Chapter 45

śrīnārāyaṇa uvāca |
śaṃbhuḥ prāha tadā dakṣaṃ candrarogaṃvināśaya |
dakṣaḥ prāha ca me śāpaṃ hariṣyāmi tu śaṃkara || 1 ||
[Analyze grammar]

putrīṇāṃ somato nairāśyajaṃ duḥkhaṃ punaḥ punaḥ |
ko hariṣyati tadduḥkhaṃ nityajaṃ śaśinaṃ vinā || 2 ||
[Analyze grammar]

sādhvīnāṃ tasya patnīnāṃ duḥkhadāhakṛtaṃ punaḥ |
śāpaṃ ko vārayed devo yatheṣṭaṃ kuru śaṃkaraḥ || 3 ||
[Analyze grammar]

ityāśrutya gurorvākyaṃ dakṣasya prayatātmanaḥ |
śaṃbhuḥ prāha tadā candraṃ dakṣaśāpo vinaśyatu || 4 ||
[Analyze grammar]

savīryo bhava śītāṃśo maivaṃ pakṣagamo bhava |
atha patnīkṛtaśāpavināśāyā'pi śaṃkaraḥ || 5 ||
[Analyze grammar]

revatīprabhṛtibhyastatkṣamāṃ yācitavānprabhuḥ |
patnībhiśca tadā rogo nāśaṃ yāhīti kīrtitam || 6 ||
[Analyze grammar]

rogo vīryakṣayo naṣṭo na naṣṭastu kalākṣayaḥ |
pakṣapātitvadoṣasya vināśāya kṣamāpitam || 7 ||
[Analyze grammar]

rohiṇyāmeva pātitvaṃ parityaktaṃ himāṃśunā |
vīryakṣayaprapātitvaṃ śaṃbhunā samvināśitam || 8 ||
[Analyze grammar]

sarvāsu samagāmitvamaṃgīkṛtaṃ himāṃśunā |
kalānāṃ kṣayagāmitvaṃ na nāśitaṃ tu śaṃbhunā || 9 ||
[Analyze grammar]

tadā candraḥ punardevaṃ brahmāṇaṃ pratyabhāṣata |
pitastejaḥkṣayo duḥkhaṃ sarvaduḥkhādviśiṣyate || 10 ||
[Analyze grammar]

tejastejasvināmātmā tejaḥ sammānamucyate |
tejaḥ kīrtiyaśo dravyaṃ mahattā tejasi sthitā || 11 ||
[Analyze grammar]

nistejā yo bhavelloke gaṇanāto bahiṣkṛtaḥ |
tejasvināṃ tu gaṇane tejasvī parigaṇyate || 12 ||
[Analyze grammar]

anyaguṇaivihīno'pi tejorūpasamanvitaḥ |
cakṣuṣāṃ tu priyaḥ syādvai puṣpaṃ kiṃśukajaṃ tathā || 13 ||
[Analyze grammar]

naikaguṇairyutaṃ cāpi rūpatejovihīnakam |
cakṣuḥpriyataraṃ na syātkṛṣṇaṃ vyāptaṃ tamo yathā || 14 ||
[Analyze grammar]

śuklaṃ nīlaṃ tathā pītaṃ rakta ca haritaṃ tathā |
kapīśaṃ karburaṃ ceti saptarūpāṇi tanvate || 15 ||
[Analyze grammar]

sarvebhyastatra śuklaṃ vai śreṣṭhaṃ rūpaṃ hi kathyate |
tataḥ pītaṃ tato raktaṃ kapīśaṃ tadanantaram || 16 ||
[Analyze grammar]

haritaṃ ca tataḥ proktaṃ tato nīlaṃ tu gaṇyate |
karburaṃ citrasaṃjñaṃ tu tataḥ priyaṃ tvihocyate || 17 ||
[Analyze grammar]

śuklaṃ tejo brahmaṇastu parabrahmaṇa ityapi |
muktānāṃ brahmasaṃjñānāṃ golokādisthalījuṣām || 18 ||
[Analyze grammar]

rūpaṃ śvetaṃ sadā cakṣuḥpriyatākaramiṣyate |
mama rūpaṃ sadā śuklaṃ tejaādhārakaṃ matam || 19 ||
[Analyze grammar]

vinātejo'pyahaṃ kṛṣṇo lohamṛttikayā samaḥ |
tasmāttejo madīyaṃ me śāśvataṃ dehi padmaja || 20 ||
[Analyze grammar]

nā'haṃ tejovihīno vai sthātumicchāmi pūrvaja |
tejohīnaṃ ca māṃ sarve tiraskurvanti sarvathā || 21 ||
[Analyze grammar]

nāryaścāpi madīyā na mānayiṣyanti pūrvavat |
pūrvaṃ tejaḥsamudrekād vyarājaṃ devasaṃsadi || 22 ||
[Analyze grammar]

idānīṃ tejasā hīnaḥ kathaṃ yāmi suragṛhe |
tejohīno na jīveyaṃ mriyeya vacmi cāntikam || 23 ||
[Analyze grammar]

soma ityabhyarthayati yāvattāvat tu tatra vai |
oṣadhayaḥ samāyātā vividhā bhinnalokajāḥ || 24 ||
[Analyze grammar]

kāścidoṣadhayastatra kalaikā'mṛtajīvanāḥ |
kāścidoṣadhayastatra dvikalā'mṛtajīvanāḥ || 25 ||
[Analyze grammar]

trikalā'mṛtapā kaścitkāściccatuḥkalā'mṛtāḥ |
kāścitpañcakalābhoktryaḥ kāścicchaṭkalanā'mṛtāḥ || 26 ||
[Analyze grammar]

kāścit saptakalābhoktryaḥ kāścidaṣṭakalā'mṛtāḥ |
kāścinnavakalābhoktryaḥ kāściddaśakalā'mṛtāḥ || 27 ||
[Analyze grammar]

kāścidekādaśakalāḥ kāściddvādaśasatkalāḥ |
kāścit trayodaśakalāḥ kāściccaturdaśā'mṛtāḥ || 28 ||
[Analyze grammar]

kāścitpañcadaśakalā'mṛtabhogā''ptatṛptayaḥ |
prāpte tattaddine tāstā bhakṣayantyamṛtaṃ svakam || 29 ||
[Analyze grammar]

evaṃ vibhinnasāmarthyā vibhinnā'mṛtajīvanāḥ |
vibhinnakalayā puṣṭā hyāsaṃstatra samāgatāḥ || 30 ||
[Analyze grammar]

oṣadhibhirvibhinnābhiḥ prārthitaṃ svārthajīvanam |
hrāsavṛddhikalāyuktaścandramā yadi pākṣikaḥ || 31 ||
[Analyze grammar]

varteta tu tadā'smākaṃ jīvanaṃ cāpi pauṣṭikam |
saphalaṃ sarasaṃ smṛddhaṃ yathābhakṣyasupoṣaṇam || 32 ||
[Analyze grammar]

yathāvṛddhi yathāpoṣaṃ yathārtavaṃ sabījakam |
yadi pūrṇakalaścandraḥ sarvadā syāttathā tu tāḥ || 33 ||
[Analyze grammar]

kalā asahamānāśca naśyāmo vayamaṃjasā |
sarvakalā'mṛtasyā'sya śaityāgnidahanā'kṣamāḥ || 34 ||
[Analyze grammar]

kumāryaḥ peśalāḥ sarvā nāśamāpsyantyaharniśam |
tasmāccandramaso nityaśītatāsahanā'kṣamā || 35 ||
[Analyze grammar]

komalā hyaṃkurādeva mā nāśaṃ yāntu vallayaḥ |
iti tāsāṃ prārthanāṃ tu śrutvā brahmā ca śaṃkaraḥ || 36 ||
[Analyze grammar]

candramoṣadhināthaṃ tau prāhatuḥ sukhakṛdvacaḥ |
candra tvayā'vadhāryaṃ vai vallīnāṃ prārthitaṃ khalu || 37 ||
[Analyze grammar]

svīkurve tatprasahyā'tra nā'nyo mārgo'tra dṛśyate |
oṣadhyadhīnamevaiṣāṃ lokānāṃ jīvanaṃ kṛtam || 38 ||
[Analyze grammar]

oṣadhīnāṃ jīvanantu kalāḥ ṣoḍaśa te matāḥ |
bhinnā bhinnāḥ kalāstāṃ tāṃ jīvayatyanvahaṃ yataḥ || 39 ||
[Analyze grammar]

kalādhāro bhavānproktaḥ sa cet kṛpāṃ na cācaret |
sarvāni naṣṭā bhaveyurvai parasparatayā muhuḥ || 40 ||
[Analyze grammar]

tasmāttejaḥkalālābhe kathayāvastathā kuru |
bhava pakṣe vardhamānaḥ pakṣe kṣayamavāpnuhi || 41 ||
[Analyze grammar]

pakṣapātitvadoṣaste kalāsveva niveśitaḥ |
kalāyāste kṣayaḥ syādvai vīryaṃ te cā'kṣayaṃ bhavet || 42 ||
[Analyze grammar]

patnīpradattaśāpo vai vajraḥ kena hi vāryate |
poṣyavargā'rthyamiṣṭaṃ tu poṣyārthaṃ tyajyate na kim || 43 ||
[Analyze grammar]

paropakāraśīlāstu pareṣāṃ sukhahetave |
nijārthaṃ svānukūlaṃ ca tyajanti paramārthataḥ || 44 ||
[Analyze grammar]

candra  sarvāsu patnīṣu samānaṃ ramaṇaṃ kuru |
mā niḥśvāsaṃ tu tāsāṃ vai gṛhāṇa sukhavān bhava || 45 ||
[Analyze grammar]

oṣadhīnāṃ jīvanasya puṇyaṃ gṛhāṇa pakṣadhṛk |
evaṃ candramasaṃ kṛtvā brahmā ca śaṃkarastathā || 46 ||
[Analyze grammar]

devāḥ kalāhrāsavṛddhī tathaivā'sthāpayaṃstadā |
tadārabhya sadā candraḥ pūrṇavīryasusaṃbhṛtaḥ || 47 ||
[Analyze grammar]

reme nakṣatrarūpābhiḥ patnībhiḥ samabhāvataḥ |
kalānāśavivṛddhī tu hayoṣadhiprārthite sthite || 48 ||
[Analyze grammar]

brahmādyāśca tathā devā hyagacchansvaniketanam |
atha śaṃbhuryayāce taṃ candraṃ lalāṭabhūṣaṇam || 49 ||
[Analyze grammar]

brahmā prādādabdhijaṃ tatkalācandraṃ dvitīyakam |
atrerjātaśca yaścandraḥ sa tu rājā tṛtīyakaḥ || 50 ||
[Analyze grammar]

te te candrāḥ prabhinnā vai bodhyā vibhinnakāryajāḥ |
yāvantaḥ śaṃbhavaḥ santi yāvantyaṇḍāni santi ca || 51 ||
[Analyze grammar]

tāvantaścandramasaḥ syuḥ kalpabhedāt tvanantakāḥ |
iti te kathitaṃ lakṣmi  candre'pi kṣayakāraṇam || 52 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne caṃdrasya tejaḥkalāhrāsavṛddhisthitikāraṇapradarśananāmā |
pañcacatvāriṃśo'dhyāyaḥ || 45 ||
[Analyze grammar]