Chapter 55

śrīnārāyaṇa uvāca |
śṛṇu lakṣmi  raivatākhyo manurvaikuṇṭhamāptavān |
tuṣṭāva ca mahāpremṇā dayāluṃ māṃ tvayā'nvitam || 1 ||
[Analyze grammar]

namaḥ saccitsvarūpāyā''nandasandohavārdhaye |
namastvekasvarūpāyobhayarūpāya te namaḥ || 2 ||
[Analyze grammar]

namo hiraṇyakeśāya śmaśrvaśmaśrumate namaḥ |
namaḥ stanyā'stanyavate bījā'bījadhṛte namaḥ || 3 ||
[Analyze grammar]

namo bahiḥ pracihnāyāṃ'bahiścihnāya te namaḥ |
namo viśvakpravālāya kvacidvālāya te namaḥ || 4 ||
[Analyze grammar]

namo dakṣiṇasattvāya vāmasattvāya te namaḥ |
nama ūrdhvasvarūpāyā'nūrdhvarūpāya te namaḥ || 5 ||
[Analyze grammar]

nama ādheyarūpāyā''dhārarūpāya te namaḥ |
namo dvidalarūpāyā'ṅkuraprasūtaye namaḥ || 6 ||
[Analyze grammar]

namo vaikuṇṭhavāsāya kuṇṭhavāsāya te namaḥ |
namo mānasarūpāya bhaktarūpāya te namaḥ || 7 ||
[Analyze grammar]

namaste karuṇāsindho namaḥ saurāṣṭravardhine |
namo raivatavāsāya dāmodarāya te namaḥ || 8 ||
[Analyze grammar]

namaḥ patnīvratākhyāya namaḥ kṛṣṇāya viṣṇave |
namo'nantasvarūpāya mamā'ntaryāmiṇe namaḥ || 9 ||
[Analyze grammar]

svatantrastvaṃ mahāviṣṇo na jāne tvaṃ kimicchasi |
bhakto yadarthamāhūtastadvai vidhātumarhasi || 10 ||
[Analyze grammar]

dāso'yaṃ kṛpayā viṣṇo neyaḥ pāraṃ bhavādhvanaḥ |
yatra te caraṇau stastaddeśo me hyaraṇaṃ bhavet || 11 ||
[Analyze grammar]

na vai tyājyaḥ kṛpānātha dāso'yaṃ śaraṇāgataḥ |
karuṇayā gṛhīto'yaṃ na vai taṃ tyaktumarhasi || 12 ||
[Analyze grammar]

yadiṣṭaṃ kṣemakṛlloke tadiṣṭaṃ saṃvidhīyatām |
iti stutvā virarāma raivato bhaktasattamaḥ || 13 ||
[Analyze grammar]

prāha taṃ bhagavān śrīmān vaikuṇṭhādhipatiḥ prabhuḥ |
gṛhāṇemāṃ cāṇurūpāṃ mama vaikuṇṭhabhūmikām || 14 ||
[Analyze grammar]

svayaṃbhvākhyacaturvaktrabrahmaṇo golake tava |
priyavratasya bhūrājye paścimaṃ vivaraṃ mahat || 15 ||
[Analyze grammar]

suratrāsapathaṃ chidraṃ śatagavyūtirāyatam |
pūraṇīyaṃ bhūmikayā vikasantyā tvayaiva tat || 16 ||
[Analyze grammar]

suratrāṇaṃ bhavettena saurāṣṭrasaṃjñatāṃ vrajet |
tatrā'haṃ śrīsamāyukto nivatsye tava kāraṇāt || 17 ||
[Analyze grammar]

anyad yannāradenoktaṃ vidhāsye tatra coṣitaḥ |
ityabhidhāya devena vaikuṇṭhā'ṇuḥ samarpitaḥ || 18 ||
[Analyze grammar]

tamādāyā''jñayā viṣṇoḥ raivataḥ punarāgataḥ |
yathoktaṃ tamaṇuṃ yāvadvivare nyastumicchati || 19 ||
[Analyze grammar]

tāvadvipulatāṃ yātaṃ śatagavyūtirāyatam |
jāḍye bhūstaratulyaṃ tad divyaṃ paṃcaguṇātmakam || 20 ||
[Analyze grammar]

yathāpekṣaṃ yathāsthānaṃ sthitaṃ chidraṃ prapūritam |
adivye divyasaṃmiśrāt sandhiḥ śvetaraṇātmakaḥ || 21 ||
[Analyze grammar]

śvetā'khātaśca bhūḥ śvetā vyāvartayati maṇḍalam |
śatagavyūtimātraṃ tanmaṇḍalaṃ śyāmapāṇḍuram || 22 ||
[Analyze grammar]

divyatyakhaṇḍabhūmadhyaṃ surāṣṭraṃ raivatā'rjitam |
raivatastanmadhyabhāge viṣṇuṃ dhyeyaṃ vidhāya ca || 23 ||
[Analyze grammar]

sarvadā''rādhanaparo hyāste visṛjya māyikam |
nārāyaṇaḥ svayaṃ tasmai datte sakaruṇekṣaṇam || 24 ||
[Analyze grammar]

dadau cāsmai maṇeḥ svasya sahasrāṃśaṃ tadā hariḥ |
sa vai sthaulyaṃ samāpannaḥ śailarūpaṃ paraṃ dadhau || 25 ||
[Analyze grammar]

so'yaṃ saṃsthāpito madhye surāṣṭrasyā'tha nāmataḥ |
neturnāmnā hyabhūt khyāto raivatācala ityayam || 26 ||
[Analyze grammar]

raivatena puraṃ tatra nirmitaṃ raivatāhvayam |
raivataḥ sarvadā viṣṇoḥ smaraṇe kīrtane śrave || 27 ||
[Analyze grammar]

sevane hyarcane stotre dāsye sarvanivedane |
hyavartata mahābhakto jāgratsvapnasuṣuptiṣu || 28 ||
[Analyze grammar]

rājyabhāre vyavahāre bhojane śayane tathā |
sarvathā devadeveśa nārāyaṇaṃ samābhajat || 29 ||
[Analyze grammar]

tatraikadā mahāmaṃce śayāno yoganidrayā |
ātmani śrīhariṃ dhyāyan samādhiṃ tvagamaddhi saḥ || 30 ||
[Analyze grammar]

nārāyaṇecchayā tasya dakṣiṇasya bhujasya ca |
svarṇāṃgado dravo bhūtvā patito maṃcake'bhavat || 31 ||
[Analyze grammar]

svarṇavarṇaḥ kiśoro'bhūt śvetakāntiḥ śaśīva ha |
śītaśvetaprakāśasya paridhiḥ sarvato'bhavat || 32 ||
[Analyze grammar]

sarvataḥ śvetakiraṇairvyāpto'bhūdityakhaṇḍitaḥ |
prāsādaṃ nagaraṃ deśaṃ dugdhadhavalatejasā || 33 ||
[Analyze grammar]

kurvan vitimiraṃ sarvamāste sma maṃcake tu saḥ |
yadṛcchayā mahābhakto raivato jāgrato'bhavat || 34 ||
[Analyze grammar]

khaṭvāyāṃ svāṃgadotpannaṃ kumāraṃ pratyapadyata |
candramasamiva śuklaṃ saumyaṃ tejomayaṃ śubham || 35 ||
[Analyze grammar]

dikṣu vidikṣu dhavalīkurvantamakhilaṃ jagat |
jātamātraṃ susaṃskṛtaṃ ṣoḍaśābdaṃ sadāprabham || 36 ||
[Analyze grammar]

cakravartidhanuścihnaṃ kuśalaṃ jñaptisaṃbhṛtam |
jñātvā rājyāsanaṃ datvā raivato raivatācale || 37 ||
[Analyze grammar]

viśālāyāṃ kandarāyāṃ jagāmopāsanākṛte |
tatra samādhimāpanno raivataḥ sarvadā harau || 38 ||
[Analyze grammar]

ekātmanā sthito yāvatpaṃcamo manurābhavet |
athottare mahākāle kalpe kalpe tu sa svayam || 39 ||
[Analyze grammar]

satye mahāvibhūtyākhye vartiṣyata iti sthitiḥ |
tatra tatra tasya vaṃśe khaṭavāṃgadanṛpādayaḥ || 40 ||
[Analyze grammar]

bhūmicakrapraśāstāro bhaviṣyantyabdakoṭiṣu |
khaṭvāyāmaṃgadājjāto nāmnā khaṭvāṃgadaḥ kṛtaḥ || 41 ||
[Analyze grammar]

ūrdhvapuṇḍraṃ svarṇarekhaṃ lalāṭe tilakaṃ tvaci |
svābhāvikamabhūttasya madhyaraktābhabindukam || 42 ||
[Analyze grammar]

kaṇṭhe svarṇamayī mālā tvaci svābhāvikī hyabhūt |
sarvaiśvaryāśrayo bhūbhṛt tejasā timiraṃ haran || 43 ||
[Analyze grammar]

vimānamadhiruhyā'thā'ntarīkṣe vyacaranmuhuḥ |
dūrāddūrataraṃjñātaṃ amādau timiraṃ niśi || 44 ||
[Analyze grammar]

yatra candraśūnyadeśe tatrā'gacchad vihāyasā |
timiraṃ nāśayan sarvaṃ dvitīyaścandramā iva || 45 ||
[Analyze grammar]

māsi māsi bhraman vyomni śūnyadikṣu niśāpateḥ |
lokān karoti sā''lokān śītaraśmīn prasārayan || 46 ||
[Analyze grammar]

athaivaṃ tu kṛte tatra samudrāḥ pārvaṇāḥ sadā |
kṣubdhā bhūmistaraplāvā velābhirabhavanmuhuḥ || 47 ||
[Analyze grammar]

velā ūrdhvaṃ samāyānti nivartante na vai tathā |
bhūmayastu jalākrāntā jāyante sma tadā tadā || 48 ||
[Analyze grammar]

ekadvitrikalāpoṣyā auṣadhyaḥ prāyaśastadā |
poṣyā'tiśaityasaṃghātādajīrṇatvātkṣayaṃ yayuḥ || 49 ||
[Analyze grammar]

ityevaṃ hānimālokya vimānaṃ svaṃ nyavārayat |
tādṛśo'bhūnmahādivyaḥ śītatejomayaḥ svarāṭ || 50 ||
[Analyze grammar]

karoti śrīharerbhaktiṃ kārayatyaparān janān |
udghoṣayati prātaḥ sa viṣṇuḥ pūjyaḥ sadā janaiḥ || 51 ||
[Analyze grammar]

puṇḍraṃ sacandrakaṃ kāryaṃ bhojyaṃ prārpyaṃ harau sadā |
sāyaṃ viṣṇorgṛhe gatvā stutyo devo janārdanaḥ || 52 ||
[Analyze grammar]

sādhvyaḥ santaścātimānyā bhojyapānādidāpanaiḥ |
hotavyamanale deyaṃ devebhyo bhaktipūrvakam || 53 ||
[Analyze grammar]

nārāyaṇaparo yo vai bhajennārāyaṇaṃ sadā |
na mayā tu karastasmād grahītavyaḥ kadācana || 54 ||
[Analyze grammar]

evaṃ tena kṛtā bhūmiḥ sarvā vaiṣṇavamaṇḍitā |
nā'bhakto hyabhavat kaściccakre tasminpraśāsati || 55 ||
[Analyze grammar]

evaṃ bhaktiyute cakre śāntaḥ khaṭvāṃgado nṛpaḥ |
rājyacintāṃ parityajya bhagavantaṃ sadā'smarat || 56 ||
[Analyze grammar]

vimānaṃ kandare sthāpya svayamārādhane'bhavat |
kāle bahvarbude krānte tapase hyakaronmataḥ || 57 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne lakṣmīśastutimaṇibhūmyaṇugrahaṇabhūvivarapūraṇasatejaskā'paracandrībhavanatejaḥprasāraṇabhaktividhāpanādinirūpaṇanāmā pañcapañcāśattamo'dhyāyaḥ || 55 ||
[Analyze grammar]