Chapter 65

śrīnārāyaṇa uvāca |
śṛṇu lakṣmi  yāmyapure śrāvaṇā dvādaśo'nugāḥ |
brahmaputrāḥ pratīhārāḥ manuṣyāṇāṃ tu ceṣṭitam || 1 ||
[Analyze grammar]

śubhā'śubhaṃ tu yatkarma vicāryyaiva punaḥ punaḥ |
śrāvayanti tadānīṃ vai citragupte yame tathā || 2 ||
[Analyze grammar]

naraistuṣṭaiśca ruṣṭaiśca yadyatkarma kṛtaṃ bhavet |
sarvamāvedayanti sma yathārthaṃ yādṛśaṃ ca yat || 3 ||
[Analyze grammar]

dūrāchravaṇavijñānaṃ dūrād darśanagocaram |
svarbhūḥpātālavāsānāṃ ceṣṭājñānaṃ ca dūrataḥ || 4 ||
[Analyze grammar]

evaṃ teṣāṃ śaktirasti martyādau guptabodhinī |
te vai pretasya yāvaddhi karma gāyanti tatra ca || 5 ||
[Analyze grammar]

śrīlakṣmīruvāca |
śrāvaṇāḥ kasya putrāste kathaṃ yamapure sthitāḥ |
trilokasthaiḥ kṛtaṃ karma kathaṃ jānanti te prabho || 6 ||
[Analyze grammar]

kathaṃ śṛṇvanti te sarve kasmājjñānaṃ samāgatam |
kadā te ca samutpannā brūhi me kānta sarvathā || 7 ||
[Analyze grammar]

śrīnārāyaṇa uvāca |
ādau jagatsamutpannaṃ brahmayā nirmitaṃ hi tat |
mayā tu pālitaṃ tadvai rudraḥ saṃhārakṛt tataḥ || 8 ||
[Analyze grammar]

dharmarājo mayā sṛṣṭaścitraguptena saṃyutaḥ |
svasvakāryaṃ nirvahanti trayo devāḥ svatantrataḥ || 9 ||
[Analyze grammar]

sarve'pyādye satyayuge svatantrā hyabhavan janāḥ |
sarve tridevasadṛśā na teṣu kasya śāsanam || 10 ||
[Analyze grammar]

tretāyāmapi tadvacca svatantrāḥ karma cakrire |
śāstṝṇāṃ tadaviditaṃ śāstṛtvaṃ kutra sārthakam || 11 ||
[Analyze grammar]

tadā devāsrtayastatra militāścintanāya vai |
prāṇināṃ tu svatantrāṇāṃ karmajñānaṃ na no yadi || 12 ||
[Analyze grammar]

na jānīmaḥ kathaṃ śāsayitavyāḥ prāṇinastadā |
vicāryetthaṃ vimamṛśuḥ sraṣṭavyāstādṛśāḥ sutāḥ || 13 ||
[Analyze grammar]

tadā brahmā śivaviṣṇvormatamādāya mantrayuk |
gṛhītvā dvādaśakuśān jalaṃ saṃprokṣya tatra ca || 14 ||
[Analyze grammar]

dadau dharmāya sajalakuśān dvādaśa cetanān |
yamo haste gṛhītvā tān saṃkalpayati putrakān || 15 ||
[Analyze grammar]

tejorāśīn viśālākṣān dūraśravaṇadarśanān |
ātmadraṣṭṝrnigitajñān parasaṃkalpabodhakān || 16 ||
[Analyze grammar]

adṛśyān dṛśyarūpāṃśca so'sṛjad dvādaśātmajān |
yamaputrā ime loke sarvatra karṇanetragāḥ || 17 ||
[Analyze grammar]

yo yaṃ vadati loke'smin yat karoti śubhā'śubham |
prāpayanti ca te śīghraṃ yamasya karṇagocare || 18 ||
[Analyze grammar]

dūrācchravaṇavijñānaṃ dūrāddarśanagocaram |
sarvaṃ śṛṇvanti te sarve tenaiva śrāvaṇā matāḥ || 19 ||
[Analyze grammar]

vicaranti vāyurūpāḥ sthitvā cākāśavarmani |
jantūnāṃ ceṣṭitaṃ jñātvā yamāya pravadanti te || 20 ||
[Analyze grammar]

mṛtyoruttarakāle te yathākarma yathākṛtam |
dharmaṃ cārthaṃ ca kāmaṃ ca yadvā mokṣaṃ yathā kṛtam || 21 ||
[Analyze grammar]

tathā sarvaṃ prāṇināṃ tu citraguptāya satvaram |
nivedayanti paścādvai yamāyā''vedayanti ca || 22 ||
[Analyze grammar]

śrāvaṇāste bahurūpāṇyapi dhārayituṃ kṣamāḥ |
caturdaśabhuvaneṣu naikarūpaiścaranti te || 23 ||
[Analyze grammar]

dharmacarā janā ye te yānti vimānasaṃsthitāḥ |
arthadāste'jñapyapsarobhiryānti vimānasaṃsthitāḥ || 24 ||
[Analyze grammar]

kāmadānapradātāro yāntyaśvayuktasadrathaiḥ |
haṃsahastivimānaiśca mokṣabhājaḥ prayānti vai || 25 ||
[Analyze grammar]

adhārmikāstu padbhyāṃ vai yānti mārgaṃ suduḥsaham |
pāṣāṇaiḥ kaṇṭakaiḥ kliṣṭaṃ hyasipatravanātmakam || 26 ||
[Analyze grammar]

taptavālukayā vyāptaṃ pāśabaddhāḥ prayānti vai |
teṣāṃ sukhapravāsārthaṃ dānaṃ deyaṃ yathābalam || 27 ||
[Analyze grammar]

chatropānahavastrāṇi mudrikā ca kamaṇḍaluḥ |
āsanaṃ bhājanaṃ caiva vāhanaṃ bhūṣaṇaṃ jalam || 28 ||
[Analyze grammar]

annamājyamupavītaṃ gomahiṣyādikaṃ dhanam |
dātavyaṃ pretamuddiśya mārgaṃ sukhakaraṃ bhavet || 29 ||
[Analyze grammar]

mṛtoddeśena yatkiṃcid dīyate svagṛhe priye |
jalātmā sākṣikastaddhi varuṇo vetti sarvathā || 30 ||
[Analyze grammar]

gṛhṇāti varuṇo dānaṃ mama haste prayacchati |
ahaṃ nārāyaṇastato'rpayāmi bhāskare ravau || 31 ||
[Analyze grammar]

bhāskarāt sa ca vai pretaḥ saṃgṛhyā'śnāti cetyataḥ |
deyaṃ pretasukhārthaṃ vai dānaṃ bahuvidhaṃ priye || 32 ||
[Analyze grammar]

yastu dharmaḥ kṛto naiva dānaṃ paścānna dīyate |
puṇyaṃ tu nā'rjitaṃ svaiśca narakān yāti dāruṇān || 33 ||
[Analyze grammar]

caturaśītilakṣāste narakāḥ santi duḥkhadāḥ |
teṣāṃ madhye mukhyatamā dhaureyāstvekaviṃśatiḥ || 34 ||
[Analyze grammar]

tāmisraścāndhatāmisro mahārauravarauravau |
kuṃbhīpākaḥ kālasūtramasipatravanaṃ tathā || 35 ||
[Analyze grammar]

sūkarāsyamandhakūpaḥ kṛmibhojanamityapi |
saṃdaṃśastaptasūrmiśca vajrakaṃṭakaśālmalī || 36 ||
[Analyze grammar]

pūyodo vaitaraṇī ca prāṇarodho viśaṃsanam |
ayaḥpānamavīciśca śvādanaṃ lāḷabhakṣaṇam || 37 ||
[Analyze grammar]

ityete mukhyarūpā vai yamapūryāṃ matāstathā |
tebhyo'dhastātpare sapta santyanye nāmataḥ śṛṇu || 38 ||
[Analyze grammar]

kṣārakardama eko'nyo rakṣogaṇaprabhojanaḥ |
śūlaproto dandaśūko'vaṭanirodhanastathā || 39 ||
[Analyze grammar]

paryāvartanakaścaiva sūcīmukhamiti pṛthak |
athā'nye narakagrāmāstatra santi nibodha tān || 40 ||
[Analyze grammar]

talapāto mahājvālaḥ śabalaśca vikartanaḥ |
adhaḥśirā rudhirāndhaścakṣuḥśūlaḥprapācanam || 41 ||
[Analyze grammar]

śailapāto lohaśaṃkupratodanigaḍāstathā |
lohayantraśca kākolo mṛtajīvanavaiśasau || 42 ||
[Analyze grammar]

narakāṇīti cānyāni bhedaprabhedatastathā |
bhavanti pāpakartṝṇāṃ niṣkṛtyarthaṃ kṛtāni vai || 43 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne dvādaśaśravaṇākhyadūtānāmaṣṭāviṃśatyādinarakāṇāmuddeśanāmā pañcaṣaṣṭitamo'dhyāyaḥ || 65 ||
[Analyze grammar]