Chapter 44

viśālān kosalān ramyānyātvā lakṣmaṇapūrvajaḥ |
āsasāda mahābāhuḥ śṛṅgaverapuraṃ prati || 1 ||
[Analyze grammar]

tatra tripathagāṃ divyāṃ śivatoyāmaśaivalām |
dadarśa rāghavo gaṅgāṃ puṇyāmṛṣinisevitām || 2 ||
[Analyze grammar]

haṃsasārasasaṃghuṣṭāṃ cakravākopakūjitām |
śiṃśumaraiśca nakraiśca bhujaṃgaiśca niṣevitām || 3 ||
[Analyze grammar]

tāmūrmikalilāvartāmanvavekṣya mahārathaḥ |
sumantramabravīt sūtamihaivādya vasāmahe || 4 ||
[Analyze grammar]

avidūrādayaṃ nadyā bahupuṣpapravālavān |
sumahāniṅgudīvṛkṣo vasāmo'traiva sārathe || 5 ||
[Analyze grammar]

lakṣaṇaśca sumantraśca bāḍhamityeva rāghavam |
uktvā tamiṅgudīvṛkṣaṃ tadopayayaturhayaiḥ || 6 ||
[Analyze grammar]

rāmo'bhiyāya taṃ ramyaṃ vṛkṣamikṣvākunandanaḥ |
rathādavātarattasmāt sabhāryaḥ sahalakṣmaṇaḥ || 7 ||
[Analyze grammar]

sumantro'pyavatīryaiva mocayitvā hayottamān |
vṛkṣamūlagataṃ rāmamupatasthe kṛtāñjaliḥ || 8 ||
[Analyze grammar]

tatra rājā guho nāma rāmasyātmasamaḥ sakhā |
niṣādajātyo balavān sthapatiśceti viśrutaḥ || 9 ||
[Analyze grammar]

sa śrutvā puruṣavyāghraṃ rāmaṃ viṣayamāgatam |
vṛddhaiḥ parivṛto'mātyairjñātibhiścāpyupāgataḥ || 10 ||
[Analyze grammar]

tato niṣādādhipatiṃ dṛṣṭvā dūrādavasthitam |
saha saumitriṇā rāmaḥ samāgacchadguhena saḥ || 11 ||
[Analyze grammar]

tamārtaḥ saṃpariṣvajya guho rāghavamabravīt |
yathāyodhyā tathedaṃ te rāma kiṃ karavāṇi te || 12 ||
[Analyze grammar]

tato guṇavadannādyamupādāya pṛthagvidham |
arghyaṃ copānayat kṣipraṃ vākyaṃ cedamuvāca ha || 13 ||
[Analyze grammar]

svāgataṃ te mahābāho taveyamakhilā mahī |
vayaṃ preṣyā bhavānbhartā sādhu rājyaṃ praśādhi naḥ || 14 ||
[Analyze grammar]

bhakṣyaṃ bhojyaṃ ca peyaṃ ca lehyaṃ cedamupasthitam |
śayanāni ca mukhyāni vājināṃ khādanaṃ ca te || 15 ||
[Analyze grammar]

guhameva bruvāṇaṃ taṃ rāghavaḥ pratyuvāca ha |
arcitāścaiva hṛṣṭāśca bhavatā sarvathā vayam || 16 ||
[Analyze grammar]

padbhyāmabhigamāccaiva snehasaṃdarśanena ca |
bhujābhyāṃ sādhuvṛttābhyāṃ pīḍayan vākyamabravīt || 17 ||
[Analyze grammar]

diṣṭyā tvāṃ guha paśyāmi arogaṃ saha bāndhavaiḥ |
api te kūśalaṃ rāṣṭre mitreṣu ca dhaneṣu ca || 18 ||
[Analyze grammar]

yattvidaṃ bhavatā kiṃ cit prītyā samupakalpitam |
sarvaṃ tadanujānāmi na hi varte pratigrahe || 19 ||
[Analyze grammar]

kuśacīrājinadharaṃ phalamūlāśanaṃ ca mām |
viddhi praṇihitaṃ dharme tāpasaṃ vanagocaram || 20 ||
[Analyze grammar]

aśvānāṃ khādanenāhamarthī nānyena kena cit |
etāvatātrabhavatā bhaviṣyāmi supūjitaḥ || 21 ||
[Analyze grammar]

ete hi dayitā rājñaḥ piturdaśarathasya me |
etaiḥ suvihitairaśvairbhaviṣyāmyahamarcitaḥ || 22 ||
[Analyze grammar]

aśvānāṃ pratipānaṃ ca khādanaṃ caiva so'nvaśāt |
guhastatraiva puruṣāṃstvaritaṃ dīyatāmiti || 23 ||
[Analyze grammar]

tataścīrottarāsaṅgaḥ saṃdhyāmanvāsya paścimām |
jalamevādade bhojyaṃ lakṣmaṇenāhṛtaṃ svayam || 24 ||
[Analyze grammar]

tasya bhūmau śayānasya pādau prakṣālya lakṣmaṇaḥ |
sabhāryasya tato'bhyetya tasthau vṛkṣamupāśritaḥ || 25 ||
[Analyze grammar]

guho'pi saha sūtena saumitrimanubhāṣayan |
anvajāgrattato rāmamapramatto dhanurdharaḥ || 26 ||
[Analyze grammar]

tathā śayānasya tato'sya dhīmato yaśasvino dāśarathermahātmanaḥ |
adṛṣṭaduḥkhasya sukhocitasya sā tadā vyatīyāya cireṇa śarvarī || 27 ||
[Analyze grammar]