Chapter 41

teṣāṃ sutumulaṃ śabdaṃ vānarāṇāṃ tarasvinām |
nardatāṃ rākṣasaiḥ sārdhaṃ tadā śuśrāva rāvaṇaḥ || 1 ||
[Analyze grammar]

snigdhagambhīranirghoṣaṃ śrutvā sa ninadaṃ bhṛśam |
sacivānāṃ tatasteṣāṃ madhye vacanamabravīt || 2 ||
[Analyze grammar]

yathāsau saṃprahṛṣṭānāṃ vānarāṇāṃ samutthitaḥ |
bahūnāṃ sumahānnādo meghānāmiva garjatām || 3 ||
[Analyze grammar]

vyaktaṃ sumahatī prītireteṣāṃ nātra saṃśayaḥ |
tathā hi vipulairnādaiścukṣubhe varuṇālayaḥ || 4 ||
[Analyze grammar]

tau tu baddhau śaraistīṣkṇairbhrātarau rāmalakṣmaṇau |
ayaṃ ca sumahānnādaḥ śaṅkāṃ janayatīva me || 5 ||
[Analyze grammar]

etattu vacanaṃ coktvā mantriṇo rākṣaseśvaraḥ |
uvāca nairṛtāṃstatra samīpaparivartinaḥ || 6 ||
[Analyze grammar]

jñāyatāṃ tūrṇametaṣāṃ sarveṣāṃ vanacāriṇām |
śokakāle samutpanne harṣakāraṇamutthitam || 7 ||
[Analyze grammar]

tathoktāstena saṃbhrāntāḥ prākāramadhiruhya te |
dadṛśuḥ pālitāṃ senāṃ sugrīveṇa mahātmanā || 8 ||
[Analyze grammar]

tau ca muktau sughoreṇa śarabandhena rāghavau |
samutthitau mahābhāgau viṣeduḥ prekṣya rākṣasāḥ || 9 ||
[Analyze grammar]

saṃtrastahṛdayā sarve prākārādavaruhya te |
viṣaṇṇavadanāḥ sarve rākṣasendramupasthitāḥ || 10 ||
[Analyze grammar]

tadapriyaṃ dīnamukhā rāvaṇasya niśācarāḥ |
kṛtsnaṃ nivedayāmāsuryathāvadvākyakovidāḥ || 11 ||
[Analyze grammar]

yau tāvindrajitā yuddhe bhrātarau rāmalakṣmaṇau |
nibaddhau śarabandhena niṣprakampabhujau kṛtau || 12 ||
[Analyze grammar]

vimuktau śarabandhena tau dṛśyete raṇājire |
pāśāniva gajau chittvā gajendrasamavikramau || 13 ||
[Analyze grammar]

tacchrutvā vacanaṃ teṣāṃ rākṣasendro mahābalaḥ |
cintāśokasamākrānto viṣaṇṇavadano'bravīt || 14 ||
[Analyze grammar]

ghorairdattavarairbaddhau śarairāśīviṣomapaiḥ |
amoghaiḥ sūryasaṃkāśaiḥ pramathyendrajitā yudhi || 15 ||
[Analyze grammar]

tamastrabandhamāsādya yadi muktau ripū mama |
saṃśayasthamidaṃ sarvamanupaśyāmyahaṃ balam || 16 ||
[Analyze grammar]

niṣphalāḥ khalu saṃvṛttāḥ śarā vāsukitejasaḥ |
ādattaṃ yaistu saṃgrāme ripūṇāṃ mama jīvitam || 17 ||
[Analyze grammar]

evamuktvā tu saṃkruddho niśvasannurago yathā |
abravīd rakṣasāṃ madhye dhūmrākṣaṃ nāma rākasaṃ || 18 ||
[Analyze grammar]

balena mahatā yukto rakṣasāṃ bhīmakarmaṇām |
tvaṃ vadhāyābhiniryāhi rāmasya saha vānaraiḥ || 19 ||
[Analyze grammar]

evamuktastu dhūmrākṣo rākṣasendreṇa dhīmatā |
kṛtvā praṇāmaṃ saṃhṛṣṭo nirjagāma nṛpālayāt || 20 ||
[Analyze grammar]

abhiniṣkramya taddvāraṃ balādhyakṣamuvāca ha |
tvarayasva balaṃ tūrṇaṃ kiṃ cireṇa yuyutsataḥ || 21 ||
[Analyze grammar]

dhūmrākṣasya vacaḥ śrutvā balādhyakṣo balānugaḥ |
balamudyojayāmāsa rāvaṇasyājñayā drutam || 22 ||
[Analyze grammar]

te baddhaghaṇṭā balino ghorarūpā niśācarāḥ |
vinardamānāḥ saṃhṛṣṭā dhūmrākṣaṃ paryavārayan || 23 ||
[Analyze grammar]

vividhāyudhahastāśca śūlamudgarapāṇayaḥ |
gadābhiḥ paṭṭasairdaṇḍairāyasairmusalairbhṛśam || 24 ||
[Analyze grammar]

parighairbhiṇḍipālaiśca bhallaiḥ prāsaiḥ paraśvadhaiḥ |
niryayū rākṣasā ghorā nardanto jaladā yathā || 25 ||
[Analyze grammar]

rathaiḥ kavacinastvanye dhvajaiśca samalaṃkṛtaiḥ |
suvarṇajālavihitaiḥ kharaiśca vividhānanaiḥ || 26 ||
[Analyze grammar]

hayaiḥ paramaśīghraiśca gajendraiśca madotkaṭaiḥ |
niryayū rākṣasavyāghrā vyāghrā iva durāsadāḥ || 27 ||
[Analyze grammar]

vṛkasiṃhamukhairyuktaṃ kharaiḥ kanakabhūṣaṇaiḥ |
āruroha rathaṃ divyaṃ dhūmrākṣaḥ kharanisvanaḥ || 28 ||
[Analyze grammar]

sa niryāto mahāvīryo dhūmrākṣo rākṣasairvṛtaḥ |
prahasanpaścimadvāraṃ hanūmānyatra yūthapaḥ || 29 ||
[Analyze grammar]

prayāntaṃ tu mahāghoraṃ rākṣasaṃ bhīmadarśanam |
antarikṣagatāḥ krūrāḥ śakunāḥ pratyavārayan || 30 ||
[Analyze grammar]

rathaśīrṣe mahābhīmo gṛdhraśca nipapāta ha |
dhvajāgre grathitāścaiva nipetuḥ kuṇapāśanāḥ || 31 ||
[Analyze grammar]

rudhirārdro mahāñ śvetaḥ kabandhaḥ patito bhuvi |
visvaraṃ cotsṛjannādaṃ dhūmrākṣasya samīpataḥ || 32 ||
[Analyze grammar]

vavarṣa rudhiraṃ devaḥ saṃcacāla ca medinī |
pratilomaṃ vavau vāyurnirghātasamanisvanaḥ |
timiraughāvṛtāstatra diśaśca na cakāśire || 33 ||
[Analyze grammar]

sa tūtpātāṃstato dṛṣṭvā rākṣasānāṃ bhayāvahān |
prādurbhūtān sughorāṃśca dhūmrākṣo vyathito'bhavat || 34 ||
[Analyze grammar]

tataḥ subhīmo bahubhirniśācarairvṛto'bhiniṣkramya raṇotsuko balī |
dadarśa tāṃ rāghavabāhupālitāṃ samudrakalpāṃ bahuvānarīṃ camūm || 35 ||
[Analyze grammar]