Chapter 26

[English text for this chapter is available]

śrībhagavānuvāca |
atha te sampravakṣyāmi tattvānāṃ lakṣaṇaṃ pṛthak |
yadviditvā vimucyeta puruṣaḥ prākṛtairguṇaiḥ || 1 ||
[Analyze grammar]

jñānaṃ niḥśreyasārthāya puruṣasyātmadarśanam |
yadāhurvarṇaye tatte hṛdayagranthibhedanam || 2 ||
[Analyze grammar]

anādirātmā puruṣo nirguṇaḥ prakṛteḥ paraḥ |
pratyagdhāmā svayaṃjyotiḥ viśvaṃ yena samanvitam || 3 ||
[Analyze grammar]

sa eṣa prakṛtiṃ sūkṣmāṃ daivīṃ guṇamayīṃ vibhuḥ |
yadṛcchayaivopagatāṃ abhyapadyata līlayā || 4 ||
[Analyze grammar]

guṇairvicitrāḥ sṛjatīṃ sarūpāḥ prakṛtiṃ prajāḥ |
vilokya mumuhe sadyaḥ sa iha jñānagūhayā || 5 ||
[Analyze grammar]

evaṃ parābhidhyānena kartṛtvaṃ prakṛteḥ pumān |
karmasu kriyamāṇeṣu guṇairātmani manyate || 6 ||
[Analyze grammar]

tadasya saṃsṛtirbandhaḥ pāratantryaṃ ca tatkṛtam |
bhavati akarturīśasya sākṣiṇo nirvṛtātmanaḥ || 7 ||
[Analyze grammar]

kāryakāraṇakartṛtve kāraṇaṃ prakṛtiṃ viduḥ |
bhoktṛtve sukhaduḥkhānāṃ puruṣaṃ prakṛteḥ param || 8 ||
[Analyze grammar]

devahūtiruvāca |
prakṛteḥ puruṣasyāpi lakṣaṇaṃ puruṣottama |
brūhi kāraṇayorasya sadasacca yadātmakam || 9 ||
[Analyze grammar]

śrībhagavānuvāca |
yattat triguṇamavyaktaṃ nityaṃ sadasadātmakam |
pradhānaṃ prakṛtiṃ prāhuḥ aviśeṣaṃ viśeṣavat || 10 ||
[Analyze grammar]

pañcabhiḥ pañcabhirbrahma caturbhirdaśabhistathā |
etat caturviṃśatikaṃ gaṇaṃ prādhānikaṃ viduḥ || 11 ||
[Analyze grammar]

mahābhūtāni pañcaiva bhūrāpo'gnirmarunnabhaḥ |
tanmātrāṇi ca tāvanti gandhādīni matāni me || 12 ||
[Analyze grammar]

indriyāṇi daśa śrotraṃ tvag dṛk rasananāsikāḥ |
vākkarau caraṇau meḍhraṃ pāyurdaśama ucyate || 13 ||
[Analyze grammar]

mano buddhirahaṅkāraḥ cittamityantarātmakam |
caturdhā lakṣyate bhedo vṛttyā lakṣaṇarūpayā || 14 ||
[Analyze grammar]

etāvāneva saṅkhyāto brahmaṇaḥ saguṇasya ha |
sanniveśo mayā prokto yaḥ kālaḥ pañcaviṃśakaḥ || 15 ||
[Analyze grammar]

prabhāvaṃ pauruṣaṃ prāhuḥ kālameke yato bhayam |
ahaṅkāravimūḍhasya kartuḥ prakṛtimīyuṣaḥ || 16 ||
[Analyze grammar]

prakṛterguṇasāmyasya nirviśeṣasya mānavi |
ceṣṭā yataḥ sa bhagavān kāla ityupalakṣitaḥ || 17 ||
[Analyze grammar]

antaḥ puruṣarūpeṇa kālarūpeṇa yo bahiḥ |
samanvetyeṣa sattvānāṃ bhagavān ātmamāyayā || 18 ||
[Analyze grammar]

daivātkṣubhitadharmiṇyāṃ svasyāṃ yonau paraḥ pumān |
ādhatta vīryaṃ sāsūta mahattattvaṃ hiraṇmayam || 19 ||
[Analyze grammar]

viśvamātmagataṃ vyañjan kūṭastho jagadaṅkuraḥ |
svatejasāpibat tīvraṃ ātmaprasvāpanaṃ tamaḥ || 20 ||
[Analyze grammar]

yattatsattvaguṇaṃ svacchaṃ śāntaṃ bhagavataḥ padam |
yadāhurvāsudevākhyaṃ cittaṃ tanmahadātmakam || 21 ||
[Analyze grammar]

svacchatvaṃ avikāritvaṃ śāntatvamiti cetasaḥ |
vṛttibhirlakṣaṇaṃ proktaṃ yathāpāṃ prakṛtiḥ parā || 22 ||
[Analyze grammar]

mahattattvād vikurvāṇād bhagavadvīryasambhavāt |
kriyāśaktiḥ ahaṅkāraḥ trividhaḥ samapadyata || 23 ||
[Analyze grammar]

vaikārikastaijasaśca tāmasaśca yato bhavaḥ |
manasaścendriyāṇāṃ ca bhūtānāṃ mahatāmapi || 24 ||
[Analyze grammar]

sahasraśirasaṃ sākṣād yaṃ anantaṃ pracakṣate |
saṅkarṣaṇākhyaṃ puruṣaṃ bhūtendriyamanomayam || 25 ||
[Analyze grammar]

kartṛtvaṃ karaṇatvaṃ ca kāryatvaṃ ceti lakṣaṇam |
śāntaghoravimūḍhatvaṃ iti vā syādahaṅkṛteḥ || 26 ||
[Analyze grammar]

vaikārikād vikurvāṇāt manastattvamajāyata |
yatsaṅkalpavikalpābhyāṃ vartate kāmasambhavaḥ || 27 ||
[Analyze grammar]

yad vidurhyaniruddhākhyaṃ hṛṣīkāṇāṃ adhīśvaram |
śāradendīvaraśyāmaṃ saṃrādhyaṃ yogibhiḥ śanaiḥ || 28 ||
[Analyze grammar]

taijasāttu vikurvāṇād buddhitattvamabhūtsati |
dravyasphuraṇavijñānaṃ indriyāṇāmanugrahaḥ || 29 ||
[Analyze grammar]

saṃśayo'tha viparyāso niścayaḥ smṛtireva ca |
svāpa ityucyate buddheḥ lakṣaṇaṃ vṛttitaḥ pṛthak || 30 ||
[Analyze grammar]

taijasāni indriyāṇyeva kriyājñānavibhāgaśaḥ |
prāṇasya hi kriyāśaktiḥ buddhervijñānaśaktitā || 31 ||
[Analyze grammar]

tāmasācca vikurvāṇād bhagavadvīryacoditāt |
śabdamātraṃ abhūt tasmāt nabhaḥ śrotraṃ tu śabdagam || 32 ||
[Analyze grammar]

arthāśrayatvaṃ śabdasya draṣṭurliṅgatvameva ca |
tanmātratvaṃ ca nabhaso lakṣaṇaṃ kavayo viduḥ || 33 ||
[Analyze grammar]

bhūtānāṃ chidradātṛtvaṃ bahirantarameva ca |
prāṇendriyātmadhiṣṇyatvaṃ nabhaso vṛttilakṣaṇam || 34 ||
[Analyze grammar]

nabhasaḥ śabdatanmātrāt kālagatyā vikurvataḥ |
sparśo'bhavattato vāyuḥ tvak sparśasya ca saṅgrahaḥ || 35 ||
[Analyze grammar]

mṛdutvaṃ kaṭhinatvaṃ ca śaityamuṣṇatvameva ca |
etatsparśasya sparśatvaṃ tanmātratvaṃ nabhasvataḥ || 36 ||
[Analyze grammar]

cālanaṃ vyūhanaṃ prāptiḥ netṛtvaṃ dravyaśabdayoḥ |
sarvendriyāṇāṃ ātmatvaṃ vāyoḥ karmābhilakṣaṇam || 37 ||
[Analyze grammar]

vāyośca sparśatanmātrād rūpaṃ daiveritādabhūt |
samutthitaṃ tatastejaḥ cakṣū rūpopalambhanam || 38 ||
[Analyze grammar]

dravyākṛtitvaṃ guṇatā vyaktisaṃsthātvameva ca |
tejastvaṃ tejasaḥ sādhvi rūpamātrasya vṛttayaḥ || 39 ||
[Analyze grammar]

dyotanaṃ pacanaṃ pānaṃ adanaṃ himamardanam |
tejaso vṛttayastvetāḥ śoṣaṇaṃ kṣuttṛḍeva ca || 40 ||
[Analyze grammar]

rūpamātrād vikurvāṇāt tejaso daivacoditāt |
rasamātraṃ abhūt tasmāt ambho jihvā rasagrahaḥ || 41 ||
[Analyze grammar]

kaṣāyo madhurastiktaḥ kaṭvamla iti naikadhā |
bhautikānāṃ vikāreṇa rasa eko vibhidyate || 42 ||
[Analyze grammar]

kledanaṃ piṇḍanaṃ tṛptiḥ prāṇanāpyāyanondanam |
tāpāpanodo bhūyastvaṃ ambhaso vṛttayastvimāḥ || 43 ||
[Analyze grammar]

rasamātrād vikurvāṇāt ambhaso daivacoditāt |
gandhamātraṃ abhūt tasmāt pṛthvī ghrāṇastu gandhagaḥ || 44 ||
[Analyze grammar]

karambhapūtisaurabhya śāntogrāmlādibhiḥ pṛthak |
dravyāvayavavaiṣamyād gandha eko vibhidyate || 45 ||
[Analyze grammar]

bhāvanaṃ brahmaṇaḥ sthānaṃ dhāraṇaṃ sadviśeṣaṇam |
sarvasattvaguṇod‍bhedaḥ pṛthivīvṛttilakṣaṇam || 46 ||
[Analyze grammar]

nabhoguṇaviśeṣo'rtho yasya tacchrotramucyate |
vāyorguṇaviśeṣo'rtho yasya tatsparśanaṃ viduḥ || 47 ||
[Analyze grammar]

tejoguṇaviśeṣo'rtho yasya taccakṣurucyate |
ambhoguṇaviśeṣo'rtho yasya tadrasanaṃ viduḥ |
bhūmerguṇaviśeṣo'rtho yasya sa ghrāṇa ucyate || 48 ||
[Analyze grammar]

parasya dṛśyate dharmo hi aparasmin samanvayāt |
ato viśeṣo bhāvānāṃ bhūmāvevopalakṣyate || 49 ||
[Analyze grammar]

etānyasaṃhatya yadā mahadādīni sapta vai |
kālakarmaguṇopeto jagadādirupāviśat || 50 ||
[Analyze grammar]

tatastenānuviddhebhyo yuktebhyo'ṇḍaṃ acetanam |
utthitaṃ puruṣo yasmāt udatiṣṭhadasau virāṭ || 51 ||
[Analyze grammar]

etadaṇḍaṃ viśeṣākhyaṃ kramavṛddhairdaśottaraiḥ |
toyādibhiḥ parivṛtaṃ pradhānenāvṛtairbahiḥ |
yatra lokavitāno'yaṃ rūpaṃ bhagavato hareḥ || 52 ||
[Analyze grammar]

hiraṇmayād aṇḍakośād utthāya salileśayāt |
tamāviśya mahādevo bahudhā nirbibheda kham || 53 ||
[Analyze grammar]

nirabhidyatāsya prathamaṃ mukhaṃ vāṇī tato'bhavat |
vāṇyā vahniratho nāse prāṇo'to ghrāṇa etayoḥ || 54 ||
[Analyze grammar]

ghrāṇāt vāyurabhidyetāṃ akṣiṇī cakṣuretayoḥ |
tasmātsūryo nyabhidyetāṃ karṇau śrotraṃ tato diśaḥ || 55 ||
[Analyze grammar]

nirbibheda virājastvag romaśmaśrvādayastataḥ |
tata oṣadhayaścāsan śiśnaṃ nirbibhide tataḥ || 56 ||
[Analyze grammar]

retastasmādāpa āsan nirabhidyata vai gudam |
gudādapāno'pānācca mṛtyurlokabhayaṅkaraḥ || 57 ||
[Analyze grammar]

hastau ca nirabhidyetāṃ balaṃ tābhyāṃ tataḥ svarāṭ |
pādau ca nirabhidyetāṃ gatistābhyāṃ tato hariḥ || 58 ||
[Analyze grammar]

nāḍyo'sya nirabhidyanta tābhyo lohitamābhṛtam |
nadyastataḥ samabhavan udaraṃ nirabhidyata || 59 ||
[Analyze grammar]

kṣutpipāse tataḥ syātāṃ samudrastvetayorabhūt |
athāsya hṛdayaṃ bhinnaṃ hṛdayānmana utthitam || 60 ||
[Analyze grammar]

manasaścandramā jāto buddhirbuddhergirāṃ patiḥ |
ahaṅkārastato rudraḥ cittaṃ caityastato'bhavat || 61 ||
[Analyze grammar]

ete hi abhyutthitā devā naivāsyotthāpane'śakan |
punarāviviśuḥ khāni tamutthāpayituṃ kramāt || 62 ||
[Analyze grammar]

vahnirvācā mukhaṃ bheje nodatiṣṭhat tadā virāṭ |
ghrāṇena nāsike vāyuḥ nodatiṣṭhat tadā virāṭ || 63 ||
[Analyze grammar]

akṣiṇī cakṣuṣādityo nodatiṣṭhat tadā virāṭ |
śrotreṇa karṇau ca diśo nodatiṣṭhat tadā virāṭ || 64 ||
[Analyze grammar]

tvacaṃ romabhiroṣadhyo nodatiṣṭhat tadā virāṭ |
retasā śiśnamāpastu nodatiṣṭhat tadā virāṭ || 65 ||
[Analyze grammar]

gudaṃ mṛtyurapānena nodatiṣṭhat tadā virāṭ |
hastāvindro balenaiva nodatiṣṭhat tadā virāṭ || 66 ||
[Analyze grammar]

viṣṇurgatyaiva caraṇau nodatiṣṭhat tadā virāṭ |
nāḍīrnadyo lohitena nodatiṣṭhat tadā virāṭ || 67 ||
[Analyze grammar]

kṣuttṛḍbhyāṃ udaraṃ sindhuḥ nodatiṣṭhat tadā virāṭ |
hṛdayaṃ manasā candro nodatiṣṭhat tadā virāṭ || 68 ||
[Analyze grammar]

buddhyā brahmāpi hṛdayaṃ nodatiṣṭhat tadā virāṭ |
rudro'bhimatyā hṛdayaṃ nodatiṣṭhat tadā virāṭ || 69 ||
[Analyze grammar]

cittena hṛdayaṃ caityaḥ kṣetrajñaḥ prāviśadyadā |
virāṭtadaiva puruṣaḥ salilād udatiṣṭhata || 70 ||
[Analyze grammar]

yathā prasuptaṃ puruṣaṃ prāṇendriyamanodhiyaḥ |
prabhavanti vinā yena notthāpayitumojasā || 71 ||
[Analyze grammar]

tamasmin pratyagātmānaṃ dhiyā yogapravṛttayā |
bhaktyā viraktyā jñānena vivicyātmani cintayet || 72 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe ṣaḍviṃśo'dhyāyaḥ || 26 ||
[Analyze grammar]