Chapter 42

anugamya nivṛttānāṃ rāmaṃ nagaravāsinām |
udgatānīva sattvāni babhūvuramanasvinām || 1 ||
[Analyze grammar]

svaṃ svaṃ nilayamāgamya putradāraiḥ samāvṛtāḥ |
aśrūṇi mumucuḥ sarve bāṣpeṇa pihitānanāḥ || 2 ||
[Analyze grammar]

na cāhṛṣyanna cāmodan vaṇijo na prasārayan |
na cāśobhanta paṇyāni nāpacan gṛhamedhinaḥ || 3 ||
[Analyze grammar]

naṣṭaṃ dṛṣṭvā nābhyanandan vipulaṃ vā dhanāgamam |
putraṃ prathamajaṃ labdhvā jananī nābhyanandata || 4 ||
[Analyze grammar]

gṛhe gṛhe rudantyaśca bhartāraṃ gṛhamāgatam |
vyagarhayanto duḥkhārtā vāgbhistotrairiva dvipān || 5 ||
[Analyze grammar]

kiṃ nu teṣāṃ gṛhaiḥ kāryaṃ kiṃ dāraiḥ kiṃ dhanena vā |
putrairvā kiṃ sukhairvāpi ye na paśyanti rāghavam || 6 ||
[Analyze grammar]

ekaḥ satpuruṣo loke lakṣmaṇaḥ saha sītayā |
yo'nugacchati kākutsthaṃ rāmaṃ paricaran vane || 7 ||
[Analyze grammar]

āpagāḥ kṛtapuṇyāstāḥ padminyaśca sarāṃsi ca |
yeṣu snāsyati kākutstho vigāhya salilaṃ śuci || 8 ||
[Analyze grammar]

śobhayiṣyanti kākutsthamaṭavyo ramyakānanāḥ |
āpagāśca mahānūpāḥ sānumantaśca parvatāḥ || 9 ||
[Analyze grammar]

kānanaṃ vāpi śailaṃ vā yaṃ rāmo'bhigamiṣyati |
priyātithimiva prāptaṃ nainaṃ śakṣyantyanarcitum || 10 ||
[Analyze grammar]

vicitrakusumāpīḍā bahumañjaridhāriṇaḥ |
akāle cāpi mukhyāni puṣpāṇi ca phalāni ca |
darśayiṣyantyanukrośādgirayo rāmamāgatam || 11 ||
[Analyze grammar]

vidarśayanto vividhānbhūyaścitrāṃśca nirjharān |
pādapāḥ parvatāgreṣu ramayiṣyanti rāghavam || 12 ||
[Analyze grammar]

yatra rāmo bhayaṃ nātra nāsti tatra parābhavaḥ |
sa hi śūro mahābāhuḥ putro daśarathasya ca || 13 ||
[Analyze grammar]

purā bhavati no dūrādanugacchāma rāghavam |
pādacchāyā sukhā bhartustādṛśasya mahātmanaḥ |
sa hi nātho janasyāsya sa gatiḥ sa parāyaṇam || 14 ||
[Analyze grammar]

vayaṃ paricariṣyāmaḥ sītāṃ yūyaṃ tu rāghavam |
iti paurastriyo bhartṝnduḥkhārtāstattadabruvan || 15 ||
[Analyze grammar]

yuṣmākaṃ rāghavo'raṇye yogakṣemaṃ vidhāsyati |
sītā nārījanasyāsya yogakṣemaṃ kariṣyati || 16 ||
[Analyze grammar]

ko nvanenāpratītena sotkaṇṭhitajanena ca |
saṃprīyetāmanojñena vāsena hṛtacetasā || 17 ||
[Analyze grammar]

kaikeyyā yadi ced rājyaṃ syādadharmyamanāthavat |
na hi no jīvitenārthaḥ kutaḥ putraiḥ kuto dhanaiḥ || 18 ||
[Analyze grammar]

yayā putraśca bhartā ca tyaktāvaiśvaryakāraṇāt |
kaṃ sā pariharedanyaṃ kaikeyī kulapāṃsanī || 19 ||
[Analyze grammar]

kaikeyyā na vayaṃ rājye bhṛtakā nivasemahi |
jīvantyā jātu jīvantyaḥ putrairapi śapāmahe || 20 ||
[Analyze grammar]

yā putraṃ pārthivendrasya pravāsayati nirghṛṇā |
kastāṃ prāpya sukhaṃ jīvedadharmyāṃ duṣṭacāriṇīm || 21 ||
[Analyze grammar]

na hi pravrajite rāme jīviṣyati mahīpatiḥ |
mṛte daśarathe vyaktaṃ vilopastadanantaram || 22 ||
[Analyze grammar]

te viṣaṃ pibatāloḍya kṣīṇapuṇyāḥ sudurgatāḥ |
rāghavaṃ vānugacchadhvamaśrutiṃ vāpi gacchata || 23 ||
[Analyze grammar]

mithyā pravrājito rāmaḥ sabhāryaḥ sahalakṣmaṇaḥ |
bharate saṃniṣṛṣṭāḥ smaḥ saunike paśavo yathā || 24 ||
[Analyze grammar]

tāstathā vilapantyastu nagare nāgarastriyaḥ |
cukruśurbhṛśasaṃtaptā mṛtyoriva bhayāgame || 25 ||
[Analyze grammar]

tathā striyo rāmanimittamāturā yathā sute bhrātari vā vivāsite |
vilapya dīnā rurudurvicetasaḥ sutairhi tāsāmadhiko hi so'bhavat || 26 ||
[Analyze grammar]