Chapter 34

bhūya eva mahātejā hanūmānmārutātmajaḥ |
abravīt praśritaṃ vākyaṃ sītāpratyayakāraṇāt || 1 ||
[Analyze grammar]

vānaro'haṃ mahābhāge dūto rāmasya dhīmataḥ |
rāmanāmāṅkitaṃ cedaṃ paśya devyaṅgulīyakam |
samāśvasihi bhadraṃ te kṣīṇaduḥkhaphalā hyasi || 2 ||
[Analyze grammar]

gṛhītvā prekṣamāṇā sā bhartuḥ karavibhūṣaṇam |
bhartāramiva saṃprāptā jānakī muditābhavat || 3 ||
[Analyze grammar]

cāru tadvadanaṃ tasyāstāmraśuklāyatekṣaṇam |
babhūva praharṣodagraṃ rāhumukta ivoḍurāṭ || 4 ||
[Analyze grammar]

tataḥ sā hrīmatī bālā bhartuḥ saṃdeśaharṣitā |
parituṭṣā priyaṃ śrutvā prāśaṃsata mahākapim || 5 ||
[Analyze grammar]

vikrāntastvaṃ samarthastvaṃ prājñastvaṃ vānarottama |
yenedaṃ rākṣasapadaṃ tvayaikena pradharṣitam || 6 ||
[Analyze grammar]

śatayojanavistīrṇaḥ sāgaro makarālayaḥ |
vikramaślāghanīyena kramatā goṣpadīkṛtaḥ || 7 ||
[Analyze grammar]

na hi tvāṃ prākṛtaṃ manye vanaraṃ vanararṣabha |
yasya te nāsti saṃtrāso rāvaṇānnāpi saṃbhramaḥ || 8 ||
[Analyze grammar]

arhase ca kapiśreṣṭha mayā samabhibhāṣitum |
yadyasi preṣitastena rāmeṇa viditātmanā || 9 ||
[Analyze grammar]

preṣayiṣyati durdharṣo rāmo na hyaparīkṣitam |
parākramamavijñāya matsakāśaṃ viśeṣataḥ || 10 ||
[Analyze grammar]

diṣṭyā ca kuśalī rāmo dharmātmā dharmavatsalaḥ |
lakṣmaṇaśca mahātejāḥ sumitrānandavardhanaḥ || 11 ||
[Analyze grammar]

kuśalī yadi kākutsthaḥ kiṃ nu sāgaramekhalām |
mahīṃ dahati kopena yugāntāgnirivotthitaḥ || 12 ||
[Analyze grammar]

atha vā śaktimantau tau surāṇāmapi nigrahe |
mamaiva tu na duḥkhānāmasti manye viparyayaḥ || 13 ||
[Analyze grammar]

kaccicca vyathate rāmaḥ kaccinna paripatyate |
uttarāṇi ca kāryāṇi kurute puruṣottamaḥ || 14 ||
[Analyze grammar]

kaccinna dīnaḥ saṃbhrāntaḥ kāryeṣu ca na muhyati |
kaccinpuruṣakāryāṇi kurute nṛpateḥ sutaḥ || 15 ||
[Analyze grammar]

dvividhaṃ trividhopāyamupāyamapi sevate |
vijigīṣuḥ suhṛt kaccinmitreṣu ca paraṃtapaḥ || 16 ||
[Analyze grammar]

kaccinmitrāṇi labhate mitraiścāpyabhigamyate |
kaccit kalyāṇamitraśca mitraiścāpi puraskṛtaḥ || 17 ||
[Analyze grammar]

kaccidāśāsti devānāṃ prasādaṃ pārthivātmajaḥ |
kaccit puruṣakāraṃ ca daivaṃ ca pratipadyate || 18 ||
[Analyze grammar]

kaccinna vigatasneho vivāsānmayi rāghavaḥ |
kaccinmāṃ vyasanādasmānmokṣayiṣyati vānaraḥ || 19 ||
[Analyze grammar]

sukhānāmucito nityamasukhānāmanūcitaḥ |
duḥkhamuttaramāsādya kaccid rāmo na sīdati || 20 ||
[Analyze grammar]

kausalyāyāstathā kaccit sumitrāyāstathaiva ca |
abhīkṣṇaṃ śrūyate kaccit kuśalaṃ bharatasya ca || 21 ||
[Analyze grammar]

mannimittena mānārhaḥ kaccicchokena rāghavaḥ |
kaccinnānyamanā rāmaḥ kaccinmāṃ tārayiṣyati || 22 ||
[Analyze grammar]

kaccidakṣauhiṇīṃ bhīmāṃ bharato bhrātṛvatsalaḥ |
dhvajinīṃ mantribhirguptāṃ preṣayiṣyati matkṛte || 23 ||
[Analyze grammar]

vānarādhipatiḥ śrīmān sugrīvaḥ kaccideṣyati |
matkṛte haribhirvīrairvṛto dantanakhāyudhaiḥ || 24 ||
[Analyze grammar]

kaccicca lakṣmaṇaḥ śūraḥ sumitrānandavardhanaḥ |
astraviccharajālena rākṣasān vidhamiṣyati || 25 ||
[Analyze grammar]

raudreṇa kaccidastreṇa rāmeṇa nihataṃ raṇe |
drakṣyāmyalpena kālena rāvaṇaṃ sasuhṛjjanam || 26 ||
[Analyze grammar]

kaccinna taddhemasamānavarṇaṃ tasyānanaṃ padmasamānagandhi |
mayā vinā śuṣyati śokadīnaṃ jalakṣaye padmamivātapena || 27 ||
[Analyze grammar]

dharmāpadeśāttyajataśca rājyāṃ māṃ cāpyaraṇyaṃ nayataḥ padātim |
nāsīdvyathā yasya na bhīrna śokaḥ kaccit sa dhairyaṃ hṛdaye karoti || 28 ||
[Analyze grammar]

na cāsya mātā na pitā na cānyaḥ snehādviśiṣṭo'sti mayā samo vā |
tāvaddhyahaṃ dūtajijīviṣeyaṃ yāvat pravṛttiṃ śṛṇuyāṃ priyasya || 29 ||
[Analyze grammar]

itīva devī vacanaṃ mahārthaṃ taṃ vānarendraṃ madhurārthamuktvā |
śrotuṃ punastasya vaco'bhirāmaṃ rāmārthayuktaṃ virarāma rāmā || 30 ||
[Analyze grammar]

sītāyā vacanaṃ śrutvā mārutirbhīmavikramaḥ |
śirasyañjalimādhāya vākyamuttaramabravīt || 31 ||
[Analyze grammar]

na tvāmihasthāṃ jānīte rāmaḥ kamalalocanaḥ |
śrutvaiva tu vaco mahyaṃ kṣiprameṣyati rāghavaḥ || 32 ||
[Analyze grammar]

camūṃ prakarṣanmahatīṃ haryṛṣkagaṇasaṃkulām |
viṣṭambhayitvā bāṇaughairakṣobhyaṃ varuṇālayam |
kariṣyati purīṃ laṅkāṃ kākutsthaḥ śāntarākṣasām || 33 ||
[Analyze grammar]

tatra yadyantarā mṛtyuryadi devāḥ sahāsurāḥ |
sthāsyanti pathi rāmasya sa tānapi vadhiṣyati || 34 ||
[Analyze grammar]

tavādarśanajenārye śokena sa pariplutaḥ |
na śarma labhate rāmaḥ siṃhārdita iva dvipaḥ || 35 ||
[Analyze grammar]

dardareṇa ca te devi śape mūlaphalena ca |
malayena ca vindhyena meruṇā mandareṇa ca || 36 ||
[Analyze grammar]

yathā sunayanaṃ valgu bimbauṣṭhaṃ cārukuṇḍalam |
mukhaṃ drakṣyasi rāmasya pūrṇacandramivoditam || 37 ||
[Analyze grammar]

kṣipraṃ drakṣyasi vaidehi rāmaṃ prasravaṇe girau |
śatakratumivāsīnaṃ nākapṛṣṭhasya mūrdhani || 38 ||
[Analyze grammar]

na māṃsaṃ rāghavo bhuṅkte na cāpi madhusevate |
vanyaṃ suvihitaṃ nityaṃ bhaktamaśnāti pañcamam || 39 ||
[Analyze grammar]

naiva daṃśānna maśakānna kīṭānna sarīsṛpān |
rāghavo'panayedgatrāttvadgatenāntarātmanā || 40 ||
[Analyze grammar]

nityaṃ dhyānaparo rāmo nityaṃ śokaparāyaṇaḥ |
nānyaccintayate kiṃ cit sa tu kāmavaśaṃ gataḥ || 41 ||
[Analyze grammar]

anidraḥ satataṃ rāmaḥ supto'pi ca narottamaḥ |
sīteti madhurāṃ vāṇīṃ vyāharanpratibudhyate || 42 ||
[Analyze grammar]

dṛṣṭvā phalaṃ vā puṣpaṃ vā yaccānyat strīmanoharam |
bahuśo hā priyetyevaṃ śvasaṃstvāmabhibhāṣate || 43 ||
[Analyze grammar]

sa devi nityaṃ paritapyamānastvāmeva sītetyabhibhāṣamāṇaḥ |
dhṛtavrato rājasuto mahātmā tavaiva lābhāya kṛtaprayatnaḥ || 44 ||
[Analyze grammar]

sā rāmasaṃkīrtanavītaśokā rāmasya śokena samānaśokā |
śaranmukhenāmbudaśeṣacandrā niśeva vaidehasutā babhūva || 45 ||
[Analyze grammar]