Chapter 44

śrīnārāyaṇa uvāca |
śṛṇu lakṣmi  tataḥ paścād yadbhūtaṃ tad bravīmi te |
pitā dakṣastadākarṇya para khedamavāpa ha || 1 ||
[Analyze grammar]

śanaiḥ śvāsaṃ parāmucya kanyāḥ prāha dayāvaśaḥ |
samāgacchantu candraṃ tu śikṣayāmi punaḥ sa hi || 2 ||
[Analyze grammar]

naivaṃ kuryāt prakuryāttu sarvāsu samakāmanām |
iti kṛtvā gatāḥ sarve candrabhavanamādarāt || 3 ||
[Analyze grammar]

dakṣaḥ prāha śaśindeva  tvaṃ me śiṣyo'si suvrata |
sujño'si kinnu bahunā vaktavyaṃ te praśikṣaṇam || 4 ||
[Analyze grammar]

sarvāḥ samānā me kanyā yuvatyaste'rpitā mayā |
tava patnyaśca tāḥ sarvāstvayi raktā vilokya tu || 5 ||
[Analyze grammar]

sarvā bhaja samānā vai pakṣapātaṃ jahīti ca |
sarvā nārīrbhajasva tvaṃ samakāmasukhepsayā || 6 ||
[Analyze grammar]

naikasyāmanurakto'bhūḥ sarvāsveva rato bhava |
sarvāśca kāmaya candra  tāstṛptāḥ syuryathā yathā || 7 ||
[Analyze grammar]

nārīṇāṃ kāmadāhasya yaḥ patiḥ śāntatāṃ nayet |
smṛddhiḥ svargaṃ ca tasyaiva vividhāśca vibhūtayaḥ || 8 ||
[Analyze grammar]

bhavantyakṣatakuśalā vivardhante dine dine |
patnīnāṃ prāṇadātrīṇāṃ raṃjanād raṃjanaṃ sadā || 9 ||
[Analyze grammar]

tāsāṃ hṛtkalpakād duḥkhānnaro narakamāpnuyāt |
narasyaiva tu saddharmo nārīṇāṃ kāmaśāntanam || 10 ||
[Analyze grammar]

tanna kuryāttadā lagnaṃ kṛtaṃ kevalamṛtyave |
varaṃ nāryā samaṃ nāryā lagnaṃ kāmadhurojjhitam || 11 ||
[Analyze grammar]

yadi lagnaphalaṃ na syānnāryāḥ puṃsaḥ samāgame |
tadā nāryāśca vā puṃso lagnaṃ bhārāya kevalam || 12 ||
[Analyze grammar]

yadi lagne kṛte'naṃgā''nandaṃ nāpnoti mānavaḥ |
dvandvārthaṃ tatkṛtaṃ lagnaṃ nā'bhūd ratyarthamityatha || 13 ||
[Analyze grammar]

nāryoḥ puṃsośca vā dvandvo lagnataḥ syāt kathaṃ nahi |
kathaṃkāraṃ naraṃ nārīṃ racayed bhagavān hariḥ || 14 ||
[Analyze grammar]

kathaṃ vā cā'rpyate nārī narāya na naraḥ punaḥ |
kathaṃ vā tatra gṛhṇāti naro nārīṃ naraṃ tu na || 15 ||
[Analyze grammar]

iti candra vicāryyaiva sarvāḥ saubhāgyasampadaḥ |
tava patnyaḥ sadā sevyāstvayā saukhyapradāpane || 16 ||
[Analyze grammar]

candra omiti sammatvā dakṣaṃ saṃpūjya bhāvataḥ |
patnīḥ sarvāḥ samāgṛhya bahudhā'ramayacca saḥ || 17 ||
[Analyze grammar]

punaḥ sarvāḥ samāgṛhya bahudhā'ramayacca saḥ || 17 ||
[Analyze grammar]

kāle bahutithe jāte rohiṇyāmeva sarvathā |
pūrvavat snehabāhulyamanyāsvalpaṃ punarvyadhāt || 18 ||
[Analyze grammar]

tadā punaḥ punastābhirdakṣaḥ samyaṅniveditaḥ |
bhūtvā dakṣastadā kruddhaḥ prāha candramasaṃ hitam || 19 ||
[Analyze grammar]

candra  tvaṃ śikṣitaḥ samyaṅ śikṣyate ca punarmayā |
vartitavyaṃ tvayā sarvadāreṣu samabhāvataḥ || 20 ||
[Analyze grammar]

tadā tvaṃ sarvadā smṛddho yogīva bhava śaktimān |
akṣayyavīryatejaskaḥ sarvāsāṃ samatṛptikṛt || 21 ||
[Analyze grammar]

iti te'nugrahaṃ kurve putrīṇāṃ snehatastava |
yadi śāpaṃ sṛjāmi tvāṃ putrīṇāṃ duḥkhado bhavet || 22 ||
[Analyze grammar]

tasmāttvāmanuśikṣyāmi sarvāsu samabhāgbhava |
sarvāḥ samyak saṃbhajasva yatheṣṭaṃ sukhado bhava || 23 ||
[Analyze grammar]

yadi pravartsyasenaivaṃ tadā kṣayamavāpsyasi |
śakteśca tejasaścaiva kṣayaṃ duḥkhamavāpsyasi || 24 ||
[Analyze grammar]

ekayā kalayā tvaṃ vai jīviṣyasi na saṃśayaḥ |
evaṃ me vacane yāhi kalāpūrṇaḥ sadā bhava || 25 ||
[Analyze grammar]

iti dakṣakathitaṃ tadabhidhyāya punaḥ punaḥ |
ramate sarvapatnībhiḥ sarvadā sa muhuḥ samaḥ || 26 ||
[Analyze grammar]

rohiṇī tu haṭhāttaṃ vai nirodhayati kāminī |
svagṛhe eva bahudhā kāmanā'tṛptamānasā || 27 ||
[Analyze grammar]

patnyaścānyāḥ pratīkṣante mārgaṃ candrasya cāṃgaṇe |
na cāyāti yadā nāthaḥ śapantyastāstadā'rudan || 28 ||
[Analyze grammar]

nāthe sati vayaṃ patnyo nāpnumaḥ kāmadānatām |
anyathā tu tadā kanyā nāthe satyapyanāthavat || 29 ||
[Analyze grammar]

asmākaṃ yadi nātho na rohiṇyā api mā bhavet |
ityākruśya ca tāḥ sarvāḥ śepurnāthaṃ punaḥ punaḥ || 30 ||
[Analyze grammar]

kṣayaṃ yāhi sadā candra  tejovīryakṣayastava |
savīrye vā hyavīrye vā tvayi sattve'pi pakṣaga || 31 ||
[Analyze grammar]

nā'smākaṃ ṛtulābho'pi tasmād vīryakṣayastava |
rūpakṣayo'pi bhavatu pakṣapātin  karoṣi kim || 32 ||
[Analyze grammar]

atibhogakarī ceyaṃ rohiṇī rogiṇī bhavet |
raktasrāvā pradarārtā rohiṇi  bhava rogiṇī || 33 ||
[Analyze grammar]

itīdaṃ tasya patnīnāmulbaṇaṃ śāpavācanam |
dakṣasyāpi vacobhaṃgakṛtāptadoṣamulbaṇam || 34 ||
[Analyze grammar]

candrasya tu tadaiva drāk kṣīṇaṃ tejaḥ savīryakam |
ṣaṇḍhaścaikakalāmātrajīvanaḥ samavartata || 35 ||
[Analyze grammar]

sadā duḥkhī sadā tyājyo nārībhiḥ samajāyata |
rohiṇyapi raktasrāvā pradarārtā babhūva ha || 36 ||
[Analyze grammar]

candro gṛhaṃ parityajya patnīḥ sarvāśca tatkṣaṇam |
prāptastapaḥ samākartuṃ saurāṣṭre vāridhestaṭe || 37 ||
[Analyze grammar]

tatra varṣaśataṃ tepe tapaḥ paramadāruṇam |
svasya rogavināśāya rogo naiva nyavartata || 38 ||
[Analyze grammar]

śokaṃ jagāma bahulaṃ vimanāiva so'bhavat |
rohiṇyapi sadā raktasrāvā'dyāpi ca vartate || 39 ||
[Analyze grammar]

athā'tra samaye loke śatavarṣeṣu bhūtale |
candrāmṛtaṃ vinā sarvā oṣadhayaḥ kṣayaṃ gatāḥ || 40 ||
[Analyze grammar]

kaṇā naiva tu jāyante tuṣeṣu puṣpakeṣu ca |
pṛthvyā rasaśca kandeṣu mūleṣu na ca rohati || 41 ||
[Analyze grammar]

puṣṭistu sarvadā naṣṭā jīvāstadā tu duḥkhitāḥ |
devāścā'pyalabdharasāḥ ṛṣayaścā'mṛtakṣayāḥ || 4 ||
[Analyze grammar]

brahmāṇamupasaṃgamya prārthayan duḥkhanāśanam |
candrastatra mahādevaṃ śivaṃ saṃsthāpya yatnataḥ || 43 ||
[Analyze grammar]

punarvarṣaśataṃ taptvā śaṃkaraṃ cā'prasādayat |
prasannaḥ śaṃkarastasmai prāha kiṃ te hyapekṣitam || 44 ||
[Analyze grammar]

varaṃ varaya bhadraṃ te sukho bhava sadā śaśin |
candrastadā''ha nandīśaṃ deva  someśvaro bhava || 45 ||
[Analyze grammar]

mayā prasāditaścātra tapastaptvā sudāruṇam |
saurāṣṭre paścime prānte vāridhestaṭasannidhau || 46 ||
[Analyze grammar]

mama pūjyo mahādevaḥ sadā someśvaro bhava |
mama dakṣavacojanyaṃ kṣayaṃ rogaṃ vināśaya || 47 ||
[Analyze grammar]

tava deva mahādeva  pratiṣṭhā prakaromyaham |
brahmādīṃścātra cā''hūya kurve yajñamahotsavam || 48 ||
[Analyze grammar]

iti saṃkalpya candreṇa brahmādyā devatāstathā |
ṛṣayo munayastatra prajānāṃ patayastathā || 49 ||
[Analyze grammar]

manavo devagandharvāḥ sūtamāgadhanartakāḥ |
śaṃkarasya pratiṣṭhārthamākāritāḥ samāgaman || 50 ||
[Analyze grammar]

bhadrāvatyāstu nadyāstatkṣetraṃ dakṣiṇadigbhavam |
ābhadrāyā āsamudraṃ kṣetraṃ mokṣakaraṃ nṛṇām || 51 ||
[Analyze grammar]

tatra kuṃkumavāpyākhyanagare saṃvasan dvijaḥ |
patnīvratākhyaviprarṣirvedān nītvā'gamattathā || 52 ||
[Analyze grammar]

parabrahā'vatāro'yaṃ śrīkṛṣṇaḥ svayameva hi |
vidhinā somanāthasya pratiṣṭhānamakārayat || 53 ||
[Analyze grammar]

pratiṣṭhānottaraṃ brahmā tadā prāha triśūline |
candrakṣayeṇa yāvatya oṣadhayaḥ kṣayaṃ gatāḥ || 54 ||
[Analyze grammar]

tanmūlāśca prajāḥ sarvāḥ kṣayaṃ yānti muhurmuhuḥ |
tataścandrakṣayo nāśyo bhavatā sukṛpālunā || 55 ||
[Analyze grammar]

śaṃbhuḥ prāha tu tānsarvān gacchāmo dakṣamāturam |
kathayāmo hitaṃ kartuṃ yathā syāt susukhaṃ jagat || 56 ||
[Analyze grammar]

ityāmantrya prajagmuste dakṣasya bhavanaṃ prati |
svāgataṃ kṛtavān dakṣo niṣeduśca yathāsthalam || 57 ||
[Analyze grammar]

kuśalaṃ pṛṣṭhavāndakṣo jijñāsāṃ kṛtavānapi |
mayi prayojanaṃ na syānnispṛhāṇāṃ mahātmanām || 58 ||
[Analyze grammar]

tathāpi mama lābhāya kṣemāya ca hitāya ca |
bhavatāmāgamo bhāvyo dāsaḥ kiṃ karavāṇi vaḥ || 59 ||
[Analyze grammar]

ityāvedya namaḥ kurvandakṣaḥ prāñjalirāsa vai |
somārthaṃ ca tadā śaṃbhuḥ prāha dakṣamidaṃ vacaḥ || 60 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne dakṣakṛtacandraśikṣaṇaśāparogasomanāthapratiṣṭhāpanādināmā |
catuścatvāriṃśo'dhyāyaḥ || 44 ||
[Analyze grammar]