Chapter 52

śrī lakṣmīruvāca |
kadā yajñaḥ pravṛttaḥ sa kimabhūttatra pāpakṛt |
kena kṛtaḥ kathaṃ vasoḥ patanaṃ samabhūtkutaḥ || 1 ||
[Analyze grammar]

śrīnārāyaṇa uvāca |
prathame tu yuge tretānāmake rājacihnavān |
uttānapādaputrastu vasunāmā'bhavannṛpaḥ || 2 ||
[Analyze grammar]

viṣṇoraṃśena jāyante pṛthivyāṃ cakravartinaḥ |
ājānubāhavaścaiva dhanurhastā vṛṣāṃkitāḥ || 3 ||
[Analyze grammar]

tāmraprabhauṣṭhadantauṣṭhāḥ śrīvatsāścordhvaromaśāḥ |
keśasthitā lalāṭorṇā jihvā caiṣāṃ pramārjanī || 4 ||
[Analyze grammar]

nyagrodhapariṇāhāśca siṃhaskandhāḥ sumehanāḥ |
gajendragatayaścaiva mahāhanava eva ca || 5 ||
[Analyze grammar]

aiśvaryeṇā'ṇimādyena prabhuśaktyā balena ca |
annena tapasā caiva ṛṣīnabhibhavanti vai || 6 ||
[Analyze grammar]

nayena tapasā caiva devadānavamānuṣān |
abhibhavanti yogena viṣṇupradattaśaktibhiḥ || 7 ||
[Analyze grammar]

pādayoścakramatsyau ca śaṃkhapadme tu hastayoḥ |
dhanurbhuje hyurau chatraṃ rekhāstāścakravartinām || 8 ||
[Analyze grammar]

cakraṃ ratho maṇiḥ khaḍgaṃ dhanūratnaṃ ca paṃcamam |
keturnidhiśca saptaite ratnaśreṣṭhā acetanāḥ || 9 ||
[Analyze grammar]

rājñī purohitaścaiva senānī rathasārathiḥ |
mantryaśvaḥ kalabhaścaite ratnaśreṣṭhāḥ sacetanāḥ || 10 ||
[Analyze grammar]

divyaitāni caturdaśa sarveṣāṃ cakravartinām |
antarikṣe samudre ca pātāle parvateṣu ca || 11 ||
[Analyze grammar]

ahatā gatayasteṣāṃ catasraścakravartinām |
cakravartī bhavedaṃśastasya śrīparamātmanaḥ || 12 ||
[Analyze grammar]

tena tasya prajāyāṃ vai prādurbhavanti śaktayaḥ |
divyāśca laukikāścāpi rājyasīmāntabodhikāḥ || 13 ||
[Analyze grammar]

dūraśravaṇayantrāṇi dūrabhyo dūradarśanāḥ |
kālamānasuyantrāṇi dūravācakaraśmayaḥ || 14 ||
[Analyze grammar]

dūramūrtidarśakāni divyakācāni bhūriśaḥ |
dehānāvaraṇadṛṣṭipradavidyutprasādhanam || 15 ||
[Analyze grammar]

dhātutantudhṛtividyutprakāśāḥ supradīpakāḥ |
agniyantrodbhavodyogā jalayantrāṇi bhūriśaḥ || 16 ||
[Analyze grammar]

jalāntargatiyānāni vyomayānāni cāpyatha |
vimānāni hyasaṃkhyāni kācikā dūradarśinī || 17 ||
[Analyze grammar]

vāyutantudhvanigrāhyaśabdaśaktiniyantraṇā |
pravāsayānayantrāṇi bhūvimānāni bhūriśaḥ || 18 ||
[Analyze grammar]

jalapravāsayantrāṇi meghotpādakaśaktayaḥ |
sainikā vyomagatikā jalāntargatikā api || 19 ||
[Analyze grammar]

dhūmrayānāni bāṣpāṇāṃ śakaṭāni rathāstathā |
mohamāraṇadravyāṇi saṃhārāṇḍāni bhūriśaḥ || 20 ||
[Analyze grammar]

cakradrāvaṇagatayaścauṣadhīnāṃ suśaktayaḥ |
grahāntaragatiścāgnau gatiḥ pṛthvyudarekṣaṇam || 21 ||
[Analyze grammar]

rūpāntaradhṛtiścāpi hayadṛśyabhavanādikam |
bhautikyaḥ śaktayaścaitāḥ sahā''gacchanti tena vai || 22 ||
[Analyze grammar]

tattacchaktimayā devā mānuṣā vā bhavanti ca |
tattadāviṣkṛtairbhaumairjalīyaistaijasairapi || 23 ||
[Analyze grammar]

dhātujairmānasaiścaiva sādhanaiścakravartinaḥ |
mānavā rājyabhāraṃ nirvahanti cālayanti ca || 24 ||
[Analyze grammar]

lokāntaragataṃ rājyaṃ dvīpāntaragataṃ ca vā |
samudrāntaritaṃ rājyaṃ karoti nikaṭe iva || 25 ||
[Analyze grammar]

paśyati ca śṛṇotyapi spṛśatyapi prajighrati |
vadati cānubhavati svagṛhe iva saṃsthitam || 26 ||
[Analyze grammar]

cakravartiprajāḥ sarvāstatsamā bhāgyaśālinī |
tatsamānaprabhogā ca puṇyayugabalādbhavet || 27 ||
[Analyze grammar]

uttānapādatanujo vyomagāmī vasurnṛpaḥ |
cakravartyabhavaddharmasatyejyādānasattapāḥ || 28 ||
[Analyze grammar]

tadā viśvabhugindraśca yajñaṃ prāvartayacchubham |
devaistu sahitaiḥ sarvairmunibhiḥ ṛṣibhistathā || 29 ||
[Analyze grammar]

pitṛbhiryakṣarākṣasagandharvakinnaroragaiḥ |
mānuṣairnadanadībhiḥ samudraistīrthaparvataiḥ || 30 ||
[Analyze grammar]

nakṣatradaityadānavasādhusādhvīsutattvakaiḥ |
jalasthalacarairvṛkṣavallīgulmalatādibhiḥ || 31 ||
[Analyze grammar]

sātvikairmanubhiścāpi rājasairnaramānavaiḥ |
tāmasairdevadevībhiḥ sahitaścākaronmakham || 32 ||
[Analyze grammar]

mānasī maithunī sṛṣṭiḥ sarvā tatrā'gamanmudā |
athā'śvamedhe vitate tāmasāścā'rdhatāmasāḥ || 33 ||
[Analyze grammar]

yajante paśubhirmedhyairhutvā māṃsapriyāśanāḥ |
karmavyagreṣu ṛtvikṣu santate yajñakarmaṇi || 34 ||
[Analyze grammar]

saṃpragīteṣu teṣvevamāgameṣvatha susvaram |
parikrānteṣu laghuṣu cādhvaryuvṛṣabheṣu ca || 35 ||
[Analyze grammar]

āhuteṣu ca deveṣu yajñabhāṃkṣu mahātmasu |
ālabdheṣu ca medhyeṣu tathā paśugaṇeṣu vai || 36 ||
[Analyze grammar]

haviṣyagnau hūyamāne devānāṃ devahotṛbhiḥ |
ya indriyātmakā devā yajñabhājastathā tu ye || 37 ||
[Analyze grammar]

kalpādiṣu ca ye devāstān yajante hyadhvaryavaḥ |
tadā tu sātvikāḥ praiṣakāle ye vai maharṣayaḥ || 38 ||
[Analyze grammar]

vīkṣyotthitā adhvaryavo dīnānpaśugaṇān sthitān |
papracchurindraṃ saṃbhūya ko'yaṃ yajñavidhistava || 39 ||
[Analyze grammar]

adharmo balavāneṣo hiṃsākāryecchayā tava |
neṣṭaḥ paśuvadhastveṣastava yajñe surottama || 40 ||
[Analyze grammar]

adharmo dharmaghātāya prārabdhaḥ paśubhistvayā |
nā'yaṃ dharmo hyadharmo'yaṃ na hiṃsā dharma ucyate || 41 ||
[Analyze grammar]

hiṃsā nāma śarīrasya sajīvasya vighānatam |
sarveṣāṃ dehināṃ tādṛk duḥkhaṃ nānyattu vidyate || 42 ||
[Analyze grammar]

yathā'kasmācchastraghātād duḥkhaṃ bhavati prāṇinām |
yatkarmaṇā bhaved duḥkhaṃ pāpaṃ tattu prakīrtitam || 43 ||
[Analyze grammar]

tasmānna hiṃsayā puṇyaṃ kasyāpi ca kadāpi ca |
kathaṃ tvaṃ kuruṣe pāpaṃ devo bhūtvā surādhipa || 44 ||
[Analyze grammar]

nirāgasāṃ ca maunānāṃ parādhīnaprajīvinām |
hiṃsanaṃ mā kuru cendra karmaitannindyameva yat || 45 ||
[Analyze grammar]

ṛṣīnindrastadā prāha yajñe hiṃsā sukhapradā |
yajñe hutā ime jīvā yāsyanti svargamīpsitam || 46 ||
[Analyze grammar]

mokṣo'tha bhavate teṣāṃ yān bhuṃkte'gnimukho hariḥ |
paśuyoneśca mokṣo'pi duḥkhabāhulyanibhṛteḥ || 47 ||
[Analyze grammar]

ṛṣayaḥ prāhurindraivaṃ yajñe homācca mokṣaṇam |
duḥkhanāśastathā svargaṃ  sukhaṃ tādṛk na ko labhet || 48 ||
[Analyze grammar]

sarpasatre bhāviyuge kuhakena saha dvijāḥ |
tava homaṃ kariṣyanti tadā te śikṣaṇaṃ bhavet || 49 ||
[Analyze grammar]

pārameṣṭhyaṃ caindrapadaṃ sārvabhaumaṃ rasātalam |
vairājaṃ tattvadhāmāni prākṛtaṃ lokaghaṭṭanam || 50 ||
[Analyze grammar]

sarve māyāphenajanyā nirayā brahmaṇo hareḥ |
tavā'pīndra  padaṃ tādṛṅ niraya eva nā'param || 51 ||
[Analyze grammar]

duḥkhadaṃ kleśabahulaṃ paśuprāyaṃ vibhāti naḥ |
tasmādindra  imaṃ dehaṃ padaṃ caindraṃ parityaja || 52 ||
[Analyze grammar]

yajñe svayaṃ paśurbhūtvā homaṃ kuru nijasya vai |
yadi svahome trāsaste svaṃ homaṃ na kariṣyase || 53 ||
[Analyze grammar]

vayaṃ tu ṛṣayastvāṃ vai juhmo'vyagraḥ sthiro bhava |
tena homena te rājan paraṃ svargaṃ bhaviṣyati || 54 ||
[Analyze grammar]

yadvai brahmapadaṃ prāhurmokṣasthānamanuttamam |
tatra gantā'si cāgaccha tvāṃ prajuhmo hare'dya vai || 55 ||
[Analyze grammar]

tava māṃsena yajñeśaḥ prasannaḥ saṃbhaviṣyati |
asmākamapi puṇyaṃ syānmāṃsahomena te matam || 56 ||
[Analyze grammar]

annasyendratvalābhaḥ syātpaśavaḥ syuḥ sujīvinaḥ |
lābhāḥ subahavaścendra  hate tvayi bhavanti hi || 57 ||
[Analyze grammar]

tata āgaccha devendra bhavān huto bhavatviti |
ityevamṛṣibhiścote śacyā hyākrandanaṃ kṛtam || 58 ||
[Analyze grammar]

indro'pi trāsamāpanno maraṇakṣaṇadarśanāt |
maṇḍape ca sadasyeṣu mahānkolāhalo'bhavat || 59 ||
[Analyze grammar]

indro hūyate ṛṣibhirbahvaniṣṭaṃ bhavediti |
indrastu maraṇaśrāvāt mukhena śyāmalo'bhavat || 60 ||
[Analyze grammar]

tejastimiratāṃ yātaṃ śuṣkāsyo hyabhavatkṣaṇāt |
trāsāt hṛdayakaṃpaśca vepathurdehajo'bhavat || 61 ||
[Analyze grammar]

śaktihīnāni gātrāṇi hyabhavanmaraṇaśravāt |
athavā ṛṣibhiḥ proktaṃ mā te homo'stu devarāṭ || 62 ||
[Analyze grammar]

bahavaḥ santi hotārasteṣāṃ homo bhavatvatha |
adhvaryavaḥ ṛtvijāśca hotāraśca sadasyakāḥ || 63 ||
[Analyze grammar]

aneke santyupasthitāste hutāḥ saṃbhavantviti |
tenā'dya prīyatāṃ kṛṣṇaḥ paśavaḥ santu rakṣitāḥ || 64 ||
[Analyze grammar]

hutāḥ sarve gamiṣyanti brahmaṇaḥ padamavyayam |
devamānuṣanirayāt prayāsyanti pramokṣaṇam || 65 ||
[Analyze grammar]

śrutvaitadindraḥ svastho'bhūtkathaṃcijjīvanāśayaḥ |
adhvaryuhotṛpramukhāścintāmagnāstadā'bhavan || 66 ||
[Analyze grammar]

aho kaṣṭamiti procurnecchāmo mokṣaṇaṃ jaguḥ |
na ca muktiṃ na vai homaṃ na bhojyaṃ na ca dakṣiṇām || 67 ||
[Analyze grammar]

vastu kimapi necchāmastava sarvaṃ bhavatviti |
na sthāsyāmo vayaṃ cātra maraṇaṃ kasya vai priyam || 68 ||
[Analyze grammar]

gamiṣyāmo gṛhānsvānsvān homadravyāṇi no vayam |
ityevaṃ trāsamāptānāṃ mahān kolāhalo hyabhūt || 69 ||
[Analyze grammar]

tāvattatra samāyāto rājoparicaro vasuḥ |
vimānātsa samuttīrya yajñamaṇḍapamāgamat || 70 ||
[Analyze grammar]

indrādibhiḥ satkṛtaḥ sannyaṣīdanmadhyamāsane |
ṛṣibhistu tadā proktaṃ hiṃsāyajño na vaidikaḥ || 71 ||
[Analyze grammar]

āgamena sadā yajñaṃ karotu yadihecchasi |
vidhidṛṣṭena yajñena dharmamavyayahetunā || 72 ||
[Analyze grammar]

yajñabījaiḥ suraśreṣṭha  yeṣu hiṃsā na vidyate |
trivarṣaparamaṃ kālamuṣitairaprarohibhiḥ || 73 ||
[Analyze grammar]

eṣa dharmo mahānindra svayaṃ vicārya sādhyatām |
evaṃ viśvabhugindrastu munibhistattvadarśibhiḥ || 74 ||
[Analyze grammar]

proktaste tu vivādena khinnā divyā maharṣayaḥ |
saṃdhāya paśumubhayaṃ papracchuśceśvaraṃ vasum || 75 ||
[Analyze grammar]

vaso rājankathaṃ dṛṣṭastvayā yajñavidhirnṛpa |
auttānapāde prabrūhi saṃśayaṃ chindhi naḥ prabho || 76 ||
[Analyze grammar]

śrutvā sarvamubhayeṣāmavicārya balābalam |
vedaśāstramanusṛtya yajñatattvamuvāca ha || 77 ||
[Analyze grammar]

indrasya ca sureśasya chāyāmāśritya pakṣataḥ |
rāgāccā'pyavirodhena kṣattrāṃśaprabalena ca || 78 ||
[Analyze grammar]

yathopadiṣṭairyaṣṭavyamiti hovāca pārthivaḥ |
yaṣṭavyaṃ paśubhirmedhyairatha bījaiḥ phalaistathā || 79 ||
[Analyze grammar]

hiṃsāsvabhāvo yajñasya iti me darśayatyasau |
yathehasaṃhitāmantrā hiṃsāliṃgā maharṣibhiḥ || 80 ||
[Analyze grammar]

dīrgheṇa tapasā yuktairdarśanaistārakādibhiḥ |
tatprāmāṇyānmayā coktaṃ tasmānmāṃ mantumarhatha || 81 ||
[Analyze grammar]

yadi pramāṇaṃ tānyeva mahāvākyāni vai dvijāḥ |
tadā prāvartatāṃ yajño hyanyathā no'nṛtaṃ vacaḥ || 82 ||
[Analyze grammar]

evaṃ prāptottarāste vai yuktātmānastapodhanāḥ |
bhūtvā hyadhomukhā vasuṃ prāhurmā vada pārthiva || 83 ||
[Analyze grammar]

vedārthastalasparśitvabuddhyā naivā''hṛtastvayā |
vedasya nahi tātparyaṃ kadāpi hiṃsane matam || 84 ||
[Analyze grammar]

svabhāvaprāptahiṃsāyā nivṛttau yuktikṛdvacaḥ |
anāloḍyocyate hiṃsā vidhiścetyanṛto bhavān || 85 ||
[Analyze grammar]

mithyāvādī vasuḥ so'yaṃ satyaṃ naiva bravītyapi |
ityuktamātre nṛpatiḥ praviveśa rasātalam || 86 ||
[Analyze grammar]

ūrdhvacārī vasustvāsīd rasātalacaro'bhavat |
vasudhā'dhaḥ sadāvāsī mithyāvākyena so'bhavat || 87 ||
[Analyze grammar]

tasmānna vācyamekena bahujñenāpi saṃśayāt |
bahudvārasya dharmasya sūkṣmāt sūkṣmatarā gatiḥ || 88 ||
[Analyze grammar]

tasmānna niścayādvaktuṃ dharmaḥ śakyastu kenacit |
tato na hiṃsā dharmasya dvāraṃ bhavati karhicit || 89 ||
[Analyze grammar]

patraṃ mūlaṃ phalaṃ śākaṃ munyannaṃ paya eva ca |
yajñe datvā mahīyante svarge loke tapodhanāḥ || 90 ||
[Analyze grammar]

adrohaścā'pyalobhaśca damau bhūtadayā tapaḥ |
brahmasevā ca satyaṃ ca hyupakāraḥ kṣamā dhṛtiḥ || 91 ||
[Analyze grammar]

sanātanasya dharmasya mūlānyetāni sarvathā |
tasmād drohaṃ mā kuru tvaṃ paśūnmocaya yajñataḥ || 92 ||
[Analyze grammar]

phalānnādidravyahavyairyajñaṃ kuru sureśvara |
ityetadvākyamādṛtya śakreṇa hatapāyasaiḥ || 93 ||
[Analyze grammar]

yajñaḥ kṛtastataḥ paścād yajñāstu sāttvikāḥ sadā |
vaiṣṇavāḥ sarvathā tretāyāṃ prāvartanta cā'druhaḥ || 94 ||
[Analyze grammar]

ṛṣayastu tadārabhya śaṃ prākurvan susattapaḥ |
yajñāṃśca vaiṣṇavāṃścakrurahiṃsādharmasaṃbhṛtān || 95 ||
[Analyze grammar]

ajena tu yajeteti ajastraivārṣiko brihiḥ |
na jāyateṃ'kuro yasya taddhānyamaja ucyate || 96 ||
[Analyze grammar]

maithune mādake māṃse tāmasānāṃ svabhāvajā |
pravṛttirbhavatīti tannirodhāya vidhirmataḥ || 97 ||
[Analyze grammar]

maithunecchā yadi tīvrā vivāhena praśāmyatu |
yadīcchā māṃsarasane yajñenaiva praśāmyatu || 98 ||
[Analyze grammar]

yadīcchā mādake pāne sautrāmaṇyā praśāmyatu |
kathaṃcidanubhūyaitānnivṛttāḥ saṃbhavantviti || 99 ||
[Analyze grammar]

vidhipūrvo niṣedhaḥ sa na vidhistattraye'pi vai |
madyamāṃsamithunairyo nā''krānto mukta eva saḥ || 100 ||
[Analyze grammar]

ahiṃsā paramo dharmo brahmacaryaṃ mahattapaḥ |
amādakaṃ parā śuddhistribhirbrahma suvindati || 101 ||
[Analyze grammar]

athāpi kālavegāśca tāmasāhāramiśraṇāt |
annādilābhavaidhuryād rasanārasalolanāt || 102 ||
[Analyze grammar]

tāmasaistāmasī rītirgṛhyate tattrayātmikā |
teṣāṃ daṇḍapradānārthaṃ dharmo vaivasvato yamaḥ || 103 ||
[Analyze grammar]

vartate nyāyakartā śrīnārāyaṇasamīhayā |
tadanyāyaparā śuddhiryamaloke karoti saḥ || 104 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne cakravarticihnamahendrayajñasambandhihiṃsāpratipādakoparicaravasuprapatanādinirūpaṇanāmā |
dvipaṃcāśattamo'dhyāyaḥ || 52 ||
[Analyze grammar]