Chapter 50

[English text for this chapter is available]

sūta uvāca |
idaṃ skāṃdamahaṃ śrutvā kāśīkhaṃḍamanuttamam |
nitarāṃ paritṛptosmi hṛdi cāpi vidhāritam || 1 ||
[Analyze grammar]

anukramaṇikādhyāyaṃ tathā māhātmyamuttamam |
pārāśarya samācakṣva yathāpūrvamidaṃ bhavet || 2 ||
[Analyze grammar]

vyāsa uvāca |
sūtāvadhehi dharmātmañjātūkarṇya niśāmaya |
śukavaiśaṃpāyanādyāḥ śṛṇvaṃtvapi ca bālakāḥ || 3 ||
[Analyze grammar]

anukramaṇikādhyāyaṃ māhātmyaṃ cāpi khaṃḍajam |
pravakṣyāmyaghanāśāya mahāpuṇyapravardhanam || 4 ||
[Analyze grammar]

viṃdhyanāradasaṃvādaḥ prathame parikīrtitaḥ |
satyalokaprabhāvaśca dvitīyaḥ samudāhṛtaḥ || 5 ||
[Analyze grammar]

agasterāśramapade devānāmāgamastataḥ |
pativratā caritraṃ ca prasthānaṃ kuṃbhasaṃbhavaḥ || 6 ||
[Analyze grammar]

tīrthapraśaṃsā ca tataḥ saptapuryastataḥ smṛtāḥ |
saṃyaminyāḥ svarūpaṃ ca bradhnalokastataḥ param || 7 ||
[Analyze grammar]

iṃdrāgnyorlokasaṃprāptistataśca śivaśarmaṇaḥ |
agneḥ samudbhavastasmāt kravyādvaruṇasaṃbhavaḥ || 8 ||
[Analyze grammar]

gaṃdhavatyalakāpuryorīśayostu samudbhavaḥ |
caṃdralokapariprāptiḥ śivaśarmadvijanmanaḥ || 9 ||
[Analyze grammar]

uḍuloka kathā tasmāttataḥ śukrasamudbhavaḥ |
māheya gurusaurīṇāṃ lokānāṃ varṇanaṃ tataḥ || 10 ||
[Analyze grammar]

saptarṣīṇāṃ tato lokā dhruvasya ca tapastataḥ |
tato dhruvapadaprāptirdhruvaloka sthitistataḥ || 11 ||
[Analyze grammar]

darśanaṃ satyalokasya tasya vai śivaśarmaṇaḥ |
caturbhujābhiṣekaśca nirvāṇaṃ śivaśarmaṇaḥ || 12 ||
[Analyze grammar]

skaṃdāgastyośca saṃvādo maṇikarṇyāḥ samudbhavaḥ |
tatastu gaṃgāmāhātmyaṃ tato daśaharāstavaḥ || 13 ||
[Analyze grammar]

prabhāvaścāpi gaṃgāyā gaṃgānāmasahasrakam |
vārāṇasyāḥ praśaṃsātha bhairavāvirbhavastataḥ || 14 ||
[Analyze grammar]

daṃḍapāṇeḥ samudbhūtirjñānavāpyudbhavastataḥ |
ākhyānaṃ ca kalāvatyāḥ sadācārastataḥ param || 15 ||
[Analyze grammar]

brahmacāri prakaraṇaṃ tataḥ strīlakṣaṇāni ca |
kṛtyākṛtyaprakaraṇamavimukteśavarṇanam || 16 ||
[Analyze grammar]

tato gṛhasthadharmāśca tato yoganirūpaṇam |
kālajñānaṃ tataḥ proktaṃ divodāsasya varṇanam || 17 ||
[Analyze grammar]

kāśyāśca varṇanaṃ tasmādyoginīvarṇanaṃ tataḥ |
lolārkasya samākhyānamuttarārkakathā tataḥ || 18 ||
[Analyze grammar]

sāṃbādityasya mahimā drupadāditya śaṃsanam |
tatastu garuḍākhyānamaruṇārkādayastataḥ || 19 ||
[Analyze grammar]

daśāśvamedhikaṃ tīrthaṃ maṃdarācca gaṇāgamaḥ |
piśācamocanākhyānaṃ gaṇeśapreṣaṇaṃ tataḥ || 20 ||
[Analyze grammar]

māyāgaṇapateścātha ḍhuṃḍhiprādurbhavastataḥ |
viṣṇumāyāprapaṃcotha divodāsavisarjanam || 21 ||
[Analyze grammar]

tataḥ paṃcanadotpattirbiṃdumādhavasaṃbhavaḥ |
tato vaiṣṇavatīrthānāṃ māhātmyaparivarṇanam || 22 ||
[Analyze grammar]

prayāṇaṃ maṃdarātkāśīṃ vṛṣabhadhvajaśūlinaḥ |
jaigīṣavyena saṃvādo jyeṣṭhasthāne maheśituḥ || 23 ||
[Analyze grammar]

tataḥ kṣetrarahasyasya kathanaṃ pāpanāśanam |
athātaḥ kaṃdukeśasya vyāghreśasya samudbhavaḥ || 24 ||
[Analyze grammar]

tataḥ śaileśvarakathā ratneśasya ca darśanam |
kṛttivāsaḥ samutpattistataścāyatanāgamaḥ || 25 ||
[Analyze grammar]

devatānāmadhiṣṭhānaṃ durgāsuraparākramaḥ |
durgāyā vijayaścātha tata oṃkāravarṇanam || 26 ||
[Analyze grammar]

punaroṃkāramāhātmyaṃ trilocanasamudbhavaḥ |
trilocanaprabhāvotha kedārākhyānameva ca || 27 ||
[Analyze grammar]

tato dharmeśamahimā tataḥ pakṣikathā śubhā |
tato viśvabhujākhyānaṃ durdamasya kathā tataḥ || 28 ||
[Analyze grammar]

tato vīreśvarākhyānaṃ vīreśa mahimā punaḥ |
gaṃgātīrthaiśca saṃyuktā kāmeśa mahimā tataḥ || 29 ||
[Analyze grammar]

viśvakarmeśa mahimā dakṣayajñasamudbhavaḥ |
satyā dehavisargaśca tato dakṣeśvarodbhavaḥ || 30 ||
[Analyze grammar]

tato vai pārvatīśasya mahimnaḥ parikīrtanam |
gaṃgeśasyātha mahimā narmadeśasamudbhavaḥ || 31 ||
[Analyze grammar]

satīśvarasamutpattiramṛteśādi vaṇarnam |
vyāsasya hi bhujastaṃbho vyāsaśāpavimokṣaṇam || 32 ||
[Analyze grammar]

kṣetratīrthakadaṃbaṃ ca muktimaṃḍapa saṃkathā |
viśveśāvirbhavaścātha tato yātrāparikramaḥ || 33 ||
[Analyze grammar]

etadākhyānaśatakaṃ krameṇa parikīrtitam |
yasya śravaṇamātreṇa sarvakhaṃḍa śruteḥ phalam |
anukramaṇikādhyāyepyasti yātrāparikramaḥ || 34 ||
[Analyze grammar]

sūta uvāca |
yātrā parikramaṃ brūhi janānāṃ hitakāmyayā |
yathāvatsiddhikāmānāṃ satyavatyāḥ sutottama || 35 ||
[Analyze grammar]

vyāsa uvāca |
niśāmaya mahāprājña lomaharṣaṇa vacmi te |
yathā prathamato yātrā kartavyā yātrikairmudā || 36 ||
[Analyze grammar]

sacailamādau saṃsnāya cakrapuṣkariṇījale |
saṃtarpyadevāsapitṝnbrāhmaṇāṃśca tathārthinaḥ || 37 ||
[Analyze grammar]

ādityaṃ draupadīṃ viṣṇuṃ daṃḍapāṇiṃ maheśvaram |
namaskṛtya tato gaccheddraṣṭuṃ ḍhuṃḍhivināyakam || 38 ||
[Analyze grammar]

jñānavāpīmupaspṛśya naṃdikeśaṃ tatorcayet |
tārakeśaṃ tatobhyarcya mahākāleśvaraṃ tataḥ || 39 ||
[Analyze grammar]

tataḥ punardaṃḍapāṇimityeṣā paṃcatīrthikā || 40 ||
[Analyze grammar]

dainaṃdinī vidhātavyā mahāphalamabhīpsubhiḥ |
tato vaiśveśvarī yātrā kāryā sarvārtha siddhidā || 41 ||
[Analyze grammar]

dvisaptāyatanānāṃ ca kāryā yātrā prayatnataḥ |
kṛṣṇāṃ pratipadaṃ prāpya bhūtāvadhi yathāvidhi || 42 ||
[Analyze grammar]

athavā pratibhūtaṃ ca kṣetrasiddhimabhīpsubhiḥ |
tattattīrthakṛtasnānastattalliṃgakṛtārcanaḥ || 43 ||
[Analyze grammar]

maunena yātrāṃ kurvāṇaḥ phalaṃ prāpnoti yātrikaḥ |
oṃkāraṃ prathamaṃ paśyenmatsyodaryāṃ kṛtodakaḥ || 44 ||
[Analyze grammar]

triviṣṭapaṃ mahādevaṃ tato vai kṛttivāsasam |
ratneśaṃ cātha caṃdreśaṃ kedāraṃ ca tato vrajet || 45 ||
[Analyze grammar]

dharmeśvaraṃ ca vīreśaṃ gacchetkāmeśvaraṃ tataḥ |
viśvakarmeśvaraṃ cātha maṇikarṇīśvaraṃ tataḥ || 46 ||
[Analyze grammar]

avimukteśvaraṃ dṛṣṭvā tato viśveśamarcayet |
eṣā yātrā prayatnena kartavyā kṣetravāsinā || 47 ||
[Analyze grammar]

yastu kṣetramuṣitvā tu naitāṃ yātrāṃ samācaret |
vighnāstasyopatiṣṭhaṃte kṣetroccāṭanasūcakāḥ || 48 ||
[Analyze grammar]

aṣṭāyatana yātrānyā kartavyā vighraśāṃtaye |
dakṣeśaḥ pārvatīśaśca tathā paśupatīśvaraḥ || 49 ||
[Analyze grammar]

gaṃgeśo narmadeśaśca gabhastīśaḥ satīśvaraḥ |
aṣṭamastārakeśaśca pratyaṣṭami viśeṣataḥ || 50 ||
[Analyze grammar]

dṛśyānyetāni liṃgāni mahāpāpopaśāṃtaye |
aparāpi śubhā yātrā yogakṣemakarī sadā || 51 ||
[Analyze grammar]

sarvavighropahaṃtrī ca kartavyā kṣetravāsibhiḥ |
śaileśaṃ prathamaṃ vīkṣya varaṇāsnānapūrvakam || 52 ||
[Analyze grammar]

snānaṃ tu saṃgame kṛtvā draṣṭavyaḥ saṃgameśvaraḥ |
svalīna tīrthe susnātaḥ paśyetsvalīnamīśvaram || 53 ||
[Analyze grammar]

snātvā maṃdākinī tīrthe draṣṭavyo madhyameśvaraḥ |
paśyeddhiraṇyagarbheśaṃ tatra tīrthe kṛtodakaḥ || 54 ||
[Analyze grammar]

maṇikarṇyāṃ tataḥ snātvā paśyedīśānamīśvaram |
tataḥ kūpamupaspṛśya goprekṣamavalokayet || 55 ||
[Analyze grammar]

kāpileya hrade snātvā vīkṣeta vṛṣabhadhvajam |
upaśāṃtaśivaṃ paśyettatkūpavihitodakaḥ || 56 ||
[Analyze grammar]

paṃcacūḍāhrade snātvā jyeṣṭhasthānaṃ tatorcayet |
catuḥsamudrakūpe tu snātvā devaṃ samarcayet || 57 ||
[Analyze grammar]

devasyāgre tu yā vāpī tatropasparśane kṛte |
śukreśvaraṃ tataḥ paśyettatkūpavihitodakaḥ || 58 ||
[Analyze grammar]

daṃḍakhāte tataḥ snātvā vyāghreśaṃ pūjayettataḥ |
śaunakeśvarakuṃḍe tu snānaṃ kṛtvā tatorcayet || 59 ||
[Analyze grammar]

jaṃbukeśaṃ mahāliṃgaṃ kṛtvā yātrāmimāṃ naraḥ |
kvacinna jāyate bhūyaḥ saṃsāre duḥkhasāgare || 60 ||
[Analyze grammar]

samārabhya pratipadaṃ yāvatkṛṣṇā caturdaśī |
etatkrameṇa kartavyānye tadāyatanāni vai || 61 ||
[Analyze grammar]

imāṃ yātrāṃ naraḥ kṛtvā na bhūyopyabhijāyate |
anyā yātrā prakartavyaikā daśāyatanodbhavā || 62 ||
[Analyze grammar]

āgnīdhra kuṃḍe susnātaḥ paśyedāgnīdhramīśvaram |
urvaśīśaṃ tato gacchettatastu nakulīśvaram || 63 ||
[Analyze grammar]

āṣāḍhīśaṃ tato dṛṣṭvā bhārabhūteśvaraṃ tataḥ |
lāṃgalīśamathālokya tatastu tripurāṃtakam || 64 ||
[Analyze grammar]

tato manaḥprakāmeśaṃ prītikeśamatho vrajet |
madālaseśvaraṃ tasmāttilaparṇeśvaraṃ tataḥ || 65 ||
[Analyze grammar]

yātraikādaśaliṃgānāmeṣā kāryā prayatnataḥ |
imāṃ yātrāṃ prakurvāṇo rudratvaṃ prāpnuyānnaraḥ || 66 ||
[Analyze grammar]

ataḥ paraṃ pravakṣyāmi gārī yātrāmanuttamām |
śuklapakṣe tṛtīyāyāṃ yā yātrā viṣvagṛddhidā || 67 ||
[Analyze grammar]

goprekṣatīrthe susnāya mukhanirmālikāṃ vrajet |
jyeṣṭhāvāpyāṃ naraḥ snātvā jyeṣṭhāgaurīṃ samarcayet || 68 ||
[Analyze grammar]

saubhāgyagaurī saṃpūjyā jñānavāpyāṃ kṛtodakaiḥ |
tataḥ śṛṃgāragaurīṃ ca tatraiva ca kṛtodakaḥ || 69 ||
[Analyze grammar]

snātvā viśālagaṃgāyāṃ viśālākṣīṃ tato vrajet |
susnāto lalitātīrthe lalitāmarcayettataḥ || 70 ||
[Analyze grammar]

snātvā bhavānītīrthetha bhavānīṃ paripūjayet |
maṃgalā ca tatobhyarcyā biṃdutīrthakṛtodakaiḥ || 71 ||
[Analyze grammar]

tato gacchenmahālakṣmīṃ sthiralakṣmīsamṛddhaye |
imāṃ yātrāṃ naraḥ kṛtvā kṣetresminmuktijanmani || 72 ||
[Analyze grammar]

na duḥkhairabhibhūyeta ihāmutrāpi kutracit |
kuryātpraticaturthīha yātrāṃ vighneśituḥ sadā || 73 ||
[Analyze grammar]

brāhmaṇebhyastaduddeśāddeyā vai modakā mude |
bhaume bhairavayātrā ca kāryā pātakahāriṇī || 74 ||
[Analyze grammar]

ravivāre raveryātrā ṣaṣṭhyāṃ vāravisaṃyuji |
tathaiva ravisaptamyāṃ sarvavighnopaśāṃtaye || 75 ||
[Analyze grammar]

navamyāmathavāṣṭamyāṃ caṃḍīyātrā śubhā matā |
aṃtargṛhasya vai yātrā kartavyā prativāsaram || 76 ||
[Analyze grammar]

prātaḥsnānaṃ vidhāyādau natvā paṃcavināyakān |
namaskṛtvātha viśveśaṃ sthitvā nirvāṇamaṃḍape || 77 ||
[Analyze grammar]

aṃtargṛhasya yātrā vai kariṣye ghaughaśāṃtaye |
gṛhītvā niyamaṃ ceti gatvātha maṇikarṇikām || 78 ||
[Analyze grammar]

snātvā maunena cāgatya maṇikarṇīśamarcayet |
kaṃbalāśvatarau natvā vāsukīśaṃ praṇamya ca || 79 ||
[Analyze grammar]

parvateśaṃ tato dṛṣṭvā gaṃgākeśavamapyatha |
tatastu lalitāṃ dṛṣṭvā jarāsaṃdheśvaraṃ tataḥ || 80 ||
[Analyze grammar]

tato vai somanāthaṃ ca vārāhaṃ ca tato vrajet |
brahmeśvaraṃ tato natvā natvāgastīśvaraṃ tataḥ || 81 ||
[Analyze grammar]

kaśyapeśaṃ namaskṛtya harikeśavanaṃ tataḥ |
vaidyanāthaṃ tato dṛṣṭvā dhruveśamatha vīkṣya ca || 82 ||
[Analyze grammar]

gokarṇeśvaramabhyarcya hāṭakeśamatho vrajet |
asthikṣepa taḍāge ca dṛṣṭvā vai kīkaseśvaram || 83 ||
[Analyze grammar]

bhārabhūtaṃ tato natvā citregupteśvaraṃ tataḥ |
citraghaṃṭāṃ praṇamyātha tataḥ paśupatīśvaram || 84 ||
[Analyze grammar]

pitāmaheśvaraṃ gatvā tatastu kalaśeśvaram |
caṃdreśastvatha vīreśo vidyeśognīśa eva ca || 85 ||
[Analyze grammar]

nāgeśvaro hariścaṃdraściṃtāmaṇivināyakaḥ |
senāvināyakaścātha draṣṭavyaḥ sarvavighnahṛt || 86 ||
[Analyze grammar]

vasiṣṭhavāmadevau ca mūrtirūpadharāvubhau |
draṣṭavyau yatnataḥ kāśyāṃ mahāvighnavināśinau || 87 ||
[Analyze grammar]

sīmāvināyakaṃ cātha karuṇeśaṃ tato vrajet |
trisaṃdhyeśo viśālākṣī dharmeśo viśvabāhukā |
āśāvināyakaścātha vṛddhādityastataḥ punaḥ || 88 ||
[Analyze grammar]

caturvaktreśvaraṃ liṃgaṃ brāhmīśastu tataḥ paraḥ |
tato manaḥprakāmeśa īśāneśastataḥ param || 89 ||
[Analyze grammar]

caṃḍīcaṃḍīśvarau dṛśyau bhavānīśaṃkarau tataḥ |
ḍhuṃḍhiṃ praṇamya ca tato rājarājeśamarcayet || 90 ||
[Analyze grammar]

lāṃgalīśastatobhyarcyastatastu nakulīśvaraḥ |
parānneśamatho natvā paradravyeśvaraṃ tataḥ || 91 ||
[Analyze grammar]

pratigraheśvaraṃ vāpi niṣkalaṃkeśameva ca |
mārkaṃḍeyeśamabhyarcya tataścāpsaraseśvaram || 92 ||
[Analyze grammar]

gaṃgeśorcyastato jñānavāpyāṃ snānaṃ samācaret |
naṃdikeśaṃ tārakeśaṃ mahākāleśvaraṃ tataḥ || 93 ||
[Analyze grammar]

daṃḍapāṇiṃ maheśaṃ ca mokṣeśaṃ praṇamettataḥ |
vīrabhadreśvaraṃ natvā avimukteśvaraṃ tataḥ || 94 ||
[Analyze grammar]

vināyakāṃstataḥ paṃca viśvanāthaṃ tato vrajet |
tato maunaṃ visṛjyātha maṃtrametamudīrayet || 95 ||
[Analyze grammar]

aṃtargṛhasya yātreyaṃ yathāvadyā mayā kṛtā |
nyūnātiriktayā śaṃbhuḥ prīyatāmanayā vibhuḥ || 96 ||
[Analyze grammar]

iti maṃtraṃ samuccārya kṣaṇaṃ vai muktimaṃḍape |
viśramya yāyādbhavanaṃ niṣpāpaḥ puṇyavānnaraḥ || 97 ||
[Analyze grammar]

saṃprāpya vāsaraṃ viṣṇorviṣṇutīrtheṣu sarvataḥ |
kāryā yātrā prayatnena mahāpuṇya samṛddhaye || 98 ||
[Analyze grammar]

nabhasya paṃcadaśyāṃ ca kulastaṃbhaṃ samarcayet |
duḥkhaṃ rudrapiśācatvaṃ na bhavedyasya pūjanāt || 99 ||
[Analyze grammar]

śraddhāpūrvamimā yātrā kartavyāḥ kṣetravāsibhiḥ |
parvasvapi viśeṣeṇa kāryā yātrāśca sarvataḥ || 100 ||
[Analyze grammar]

na vaṃdhyaṃ divasaṃ kuryādvināyātrāṃ kvacitkṛtī |
yātrādvayaṃ prayatnena kartavyaṃ prativāsaram || 1 ||
[Analyze grammar]

ādau svargataraṃgiṇyāstato viśveśiturdhruvam |
yasya vaṃdhyaṃ dinaṃ yātaṃ kāśyāṃ nivasataḥ sataḥ || 2 ||
[Analyze grammar]

nirāśāḥ pitarastasya tasminneva dine'bhavan |
sa daṣṭaḥ kālasarpeṇa sa dṛṣṭo mṛtyunā sphuṭam || 3 ||
[Analyze grammar]

sa muṣṭastatra divase viśveśo yatra nekṣitaḥ |
sarvatīrtheṣu sasnau sa sarvayātrāṃ vyadhātsa ca |
maṇikarṇyāṃ tu yaḥ snāto yo viśveśaṃ niraikṣata || 4 ||
[Analyze grammar]

satyaṃ satyaṃ punaḥ satyaṃ satyaṃ satyaṃ punaḥpunaḥ |
dṛśyo viśveśvaro nityaṃ snātavyā maṇikarṇikā || 5 ||
[Analyze grammar]

vyāsa uvāca |
sūta skāṃdamidaṃ śrutvā kāśīmāhātmyamuttamam |
naro na nirayaṃ yāti kṛtvāpyaghasahasrakam || 6 ||
[Analyze grammar]

snātvā sarvāṇi tīrthāni yacchreyaḥ samupārjyate |
kāśīkhaṃḍasya śravaṇāttatsyātsūta na saṃśayaḥ || 7 ||
[Analyze grammar]

dattvā dānāni sarvāṇi kṛtvā yajñānanekaśaḥ |
tatpuṇyaṃ labhate martyastadā tacchravaṇāddhruvam || 8 ||
[Analyze grammar]

taptvā tapāṃsi cogrāṇi prāpyate yanmahatphalam |
śravaṇādasya khaṃḍasya labhate tanna saṃśayaḥ || 9 ||
[Analyze grammar]

adhītya caturo vedānsāṃgānyatphalamāpyate |
kāśīkhaṃḍaṃ samākarṇya tatphalaṃ labhyate naraiḥ || 110 ||
[Analyze grammar]

gayayāṃ śrāddhadānācca yathā tṛpyaṃti pūrvajāḥ |
tathaitacchravaṇānnṛṇāṃ tṛpnuvaṃti pitāmahāḥ || 11 ||
[Analyze grammar]

taiśca sarvapurāṇāni śrutāni sthirabuddhibhiḥ |
kāśīkhaṃḍaṃ śrutaṃ yaiśca sarveṣāṃ śreyasāṃ padam || 12 ||
[Analyze grammar]

śrutāśca sarvadharmāstairmahāpuṇyekarāśibhiḥ |
śrutaṃ yaiḥ sthiracetobhiḥ kāśīmāhātmyamuttamam || 13 ||
[Analyze grammar]

idameva hi devejyā paramā parikīrtitā |
japettatkhaṃḍamakhilaṃ śrotavyaṃ śraddhayā dvijāḥ || 14 ||
[Analyze grammar]

śṛṇuyādekamapi ya ākhyānaṃ kāśikhaṃḍajam |
śrutāni tena sarvāṇi dharmaśāstrāṇyasaṃśayam || 15 ||
[Analyze grammar]

mahādharmaikajananaṃ mahārthapratipādakam |
kāraṇaṃ sarvakāmāpteḥ kāśīkhaṃḍamidaṃ smṛtam || 16 ||
[Analyze grammar]

etacchravaṇataḥ puṃsāṃ kaivalyaṃ naiva dūrataḥ |
tuṣyaṃti sarve pitaraḥ śrutvaitatkhaṃḍamuttamam || 17 ||
[Analyze grammar]

prīṇaṃtyamartyāḥ sarvepi brahmaviṣṇuśivādayaḥ |
munayaḥ parimodaṃte mādyaṃti sanakādayaḥ || 18 ||
[Analyze grammar]

hṛṣṭaḥ sarvo bhavedeva bhūtagrāmaścaturvidhaḥ |
mahimaśravaṇādasmādvārāṇasyā na saṃśayaḥ || 19 ||
[Analyze grammar]

ya idaṃ śrāvayedvidvānsamastaṃ tvardhameva vā |
pādamātraṃ tadardhaṃ vā tvekaṃ vyākhyānamuttamam || 120 ||
[Analyze grammar]

sa namasyaḥ prayatnena saṃpūjyastviṣṭadevavat |
tasmai deyaṃ prayatnena viśveśa prītaye sadā || 21 ||
[Analyze grammar]

tasmiṃstuṣṭe hi saṃtuṣṭo viśveśo nātra saṃśayaḥ |
yatraitatpaṭhyate khaṃḍaṃ parānaṃdasamāśrayam || 22 ||
[Analyze grammar]

na tatra prabhavetkaścidamaṃgalasamudbhavaḥ |
ya idaṃ śṛṇuyādvidvānyaścedaṃ śrāvayetsudhīḥ || 23 ||
[Analyze grammar]

yaḥ paṭhedapi puṇyātmā te sarve rudramūrtayaḥ |
ya etatpustakaṃ ramyaṃ lekhayitvā samarpayet || 24 ||
[Analyze grammar]

akhilāni purāṇāni tena dattāni nānyathā |
atrākhyānāni yāvaṃti ślokā yāvaṃta eva hi || 25 ||
[Analyze grammar]

tathā padāni yāvaṃti varṇā yāvaṃta eva hi |
yāvaṃtyapi ca mātrāṇi yāvaṃtyaḥ padapaṃktayaḥ || 26 ||
[Analyze grammar]

guṇe sūtrāṇi yāvaṃti yāvaṃtaḥ paṭataṃtavaḥ |
citrarūpāṇi yāvaṃti ramyapustakasaṃcake || 27 ||
[Analyze grammar]

tāvadyugasahasrāṇi dātā svarge mahīyate |
etaddvādaśakṛtvo yaḥ śṛṇuyātkhaṃḍamuttamam || 28 ||
[Analyze grammar]

brahmahatyāpi tasyāśu naśyecchaṃbhoranugrahāt |
aputraḥ śṛṇuyādyastu susnātaḥ śraddhayānvitaḥ || 29 ||
[Analyze grammar]

tasya putro bhavatyeva śaṃbhorājñā prabhāvataḥ |
kiṃ bahūktena sūteha yasya yasya manorathaḥ || 130 ||
[Analyze grammar]

yo yastaṃ taṃ sa sasadā śrutvaitatprāpnuyātkṛtī |
śṛṇuyāddūradeśepi yaḥ kāśīkhaṃḍamuttamam || 31 ||
[Analyze grammar]

sa kāśīvāsapuṇyasya bhājanaṃ syācchivājñayā |
etacchravaṇataḥ puṃsāṃ sarvatra vijayo bhavet |
saubhāgyaṃ cāpi sarvatra prāpnuyānnirmalāśayaḥ || 32 ||
[Analyze grammar]

yasya viśveśvarastuṣṭastasyaitacchravaṇe matiḥ |
jāyate puṇyayuktasya mahānirmalacetasaḥ || 33 ||
[Analyze grammar]

sarveṣāṃ maṃgalānāṃ ca mahāmaṃgalamuttamam |
gṛhepi likhitaṃ pūjyaṃ sarvamaṃgalasiddhaye || 134 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe'nukramaṇikānāma śatatamo'dhyāyaḥ || 100 || || 7 || || śrīkāśīkhaṇḍottarārdhaṃ sampūrṇam |
samāptaṃ cedaṃ caturthaṃ kāśīkhaṃḍam || 4 ||
[Analyze grammar]