Chapter 52

evamuktā vasiṣṭhena śabalā śatrusūdana |
vidadhe kāmadhukkāmānyasya yasya yathepsitam || 1 ||
[Analyze grammar]

ikṣūnmadhūṃstathā lājānmaireyāṃśca varāsavān |
pānāni ca mahārhāṇi bhakṣyāṃścoccāvacāṃstathā || 2 ||
[Analyze grammar]

uṣṇāḍhyasyaudanasyāpi rāśayaḥ parvatopamāḥ |
mṛṣṭānnāni ca sūpāśca dadhikulyāstathaiva ca || 3 ||
[Analyze grammar]

nānāsvādurasānāṃ ca ṣāḍavānāṃ tathaiva ca |
bhājanāni supūrṇāni gauḍāni ca sahasraśaḥ || 4 ||
[Analyze grammar]

sarvamāsīt susaṃtuṣṭaṃ hṛṣṭapuṣṭajanākulam |
viśvāmitrabalaṃ rāma vasiṣṭhenābhitarpitam || 5 ||
[Analyze grammar]

viśvāmitro'pi rājarṣirhṛṣṭapuṣṭastadābhavat |
sāntaḥ puravaro rājā sabrāhmaṇapurohitaḥ || 6 ||
[Analyze grammar]

sāmātyo mantrisahitaḥ sabhṛtyaḥ pūjitastadā |
yuktaḥ pareṇa harṣeṇa vasiṣṭhamidamabravīt || 7 ||
[Analyze grammar]

pūjito'haṃ tvayā brahmanpūjārheṇa susatkṛtaḥ |
śrūyatāmabhidhāsyāmi vākyaṃ vākyaviśārada || 8 ||
[Analyze grammar]

gavāṃ śatasahasreṇa dīyatāṃ śabalā mama |
ratnaṃ hi bhagavannetad ratnahārī ca pārthivaḥ |
tasmānme śabalāṃ dehi mamaiṣā dharmato dvija || 9 ||
[Analyze grammar]

evamuktastu bhagavān vasiṣṭho munisattamaḥ |
viśvāmitreṇa dharmātmā pratyuvāca mahīpatim || 10 ||
[Analyze grammar]

nāhaṃ śatasahasreṇa nāpi koṭiśatairgavām |
rājandāsyāmi śabalāṃ rāśibhī rajatasya vā || 11 ||
[Analyze grammar]

na parityāgamarheyaṃ matsakāśādariṃdama |
śāśvatī śabalā mahyaṃ kīrtirātmavato yathā || 12 ||
[Analyze grammar]

asyāṃ havyaṃ ca kavyaṃ ca prāṇayātrā tathaiva ca |
āyattamagnihotraṃ ca balirhomastathaiva ca || 13 ||
[Analyze grammar]

svāhākāravaṣaṭkārau vidyāśca vividhāstathā |
āyattamatra rājarṣe sarvametanna saṃśayaḥ || 14 ||
[Analyze grammar]

sarva svametat satyena mama tuṣṭikarī sadā |
kāraṇairbahubhī rājanna dāsye śabalāṃ tava || 15 ||
[Analyze grammar]

vasiṣṭhenaivamuktastu viśvāmitro'bravīttataḥ |
saṃrabdhataramatyarthaṃ vākyaṃ vākyaviśāradaḥ || 16 ||
[Analyze grammar]

hairaṇyakakṣyāgraiveyān suvarṇāṅkuśabhūṣitān |
dadāmi kuñjarāṇāṃ te sahasrāṇi caturdaśa || 17 ||
[Analyze grammar]

hairaṇyānāṃ rathānāṃ ca śvetāśvānāṃ caturyujām |
dadāmi te śatānyaṣṭau kiṅkiṇīkavibhūṣitān || 18 ||
[Analyze grammar]

hayānāṃ deśajātānāṃ kulajānāṃ mahaujasām |
sahasramekaṃ daśa ca dadāmi tava suvrata || 19 ||
[Analyze grammar]

nānāvarṇavibhaktānāṃ vayaḥsthānāṃ tathaiva ca |
dadāmyekāṃ gavāṃ koṭiṃ śabalā dīyatāṃ mama || 20 ||
[Analyze grammar]

evamuktastu bhagavān viśvāmitreṇa dhīmatā |
na dāsyāmīti śabalāṃ prāha rājan kathaṃ cana || 21 ||
[Analyze grammar]

etadeva hi me ratnametadeva hi me dhanam |
etadeva hi sarvasvametadeva hi jīvitam || 22 ||
[Analyze grammar]

darśaśca pūrṇamāsaśca yajñāścaivāptadakṣiṇāḥ |
etadeva hi me rājan vividhāśca kriyāstathā || 23 ||
[Analyze grammar]

adomūlāḥ kriyāḥ sarvā mama rājanna saṃśayaḥ |
bahūnāṃ kiṃ pralāpena na dāsye kāmadohinīm || 24 ||
[Analyze grammar]