Chapter 66

śrīnārāyaṇa uvāca |
yeṣāṃ tu narake ghore gatānyabdaśatāni vai |
santatirnaiva vidyeta dūtatvaṃ te prayānti hi || 1 ||
[Analyze grammar]

yamena preṣitāste vai mānuṣādermṛtasya ca |
dine dine pragṛhṇanti dīpamannaṃ ghaṭādikam || 2 ||
[Analyze grammar]

pretasyaiva prayacchanti hyannakāmasya sattṛṣaḥ |
tṛptiṃ prayānti te sarve pratyahaṃ caiva vatsaram || 3 ||
[Analyze grammar]

citraguptapuraṃ pūrvaṃ yojanānāṃ tu viṃśatiḥ |
kāyasthāstatra paśyanti pāpapuṇye ca sarvathā || 4 ||
[Analyze grammar]

yojanānāṃ caturviṃśatistu vaivasvataṃ puram |
tatra gatvā preṣyadūtāḥ pratīhāraṃ vadanti vai || 5 ||
[Analyze grammar]

dharmadhvaja pratīhāre brūte tasya śubhā'śubham |
yamarājasya dūtāstu bhīṣaṇā yamakiṃkarāḥ || 6 ||
[Analyze grammar]

pāśadaṇḍadharā ghorāḥ sahasrāṇi ca ṣoḍaśa |
ekaikasya purasyā'gre sahasraikaṃ ca tiṣṭhati || 7 ||
[Analyze grammar]

dharmarājaḥ svayaṃ nyāyaṃ dadātyasmai tu pāpine |
tatra tatra ca narakān prabhuṃkte tadyathā śṛṇu || 8 ||
[Analyze grammar]

prasahya paravittastryapatyapatyādihārakāḥ |
patanti tatra tāmisre bhṛśaṃ kṣuttṛṭprabādhitāḥ || 9 ||
[Analyze grammar]

vaṃcayitvā paravittā'patyanāryādibhoginaḥ |
patanti tvandhatāmitre naṣṭadṛṅmatayastu te || 10 ||
[Analyze grammar]

patanti hiṃsakā mahāraurave tatra dehinaḥ |
kravyādā ruravo bhūtvā ghātayanti svaghātakam || 11 ||
[Analyze grammar]

bhūtadrohaiḥ kuṭumbasya poṣakā yānti raurave |
bhūtāni ruravaḥ sarpā bhūtvā hiṃsanti hiṃsakān || 12 ||
[Analyze grammar]

paśvādirandhakā duṣṭāḥ kuṃbhīpāke patanti vai |
dūtāstāṃstaptataileṣu randhayanti muhurmuhuḥ || 13 ||
[Analyze grammar]

gurupitṛbrahmasādhusādhvyādiprāṇināṃ druhaḥ |
yānti vai kālasūtrākhye'yutayojanamaṇḍale || 14 ||
[Analyze grammar]

vahnitapte tāmrakhale loṭhayanti dahanti te |
svadharmahantā pākhaṇḍī vane yātyasipatrake || 15 ||
[Analyze grammar]

ubhatodhārakhaḍgaiḥ saṃchidyate mṛdyate muhuḥ |
anyāyadaṇḍadā yānti sūkarāsyākhyayantrake || 16 ||
[Analyze grammar]

niṣpīḍyamānā'vayavāścūrṇībhavanti tatra vai |
īśakalpitavṛttīnāṃ yūkāmaśakapakṣiṇām || 17 ||
[Analyze grammar]

jantūnāṃ nāśakartāro hyandhakūpe patanti vai |
tatra dūtā janturūpā drugdhā druhyanti tānpunaḥ || 18 ||
[Analyze grammar]

asaṃvibhajya bhoktāraḥ patanti kṛmibhojane |
bhakṣyante kṛmibhiste ca śatasāhasrayojane || 19 ||
[Analyze grammar]

steyādbalātparasvarṇaratnabhvādyapahārakāḥ |
saṃdaṃśe yāntyayodaṃśairniṣkṛntanti ca tān yamāḥ || 20 ||
[Analyze grammar]

agamyāṃstu narānnārīrbalātkāreṇa kāmukān |
taptasūrmyāṃ taptaloṣṭhaputalyā''liṃgayanti te || 21 ||
[Analyze grammar]

paśvādinaramādāsu prasahya kāmukān janān |
vajrakaṃṭakaśālmalyāmāropya kartayanti vai || 22 ||
[Analyze grammar]

paśvācārā naṣṭaśaucāḥ śleṣmaviṇmūtrapūyake |
pūyodākhye patantyete hyaśnanti tanmalaṃ tathā || 23 ||
[Analyze grammar]

rakṣakā bhakṣakā bhūtvā rakṣyān bhindanti bhītidāḥ |
viṇmūtrapūyaraktātmavaitaraṇyāṃ vahanti te || 24 ||
[Analyze grammar]

mṛgayāsaktapaśvādighātinaḥ prāṇarodhane |
pātayitveṣubhistatra vidhyanti yamapūruṣāḥ || 25 ||
[Analyze grammar]

viśaṃsane paśu pakṣimanuṣyādividārakān |
vidārayanti khādantyasṛk pibanti ca te punaḥ || 26 ||
[Analyze grammar]

asaṃkhyajantunāśotthamadirāpānakṛjjanān |
taptā'yorasapānaṃ vai kārayanti balād yamāḥ || 27 ||
[Analyze grammar]

kūṭasākṣyaprakartṝṃścāvīcau yāmyāḥ punaḥ punaḥ |
gavyūtidviśatocchrāyagirestu pātayanti vai || 28 ||
[Analyze grammar]

viṣadānagnidānduṣṭān śvādane'danti kukkurāḥ |
retaḥprapāyakān lāḷāḥ pāyayanti yamānugāḥ || 29 ||
[Analyze grammar]

pūjyapūjāvyaticārakartā tu kṣārakardame |
patatyavākśirāstatra tatphalaṃ ca samaśnute || 30 ||
[Analyze grammar]

paśupakṣinaranārīkhādakānāṃ yamānugāḥ |
khādantyasṛk prāpibanti rakṣogaṇaprabhojane || 31 ||
[Analyze grammar]

prāṇināṃ kaṇṭakasūcīśūlaistu vedhakānmuhuḥ |
śūlaprote pravidhyanti tīkṣṇāgrairyamasevakāḥ || 32 ||
[Analyze grammar]

prāṇyudvegaprakartṝṃśca daṃdaśūke śatānanāḥ |
dandaśūkāstroṭayanti grasante ca muhurmuhuḥ || 33 ||
[Analyze grammar]

guhāvivarakusūlabilādau prāṇirundhakān |
yāmyā rundhanti dhūmādyairvahninā sagareṇa ca || 34 ||
[Analyze grammar]

māṃsādikhādakān dūtāḥ khādanti kṣudhitāḥ punaḥ |
karasparśeṇa jāyante pūrṇāḥ khādanti tānpunaḥ || 35 ||
[Analyze grammar]

āḍhyābhimāninaṃ tiryakprekṣakaṃ pāpakāriṇam |
sūcīmukhe pātayitvā sūtraiḥ parivayanti ca || 36 ||
[Analyze grammar]

dīnadurbalasatpātramīkṣate kruddhacakṣuṣā |
tannetre vajratuṇḍairutpāṭayanti patattriṇaḥ || 37 ||
[Analyze grammar]

anyeṣāṃ tu vṛkṣaphalacauryakartārameva tu |
tāle uttolya bhūbhāge pātayanti yamānugāḥ || 38 ||
[Analyze grammar]

araṇyakṣetradagdhāraṃ mahājvāle nipātya vai |
vahnau taṃ bharjayantyeva yamadūtā muhurmuhuḥ || 39 ||
[Analyze grammar]

aśuddhaṃ bhojayitāraṃ śamale pātayanti hi |
tatrā'śuddhaṃ ca durgandhaṃ bhojayanti yamānugāḥ || 40 ||
[Analyze grammar]

kaṃcukapuṭakaṃ ye cotkṛtya dravyaṃ haranti tān |
vikartane kṣipantyugrāḥ kṛntanti prapibantyasṛk || 41 ||
[Analyze grammar]

bhittyādau vivaraṃ kṛtvā corayanti ca ye dhanam |
tānadhaḥśirasā vyomni tolayanti talāgninā || 42 ||
[Analyze grammar]

dugdhadānannatoyābhyāṃ sevante na paśūnnarāḥ |
rudhirāndhe pātayanti rudhiraṃ tat pibanti te || 43 ||
[Analyze grammar]

dṛśyā'narhe duṣṭacakṣuḥprayoktāraṃ yamānugāḥ |
śūlaṃ netre praviśyaiva daṇḍaṃ dadati tatra vai || 44 ||
[Analyze grammar]

agninā randhitā jīvāḥ pācayanti ca taṃ tu te |
pāṣāṇairbhūtahantṝnvai pātayanti śilopari || 45 ||
[Analyze grammar]

nirāgaso bandhayitā badhyate nigaḍairyamaiḥ |
jñātvā jantucūrṇayitā cūrṇyate lohayantrakaiḥ || 46 ||
[Analyze grammar]

jīvānduḥkhapradātā tu kākole paripīḍyate |
ājīvanaṃ duḥkhadātā mithyābhiśaṃsakaśca yaḥ || 47 ||
[Analyze grammar]

mārayitvā khādayitvā jīvayitvā yamānugāḥ |
kṛntanti saṃchedayanti khādayanti hyamuṃ yamāḥ || 48 ||
[Analyze grammar]

patnyai duḥkhapradātā yaḥ svāmine duḥkhadā ca yā |
āśritānāṃ duḥkhadā ye te patanti tu raurave || 49 ||
[Analyze grammar]

ityevaṃ rakṣakā yatra bhakṣakā luñcajīvinaḥ |
sarve te nārakāḥ pāṭyā jāyante yamakiṃkaraiḥ || 50 ||
[Analyze grammar]

ityevaṃ nirayāḥ santi prāṇināṃ niṣkṛtātmakāḥ |
yatra śuddhyanti pāpiṣṭhāstato gacchanti janmane || 51 ||
[Analyze grammar]

yasya yādṛk janma karma vidyate prāk tu saṃcitam |
tasya tathaiva mārgeṇa yamaḥ prāpayate janim || 52 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne catvāriṃśannarakagāmināṃ pāpaphalavarṇananāmā ṣaṭṣaṣṭitamo'dhyāyaḥ || 66 ||
[Analyze grammar]