Chapter 5

śrīkṛṣṇa uvāca |
adhodhaḥ patanaṃ puṃsāmadhaḥkarma prakīrtitam |
narakārṇavaghoreṣu yātanā pāpamucyate || 1 ||
[Analyze grammar]

adharmabhedā vijñeyāścittavṛttiprabhedataḥ |
sthūlāḥ sūkṣmāḥ susūkṣmāśca koṭi bhedairanekadhā || 2 ||
[Analyze grammar]

tatra ye pāpanicayāḥ sthūlā narakahetavaḥ |
te samāsena kathyaṃte manovākkāyasādhanāḥ || 3 ||
[Analyze grammar]

parastrīṣvatha saṃkalpaścetasāniṣṭaciṃtanam |
akāryābhiniveśaśca caturdhā karma mānasam || 4 ||
[Analyze grammar]

anibaddhapralāpitvamasatyaṃ cāpriyaṃ ca yat |
parāpavādapaiśunyaṃ caturdhā karma vācikam || 5 ||
[Analyze grammar]

abhakṣyabhakṣaṇaṃ hiṃsā mithyā kāmasya sevanam |
parasvānāmupādānaṃ caturddhā karma kāyikam || 6 ||
[Analyze grammar]

ityetaddvādaśavidhaṃ karma proktaṃ sasādhanam |
teṣāṃ bhedaṃ punarvacmi yeṣāṃ phalamanaṃtakam | 7 |
ye dviṣaṃti mahādevaṃ saṃsārārṇavatāraṇam |
samastapātakopetāste yānti narakāgniṣu || 8 ||
[Analyze grammar]

brahmaghnaśca surāpaśca steyī ca gurutalpagaḥ |
mahāpātakinaścaite tatsaṃsargī ca paṃcamaḥ || 9 ||
[Analyze grammar]

krodhāddveṣādbhayāllobhādbrāhmaṇaṃ viśasaṃti ye |
prāṇāṃtiko mahādoṣo brahmaghnāste prakīrtitāḥ || 10 ||
[Analyze grammar]

brāhmaṇaṃ ca samāhūya yācamānamakiñcanam |
paścānnāstīti taṃ brūyātsa caivaṃ brahmahā smṛtaḥ || 11 ||
[Analyze grammar]

yastu vidyābhimānena nityaṃ jayati vai dvijān |
samāsīnaḥ sabhāmadhye brahmahā so'pi kīrtitaḥ || 12 ||
[Analyze grammar]

mithyāguṇaiḥ svamātmānaṃ nayatyutkarṣaṇaṃ balāt |
gurūṇāṃ ca viruddho yaḥ sa caiva brahmahā smṛtaḥ |
kṣuttṛṭsaṃtaptadehānāṃ dvijānāṃ bhoktumicchatām |
samācarati yo vighnaṃ tamāhurbrahmaghātakam || 14 ||
[Analyze grammar]

piśunaḥ sarvalokānāṃ chidrānveṣaṇatatparaḥ |
udvegajananaḥ krūraḥ sa caiva brahmahā smṛtaḥ || 15 ||
[Analyze grammar]

gavāṃ tṛṣṇābhibhūtānāṃ jalārthamupasarpatām |
samācarati yo vighnaṃ sa caiva brahmahā smṛtaḥ || 16 ||
[Analyze grammar]

paradoṣamabhijñāya nṛpakarṇe karoti yaḥ |
pāpīyānpiśunaḥ kṣudraḥ sa caiva brahmahā smṛtaḥ || 17 ||
[Analyze grammar]

devadvijagavāṃ bhūmiṃ pūrvabhuktā harettu yaḥ |
pranaṣṭāmapi kālena tamāhurbrahmaghātakam || 18 ||
[Analyze grammar]

dvijavittāpaharaṇe nyāyataḥ samupārjite |
brahmahatyā samaṃ jñeyaṃ pātakaṃ nātra saṃśayaḥ || 19 ||
[Analyze grammar]

agnihotraparityāgo yastu yājñikakarmaṇām |
mātāpitṛparityāgaḥ kūṭasākṣyaṃ suhṛdvadhaḥ || 20 ||
[Analyze grammar]

gavāṃ mārge vane cāgniṃ pure grāme ca dīpayet |
iti pāpāni ghorāṇi surāpānasamāni tu || 21 ||
[Analyze grammar]

hīnasvaharaṇe cāpi narastrīgajavājinām |
gobhūrajataratnānāmauṣadhīnāṃ rajasya ca || 22 ||
[Analyze grammar]

caṃdanāgarukarpūrakastūrīkhaṇḍavāsasām |
haste nyasyāpaharaṇaṃ rukmasteyasamaṃ smṛtam || 23 ||
[Analyze grammar]

kanyānāṃ varayogyānāmadānaṃ sadṛśe vare |
putramitrakalatreṣu gamanaṃ bhaginīṣu ca || 24 ||
[Analyze grammar]

kumārīsāhasaṃ ghoramantyajastrīniṣevaṇam |
avarṇāyāśca gamanaṃ gurutalpasamaṃ smṛtam || 25 ||
[Analyze grammar]

mahāpātakatulyāni pāpānyuktāni yāni tu |
tāni pātakasaṃjñāni tadvadāmyupapātakam || 26 ||
[Analyze grammar]

dvijārthaṃ ca pratijñāya na prayacchati yaḥ punaḥ |
tasmānnarapate vighnatulyaṃ tadupapātakam || 27 ||
[Analyze grammar]

dvijadravyāpaharaṇaṃ maryādāyā vyatikramaḥ |
atikopaśca mānaśca dāṃbhikatvaṃ kṛtaghnatā || 28 ||
[Analyze grammar]

atyaṃtaviṣayāsaktiḥ kārpaṇyaṃ śreṣṭhamatsaraḥ |
paradārāpaharaṇaṃ sādhukanyāvidūṣaṇam || 29 ||
[Analyze grammar]

parivittiḥ parīvettā yayā ca parividyate |
tayorddānaṃ ca kanyāyāstayoreva ca yājanam || 30 ||
[Analyze grammar]

putramitrakalatrāṇāmabhāve svāminastathā |
śiṣṭānāṃ caiva saṃnyāsaḥ sahajānāṃ tapasvinām || 31 ||
[Analyze grammar]

bhaṃgaśca dharmakṛtyānāṃ sahāyānāṃ vināśanam |
pīḍāmāśramasaṃsthānānnācarettvalpikāmapi || 32 ||
[Analyze grammar]

svabhṛtyaparivargasya paśudhānyadhanasya ca |
kupyadhānyapaśusteyamayācyānāṃ ca yācanam || 33 ||
[Analyze grammar]

gavāṃ kṣatriyaveśyānāṃ strīśūdrāṇāṃ viśeṣataḥ |
yajñārāmataḍāgānāṃ dārāpatyasya vikrayaḥ |
tīrthayātropavāsānāṃ vratāyatanakarmaṇām || 34 ||
[Analyze grammar]

strīdhanānyupajīvaṃti strībhiratyaṃtanirjitāḥ |
arakṣaṇaṃ ca nārīṇāṃ madyapastrīniṣevaṇam || 35 ||
[Analyze grammar]

ṛṇānāmapradānaṃ ca dhānyavṛddhyupajīvinām |
niṃditācca dhanādānamapaṇyānāṃ ca vikrayaḥ || 36 ||
[Analyze grammar]

viṣamāraṇamaṃtrāṇāṃ prayogo mūlakarmaṇām |
uccāṭanāvicāraśca garavidveṣaṇakriyā || 37 ||
[Analyze grammar]

jihvāsamupabhogārthaṃ yasyārambhaḥ svakarmasu |
mūlyenādhyāpayedyaśca mūlyenādhīyate ca ye || 38 ||
[Analyze grammar]

vrātyatā vratasaṃtyāgaḥ sarvāhāraniṣevaṇam |
asaddārābhigamanaṃ śuṣkatarkāvalaṃbanam || 39 ||
[Analyze grammar]

devāgnisādhusādhvīnāṃ niṃdā gobrāhmaṇasya ca |
pratyakṣaṃ vā parokṣaṃ vā rājñāṃ maṇḍalikāmapi |
duḥśīlā nāstikāḥ pāpāḥ sarvaśūnyasya vādinaḥ || 40 ||
[Analyze grammar]

parvakāle divā caiva viyonau paśuyoniṣu |
rajasvalānāṃ yonau ca maithunaṃ ca samācaret || 41 ||
[Analyze grammar]

strīputramitrasaṃprīte grāsānnacchedakāśca ye |
janasyā priyavaktāro dhūrtāḥ samayabhedinaḥ || 42 ||
[Analyze grammar]

bhettā taḍāgacakrāṇāṃ saṃkramāṇāṃ rathasya ca |
ekapaṃktisthitānāṃ ca pākabhedaṃ karoti yaḥ || 43 ||
[Analyze grammar]

ityetaiste narāḥ pāpairupapātakinaḥ smṛtāḥ |
yuktāstadūnakaiḥ kṣudraiḥ pāpaiḥ pāpatarāḥ smṛtāḥ || 44 ||
[Analyze grammar]

ye gobrāhmaṇakanyānāṃ svāmimitratapasvinām |
aṃtaraṃ yāṃti kāryeṣu te narā nārakāḥ smṛtāḥ || 45 ||
[Analyze grammar]

paraśriyā ye tapyaṃte ye paradravyasūcakāḥ |
paravyāpāraniratāḥ parastrīnaradūṣakāḥ || 46 ||
[Analyze grammar]

dvijāya duḥkhaṃ yaḥ kuryātprakārairbahubhiḥ sadā |
sevate yo dvijaḥ śūdrāṃ surāṃ jighrati kāmataḥ || 47 ||
[Analyze grammar]

ye pānābhiratāḥ krūrā ye ca hiṃsāpriyā narāḥ |
vittārthaṃ ye ca kurvaṃti dānayajñādikāṃ kriyām || 48 ||
[Analyze grammar]

goṣṭhāgnijalarathyāsu tarucchāyāmaṭheṣu ca |
tyajaṃtyamedhyaṃ puruṣā ārāmāyataneṣu ca || 49 ||
[Analyze grammar]

madyapānaratā nityaṃ gānavādyaratā narāḥ |
kelīkalābhujaṃgāśca raṃdhrānveṣaṇatatparāḥ || 50 ||
[Analyze grammar]

vaṃśeṣu kāśakāṣṭhaiśca śubhaiḥ śaṃkubhireva vā |
ye mārgānsamupaghnaṃti parastrīrāharaṃti ca || 51 ||
[Analyze grammar]

kūṭaśāsanahartāraḥ kūṭakarmakriyāratāḥ |
kūṭayuddhāśca śastreṇa kūṭasaṃvyavahāriṇaḥ || 52 ||
[Analyze grammar]

dhanuṣāṃ śalyaśastrāṇāṃ yaḥ kartā yaśca vikrayī |
nirdayo'tīva bhṛtyeṣu paśūnāṃ damakaśca yaḥ || 53 ||
[Analyze grammar]

mithyā pravadato vākyamākarṇayati yaḥ śanaiḥ |
svāmimitragurudrohī māyāvī capalaḥ śaṭhaḥ || 54 ||
[Analyze grammar]

ye bhāryāputramitrāṇi bālavṛddhakṛśāturān |
bhṛtyānatithibandhūṃśca prabādhante bubhukṣayā || 55 ||
[Analyze grammar]

yaḥ svayaṃ miṣṭamaśnāti viprāyānyatprayacchati |
vṛthāpākaḥ sa vijñeyo brahmavādiṣu garhitaḥ || 56 ||
[Analyze grammar]

niyamānsvayamādāya ye tyajaṃtyajiteṃdriyāḥ |
pravrajyāvāsino ye ca rahasyānāṃ ca bhedakāḥ || 57 ||
[Analyze grammar]

tāḍayaṃti ca vegādye śapaṃti ca muhurmuhuḥ |
durbalāṃśca na puṣṇaṃti punastānvāhayaṃti ca || 56 ||
[Analyze grammar]

pīḍayaṃtyatibhāreṇa sakṣatānvāhayaṃti ca |
sārddhayāmāduparitaḥ saṃyukteṣu ca bhuṃjate || 59 ||
[Analyze grammar]

ye bhagnakṣatarogārtānsvagorūpānbubhukṣayā |
na pālayaṃti yatnena te goptā nārakā narāḥ || 60 ||
[Analyze grammar]

vṛṣāṇāṃ vṛṣaṇānyeva pāpiṣṭhā gālayaṃti ye |
vāhayaṃti ca gāṃ vadhyāṃ te mahānārakāḥ smṛtāḥ || 61 ||
[Analyze grammar]

āśramaṃ samanuprāptaṃ kṣuttṛṣṇāśramapīḍitam |
ye'tithiṃ nābhimanyaṃte te vai nirayagāminaḥ || 62 ||
[Analyze grammar]

anāthaṃ vikalaṃ dīnaṃ bālaṃ vṛddhaṃ kṛśāturam |
nānukaṃpaṃti ye mūḍhāste yānti nirayārṇavam || 63 ||
[Analyze grammar]

ajāviko māhiṣikaḥ sāmudro vṛṣalīpatiḥ |
śūdraviṭkṣatravṛttiśca nārakī syāddvijādhamaḥ || 64 ||
[Analyze grammar]

śilpinaḥ kārukā vaidyā hemakārā naṭā dvijāḥ |
kṛtakaukṣeya sayuktāstathānye nārakāḥ smṛtāḥ || 65 ||
[Analyze grammar]

yaścoditamatikramya svecchayā vā haretkaram |
narake tu sa pacyeta yaśca daṃḍarucirbhavet || 66 ||
[Analyze grammar]

utkocakairadhikṛtaistaskaraiśca prapīḍyate |
yasya rājñaḥ prajā ruṣṭā pacyate narakeṣu saḥ || 67 ||
[Analyze grammar]

ye dvijāḥ pratigṛhṇaṃti nṛpasyānyāyavartinaḥ |
prayāṃti tepi ghorāṇi narakāṇi na saṃśayaḥ || 68 ||
[Analyze grammar]

pāradārikacaurāṇāṃ yatpāpaṃ pārthivasya tat |
bhavedarakṣatastasmādghorastasya pratigrahaḥ || 69 ||
[Analyze grammar]

acauraṃ cauravatpaśyeccoraṃ vā'caurarūpavat |
avicārya nṛpastasmāddhātayannarakaṃ vrajet || 70 ||
[Analyze grammar]

ghṛtatailānnapānāni madhumāṃsasurāsavam |
guḍekṣukṣāraśākāni dadhimūlaphalāni ca || 71 ||
[Analyze grammar]

tṛṇaṃ kāṣṭhaṃ puṣpapatramauṣadhaṃ kāṃsyabhājanam |
upānacchatraśakaṭamāsanaṃ śayanāṃbaram || 72 ||
[Analyze grammar]

tāmraṃ sīsaṃ trapuṃ kācaṃ śaṃkhādyaṃ ca jalodbhavam |
vārkṣaṃ vā vaiṇavādyaṃ vā gṛheṣūpaskarāṇi ca || 73 ||
[Analyze grammar]

ūrṇākārpāsakauśeyabhaṃgapaṭṭodbhavāni ca |
sthūlasūkṣmāṇi vastrāṇi ye ca lobhāddharaṃti ca || 74 ||
[Analyze grammar]

evamādīni cānyāni dravyāṇi vividhāni ca |
narakāṇi dhruvaṃ yāṃti narā vā nātra saṃśayaḥ || 75 ||
[Analyze grammar]

yadvā tadvā paradravyamapi sarṣapamātrakam |
apahṛtya naro yāti narakaṃ nātra saṃśayaḥ || 76 ||
[Analyze grammar]

evamādyai्rnaraḥ pāpairutkrāṃteḥ samanaṃtaram |
śarīraṃ yātanārthāya pūrvākāramavāpnuyāt || 77 ||
[Analyze grammar]

yamalokaṃ vrajettena śarīreṇa yamājñayā |
yamadūtairmahāghorairnīyamānaḥ suduḥkhitaḥ || 78 ||
[Analyze grammar]

tiryaṅmānuṣadehānāmadharmaniratātmanām |
dharmarājaḥ smṛtaḥ śāstā sughorairvividhairvadhaiḥ || 79 ||
[Analyze grammar]

vinayācārayuktānāṃ pramādātskhalitātmanām |
prāyaścitterguruḥ śāstā na ca tairdṛśyate yamaḥ || 80 ||
[Analyze grammar]

pāradārikacaurāṇāmanyāyavyavahāriṇām |
nṛpatiḥ śāsakasteṣāṃ pracchannānāṃ ca dharmarāṭ || 81 ||
[Analyze grammar]

tasmātkṛtasya pāpasya prāyaścittaṃ samācaret |
nābhuktasyānyathā nāśaḥ kalpakoṭiśatairapi || 82 ||
[Analyze grammar]

yaḥ karoti svayaṃ karma kārayedvāpi moda yet |
kāyena manasā vācā tasya cādhogatiḥ phalam || 83 ||
[Analyze grammar]

iti saṃkṣepataḥ proktāḥ pāpabhedāḥ sasādhanāḥ |
kathyate gatayaścitrā narāṇāṃ pāpakarmaṇām || 84 ||
[Analyze grammar]

vākkāyacittajanitairbahubhedabhinnaiḥ kṛtyaiḥ śubhāśubhaphalodayahetubhūtaiḥ || bhāsvatsureśabhuvanaṃ narakānanekānsaṃprāpnuvaṃti manujā manujeṃdracandra || 85 ||
[Analyze grammar]