Chapter 35

śrīnārāyaṇa uvāca |
patnīvratasya śabdasya samyagartho mayoditaḥ |
tava patnyāḥ kṛte kiṃ kiṃ kāryaṃ tadvakṣyate mayā || 1 ||
[Analyze grammar]

prathamaṃ brahmacāritvaṃ paścādgārhasthyameva ca |
brahmacārī purā bhūtvā patnyā saha tato vaset || 2 ||
[Analyze grammar]

brahmacaryaṃ gṛhāṇa tvaṃ yajñopavītamityapi |
vedārthāṃśca nibodha tvaṃ paścāt patnīyuto bhava || 2 ||
[Analyze grammar]

ityājñapya svakaṃ putraṃ brāhmaṇaṃ yauvanonmukham |
muhūrtaṃ śubhamāsthāya pravṛtto hyupanāyane || 4 ||
[Analyze grammar]

tathopanītiṃ putrasya kartumutsukamānasaḥ |
sarvān sampādayāmāsa saṃbhārānuruvikramaḥ || 5 ||
[Analyze grammar]

tadā maṃgalavādyāni hyavādyanta muhurmuhuḥ |
lakṣmyādayo jagustatra gītānyānandatastadā || 6 ||
[Analyze grammar]

kṛcchratrayanimittena dhenutrayapradānakam |
kāmacārā'śanā'śuddhiśāntaye kṛtamuttamam || 7 ||
[Analyze grammar]

tryahaṃ prātastryahaṃ sāyaṃ tryahamadyādayācitam |
tryahaṃ paraṃ ca nāśnīyācchuddhaṃ kṛcchramudīritam || 8 ||
[Analyze grammar]

mātṛkāpūjanaṃ caiva nāndīśrāddhaṃ tathaiva ca |
svastivāco gṛhaśāntiṃ dvijabhojanamityapi || 1 ||
[Analyze grammar]

sthaṇḍile tu samudbhavavahnisthāpanamityatha |
pūjanādi tathā tasya cakāra śrīhariḥ svayam || 10 ||
[Analyze grammar]

snātaṃ bhukta kṛtakeśavāpaṃ ca samalaṃkṛtam |
dakṣabhāge sthitaṃ saṃskārayāmāsa sutaṃ tu saḥ || 11 ||
[Analyze grammar]

kaupīnaṃ kaṭisūtraṃ ca navaṃ yajñopavītakam |
triguṇaṃ sma dadātyājyahomaṃ kṛtvā'vadatprabhuḥ || 12 ||
[Analyze grammar]

sāmākhyaste bhaved vedo gotraṃ śrībrahma vidyate |
pravarāste trayo nārāyaṇaḥ kṛṣṇo haristathā || 13 ||
[Analyze grammar]

śākhā patnīvratākhyā te nāmnā bhaviṣyati hyanu |
idānīṃ tvaṃ brahmacārī bhavasīti nibodhaya || 14 ||
[Analyze grammar]

śṛṇu dharmāṃstava yogyānkathayāmi samāsataḥ |
juhudhyagniṃ prātarādāvapośāna tathā kuru || 15 ||
[Analyze grammar]

guroḥ sevāṃ kuru nityaṃ brahmapāṭhaṃ tathā kuru |
gṛhāṇemaṃ ca gāyatrīmantraṃ japaṃ sadā kuru || 16 ||
[Analyze grammar]

oṃ nārāyaṇāyavidmahe vāsudevāya dhīmahi |
tanno viṣṇuḥ pracodayādityāvarttaya mālikām || 17 ||
[Analyze grammar]

brahmadaṇḍaṃ gṛhāṇemamaiṇā'jīnamidaṃ tathā |
sandhyopāstiṃ vidhehi tvaṃ krodhā'nṛte tu varjaya || 18 ||
[Analyze grammar]

brahmacaryaṃ tathā rakṣa vikṛtiṃ mā''viśa kvacit |
aśuddhaṃ bhakṣaṇaṃ pānaṃ mā''tiṣṭha hananaṃ kvacit || 19 ||
[Analyze grammar]

vyasanaṃ mā kuru brahman nindanaṃ mā kuru kvacit |
snānaṃ sandhyāṃ japaṃ homaṃ svādhyāyaṃ pitṛtarpaṇam || 20 ||
[Analyze grammar]

ātmajñānaṃ hareḥ pūjāmaṣṭau nityaṃ samācareḥ |
omityādāya tadvākyamupatasthe raviṃ tathā || 21 ||
[Analyze grammar]

agneḥ pradakṣiṇāṃ cakre bhikṣāṃ jagrāha mātṛtaḥ |
śrīharirgāḥ svarṇamudrā vāsāṃsyābharaṇāni ca || 22 ||
[Analyze grammar]

īśvarebhyo dadāti sma ye te tatra samāgatāḥ |
bhojanāni dakṣiṇāśca datvā santarpitāśca te || 23 ||
[Analyze grammar]

putraṃ jñānastavātmānaṃ vedamadhyāpayaddhariḥ |
jaṭākamaṇḍalūdaṇḍacarmavalkaladhāriṇaḥ || 24 ||
[Analyze grammar]

patnīvratākhyaputrasya vivāhārthaṃ vyacintayat |
pativratākhyayā sārdhaṃ rūpayauvanapūrayā || 25 ||
[Analyze grammar]

kanyayā tadvivāhaṃ ca nārāyaṇo hyakārayat |
dvayorjanmā'kṣare dṛṣṭvā lagnārthaṃ niścikāya saḥ || 26 ||
[Analyze grammar]

muhūrtaṃ ca balaṃ dṛṣṭvā lagnapatraṃ lilekha ca |
gītiṃ māṃgalikīṃ svastivācanikāṃ vidhāpya vai || 27 ||
[Analyze grammar]

mukhaṃ miṣṭaṃ tathā kṛtvā varasyā'kṣatabindukam |
piṣṭacūrṇairvarasthāṃgaṃ mardayitvā hyapūjayat || 28 ||
[Analyze grammar]

maṇḍapāropaṇaṃ kṛtvā māṇekastaṃbharopaṇam |
gaṇeśasthāpanaṃ kṛtvā mātṛkāpūjanaṃ tathā || 29 ||
[Analyze grammar]

kalaśasthāpanaṃ kṛtvā yajñakuṇḍamakārayat |
kare kāmaphalaṃ mīṃḍholakaṃ badhvā varaṃ maṇḍapamānayata || 30 ||
[Analyze grammar]

kanyāṃ tatra samānīya varamālāmadhārayat |
gārhapatyaṃ ca kuṇḍe'gniṃ pratiṣṭhāpya hyajūhavat || 31 ||
[Analyze grammar]

hastayormelanaṃ kṛtvā mukhe miṣṭamadāpayat |
vastragranthiṃ samābadhya pradakṣiṇā hyakārayat || 32 ||
[Analyze grammar]

vedavādyadhvaniṃ kṛtvā magalādīnyagāpayat |
mudrādibhī rāmayitvā hastadravyāṇi cārpayat || 23 ||
[Analyze grammar]

saha dharmaṃ caretyuktvā lagnakarmā'samāpayat |
vighnān śirasa uttārya hyāśīrbhiḥ samayojayat || 34 ||
[Analyze grammar]

brāhmeṇa vidhinā dattvā varakanye hyavāhayat |
atha nārāyaṇastatra dampatibhyāmaśikṣayat || 25 ||
[Analyze grammar]

patibhinnā na vai patnī patnībhinno na vai patiḥ |
dvayoḥ premṇorabhinnatvāddvayoraikyaṃ svabhāvajam || 36 ||
[Analyze grammar]

patyurguptaṃ mahāvīryaṃ patnī garbhe dadhāti hi |
aṃgayośca tayoraikyāddampatyoraikyamaṃgajam || 37 ||
[Analyze grammar]

piturbhāgaḥ sthito garbhe patnībhāgena puṣyate |
dvayorbālo bhavedekastato hyaikyaṃ dvayorapi || 38 ||
[Analyze grammar]

ekasyā'niṣṭatāprāptau dvayorduḥkhaṃ samaṃ bhavet |
ekasya sukhasampattau dvayoḥ saukhyaṃ samaṃ bhavet || 39 ||
[Analyze grammar]

hānirlābhaḥ sukhaṃ dukhaṃ samaṃ dvābhyāṃ nu vedyate |
ātmā''tmani dvayoḥ saktastasmādaikyaṃ dvayorapi || 40 ||
[Analyze grammar]

ekenāpyarjite dravye'nyasya svatvaṃ pravartate |
eke na kṛtapuṇyasya dvitīyo bhajate phalam || 41 ||
[Analyze grammar]

ekena tu kṛte kārye viśvasityaparo yataḥ |
ekenopārjitaṃ bhojyaṃ bhuṃkte tu dvayameva vai || 42 ||
[Analyze grammar]

divā rātrau sahaikatvaṃ dehayormanasorapi |
mamā'hante na vai bhinne tasmādaikyaṃ dvayorapi || 43 ||
[Analyze grammar]

rodane rudanaṃ yāti harṣaṇe harṣaṇaṃ tathā |
mūrchane mūrchanaṃ yāti cintane cintanaṃ bhavet || 44 ||
[Analyze grammar]

dvayoraikyādidaṃ sarvaṃ bhinnayornahi jāyate |
tasmāttu sarvathā bodhyaṃ dampatyoraikyamuttamam || 45 ||
[Analyze grammar]

ityevamaikyasāmarthyātpuṇye'pyaikyaṃ bhavatyapi |
śatrudaṇḍe rājadaṇḍe sahanaikyaṃ bhavatyapi || 46 ||
[Analyze grammar]

tīrthe dāne copakāre śubhe puṇye ca dharmaṇi |
patipatnyoḥ samo bhāgaḥ smṛddhau cā'tra paratra ca || 47 ||
[Analyze grammar]

tasmādardhaṃ śarīrasya svasyā'nyasya parārdhakam |
puṃso'rdhaṃ vāma patnyeva patnyardhaṃ dakṣiṇaṃ patiḥ || 48 ||
[Analyze grammar]

patnyāṃ patiḥ sadā hyāste kānte patnī ca vartate |
tasmādardhāṃganā patnī patiścā'rdhāṃgano mataḥ || 49 ||
[Analyze grammar]

tataḥ svārthaṃ parityajya dvayorarthaṃ vibudhya ca |
dvābhyāmājīvanaṃ cārthe sthātavyaṃ tu parasparam || 50 ||
[Analyze grammar]

parasparaṃ svakaṃ jñātvā pratibimbaṃ sahāyakṛt |
prasoḍhvāpi dvayomardaṃ kartavyaṃ kāryamanvaham || 51 ||
[Analyze grammar]

patnyā yathā patiḥ sevyo mānyaḥ pūjyaśca devavat |
patyā tathā sadvā patnī sevyā mānyeva devikā || 52 ||
[Analyze grammar]

bhojanācchādanā''lāpavihārotsavakhelane |
śṛṃgārahāsasammānā''sanayānā'dhirohaṇe || 53 ||
[Analyze grammar]

vartane vārtane svatve pūjane satkṛte'rhaṇe |
patnī tu sarvathā hyagre gaṇanīyā nareṇa hi || 54 ||
[Analyze grammar]

ramaṇyo yatra pūjyante vasanti tatra devatāḥ |
ramaṇyo yatra tuṣyanti tatra vasanti sampadḥ || 55 ||
[Analyze grammar]

ramaṇyo yatra modante vardhante smṛddhayo'tra vai |
ramaṇyo yatra tṛpyanti tatrā''kṛṣyanta ṛddhayaḥ || 56 ||
[Analyze grammar]

nāryo hyānandayantyatra tatrā''gacchanti siddhayaḥ |
nodvejyā naiva tāḍyāśca nāryo vaṃśadharā yataḥ || 57 ||
[Analyze grammar]

janakaṃ tu parityajya yā''gatā pativeśane |
patyadhīnā patibhāgyā kastāmudvejayed budhaḥ || 58 ||
[Analyze grammar]

dāsīvā''jīvanaṃ yā vai bhūjiṣyeva nu vartate |
dīneva kṛpaṇā bhūtvā patiṃ caivā'nuvartate || 59 ||
[Analyze grammar]

govat vā vahyate yatra dīnā vahati tatra vai |
chāyā tviva śarīrasya kastāṃ buddho nu duḥkhayet || 60 ||
[Analyze grammar]

dattaṃ bhuktaṃ paraṃ vṛṃkte cā'bhiyukte'vaśeṣajam |
parādhīnā patiṃ dhatte kastāṃ na rakṣayed budhaḥ || 61 ||
[Analyze grammar]

kṣudhāṃ tṛṣāṃ prasoḍhvāpi gṛhakāryaṃ karoti yā |
kaṣṭaṃ kālaṃ sahitvā'pi patikāryaṃ karoti yā || 62 ||
[Analyze grammar]

tyaktvā nidrāṃ tathā''lasyaṃ vigaṇayya manaḥ svakam |
patyuḥ kāmapravṛttyarthamupatiṣṭhatyadho bhuvi || 63 ||
[Analyze grammar]

tāḍane bhartsane krośe'dhikṣepe tyajane'pi yā |
nirbalā sahate sarvaṃ kastāṃ duḥkhaṃ pradāpayet || 64 ||
[Analyze grammar]

etādṛśyāṃ suśīlāyāṃ patnyāṃ lakṣmīḥ pratiṣṭhati |
rādhā ramā jayā padmā śāradā ca sarasvatī || 65 ||
[Analyze grammar]

ekādaśī ratiḥ sandhyā mohinī ca jayantyapi |
etāścānyā mahādevyastatra patnyāṃ vasanti hi || 66 ||
[Analyze grammar]

andhā rugṇā daridrā vā kurūpā kubhagā'pi vā |
kustanī kumukhī kubjā sthūlā śaithilyamadhyamā || 67 ||
[Analyze grammar]

kuśvāsā kupadī kuṣṭhā kupriyā kusvabhāvinī |
api duṣṭā durācārā patnī sevyeva padmajā || 68 ||
[Analyze grammar]

na kvāpi duḥkhinnīṃ kuryāt svasya śreyo hyabhīpsatā |
tasyā niḥśvāsamātreṇa sarvaṃ dahyati tatkṣaṇāt || 69 ||
[Analyze grammar]

tasyā duḥkhakṛtocchvāsān nirvaṃśo jāyate naraḥ |
puṇyaṃ pūrvakṛtaṃ naśyet tasyāḥ kalpāntavahninā || 70 ||
[Analyze grammar]

tasmātputra sadā patnīṃ pūjaya tvaṃ yathocitam |
svasmād daśaguṇaṃ patnyai dehi sarvaṃ tvayā'rjitam || 71 ||
[Analyze grammar]

tena gṛhyasukhaṃ labdhvā saha svargaṃ vigāhya ca |
ante brāhmaṃ padaṃ divyaṃ prayāsyatho'punarbhavam || 72 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne patnīvratākhyapuruṣasyabrahmacaryagārhasthyadampatītvadharmamāhātmyādinirūpaṇanāmā pañcatriṃśo'dhyāyaḥ || 35 ||
[Analyze grammar]