Chapter 39

[English text for this chapter is available]

śrīkṛṣṇabalarāmayormathurāyāṃ prati prasthānaṃ virahakātara gopīnāṃ karuṇodgāraḥ kāliṃdyāṃ akrūrakartṛkaṃ bhagavaddhāma darśanaṃ ca |
śrīśuka uvāca |
sukhopaviṣṭaḥ paryaṅke ramakṛṣṇorumānitaḥ |
lebhe manorathān sarvān panpathi yān sa cakāra ha || 1 ||
[Analyze grammar]

kimalabhyaṃ bhagavati prasanne śrīniketane |
tathāpi tatparā rājan na hi vāñchanti kiñcana || 2 ||
[Analyze grammar]

sāyaṃtanāśanaṃ kṛtvā bhagavān devakīsutaḥ |
suhṛtsu vṛttaṃ kaṃsasya papracchānyaccikīrṣitam || 3 ||
[Analyze grammar]

śrībhagavānuvāca |
tāta saumyāgataḥ kaccit svāgataṃ bhadramastu vaḥ |
api svajñātibandhūnāṃ anamīvamanāmayam || 4 ||
[Analyze grammar]

kiṃ nu naḥ kuśalaṃ pṛcche edhamāne kulāmaye |
kaṃse mātulanāmnyaṅga svānāṃ nastatprajāsu ca || 5 ||
[Analyze grammar]

aho asmadabhūd bhūri pitrorvṛjinamāryayoḥ |
yaddhetoḥ putramaraṇaṃ yaddhetorbandhanaṃ tayoḥ || 6 ||
[Analyze grammar]

diṣṭyādya darśanaṃ svānāṃ mahyaṃ vaḥ saumya kāṅkṣitam |
sañjātaṃ varṇyatāṃ tāta tavāgamanakāraṇam || 7 ||
[Analyze grammar]

śrīśuka uvāca |
pṛṣṭo bhagavatā sarvaṃ varṇayāmāsa mādhavaḥ |
vairānubandhaṃ yaduṣu vasudevavadhodyamam || 8 ||
[Analyze grammar]

yatsandeśo yadarthaṃ vā dūtaḥ sampreṣitaḥ svayam |
yaduktaṃ nāradenāsya svajanmānakadundubheḥ || 9 ||
[Analyze grammar]

śrutvākrūravacaḥ kṛṣṇo balaśca paravīrahā |
prahasya nandaṃ pitaraṃ rājñā diṣṭaṃ vijajñatuḥ || 10 ||
[Analyze grammar]

gopān samādiśat so'pi gṛhyatāṃ sarvagorasaḥ |
upāyanāni gṛhṇīdhvaṃ yujyantāṃ śakaṭāni ca || 11 ||
[Analyze grammar]

yāsyāmaḥ śvo madhupurīṃ dāsyāmo nṛpate rasān |
drakṣyāmaḥ sumahatparva yānti jānapadāḥ kila |
evamāghoṣayatkṣatrā nandagopaḥ svagokule || 12 ||
[Analyze grammar]

gopyastāstad upaśrutya babhūvurvyathitā bhṛśam |
rāmakṛṣṇau purīṃ netuṃ akrūraṃ vrajamāgatam || 13 ||
[Analyze grammar]

kāścit tatkṛtahṛttāpa śvāsamlānamukhaśriyaḥ |
sraṃsadduddukūlavalaya keśagraṃthyaśca kāścana || 14 ||
[Analyze grammar]

anyāśca tadanudhyāna nivṛttāśeṣavṛttayaḥ |
nābhyajānan imaṃ lokaṃ ātmalokaṃ gatā iva || 15 ||
[Analyze grammar]

smarantyaścāparāḥ śaureḥ anurāgasmiteritāḥ |
hṛdispṛśaścitrapadā giraḥ saṃmumuhuḥ striyaḥ || 16 ||
[Analyze grammar]

gatiṃ sulalitāṃ ceṣṭāṃ snigdhahāsāvalokanam |
śokāpahāni narmāṇi proddāmacaritāni ca || 17 ||
[Analyze grammar]

cintayantyo mukundasya bhītā virahakātarāḥ |
sametāḥ saṅghaśaḥ procuḥ aśrumukhyo'cyutāśayāḥ || 18 ||
[Analyze grammar]

śrīgopya ūcuḥ |
aho vidhātastava na kvacid dayā |
saṃyojya maitryā praṇayena dehinaḥ |
tāṃścākṛtārthān viyunaṅkṣyapārthakaṃ |
vikrīḍitaṃ te'rbhakaceṣṭitaṃ yathā || 19 ||
[Analyze grammar]

yastvaṃ pradarśyāsitakuntalāvṛtaṃ |
mukundavaktraṃ sukapolamunnasam |
śokāpanodasmitaleśasundaraṃ |
karoṣi pārokṣyamasādhu te kṛtam || 20 ||
[Analyze grammar]

krūrastvamakrūrasamākhyayā sma naḥ |
cakṣurhi dattaṃ harase batājñavat |
yenaikadeśe'khilasargasauṣṭhavaṃ |
tvadīyamadrākṣma vayaṃ madhudviṣaḥ || 21 ||
[Analyze grammar]

na nandasūnuḥ kṣaṇabhaṅgasauhṛdaḥ |
samīkṣate naḥ svakṛtāturā bata |
vihāya gehān svajanān tān patīn |
taddāsyamaddhopagatā navapriyaḥ || 22 ||
[Analyze grammar]

sukhaṃ prabhātā rajanīyamāśiṣaḥ |
satyā babhūvuḥ purayoṣitāṃ dhruvam |
yāḥ saṃpraviṣṭasya mukhaṃ vrajaspateḥ |
pāsyantyapāṅgot kalitasmitāsavam || 23 ||
[Analyze grammar]

tāsāṃ mukundo madhumañjubhāṣitairaḥ |
gṛhītacittaḥ paravān manasvyapi |
kathaṃ punarnaḥ pratiyāsyate'balā |
grāmyāḥ salajjasmitavibhramairbhraman || 24 ||
[Analyze grammar]

adya dhruvaṃ tatra dṛśo bhaviṣyate |
dāśārhabhojāndhaka vṛṣṇisātvatām |
mahotsavaḥ śrīramaṇaṃ guṇāspadaṃ |
drakṣyanti ye cādhvani devakīsutam || 25 ||
[Analyze grammar]

maitadvidhasyākaruṇasya nāma bhūd |
akrūra ityetadatīva dāruṇaḥ |
yo'sāvanāśvāsya suduḥkhitaṃ janaṃ |
priyātpriyaṃ neṣyati pāramadhvanaḥ || 26 ||
[Analyze grammar]

anārdradhīreṣa samāsthito rathaṃ |
tamanvamī ca tvarayanti durmadāḥ |
gopā anobhiḥ sthavirairupekṣitaṃ |
daivaṃ ca no'dya pratikūlamīhate || 27 ||
[Analyze grammar]

nivārayāmaḥ samupetya mādhavaṃ |
kiṃ no'kariṣyan kulavṛddhabāndhavāḥ |
mukundasaṅgānnimiṣārdhadustyajād |
daivena vidhvaṃsitadīnacetasām || 28 ||
[Analyze grammar]

yasyānurāgalalitasmitavalgumantra |
līlāvalokaparirambhaṇarāsagoṣṭhām |
nītāḥ sma naḥ kṣaṇamiva kṣaṇadā vinā taṃ |
gopyaḥ kathaṃ nvatitarema tamo durantam || 29 ||
[Analyze grammar]

yo'hnaḥ kṣaye vrajamanantasakhaḥ parīto |
gopairviśan khurarajaśchuritālakasrak |
veṇuṃ kvaṇan smitakaṭākṣanirīkṣaṇena |
cittaṃ kṣiṇotyamumṛte nu kathaṃ bhavema || 30 ||
[Analyze grammar]

śrīśuka uvāca |
evaṃ bruvāṇā virahāturā bhṛśaṃ |
vrajastriyaḥ kṛṣṇaviṣaktamānasāḥ |
visṛjya lajjāṃ ruruduḥ sma susvaraṃ |
govinda dāmodara mādhaveti || 31 ||
[Analyze grammar]

strīṇāmevaṃ rudantīnāṃ udite savitaryatha |
akrūraścodayāmāsa kṛtamaitrādiko ratham || 32 ||
[Analyze grammar]

gopāstamanvasajjanta nandādyāḥ śakaṭaistataḥ |
ādāyopāyanaṃ bhūri kumbhān gorasasambhṛtān || 33 ||
[Analyze grammar]

gopyaśca dayitaṃ kṛṣṇaṃ anuvrajyānurañjitāḥ |
pratyādeśaṃ bhagavataḥ kāṅkṣantyaścāvatasthire || 34 ||
[Analyze grammar]

tāstathā tapyatīrvīkṣya svaprasthāṇe yadūttamaḥ |
sāntvayāmasa sapremaiḥ āyāsya iti dautyakaiḥ || 35 ||
[Analyze grammar]

yāvadālakṣyate ketuḥ yāvadreṇū rathasya ca |
anuprasthāpitātmāno lekhyānīvopalakṣitāḥ || 36 ||
[Analyze grammar]

tā nirāśā nivavṛtuḥ govindavinivartane |
viśokā ahanī ninyuḥ gāyantyaḥ priyaceṣṭitam || 37 ||
[Analyze grammar]

bhagavānapi samprāpto rāmākrūrayuto nṛpa |
rathena vāyuvegena kālindīṃ aghanāśinīm || 38 ||
[Analyze grammar]

tatropaspṛśya pānīyaṃ pītvā mṛṣṭaṃ maṇiprabham |
vṛkṣaṣaṇḍamupavrajya sarāmo rathamāviśat |
akrūrastāvupāmantrya niveśya ca rathopari |
kālindyā hradamāgatya snānaṃ vidhivadācarat || 40 ||
[Analyze grammar]

nimajjya tasmin salile japan brahma sanātanam |
tāveva dadṛśe'krūro rāmakṛṣṇau samanvitau || 41 ||
[Analyze grammar]

tau rathasthau kathamiha sutau ānakadundubheḥ |
tarhi svit syandane na sta ityunmajjya vyacaṣṭa saḥ || 42 ||
[Analyze grammar]

tatrāpi ca yathāpūrvaṃ āsīnau punareva saḥ |
nyamajjad darśanaṃ yanme mṛṣā kiṃ salile tayoḥ || 43 ||
[Analyze grammar]

bhūyastatrāpi so'drākṣīt stūyamānamahīśvaram |
siddhacāraṇagandharvaiḥ asurairnatakandharaiḥ || 44 ||
[Analyze grammar]

sahasraśirasaṃ devaṃ sahasraphaṇamaulinam |
nīlāmbaraṃ visaśvetaṃ śṛṅgaiḥ śvetamiva sthitam || 45 ||
[Analyze grammar]

tasyotsaṅge ghanaśyāmaṃ pītakauśeyavāsasam |
puruṣaṃ caturbhujaṃ śāntaṃ padmapatrāruṇekṣaṇam || 46 ||
[Analyze grammar]

cāruprasannavadanaṃ cāruhāsanirīkṣaṇam |
subhrūnnasaṃ carukarṇaṃ sukapolāruṇādharam || 47 ||
[Analyze grammar]

pralambapīvarabhujaṃ tuṅgāṃsoraḥsthalaśriyam |
kambukaṇṭhaṃ nimnanābhiṃ valimatpallavodaram || 48 ||
[Analyze grammar]

bṛhatkatitataśroṇi karabhorudvayānvitam |
cārujānuyugaṃ cāru jaṅghāyugalasaṃyutam || 49 ||
[Analyze grammar]

tuṅgagulphāruṇanakha vrātadīdhitibhirvṛtam |
navāṅgulyaṅguṣṭhadalaiḥ vilasat pādapaṅkajam || 50 ||
[Analyze grammar]

sumahārhamaṇivrāta kirīṭakaṭakāṅgadaiḥ |
kaṭisūtrabrahmasūtra hāranūpurakuṇḍalaiḥ || 51 ||
[Analyze grammar]

bhrājamānaṃ padmakaraṃ śaṅkhacakragadādharam |
śrīvatsavakṣasaṃ bhrājat kaustubhaṃ vanamālinam || 52 ||
[Analyze grammar]

sunandanandapramukhaiḥ parṣadaiḥ sanakādibhiḥ |
sureśairbrahmarudrādyaiḥ navabhiśca dvijottamaiḥ || 53 ||
[Analyze grammar]

prahrādanāradavasu pramukhairbhāgavatottamaiḥ |
stūyamānaṃ pṛthagbhāvaiḥ vacobhiramalātmabhiḥ || 54 ||
[Analyze grammar]

śriyā puṣṭyā girā kāntyā kīrtyā tuṣṭyelayorjayā |
vidyayāvidyayā śaktyā māyayā ca niṣevitam || 55 ||
[Analyze grammar]

vilokya subhṛśaṃ prīto bhaktyā paramayā yutaḥ |
hṛṣyattanūruho bhāva pariklinnātmalocanaḥ || 56 ||
[Analyze grammar]

girā gad‍gadayāstauṣīt sattvamālambya sātvataḥ |
praṇamya mūrdhnāvahitaḥ kṛtāñjalipuṭaḥ śanaiḥ || 57 ||
[Analyze grammar]

iti śrīmad‍bhāgavate mahāpurāṇe pāramahaṃsyāṃ |
saṃhitāyāṃ daśamaskandhe pūrvārdhe akrūrapratiyāne ekoncatvāriṃśo'dhyāyaḥ || 39 ||
[Analyze grammar]