Chapter 1

[English text for this chapter is available]

śaunaka uvāca |
kathaṃ sūta yuge hyasminraudre vai kalisaṃjñake |
bahupākhaṃḍasaṃkīrṇe prāpsyāmo madhusūdanam || 1 ||
[Analyze grammar]

yugatraye vyatikrānte dharmācārapare sadā |
prāpte kaliyuge ghore kva viṣṇurbhagavāniti || 2 ||
[Analyze grammar]

sūta uvāca |
divaṃ yāte mahārāje rāme daśarathātmaje |
duṣṭarājanyabhāreṇa pīḍite dharaṇītale || 3 ||
[Analyze grammar]

devānāṃ kāryasiddhyarthaṃ bhūbhāraharaṇāya ca |
vasudevagṛhe sākṣādāvirbhūte janārdane || 4 ||
[Analyze grammar]

naṃdavrajaṃ gate deve pūtanāśoṣaṇe sati |
ghātite ca tṛṇāvarte śakaṭe parivartite || 5 ||
[Analyze grammar]

damite kāliye nāge pralaṃbe ca niṣūdite |
dhṛte govardhane śaile paritrāte ca gokule || 6 ||
[Analyze grammar]

surabhyā cābhiṣikte tu indre ca vimadīkṛte |
rāsakrīḍārate deve dārite keśidānave || 7 ||
[Analyze grammar]

akrūravacanāddeve mathurāyāṃ gate harau |
hate kuvalayāpīḍe mallarāje ca ghātite || 8 ||
[Analyze grammar]

paśyatāṃ deva daityānāṃ bhojarāje nipātite |
yadupuryāmabhiṣikta ugrasene narādhipe || 9 ||
[Analyze grammar]

jarāsaṃdhabale raudre yavane ca hate kṣitau |
rājasūye kratuvare caidye caiva nipātite || 10 ||
[Analyze grammar]

nivṛtte bhārate yuddhe bhāre ca kṣapite bhuvaḥ |
yātrāvyājasamānīte prabhāsaṃ yādave kule || 11 ||
[Analyze grammar]

madyapānaprasakte tu parasparavadho dyate |
kalahenātiraudreṇa vinaṣṭe yādave kule || 12 ||
[Analyze grammar]

gātraṃ saṃtyajya cātraiva gate'naṃte dharātalāt |
aśvatthamūlalamāśritya samāsīne janārdane || 13 ||
[Analyze grammar]

vyādhaprahārabhinnāṃge parityakte kalevare |
svadhāmasaṃsthite deve pārthe ca punarāgate || 14 ||
[Analyze grammar]

yadupuryyāṃ plāvitāyāṃ sāgareṇa samaṃtataḥ |
śakraprasthaṃ tato gatvā kārayitvā harergṛham || 15 ||
[Analyze grammar]

dvāpare ca vyatikrāṃte dharmādharmavimiśrite |
saṃprāpte ca mahāraudre yuge vai kalisaṃjñite || 16 ||
[Analyze grammar]

kṣīyamāṇe ca saddharme vidharme prabale tathā |
naṣṭadharmakriyāyoge vedavādabahiṣkṛte |
ekapāde sthite dharme varṇāśramavivarjite || 17 ||
[Analyze grammar]

asminyuge vilulite hyṛṣayo vanacāriṇaḥ |
sametyāmaṃtrayansarve gargacyavanabhārgavāḥ || 18 ||
[Analyze grammar]

asito devalo dhaumyaḥ kraturuddālakastathā |
ete cānye ca bahavaḥ parasparamathābruvan || 19 ||
[Analyze grammar]

paśyadhvaṃ munayaḥ sarve kalivyāptaṃ digaṃtaram |
samaṃtātparidhāvadbhirdasyubhirbādhyate prajā || 20 ||
[Analyze grammar]

adharmaparamaiḥ puṃbhiḥ satyārjavanirākṛtaiḥ |
kathaṃ sa bhagavānviṣṇuḥ saṃprāpyo munisattamāḥ || 21 ||
[Analyze grammar]

ko vā bhavābdhau patatastārayiṣyati saṃgatān |
na kalau saṃbhavastasya triyugo madhusūdanaḥ |
taṃ vinā puṃḍarīkākṣaṃ kathaṃ syāma kalau yuge || 22 ||
[Analyze grammar]

teṣāṃ ciṃtayatāmevaṃ duḥkhitānāṃ tapasvinām |
uvāca vacanaṃ tatra ṛṣiruddālakastadā || 23 ||
[Analyze grammar]

uddālaka uvāca |
yāvanna kalidoṣeṇa lipyāmo munisattamāḥ |
apāpā brahmasadanaṃ gacchāmaḥ parisaṃgatāḥ || 24 ||
[Analyze grammar]

pṛcchāmo lokadhātāraṃ sthitaṃ viṣṇuṃ kalau yuge |
yadi viṣṇuḥ kalau na syādrudreṇa brahmaṇā'saha || 25 ||
[Analyze grammar]

taṃ vinā puṃḍarīkākṣaṃ tyakṣyāmaḥ svakalevaram |
vinā bhagavatā loke kaḥ sthāsyati kalau yuge || 26 ||
[Analyze grammar]

tacchrutvā vacanaṃ tasya ṛṣayaḥ saṃśitavratāḥ |
sādhusādhviti te coktvā prasthitā brahmaṇoṃ'tikam || 27 ||
[Analyze grammar]

kathayantaḥ kathāṃ viṣṇoḥ svarūpamanuvarṇanam |
tāpasāḥ prayayuḥ sarve saṃhṛṣṭā brahmaṇoṃ'tikam || 28 ||
[Analyze grammar]

dadṛśuste tadā devamāsīnaṃ paramāsane |
pitāmahabhūtagaṇairmūrtāmūrtairvṛtaṃ tathā || 29 ||
[Analyze grammar]

dṛṣṭvā caturmukhaṃ devaṃ daṃḍavatpraṇatāḥ kṣitau |
praṇamya devadevaṃ tu stotreṇa tuṣuvustadā || 30 ||
[Analyze grammar]

ṛṣaya ūcuḥ |
namaste padmasaṃbhūta caturvaktrākṣayāvyaya |
namaste sṛṣṭikartre tu pitāmaha namo'stu te || 31 ||
[Analyze grammar]

evaṃ stutaḥ sanmunibhiḥ suprītaḥ kamalodbhavaḥ |
pādyārghyeṇābhivandyaitānpapraccha munipuṃgavān || 32 ||
[Analyze grammar]

brahmovāca |
kimāgamanakṛtyaṃ vo brūta tattvena putrakāḥ |
kuśalaṃ vo mahābhāgāḥ putraśiṣyāgnibandhuṣu || 33 ||
[Analyze grammar]

ṛṣaya ūcuḥ |
bhavatprasādātsakalaṃ prāptaṃ nastapasaḥ phalam |
yadbhavaṃtaṃ prapaśyāmaḥ sarvadevaguruṃ prabhum || 34 ||
[Analyze grammar]

śṛṇvetatkāraṇaṃ śaṃbho ete prāptāstavāṃtikam |
yugatraye vyatikrāṃte kṛtādidvāparāṃtake || 35 ||
[Analyze grammar]

prāpte kaliyuge ghore kva viṣṇuḥ pṛthivītale |
yaṃ dṛṣṭvā paramāṃ muktiṃ yāsyāmo muktabandhanāḥ || 36 ||
[Analyze grammar]

brahmovāca |
matsyakūrmādirūpaiśca bhagavāñjñāyate mayā |
viṣṇoḥ pāramikāṃ mūrtiṃ na jānāmi dvijottamāḥ || 37 ||
[Analyze grammar]

ṛṣaya ūcuḥ |
yadi tvaṃ na vijānāsi tāta viṣṇoravasthitim |
gatvā prayāgaṃ tatraiva saṃtyakṣyāmaḥ kalevaram || 38 ||
[Analyze grammar]

brahmovāca |
mā viṣādaṃ vrajadhvaṃ hi upadekṣyāmi vo hitam |
ito vrajadhvaṃ pātālaṃ yatrāste daityasattamaḥ || 39 ||
[Analyze grammar]

taṃ gatvā paripṛcchadhvaṃ prahlādaṃ daityasattamam |
sa jñāsyati hareḥ sthānaṃ yāthātathyena bho dvijāḥ || 40 ||
[Analyze grammar]

tacchutvā vacanaṃ tasya brahmaṇaḥ paramātmanaḥ |
praṇipatya ca deveśaṃ prasthitāste tapodhanāḥ || 41 ||
[Analyze grammar]

jagmuḥ saṃhṛṣṭamanasaḥ stuvanto daityasattamam |
dhanyaḥ sa daityarājo'yaṃ yo jānāti janārddanam || 42 ||
[Analyze grammar]

iti saṃciṃtayānāste prāptā vai sutalaṃ dvijāḥ || 43 ||
[Analyze grammar]

gatvā te tasya nagaraṃ viviśurbhavanottamam |
dūrādeva sa tāndṛṣṭvā balirvairocanistadā |
pratyutthāyārhayāñcakre prahlādena samanvitaḥ || 44 ||
[Analyze grammar]

madhuparkaṃ ca gāṃ caiva dattvā cārghyaṃ tathaiva ca |
uvāca prāṃjalirbhūtvā prahṛṣṭenāṃtarātmanā || 45 ||
[Analyze grammar]

svāgataṃ vo mahābhāgāḥ suvyuṣṭā rajanī mama |
bhavato yatprapaśyāmi brūta kiṃ karavāṇi ca || 46 ||
[Analyze grammar]

evaṃ hi daityarājena satkṛtāste dvijottamāḥ |
ūcuḥ prahṛṣṭamanaso dānavendrasutaṃ tadā || 47 ||
[Analyze grammar]

ṛṣaya ūcuḥ |
kāryārthinastu saṃprāptāḥ prahlāda harivallabha |
tadasmākaṃ mahābāho bhavāṃstrātā bhavārṇavāt || 48 ||
[Analyze grammar]

kathaṃ daitya yuge hyasminraudre vai kalisaṃjñake |
bhaviṣyāmo vinā viṣṇuṃ bhītānāmabhayapradam || 49 ||
[Analyze grammar]

asminyuge hyadharmeṇa jito dharmaḥ sanātanaḥ |
anṛtena jitaṃ satyaṃ viprāśca vṛṣalairjitāḥ || 50 ||
[Analyze grammar]

viṭairjitā vedamārgāḥ strībhiśca puruṣā jitāḥ |
brāhmaṇāścāpi vadhyante mleccha rājanyarūpibhiḥ || 51 ||
[Analyze grammar]

asminvilulitaprāye varṇāśramavivarjite |
avilupte vedamārge kva viṣṇurbhagavāniti || 52 ||
[Analyze grammar]

vinā jñānādvinā dhyānādvinā ceṃdriyanigrahāt |
prāpyate bhagavānyatra tadguhyaṃ kathayasva naḥ || 53 ||
[Analyze grammar]

daityarāja tvamasmākaṃ suhṛnmārgapradarśakaḥ |
kathayasva mahābhāga yatra tiṣṭhati keśavaḥ || 54 ||
[Analyze grammar]

evaṃ sa dvijamukhyaiśca saṃpṛṣṭo daityasattamaḥ |
praṇamya brāhmaṇānsarvānbhaktyā saṃhṛṣṭamānasaḥ || 55 ||
[Analyze grammar]

sa namaskṛtya devebhyo brahmaṇe paramātmane |
bhagavadbhaktiryuktaḥ sanvyāharttumupacakrame || 56 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmye kalibhītamaharṣibhirbrahmavacanātprahlādasaṃnidhau kaliyuge bhagavatsthitiviṣaye praśnakaraṇavarṇanaṃnāma prathamo'dhyāyaḥ || 1 ||
[Analyze grammar]