Chapter 128

[English text for this chapter is available]

īśvara uvāca |
tato gacchenmahādevi sāgarādityamuttamam |
bhairaveśātpaścimato rudrānmṛtyuñjayāttathā || 1 ||
[Analyze grammar]

kāmeśāddakṣiṇāgneye nātidūre vyavasthitam |
sarva rogapraśamanaṃ dāridryaughavighātakam |
pratiṣṭhitaṃ mahādevi sagareṇa mahātmanā || 2 ||
[Analyze grammar]

ṣaṣṭiputrasahasrāṇi yaḥ prāpārātisūdanaḥ |
sūryaṃ tatra samārādhya sagaraḥ pṛthivīpatiḥ || 3 ||
[Analyze grammar]

ya eṣa sāgaro devi yojanāyatavistaraḥ |
āyato'śītisāhasraṃ yojanānāṃ prakīrtitaḥ || 4 ||
[Analyze grammar]

asminmanvantare kṣiptaḥ sāgaraiśca caturdiśam |
tasyedaṃ kīrtitaṃ devi nāma sāgarasaṃjñitam || 5 ||
[Analyze grammar]

yasyādyāpīha gāyanti purāṇe prathitaṃ yaśaḥ |
tenāyaṃ sthāpito devo bhāskaro vāritaskaraḥ || 6 ||
[Analyze grammar]

taṃ dṛṣṭvā na jaḍo nāndho na daridro na duḥkhitaḥ |
na caiveṣṭaviyogī syānna rogī naiva pāpakṛt || 7 ||
[Analyze grammar]

māghe māsi mahādevi site pakṣe jitendriyaḥ |
ṣaṣṭhyāmupoṣito bhūtvā rātrau tasyāgrataḥ svapet || 8 ||
[Analyze grammar]

vibuddhastvatha saptamyāṃ bhaktyā bhānuṃ samarcayet |
brāhmaṇānbhojayedbhaktyā vittaśāṭhyaṃ vivarjayet || 9 ||
[Analyze grammar]

sutapteneha tapasā yajñairvā bahudakṣiṇaiḥ |
tāṃ gatiṃ na narā yānti yāṃ gatāḥ sūryamāśritāḥ || 10 ||
[Analyze grammar]

bhaktyā tu puruṣaiḥ pūjā kṛtā dūrvāṃkurairapi |
bhānurdadāti hi phalaṃ sarvayajñaiḥ sudurlabham || 11 ||
[Analyze grammar]

tasmātsarvaprayatnena sūryamevābhipūjayet |
janakādayo yathā siddhiṃ gatā bhānuṃ prapūjya ca || 12 ||
[Analyze grammar]

sarvātmā sarvalokeśo devadevaḥ prajāpatiḥ |
sūrya eva trilokasya mūlaṃ paramadaivatam || 13 ||
[Analyze grammar]

vasante kapilaḥ sūryo grīṣme kāñcanasaprabhaḥ |
śvetavarṇaśca varṣāsu pāṃḍuḥ śaradi bhāskaraḥ || 14 ||
[Analyze grammar]

hemante tāmravarṇastu śiśire lohito raviḥ |
evaṃ varṇaviśeṣeṇa dhyāyetsūryaṃ yathākramam || 15 ||
[Analyze grammar]

pūjayitvā vidhānena yatātmā saṃyatendriyaḥ |
paṭhennāmasahasraṃ tu sarvapātakanāśanam || 16 ||
[Analyze grammar]

devyuvāca |
nāmnāṃ sahasraṃ me brūhi prasādāñchaṃkara prabho |
tulyaṃ nāmasahasrasya kimapyanyatprakīrtaya || 17 ||
[Analyze grammar]

īśvara uvāca |
alaṃ nāmasahasreṇa paṭhasvaivaṃ śubhaṃ stavam |
yāni guhyāni nāmāni pavitrāṇi śubhāni ca |
tāni te kīrtayiṣyāmi prayatnādavadhāraya || 18 ||
[Analyze grammar]

vikartano vivasvāṃśca mārtaṇḍo bhāskaro raviḥ |
lokaprakāśakaḥ śrīmāṃllokacakṣurgraheśvaraḥ || 19 ||
[Analyze grammar]

lokasākṣī trilokeśaḥ karttā harttā tamisrahā |
tapanastāpanaścaiva śuciḥ saptāśvavāhanaḥ || 20 ||
[Analyze grammar]

gabhastihasto brahmā ca sarvadevanamaskṛtaḥ |
ekaviṃśatirityeṣa stava iṣṭo mahātmanaḥ || 21 ||
[Analyze grammar]

śarīrārogyadaścaiva dhanavṛddhiyaśaskaraḥ |
stavarāja iti khyātastriṣu lokeṣu viśrutaḥ || 22 ||
[Analyze grammar]

yaścānena mahādevi dve saṃdhye'stamanodaye |
stautyarkaṃ prayato bhūtvā sarvapāpaiḥ pramucyate |
sarvakāmasamṛddhātmā sūryalokaṃ sa gacchati || 23 ||
[Analyze grammar]

ityevaṃ kathitaṃ devi māhātmyaṃ sāgarārkajam |
śrutaṃ duḥkhaughaśamanaṃ mahāpātakanāśanam || 24 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye sāgarādityamāhātmyavarṇanaṃnāmāṣṭāviṃśatyuttaraśatatamo'dhyāyaḥ || 128 ||
[Analyze grammar]