Chapter 12

[English text for this chapter is available]

śaunaka uvāca |
aśvatthāmnopasṛṣṭena brahmaśīrṣṇorutejasā |
uttarāyā hato garbha īśenājīvitaḥ punaḥ || 1 ||
[Analyze grammar]

tasya janma mahābuddheḥ karmāṇi ca mahātmanaḥ |
nidhanaṃ ca yathaivāsīt sa pretya gatavān yathā || 2 ||
[Analyze grammar]

tadidaṃ śrotumicchāmo gadituṃ yadi manyase |
brūhi naḥ śraddadhānānāṃ yasya jñānamadācchukaḥ || 3 ||
[Analyze grammar]

sūta uvāca |
apīpaladdharmarājaḥ pitṛvad rañjayan prajāḥ |
niḥspṛhaḥ sarvakāmebhyaḥ kṛṣṇapādānusevayā || 4 ||
[Analyze grammar]

sampadaḥ kratavo lokā mahiṣī bhrātaro mahī |
jambūdvīpādhipatyaṃ ca yaśaśca tridivaṃ gatam || 5 ||
[Analyze grammar]

kiṃ te kāmāḥ suraspārhā mukundamanaso dvijāḥ |
adhijahrurmudaṃ rājñaḥ kṣudhitasya yathetare || 6 ||
[Analyze grammar]

māturgarbhagato vīraḥ sa tadā bhṛgunandana |
dadarśa puruṣaṃ kañcid dahyamāno'stratejasā || 7 ||
[Analyze grammar]

aṅguṣṭhamātramamalaṃ sphurat puraṭa maulinam |
apīvyadarśanaṃ śyāmaṃ taḍid vāsasamacyutam || 8 ||
[Analyze grammar]

śrīmad dīrghacaturbāhuṃ taptakāñcana kuṇḍalam |
kṣatajākṣaṃ gadāpāṇiṃ ātmanaḥ sarvato diśam |
paribhramantaṃ ulkābhāṃ bhrāmayantaṃ gadāṃ muhuḥ || 9 ||
[Analyze grammar]

astratejaḥ svagadayā nīhāramiva gopatiḥ |
vidhamantaṃ sannikarṣe paryaikṣata ka ityasau || 10 ||
[Analyze grammar]

vidhūya tadameyātmā bhagavān dharmagub vibhuḥ |
miṣato daśamāsasya tatraivāntardadhe hariḥ || 11 ||
[Analyze grammar]

tataḥ sarvaguṇodarke sānukūla grahodaye |
jajñe vaṃśadharaḥ pāṇḍoḥ bhūyaḥ pāṇḍurivaujasā || 12 ||
[Analyze grammar]

tasya prītamanā rājā viprairdhaumya kṛpādibhiḥ |
jātakaṃ kārayāmāsa vācayitvā ca maṅgalam || 13 ||
[Analyze grammar]

hiraṇyaṃ gāṃ mahīṃ grāmān hastyaśvān nṛpatirvarān |
prādātsvannaṃ ca viprebhyaḥ prajātīrthe sa tīrthavit || 14 ||
[Analyze grammar]

tamūcurbrāhmaṇāstuṣṭā rājānaṃ praśrayānvitam |
eṣa hyasmin prajātantau purūṇāṃ pauravarṣabha || 15 ||
[Analyze grammar]

daivenāpratighātena śukle saṃsthāmupeyuṣi |
rāto vo'nugrahārthāya viṣṇunā prabhaviṣṇunā || 16 ||
[Analyze grammar]

tasmānnāmnā viṣṇurāta iti loke bṛhacchravāḥ |
bhaviṣyati na sandeho mahābhāgavato mahān || 17 ||
[Analyze grammar]

yudhiṣṭhira uvāca |
apyeṣa vaṃśyān rājarṣīn puṇyaślokān mahātmanaḥ |
anuvartitā svidyaśasā sādhuvādena sattamāḥ || 18 ||
[Analyze grammar]

brāhmaṇā ūcuḥ |
pārtha prajāvitā sākṣāt ikṣvākuriva mānavaḥ |
brahmaṇyaḥ satyasandhaśca rāmo dāśarathiryathā || 19 ||
[Analyze grammar]

eṣa dātā śaraṇyaśca yathā hyauśīnaraḥ śibiḥ |
yaśo vitanitā svānāṃ dauṣyantiriva yajvanām || 20 ||
[Analyze grammar]

dhanvināmagraṇīreṣa tulyaścārjunayordvayoḥ |
hutāśa iva durdharṣaḥ samudra iva dustaraḥ || 21 ||
[Analyze grammar]

mṛgendra iva vikrānto niṣevyo himavāniva |
titikṣurvasudhevāsau sahiṣṇuḥ pitarāviva || 22 ||
[Analyze grammar]

pitāmahasamaḥ sāmye prasāde giriśopamaḥ |
āśrayaḥ sarvabhūtānāṃ yathā devo ramāśrayaḥ || 23 ||
[Analyze grammar]

sarvasad‍guṇamāhātmye eṣa kṛṣṇamanuvrataḥ |
rantideva ivodāro yayātiriva dhārmikaḥ || 24 ||
[Analyze grammar]

dhṛtyā balisamaḥ kṛṣṇe prahrāda iva sad‍grahaḥ |
āhartaiṣo'śvamedhānāṃ vṛddhānāṃ paryupāsakaḥ || 25 ||
[Analyze grammar]

rājarṣīṇāṃ janayitā śāstā cotpathagāminām |
nigrahītā kalereṣa bhuvo dharmasya kāraṇāt || 26 ||
[Analyze grammar]

takṣakādātmano mṛtyuṃ dvijaputropasarjitāt |
prapatsyata upaśrutya muktasaṅgaḥ padaṃ hareḥ || 27 ||
[Analyze grammar]

jijñāsitātma yāthārthyo munervyāsasutādasau |
hitvedaṃ nṛpa gaṅgāyāṃ yāsyatyaddhā akutobhayam || 28 ||
[Analyze grammar]

iti rājña upādiśya viprā jātakakovidāḥ |
labdhāpacitayaḥ sarve pratijagmuḥ svakān gṛhān || 29 ||
[Analyze grammar]

sa eṣa loke vikhyātaḥ parīkṣiditi yatprabhuḥ |
pūrvaṃ dṛṣṭamanudhyāyan parīkṣeta nareṣviha || 30 ||
[Analyze grammar]

sa rājaputro vavṛdhe āśu śukla ivoḍupaḥ |
āpūryamāṇaḥ pitṛbhiḥ kāṣṭhābhiriva so'nvaham || 31 ||
[Analyze grammar]

yakṣyamāṇo'śvamedhena jñātidrohajihāsayā |
rājā labdhadhano dadhyau anyatra karadaṇḍayoḥ || 32 ||
[Analyze grammar]

tadabhipretamālakṣya bhrātaro'cyutacoditāḥ |
dhanaṃ prahīṇamājahruḥ udīcyāṃ diśi bhūriśaḥ || 33 ||
[Analyze grammar]

tena sambhṛtasambhāro dharmaputro yudhiṣṭhiraḥ |
vājimedhaiḥ tribhirbhīto yajñaiḥ samayajat harim || 34 ||
[Analyze grammar]

āhūto bhagavān rājñā yājayitvā dvijairnṛpam |
uvāsa katicit māsān suhṛdāṃ priyakāmyayā || 35 ||
[Analyze grammar]

tato rājñābhyanujñātaḥ kṛṣṇayā sahabandhubhiḥ |
yayau dvāravatīṃ brahman sārjuno yadubhirvṛtaḥ || 36 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe naimiṣīyopākhyāne parīkṣijjanmādyutkarṣo nāma dvādaśo'dhyāyaḥ || 12 ||
[Analyze grammar]