Chapter 24

tato gatvā punas tasmāt sa rājā śiṃśapātaroḥ |
taṃ trivikramaseno 'ṃse vīro vetālam agrahīt || 1 ||
[Analyze grammar]

prasthitaṃ ca tatas taṃ sa vetālaḥ skandhato 'bravīt |
rājañ śramavinodāya śṛṇv etāṃ vacmi te kathām || 2 ||
[Analyze grammar]

akhaṇḍadharmamaryādaṃ gaṅgākūle kṛtāspadam |
kaler agamyaṃ kanakapuraṃ nāmnābhavat puram || 3 ||
[Analyze grammar]

tasmin yaśodhanākhyo 'bhūd anvartho vasudhādhipaḥ |
rarakṣa viplavāmbhodher yo velādrir iva kṣitim || 4 ||
[Analyze grammar]

jagādāhlādakaś caṇḍapratāpo 'khaṇḍamaṇḍalaḥ |
vidhinā yaś ca candrārkāv ekīkṛtyeva nirmame || 5 ||
[Analyze grammar]

maurkhyaṃ paraparīvāde na śāstrārthe daridratā |
doṣe na koṣadaṇḍābhyāṃ yasyāsīc ca mahīpateḥ || 6 ||
[Analyze grammar]

pāpabhīrur yaśolubdhaḥ ṣaṇḍhaḥ parapuraṃdhriṣu |
yaḥ śauryaudāryaśṛṅgāramayo janatayā jage || 7 ||
[Analyze grammar]

tasya rājñaḥ pure tasminn abhūd eko mahāvaṇik |
unmādinīti khyātā ca kanyā tasyābhavat sutā || 8 ||
[Analyze grammar]

yo yas tāṃ hi dadarśātra sa sa tadrūpasaṃpadā |
unmādyati sma madanasyāpi mohanaśaktayā || 9 ||
[Analyze grammar]

tasyāṃ ca yauvanasthāyāṃ sa gatvā tatpitā vaṇik |
yaśodhanaṃ taṃ rājānaṃ nītivedī vyajijñapat || 10 ||
[Analyze grammar]

trailokyaratnabhūtā me pradeyāsti sutā prabho |
tām anāvedya devasya nānyasmai dātum utsahe || 11 ||
[Analyze grammar]

devo 'pi sarvaratnānāṃ prabhuḥ kṛtsne 'pi bhūtale |
tatsvīkṛtyānugṛhṇātu devas tāṃ pratimucya vā || 12 ||
[Analyze grammar]

ity ākarṇya vaṇigvākyaṃ sa rājā brāhmaṇān nijān |
sādaraṃ vyasṛjat tasyāḥ saulakṣaṇyam avekṣitum || 13 ||
[Analyze grammar]

te gatvā brāhmaṇā dṛṣṭvā tāṃ trailokyaikasundarīm |
sadyaḥ kṣobhaṃ yayuḥ kṣiprāl labdhvā dhairyam acintayan || 14 ||
[Analyze grammar]

imāṃ prāpnoti ced rājā tad rāṣṭram avasīdati |
etanmohitacitto hi kiṃ sa rājyam avekṣate || 15 ||
[Analyze grammar]

tasmāt sulakṣaṇety eṣā nākhyeyā kṣitipāya naḥ |
ity eva mantraṃ saṃmantrya rājñas te jagmur antikam || 16 ||
[Analyze grammar]

kulakṣaṇā sā deveti tam ūcuś cātra te mṛṣā |
tena rājā sa naivaitāṃ svīcakāra vaṇiksutām || 17 ||
[Analyze grammar]

tatas tadājñayā tāṃ sa kanyām unmādinīṃ pitā |
vaṇig baladharākhyāya tat senāpataye dadau || 18 ||
[Analyze grammar]

atha sā tadgṛhe tasthau bhartrā tena samaṃ sukham |
kulakṣaṇety ahaṃ rajñā tyaktety āttavimānanā || 19 ||
[Analyze grammar]

yāti kāle ca jātv atra hatvā hemantahastinam |
phullakundalatādantaṃ mathitāmbujinīvanam || 20 ||
[Analyze grammar]

ājagāma lasatpuṣpamañjarīkesarāvaliḥ |
cūtāṅkuranakhaḥ krīdan kānane madhukesarī || 21 ||
[Analyze grammar]

tat kālaṃ cātra nagare taṃ vasantamahotsavam |
sa rājā niryayau draṣṭuṃ gajārūḍho yaśodhanaḥ || 22 ||
[Analyze grammar]

tadrūpālokasaṃbhāvyaviplavāḥ kulayoṣitaḥ |
apasārayituṃ dattaṃ tadā codghoṣaḍiṇḍimam || 23 ||
[Analyze grammar]

sā śrutvonmādinī tasmai rājñe svagṛhaharmyataḥ |
ātmānaṃ darśayāmāsa parityāgāvamānataḥ || 24 ||
[Analyze grammar]

sa ca tāṃ cakṣubhe dṛṣṭvā rājā jvālām ivodgatām |
saṃdhukṣitasya kāmāgner madhunā malayānilaiḥ || 25 ||
[Analyze grammar]

nirvarṇayaṃś ca tadrūpaṃ jaitram astraṃ manobhuvaḥ |
gāḍhaṃ praviṣṭaṃ hṛdaye kṣaṇān moham upāyayau || 26 ||
[Analyze grammar]

bhṛtyair āśvāsitaś cātra rājadhānīṃ praviśya saḥ |
pṛṣṭebhyo bubudhe tebhyas tāṃ prāgupanatojjhitām || 27 ||
[Analyze grammar]

tato nirvāsya deśāt tāṃs tatkulakṣaṇavādinaḥ |
viprān anudinaṃ dadhyau tām evotkaḥ sa bhūpatiḥ || 28 ||
[Analyze grammar]

aho jaḍātmā nirlajjaś candro nityam udeti yat |
jagannetrotsave tasyā niḥkalaṅke mukhe sati || 29 ||
[Analyze grammar]

kaṭhorau hemakalaśau gajakumbhau ca karkaśau |
labhete nopamām asyāḥ stanayoḥ pīnatuṅgayoḥ || 30 ||
[Analyze grammar]

kāñcīnakṣatramālāṅkaṃ tat tasyā jaghanasthalam |
kaṃ na kaṃdarpamātaṅgamastakābhaṃ vilobhayet || 31 ||
[Analyze grammar]

iti tāṃ cintayann antaḥ kṣīyate sma dine dine |
kāmāgnipuṭapākena pacyamānaḥ sa bhūpatiḥ || 32 ||
[Analyze grammar]

hriyā nigūhamānaś ca pṛcchadbhyo bāhyalakṣaṇaiḥ |
kṛcchrāc chaśaṃsa cāptebhyaḥ svapīḍākāraṇaṃ sa tat || 33 ||
[Analyze grammar]

alaṃ saṃtapya bhajase svādhīnāṃ tarhi kiṃ na tām |
ity uktas taiś ca naivaitad anumene sa dhārmikaḥ || 34 ||
[Analyze grammar]

tato baladharo buddhvā sa senāpatir etya tam |
prabhum abhyarthayāmāsa sadbhaktaś caraṇānataḥ || 35 ||
[Analyze grammar]

dāsastrī tava dāsy eva sā deva na parāṅganā |
svayaṃ cāhaṃ prayacchāmi tad bhāryāṃ svīkuruṣva me || 36 ||
[Analyze grammar]

athavā tāṃ tyajāmīha deva devakule tataḥ |
na doṣo grahaṇe tasyās tava devakulastriyaḥ || 37 ||
[Analyze grammar]

iti svasenāpatinā nirbandhena sa pārthivaḥ |
tenānunāthyamāno 'pi sāntaḥkopam uvāca tam || 38 ||
[Analyze grammar]

rājā bhūtvā kathaṃ kuryām adharmam aham īdṛśam |
mayy ullaṅghitamaryāde ko hi tiṣṭhet svavartmani || 39 ||
[Analyze grammar]

bhakto 'pi ca bhavān pāpe niyojayati māṃ katham |
paralokamahāduḥkhahetau kṣaṇasukhāvahe || 40 ||
[Analyze grammar]

na kṣamiṣye ca te dharmyān dārān yadi vihāsyasi |
sahate mādṛśaḥ ko hi tādṛśaṃ dharmaviplavam || 41 ||
[Analyze grammar]

tad varaṃ mṛtyur ity uktvā sa rājā niṣiṣedha tam |
tyajanty uttamasattvā hi prāṇān api na satpatham || 42 ||
[Analyze grammar]

tathaivārthayamānāṃś ca paurajānapadān api |
militān sa nirācakre rājā sudṛḍhaniścayaḥ || 43 ||
[Analyze grammar]

tataḥ krameṇa tenaiva smarajvarabharoṣmaṇā |
prakṣīṇadehaḥ prayayau sa yaśaḥśeṣatāṃ nṛpaḥ || 44 ||
[Analyze grammar]

senāpatiś cāsahiṣṇus taṃ tathā pramayaṃ prabhoḥ |
so 'gniṃ viveśa bhaktānām anirvācyaṃ hi ceṣṭitam || 45 ||
[Analyze grammar]

ity ākhyātakathāścaryo vetālo 'ṃsasthitas tadā |
sa trivikramasenaṃ taṃ bhūyaḥ papraccha pārthivam || 46 ||
[Analyze grammar]

tad etayoḥ ko nṛpateḥ senāpatimahībhṛtoḥ |
sattvenābhyadhiko brūhi pūrvoktaḥ samayaś ca te || 47 ||
[Analyze grammar]

iti vetālataḥ śrutvā muktamaunaḥ sa taṃ nṛpaḥ |
pratyuvāca dvayor rājā sattvavān adhikas tayoḥ || 48 ||
[Analyze grammar]

tad ākarṇyaiva vetālaḥ sākṣepas tam abhāṣata |
senāpatiḥ kathaṃ nātra rājann abhyadhiko vada || 49 ||
[Analyze grammar]

yas tathā svāmine bhaktyā svabhāryāṃ tāṃ tathāvidhām |
sucirajñātatadbhogasukhāsvādo 'py upānayat || 50 ||
[Analyze grammar]

ātmānaṃ cāgnisāc cakre tasmin pañcatvam āgate |
anāsvāditatadbhogas tatkāntāṃ tu jahau nṛpaḥ || 51 ||
[Analyze grammar]

vetālenaivam uktas tu vihasya sa nṛpo 'bravīt |
yady apy evaṃ tathāpy etat kiṃ citraṃ kulaputrakaḥ || 52 ||
[Analyze grammar]

senāpatiḥ sa bhaktyā yat svāmyarthe tat tathākarot |
prāṇair api hi bhṛtyānāṃ svāmisaṃrakṣaṇaṃ vratam || 53 ||
[Analyze grammar]

rājānas tu madādhmātā gajā iva niraṅkuśāḥ |
chindanti dharmamaryādāśṛṅkhalāṃ viṣayonmukhāḥ || 54 ||
[Analyze grammar]

teṣāṃ hy udriktacittānām abhiṣekāmbubhiḥ samam |
viveko vigalaty oghenohyamāna ivākhilaḥ || 55 ||
[Analyze grammar]

kṣipyanta iva coddhūya calaccāmaramārutaiḥ |
vṛddhopadiṣṭaśāstrārtharajomaśakamakṣikāḥ || 56 ||
[Analyze grammar]

ātapatreṇa satyaṃ ca sūryāloko nivāryate |
vibhūtivātyopahatā dṛṣṭir mārgaṃ ca nekṣate || 57 ||
[Analyze grammar]

te te ca vipadaṃ prāptā māramohitacetasaḥ |
jagadvijayino 'pīha rājāno nahuṣādayaḥ || 58 ||
[Analyze grammar]

eṣo rājā punaḥ pṛthvyām ekacchatro 'pi yat tayā |
unmadinyā capalayā lakṣmyeva na vimohitaḥ || 59 ||
[Analyze grammar]

prāṇān api sa dharmātmā tatyāja na punaḥ padam |
amārge nidadhe dhīras tenāsau me 'dhiko mataḥ || 60 ||
[Analyze grammar]

ity ākarṇya nṛpasya tasya vacanaṃ bhūyas tadaṃsasthalād vetālaḥ sahasā svam eva sa padaṃ māyāprabhāvād yayau |
rājāpy anvasarat tathaiva sa punaḥ saṃprāptum etaṃ javād ārabdhe hi suduḥkare 'pi mahatāṃ madhye virāmaḥ kutaḥ || 61 ||
[Analyze grammar]