Chapter 53

śrīlakṣmīruvāca |
prāṇapriya trikālajña sarpasatra kadā'bhavan |
kathaṃ kasmād yataścendrastatra huto mahādvijaiḥ || 1 ||
[Analyze grammar]

yamo vaivasvataścāpi kadā''sīt kiṃ karoti saḥ |
kīdṛśo yamalokaśca brūhi te'haṃ yadi priyā || 2 ||
[Analyze grammar]

śrīnārāyaṇa uvāca |
śṛṇu kathāṃ tāṃ surasāṃ sarpasatramayīṃ priye |
ādye tu dvāpare jātāṃ kathayāmi samāsataḥ || 3 ||
[Analyze grammar]

jāte tretāyuge kṣīṇe dvāparaḥ pratipadyate |
praṇaśyanti prajānāṃ vai tretāyāḥ siddhayastu yāḥ || 4 ||
[Analyze grammar]

udbhavanti tadā doṣā adhairyaṃ lobha ityapi |
vāṇijyaṃ ca tathā yuddhaṃ tattvajñānā'vinirṇayaḥ || 5 ||
[Analyze grammar]

varṇānāṃ svārthasaṃbhedo kāryāṇāṃ cā'pyanirṇayaḥ |
yāñca vadhaḥ paṇo daṇḍo mado daṃbho'kṣamā'balam || 6 ||
[Analyze grammar]

eṣā rajastamaḥprāyā pravṛttirdvāpare tadā |
dharmabhedo'bhavattena rāgadveṣau kṣaṇe kṣaṇe || 7 ||
[Analyze grammar]

karaṇānāṃ tu vaikalyāt kāraṇānāmaniścayāt |
doṣāṇāṃ darśanāccaiva matibhedāstadā nṛṇām || 8 ||
[Analyze grammar]

karmaṇā manasā vācā kṛcchrādvārtā prasiddhyati |
kāyakleśastu bahulo dharmāṇāṃ saṃkarastathā || 9 ||
[Analyze grammar]

varṇāśramaparidhvaṃsāḥ kāmadveṣau mahābalau |
svamānaṃ cā'parā'mānaṃ doṣī hyāsan mahābalāḥ || 10 ||
[Analyze grammar]

asatyavācanaṃ prāyo vyāpāre vyavahārake |
svasvodarabharatvaṃ ca prāyaśaḥ parivartate || 11 ||
[Analyze grammar]

etādṛśadvāparasya samayasya prabhāvataḥ |
gṛhavanto janāḥ svīyaṃ svatvaṃ kartuṃ samudyatāḥ || 12 ||
[Analyze grammar]

kṣetraṃ gṛhaṃ samudyānaṃ vāṭikā paśavo drumāḥ |
vāpyaḥ khanyo vanānyārdrāraṇyāni ca sarāṃsi ca || 13 ||
[Analyze grammar]

yeṣāṃ svatvāvṛtāsteṣāṃ bhogyā bhavanti te tadā |
ityevaṃ mānasīṃ vṛtti saṃkocapravaṇāṃ sadā || 14 ||
[Analyze grammar]

manujānāṃ vilokyaiva satyaṃ vilīnatāṃ gatam |
pṛthvyā rasaḥ kṣayaṃ yāto drumā naiva phalāni ca || 15 ||
[Analyze grammar]

kalpavṛkṣā na dṛśyante kāmanā pūryate nahi |
gāvaḥ kāmadudhā naiva dṛśyante dvāpare tadā || 16 ||
[Analyze grammar]

pralīnāścintāmaṇayaḥ kāmavṛṣṭirna varṣati |
na phalantyārtavā vṛkṣāḥ sasyānyapi phalanti na || 17 ||
[Analyze grammar]

tadā tatra balaṃ yasya bhuṃkte sa balavānamum |
ityevaṃ hrāsa āpannastadā vai dvāpare bahuḥ || 18 ||
[Analyze grammar]

rājāpi dveṣavān mānī brahmāvamānanā''daraḥ |
prajā svārthasādhikā ca kiṃ vācyaṃ kālaparyaye || 19 ||
[Analyze grammar]

evaṃ kāle pravṛtte vai sarpasatramayī kathā |
pravṛttā'bhūcchṛṇu lakṣmi  bhavabandhavimocinīm || 20 ||
[Analyze grammar]

haryārādhanasaṃdātrīṃ gāthāṃ jagatsupāvanīm |
śrutvā tāṃ tu kathāṃ ramyāṃ pūyante śravaṇādarāḥ || 21 ||
[Analyze grammar]

svāyaṃbhuvamanoḥ putraḥ priyavrata itīritaḥ |
tasya raivatanāmā'bhūtputraḥ paramadhārmikaḥ || 22 ||
[Analyze grammar]

ābālyācca tapoyogabhaktisevāparāyaṇaḥ |
snānaṃ triṣavaṇaṃ kurvan sandhyāvandanatatparaḥ || 23 ||
[Analyze grammar]

prātastu pitarau natvā vṛddhānnatvā ca bhūsurān |
gavāṃ ca pūjanaṃ kṛtvā pitṝn jalāṃjalīn dadau || 24 ||
[Analyze grammar]

agnāvājyaṃ ca havyaṃ ca datvā tato nijāśritān |
bhojayitvā'tithīn viprān svaṃ āda devatārpitam || 25 ||
[Analyze grammar]

śeṣaṃ tu samayaṃ sarvaṃ mālayā bhajanena ca |
sārthakayan svakaṃ janma sarvān bhajanamādiśat || 26 ||
[Analyze grammar]

nārāyaṇa hare kṛṣṇa svāminmādhava satpate |
vāsudeva parabrahmā'ntaryāmin pāhi sarvadā || 27 ||
[Analyze grammar]

ityevaṃ bhajatastasya nārado'gād yadṛcchayā |
raivatenā''dṛtaṃ tasya svāgataṃ cāsanādikam || 28 ||
[Analyze grammar]

pādāvanejya ca ṛṣeḥ kṛpākāṃkṣyavadat sa tam |
dayālo lokajīvānāṃ samuddhāraka divyadṛk || 29 ||
[Analyze grammar]

svayaṃ brahma tvamevokto nārāyaṇamanojaniḥ |
tvādṛgbrahmavido yogo hareryogasamo mataḥ || 30 ||
[Analyze grammar]

nispṛhāṇāṃ satāṃ naiva mādṛśātsyānnu vāñchitam |
tathāpi karuṇāḥ santo hyāyānti parabhūtaye || 31 ||
[Analyze grammar]

avaśyaṃ me karagataṃ śreyo bhavati niścitam |
nānyathā bhagavaddṛśāṃ darśanaṃ saṃbhaved drutam || 32 ||
[Analyze grammar]

śādhi śiṣyaṃ cānukūlaṃ sevādāsaṃ praśādhi mām |
nārado vādayan vīṇāṃ kṛṣṇanārāyaṇaṃ gṛṇan || 33 ||
[Analyze grammar]

prāha raivata  dhanyo'si bālyādbhajasi keśavam |
ko'nyalābho janimataḥ prākṛtātkardamādbhavet || 34 ||
[Analyze grammar]

saditi brahmaṇaḥ śabdastadvanto ye bhavantyuta |
sāyujyaṃ brahmaṇo'tyantaṃ tena santaḥ pracakṣate || 35 ||
[Analyze grammar]

tādṛśā ca satā bhāvyaṃ nā'satā tu kadācana |
satsu satāṃ virāmaḥ syānna tvasatsu kadācana || 36 ||
[Analyze grammar]

tava niṣkāmasadbhaktyā lakṣmīnārāyaṇaḥ svayam |
prasannaḥ san prerayanmāṃ kiñcidāvedyamasti yat || 37 ||
[Analyze grammar]

brahmadhāmādhipaḥ śrīmān harirnārāyaṇaḥ svayam |
prabhurdāmodaro bhūtvā pṛthvyāmāgantumicchati || 38 ||
[Analyze grammar]

brahmadhāmapradeśaṃ svavāsāyā''netumicchati |
śṛṇu tatkāraṇaṃ rājan pṛthvyāṃ paścimabhūtale || 39 ||
[Analyze grammar]

suratrāsapathaṃ chidraṃ śatagavyūtirāyatam |
vartate tadvivareṇā'talād daityaprakoṭayaḥ || 40 ||
[Analyze grammar]

svargaṃ gatvā surānsarvān trāsayanti nirāgasaḥ |
suratrāsakaraṃ chidraṃ śatagavyūtivistaram || 41 ||
[Analyze grammar]

pūraṇīyaṃ mayā tatra vastavyaṃ cāpi sarvadā |
raivatāya tadarthaṃ vai dāsye'kṣarapradeśakam || 42 ||
[Analyze grammar]

śatagavyūtivistāraṃ divyaṃ samṛddhaṃ sukhapradam |
yatra svarṇarasāḥ kūpāḥ svarṇarakṣā sarittathā || 43 ||
[Analyze grammar]

saṃjīvanī śalyahartrī chedasandhā hyamūrchanā |
raktadā dhārahantrī ca kṣutṛṇnirodhinī tathā || 44 ||
[Analyze grammar]

vividhauṣadhayastatra bhaviṣyanti mayā saha |
yatra bhadrā subhadrā me patnī bhadrāvatī nadī || 45 ||
[Analyze grammar]

yatra corjā mama patnī tatra ojasvatī bhavet |
yatrā''rdrakuṃkumaṃ lakṣmyāḥ siktaṃ kuṃkumavāpikā || 46 ||
[Analyze grammar]

yatra patnīvrato vipro madaṃśaḥ saṃbhaviṣyati |
yatrā vāḍavamādāya sarasvatī samudragā || 47 ||
[Analyze grammar]

yatra me plakṣachāyāyāṃ kṣaṇaṃ vāso bhaviṣyati |
yatra svarṇapurī ramyā dvīpāntarme bhaviṣyati || 48 ||
[Analyze grammar]

yatra khaṭvāṃgado rājā tava putro bhaviṣyati |
yatra someśvaro devo mahādevo bhaviṣyati || 49 ||
[Analyze grammar]

yatra talasya nāśādvai talaśyāmo bhaviṣyati |
yatra guptatayā yāgāt prayāgo'pi bhaviṣyati || 50 ||
[Analyze grammar]

yatra bhakto mahānme vai dāmanāmā bhaviṣyati |
yatraikatadvītatrītāḥ bhaviṣyantyṛṣayastrayaḥ || 51 ||
[Analyze grammar]

yatra tapaḥpriyo dattātreyaḥ sthāsyāmyahaṃ nage |
yatronmattā ca gaṃgā sā madarthaṃ pravahiṣyati || 52 ||
[Analyze grammar]

yatra bhaveśvarapatnyāḥ siṃhāḥ sthāsyanti vāhanam |
yatra sarvasvadātā me bhaktimārgo bhaviṣyati || 53 ||
[Analyze grammar]

yatra jayā lalitā me rādhā lakṣmīrbhaviṣyataḥ |
yatra sūryo'rkavṛkṣasya rūpaṃ janma grahīṣyati || 54 ||
[Analyze grammar]

yatra śatrūṃjitā devī nadīrūpā bhaviṣyati |
yatrā''nartaḥ punā rājā tapase saṃgamiṣyati || 55 ||
[Analyze grammar]

yatra sarpagararodhānnagaraṃ ca nivatsyati |
yatra kṛṣṇo dhanuścihnaḥ sādhurūpo bhaviṣyati || 56 ||
[Analyze grammar]

gopālakambhare me ca pitarau saṃbhaviṣyataḥ |
yatra mamā'vatārāśca bhaviṣyanti maharṣayaḥ || 57 ||
[Analyze grammar]

yatra madrājyadeṣṭāro bhaviṣyanti mamāṃśinaḥ |
yatra nṛpābhiṣektā ca devānīko bhaviṣyati || 58 ||
[Analyze grammar]

yatra me niyatasthānaṃ rajikuṭṭaṃ bhaviṣyati |
tatra me yugalaṃ kṛṣṇaḥ svayaṃ saṃsthāpayiṣyati || 59 ||
[Analyze grammar]

anādinidhanaṃ tanme sthānaṃ divyaṃ bhaviṣyati |
kṛṣṇamuktipradaḥ so'yaṃ dvīpo divyo bhaviṣyati || 60 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne dvāparadharmarevatagṛhanāradāgamapaścimabhūtalavivarapūrakabrahmapradeśānayanamatibhaviṣyattattvoddeśādipradarśananāmā tripaṃcāśattamo'dhyāyaḥ || 53 ||
[Analyze grammar]