhā bhartureva ha |
stanau saromāvaśubhau karṇau ca viṣamau tathā || 38 ||
[Analyze grammar]

karālā viṣamā dantāḥ kleśāya tu bhavanti tāḥ |
cauryāya kṛṣṇamāṃsābhā dīrghā bhartuśca mṛtyave || 39 ||
[Analyze grammar]

kravyādarūpairhastaiśca vṛkakākādisannibhaiḥ |
śirālairviṣamaiḥ śuṣkairvittahīnā bhavanti tāḥ || 40 ||
[Analyze grammar]

samunnatottarauṣṭhī yā kalahaiḥ rūkṣabhāṣiṇī |
lambakarṇasvarā śmaśrumatī pāde tu kālikā || 41 ||
[Analyze grammar]

netre raktā bhuvi tīvrā svalpabhālā tu ghātinī |
bahurekhā bahuromā bahubhāṣā'ticañcalā || 42 ||
[Analyze grammar]

bahusaṃgā bahunidrā bahvālasyā bahuvyayā |
sarvathā nirdhanatvaṃ ca dāridryaṃ mantrayatyasau || 43 ||
[Analyze grammar]

tasmāt satkarma kartavyaṃ nā'satkarma kadācana |
susatkarmakṛtātpuṇyāccharīraṃ śubhalakṣaṇam || 44 ||
[Analyze grammar]

prāpyate dhanadhānyārthyagṛhodyānādi cottamam |
kālaḥ pratīkṣate naiva kimanena kṛtaṃ na vā || 45 ||
[Analyze grammar]

mriyate jāyate jantuḥ puṣyate ca punaḥ punaḥ |
maraṇaṃ jananaṃ puṣṭiryā tu mokṣāya nirmitā || 46 ||
[Analyze grammar]

sā vai svenaiva kartavyā yadvā putrakuṭumbibhiḥ |
śubhaṃ jantorbhaved yena tathā''caryyaṃ divāniśam || 47 ||
[Analyze grammar]

pṛthvī vāsāya salilaṃ tṛptaye śāntaye marut |
dehaḥ śramāya cānnāya śreyaḥ kasmānna sādhayet || 48 ||
[Analyze grammar]

sarvatrā'tiśayaścāsti vicāryaiva punaḥ punaḥ |
yathā'pekṣe cātiśayo nāstītyapi vicārya ca || 49 ||
[Analyze grammar]

yadṛcchayopapannena nirvāhya svakalevaram |
nātisaṃsaktamanasā lokayātrāṃ tu nirvahan || 50 ||
[Analyze grammar]

nārāyaṇaṃ bhajennityaṃ yathā tvaṃ kamalekṣaṇe |
tasya nāsti sukhaṃ śreyo mokṣaśca dūramaṇvapi || 51 ||
[Analyze grammar]

sādhusādhvīsvarūpaṃ māṃ bhajet sarvasamarpaṇāt |
dīnā'tithinirādhārarūpaṃ māṃ sevayenmudā || 52 ||
[Analyze grammar]

vidyārthibālabālāsuvṛddhagurvādirūpataḥ |
vicarāmi kvacid devi  tadrūpaṃ māṃ prasevayet || 53 ||
[Analyze grammar]

tatrastho'haṃ paraṃ śreyaḥ kariṣyāmi yathā svayam |
bhaktasya tu sadā śreyaḥ kartuṃ dīkṣāṃ vahāmyaham || 54 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne lakṣmīcihnāni pramadāntaracihnāni cetyādikathananāmā ekonasaptatitamo'dhyāyaḥ || 69 ||
[Analyze grammar]