Chapter 25

tataḥ pitṛvane tasmin kravyabhakṣibhir āvṛte |
jvālāvilolarasanair bhūtair iva citāgnibhiḥ || 1 ||
[Analyze grammar]

gatvaiva tasyām akṣobhyaḥ kṣapāyāṃ śiṃśapātarum |
sa trivikramasenas tam āsasāda punar nṛpaḥ || 2 ||
[Analyze grammar]

tatrāpaśyac ca vetālavikṛtān sadṛśākṛtīn |
ullambamānān subahūn pretakāyān aśaṅkitam || 3 ||
[Analyze grammar]

aho kim etat kiṃ vānyan māyī kālaṃ kṣipaty ayam |
vetālo me na vedmy eṣāṃ grāhyaṃ yeneha bhūyaṣām || 4 ||
[Analyze grammar]

asiddhārthasya ced rātrir iyaṃ mama gamiṣyati |
tato vahniṃ pravekṣyāmi na sahiṣye tu hāsyatām || 5 ||
[Analyze grammar]

iti cintayatas tasya rājño vijñāya niścayam |
sattvatuṣṭaḥ sa vetālaḥ svamāyāṃ saṃjahāra tām || 6 ||
[Analyze grammar]

tato dṛṣṭvaikam evātra vetālaṃ nṛkalevare |
avatīrya gṛhītvāṃse sa pratasthe punar nṛpaḥ || 7 ||
[Analyze grammar]

prakrāmantaṃ ca taṃ bhūyaḥ sa vetālo 'bhyabhāṣata |
rājan nodvijase citraṃ tad imāṃ me kathāṃ sṛṇu || 8 ||
[Analyze grammar]

asti gaurītapaḥkleśavṛtena tripurāriṇā |
asāmānyaguṇotkarṣalubdheneva svayaṃvṛtā || 9 ||
[Analyze grammar]

bhogavatyamarāvatyos tṛtīyojjayinī purī |
udārasukṛtaprāpyanānābhogopabṛṃhitā || 10 ||
[Analyze grammar]

yasyāṃ stabdhatvakārkaśye kuceṣu varayoṣitām |
tāsām eva bhruvor bhaṅgo locaneṣu ca cāpalam || 11 ||
[Analyze grammar]

tamo niśāsu vakratvaṃ yasyāṃ kavivaroktiṣu |
mado dantiṣu jāḍyaṃ ca muktāmalayajenduṣu || 12 ||
[Analyze grammar]

tasyāṃ candraprabhākhyasya rājño 'mātyo bahuśrutaḥ |
devasvāmīty abhūd vipro bhūriyajño mahādhanaḥ || 13 ||
[Analyze grammar]

tasya kālena tanayaś candrasvāmīty ajāyata |
so 'dhītavidyo 'pi yuvā dyūtaikavyasano 'bhavat || 14 ||
[Analyze grammar]

ekadā ca dvijasutaś candrasvāmī sa kāṃcana |
dyūtakāramahāṭhiṇṭhāṃ dyūtena krīḍituṃ yayau || 15 ||
[Analyze grammar]

āśliṣyāmaḥ kam atreti vipadbhir iva vīkṣitum |
vikṣiptaiḥ kṛṣṇaśārābhair netrair akṣair nirantarām || 16 ||
[Analyze grammar]

kaḥ so 'sti na śriyaṃ yasya harāmy apy alakāpateḥ |
itīva tanvatīṃ nādān dyūtakṛtkalahasvanaiḥ || 17 ||
[Analyze grammar]

tāṃ praviśya kramād dīvyann akṣaiḥ sa kitavaiḥ saha |
vastrādi hārayitvāpi dhanam anyad ahārayat || 18 ||
[Analyze grammar]

mṛgyamāṇaṃ ca yan nādāt sa tad dhanam asaṃbhavi |
tad avaṣṭabhya sabhyena laguḍaiḥ paryatāḍyata || 19 ||
[Analyze grammar]

laguḍāhatasarvāṅgaḥ pāṣāṇam iva niścalam |
kṛtvā mṛtam ivātmānaṃ tasthau viprasuto 'tha saḥ || 20 ||
[Analyze grammar]

tathaiva divasān dvitrāṃs tatra tasminn avasthite |
kruddhaḥ sa sabhyaṣ ṭhiṇṭhāyāṃ kitavān svān abhāṣata || 21 ||
[Analyze grammar]

śritānenāśmatā tāvat tad etaṃ kṣipata kvacit |
nītvāndhakūpe niḥsattvaṃ dhanaṃ dāsyāmy ahaṃ tu vaḥ || 22 ||
[Analyze grammar]

ity uktās tena kitavās taṃ candrasvāminaṃ tataḥ |
araṇyaṃ ninyur utkṣipya dūraṃ kūpagaveṣiṇaḥ || 23 ||
[Analyze grammar]

tatraiko vṛddhakitavas tān anyān evam abhyadhāt |
mṛto 'yaṃ prāyaśas tat kiṃ kūpe kṣiptena no 'munā || 24 ||
[Analyze grammar]

tad ihaivainam ujjhitvā vakṣyāmaḥ kūpa ujjhitam |
iti te tadvacaḥ sarve tatheti pratipedire || 25 ||
[Analyze grammar]

tatas tyaktvā gateṣv eṣu kitaveṣu sa utthitaḥ |
candrasvāmī viveśātra śūnyam ekaṃ śivālayam || 26 ||
[Analyze grammar]

tatra kiṃcit samāśvasya cintayāmāsa duḥkhitaḥ |
viśvasto māyayā kaṣṭaṃ muṣitaḥ kitavair aham || 27 ||
[Analyze grammar]

tad īdṛśaḥ kva gacchāmi nāgnopahatapāṃśulaḥ |
pitā bandhuḥ suhṛd vāpi dṛṣṭvā kiṃ hi vaden mama || 28 ||
[Analyze grammar]

tat saṃprati sthito 'smīha naktaṃ ca kṣutpraśāntaye |
paśyāmi nirgatya kathaṃ yatiṣye bhojanaṃ prati || 29 ||
[Analyze grammar]

ity ālocayatas tasya klāntasyānambarasya ca |
mandīkṛtātapo 'stādriṃ ravis tyaktāmbaro yayau || 30 ||
[Analyze grammar]

tāvac ca bhūtidigdhāṅgas tatrāyāti sma tāpasaḥ |
mahāvratī jaṭāśūladharo hara ivāparaḥ || 31 ||
[Analyze grammar]

sa candrasvāminaṃ dṛṣṭvā ko 'sīti paripṛcchya ca |
srutvā tasmāc ca vṛttāntaṃ prahvaṃ taṃ tāpaso 'bravīt || 32 ||
[Analyze grammar]

tvaṃ mamehāśramaṃ prāptaḥ kṣutklānto 'cintito 'tithiḥ |
tad uttiṣṭha kṛtasnāno bhikṣābhāgaṃ mamāhara || 33 ||
[Analyze grammar]

ity ukto vratinā so 'tha candrasvāmī jagāda tam |
vipro 'haṃ bhagavan bhokṣye bhikṣābhāgaṃ kathaṃ tava || 34 ||
[Analyze grammar]

tac chrutvā sa vratī siddhaḥ praviśya maṭhikāṃ nijām |
iṣṭasaṃpādinīṃ vidyāṃ sasmārātithivallabhaḥ || 35 ||
[Analyze grammar]

saṃsmṛtopasthitāṃ tāṃ ca kiṃ karomīti vādinīm |
amuṣyātithyam atitheḥ kuruṣveti śaśāsa tām || 36 ||
[Analyze grammar]

tathety ukte tayā tatra sodyānaṃ sāṅganājanam |
puraṃ sauvarṇam utpannaṃ candrasvāmī dadarśa saḥ || 37 ||
[Analyze grammar]

vismitaṃ ca tam abhyetya tasmād vārāṅganāḥ purāt |
ūcur uttiṣṭha bhadraihi snāhi bhuṅkṣva tyaja śramam || 38 ||
[Analyze grammar]

ity uktvābhyantaraṃ nītvā snāpayitvānulipya ca |
tābhiḥ sa dattasadvastro ninye 'nyad vāsakottamam || 39 ||
[Analyze grammar]

tatrāntaḥ sa dadarśaikāṃ pradhānayuvatiṃ yuvā |
sarvāṅgasundarīṃ dhātrā kautukād iva nirmitām || 40 ||
[Analyze grammar]

tayā sa sotkayotthāya svāsanārdhopaveśitaḥ |
bubhuje divyam āhāraṃ tayaivātra samaṃ tataḥ || 41 ||
[Analyze grammar]

bhuktapakvaphalasvādutāmbūlaḥ svarasena ca |
paryaṅkaśayane bheje tatsaṃbhogasukhaṃ niśi || 42 ||
[Analyze grammar]

prātaḥ prabuddhaś cāpaśyat tad evātra śivāyalam |
nāpi divyāṅganāṃ nāpi puraṃ tan na paricchadam || 43 ||
[Analyze grammar]

tataḥ sa vigno niryātaṃ maṭhikātaḥ smitānanam |
pṛṣṭarātrisukhaṃ prātas tāpasaṃ taṃ vyajijñapat || 44 ||
[Analyze grammar]

tatprasādād ahaṃ rātrāv uṣito bhagavan sukham |
kiṃ tu yāsyanti me prāṇās tayā divyastriyā vinā || 45 ||
[Analyze grammar]

tac chrutvā sa tapasvī taṃ hasan kāruṇiko 'bravīt |
ihaivāssva punar naktaṃ bhaviṣyati tathaiva te || 46 ||
[Analyze grammar]

ity ukte vratinā tena tadyuktyaiva pratikṣapam |
candrasvāmy atra so 'bhuṅkta bhogāṃs tāṃs tatprasādataḥ || 47 ||
[Analyze grammar]

buddhvā ca taṃ śanair vidyāprabhāvaṃ vidhicoditaḥ |
ekadā tāpasendraṃ taṃ sa prasādyānvayācata || 48 ||
[Analyze grammar]

satyaṃ kṛpā ced bhagavan mayi te śaraṇāgate |
tad etāṃ dehi me vidyāṃ yatprabhāvo 'yam īdṛśaḥ || 49 ||
[Analyze grammar]

iti bruvāṇaṃ nirbandhāt taṃ pratyāha sa tāpasaḥ |
asādhyā tava vidyeyaṃ sādhyate 'ntarjale hy asau || 50 ||
[Analyze grammar]

tatra caiṣā sṛjaty āśu japataḥ sādhakasya tat |
māyājālaṃ vimohāya yena siddhiṃ na so 'śnute || 51 ||
[Analyze grammar]

sa hi tatra punar jātaṃ bālam ātmānam īkṣate |
tato yuvānam udvyūḍhadāraṃ jātātmajaṃ tathā || 52 ||
[Analyze grammar]

suhṛn me 'yam ayaṃ śatrur iti mithyā sa muhyati |
na ca smarati janmedaṃ na vidyāsādhane kriyām || 53 ||
[Analyze grammar]

yas tu triraṣṭavarṣaḥ san guruvidyāprabodhitaḥ |
janma smṛtvā viditvā tad dhīro māyāvijṛmbhitam || 54 ||
[Analyze grammar]

tadvaśo 'py atra kurute tathaivāgnipraveśanam |
paramārthaṃ jalottīrṇaḥ siddhavidyaḥ sa paśyati || 55 ||
[Analyze grammar]

anyasya na paraṃ vidyā śiṣyasyaiṣā hi sidhyati |
asthānārpaṇato yāvad guror api vinaśyati || 56 ||
[Analyze grammar]

matsiddhyaiva phale siddhe kiṃ graheṇāmunā tava |
matsiddhihānyā mā jātu tavaitad api naṅkṣyati || 57 ||
[Analyze grammar]

evaṃ tapasvinokte 'pi candrasvāmī graheṇa saḥ |
śikṣyāmi sarvaṃ mā bhūd vaś cintātreti tam abravīt || 58 ||
[Analyze grammar]

tato 'smai pratipede tāṃ vidyāṃ dātuṃ sa tāpasaḥ |
batāśritānurodhena kiṃ na kurvanti sādhavaḥ || 59 ||
[Analyze grammar]

tato nītvā nadītīraṃ sa taṃ smāha mahāvratī |
vatsa vidyāṃ japan māyāṃ yadi drakṣyasi tāṃ tadā || 60 ||
[Analyze grammar]

māyāgnim eva praviśer vidhyayā bodhito mayā |
ahaṃ ca tāvat sthāsyāmi tavehaiva nadītaṭe || 61 ||
[Analyze grammar]

ity uktvādhyāpayāmāsa tam ācāntaṃ śuciṃ śuciḥ |
sa candrasvāminaṃ vidyāṃ samyak tāṃ vratināṃ varaḥ || 62 ||
[Analyze grammar]

tatas tīre sthite tasmin gurau mūrdhnā praṇamya tam |
candrasvāmī sa rabhasān nadīm avatatāra tām || 63 ||
[Analyze grammar]

tasyām antarjale vidyāṃ tāṃ japan sahasaiva saḥ |
tanmāyāmohito mithyā sarvaṃ vismṛtya janma tat || 64 ||
[Analyze grammar]

vīkṣate yāvad anyasyām utpannaḥ svātmanā puri |
putro viprasya kasyāpi buddhiṃ sa śanakair gataḥ || 65 ||
[Analyze grammar]

kṛtopanayano 'dhītavidyo dārān avāpya ca |
tadduḥkhasukhasaṃmūḍhaḥ saṃpūrṇo 'patyavān kramāt || 66 ||
[Analyze grammar]

tataś cātra sutasnehasvīkṛtas tat tad ācarat |
sthito baddharatiḥ sārdhaṃ pitṛbhyāṃ bandhubhis tathā || 67 ||
[Analyze grammar]

evaṃ janmāntaraṃ mithyā tasyānubhavato 'tra saḥ |
kāle prabodhinīṃ vidyāṃ guruḥ prāyuṅkta tāpasaḥ || 68 ||
[Analyze grammar]

sa tadvidyāprayogeṇa sadyas tena prabodhitaḥ |
smṛtvātmānaṃ guruṃ taṃ ca māyājālam avetya tat || 69 ||
[Analyze grammar]

udyato 'gnipraveśāya divyāsādhyaphalāptaye |
paryavāri niṣedhadbhir vṛddhāptagurubandhubhiḥ || 70 ||
[Analyze grammar]

bahudhā bodhyamāno 'pi tair divyasukhalolupaḥ |
sa sajjitacitaṃ prāyān nadītīraṃ sabāndhavaḥ || 71 ||
[Analyze grammar]

dṛṣṭvātra vṛddhau pitarau bhāryāṃ ca maraṇodyatām |
krandanti bālāpatyāni so 'tha mohād acintayat || 72 ||
[Analyze grammar]

kaṣṭaṃ mriyante svajanāḥ sarve me viśato 'nalam |
na ca jānāmi kiṃ satyaṃ guros tad vacanaṃ na vā || 73 ||
[Analyze grammar]

tat kiṃ nu praviśāmy agnim uta na praviśāmi kim |
athavā tat kathaṃ mithyā syāt saṃvādi guror vacaḥ || 74 ||
[Analyze grammar]

tad viśāmy analaṃ kāmam ity antaḥ pravimṛśya saḥ |
agnipraveśaṃ vidadhe candrasvāmī kila dvijaḥ || 75 ||
[Analyze grammar]

anubhūtahimasparśo vahneś ca sa savismayaḥ |
śāntamāyo nadītīrād utthāyopayayau taṭam || 76 ||
[Analyze grammar]

tatra sthitaṃ ca dṛṣṭvā taṃ guruṃ natvā ca pādayoḥ |
pṛcchantaṃ cāgniśaityāntaṃ svam udantam abodhayat || 77 ||
[Analyze grammar]

tatas taṃ sa guruḥ prāha vatsa śaṅke kṛtas tvayā |
apacāro 'tra śītas te kathaṃ jāto 'gnir anyathā || 78 ||
[Analyze grammar]

adṛṣṭam etad etasyā vidyāyāḥ sādhane yataḥ |
etad guror vacaḥ śrutvā candrasvāmī jagāda saḥ || 79 ||
[Analyze grammar]

nāpacāro mayā kaścid vihito bhagavann iti |
tataḥ sa tadgurur vidyāṃ jijñāsus tāṃ samasmarat || 80 ||
[Analyze grammar]

na ca sāvirabhūt tasya na tacchiṣyasya tasya vā |
naṣṭavidyāv athobhau tau viṣaṇṇau jagmatus tataḥ || 81 ||
[Analyze grammar]

ity ākhyāya kathām atha vetālaḥ pṛṣṭavān sa taṃ bhūyaḥ |
pṛthvīpatiṃ trivikramasenaṃ samayaṃ nigadya pūrvoktam || 82 ||
[Analyze grammar]

rājan saṃśayam etaṃ chinddhi mama brūhi hetunā kena |
vihite 'pi yathoddiṣṭe karmaṇi vidyobhayos tayor naṣṭā || 83 ||
[Analyze grammar]

etat sa vetālavaco niśamya taṃ pratyavocan manujendravīraḥ |
jāne bhavān me kṣipatīha kālaṃ yogeśvaraivaṃ tad api bravīmi || 84 ||
[Analyze grammar]

na duṣkareṇāpi hi karmaṇaiva śuddhena siddhiḥ puruṣasya labhyā |
yāvan na niṣkramya vikalpaśuddhaṃ dhīraṃ mano nirmalasattvavṛtti || 85 ||
[Analyze grammar]

tasyātra mandasya tu viprayūnaś cittaṃ prabudhyāpi vikalpate sma |
vidyā na sā tena gatāsya siddhir asthānadānāc ca guror vinaṣṭā || 86 ||
[Analyze grammar]

iti tasya nṛpasya sṛṣṭavāco bata vetālavaro 'ṃsataḥ sa bhūyaḥ |
nijam eva padaṃ yayāv alakṣyo nṛpatis taṃ ca tathaiva so 'nvayāsīt || 87 ||
[Analyze grammar]