Chapter 29

[English text for this chapter is available]

śrīkṛṣṇa uvāca |
iti tadvacanaṃ śrutvā pṛthurvismitamānasaḥ |
saṃpūjya nāradaṃ samyagvisasarja tadā priye || 1 ||
[Analyze grammar]

purā'vaṃtīpure kaścidvipra āsīddhaneśvaraḥ |
brahmakarmaparibhraṣṭaḥ pāpakarmā sudurmatiḥ || 2 ||
[Analyze grammar]

deśāddeśātaraṃ gacchankrayavikrayakāraṇāt |
māhiṣmatīpurīmāgātkadācitsa dhaneśvaraḥ || 3 ||
[Analyze grammar]

mahiṣeṇa kṛtā pūrvaṃ tasmānmāhiṣmatīti sā |
yasyā vapragatā bhāti narmadā pāpanāśinī || 4 ||
[Analyze grammar]

kārtikavratinastatra nānādeśā'gatānnarān |
sa dṛṣṭvā vikrayaṃ kurvanmāsamekamuvāsa saḥ || 5 ||
[Analyze grammar]

sa nityaṃ narmadātīre bhramanvikrayakāraṇāt |
dadarśa brāhmaṇānsnānajapadevārcane sthitān || 6 ||
[Analyze grammar]

kāṃścitpurāṇaṃ paṭhataḥ kāṃścicca śravaṇe ratān |
nṛtyagāyanavāditraviṣṇuśravaṇatatparān || 7 ||
[Analyze grammar]

udyāpanavidhau saktānkāṃścijjāgaraṇe ratān |
vipragopūjanaratāndīpadānaratāṃstathā || 8 ||
[Analyze grammar]

dadarśa kautukāviṣṭastatratatra dhaneśvaraḥ |
nityaṃ paribhramaṃstatra darśanasparśabhāṣaṇāt || 9 ||
[Analyze grammar]

vaiṣṇavānāṃ tathā viṣṇornāmaśrāvādi so'labhat |
evaṃ māsaṃ sthitastasyā narmadāyāstaṭe dvijaḥ || 10 ||
[Analyze grammar]

tāvatkṛṣṇā'hinā daṣṭo vihvalaḥ sa papāta ha |
atha dehaparityaktaṃ taṃ vaddhvā yamakiṃkarāḥ || 11 ||
[Analyze grammar]

yamājñayā kuṃbhipāke cikṣipustaṃ dhaneśvaram |
yāvatkṣiptaśca tatrāsau tāvacchītalatāṃ yayau || 12 ||
[Analyze grammar]

kuṃbhīpāko yathā vahniḥ prahlādakṣepaṇātpurā |
yamastu kautukaṃ dṛṣṭvā papracchānīya taṃ tataḥ || 13 ||
[Analyze grammar]

tāvadabhyāgatastatra nāradaḥ prāha satvaram |
nārada uvāca |
naivā'yaṃ nirayānbhoktumarho hyaruṇanaṃdana || 14 ||
[Analyze grammar]

yasmādaṃte'sya saṃjātaṃ karma yannirayāpaham |
yaḥ puṇyakarmiṇāṃ kuryāddarśanasparśabhāṣaṇam || 15 ||
[Analyze grammar]

tataḥ ṣaḍaṃśamāpnoti puṇyasya niyataṃ naraḥ |
sakhyaṃ tu taistu saṃsargaṃ kṛtavānvai dhaneśvaraḥ || 16 ||
[Analyze grammar]

kārtikavratibhirmāsaṃ teṣāṃ puṇyāṃśabhāgayam || 17 ||
[Analyze grammar]

tasmādakāmapuṇyo hi yakṣayonisthito hyayam |
vilokya nirayānsarvānpāpabhogapradarśakān || 18 ||
[Analyze grammar]

śrīkṛṣṇa uvāca |
ityuktvā gatavati nārade sa sauristadvākyaśravaṇavibuddhatatsukarmā |
taṃ vipraṃ punaranayatsvakiṃkareṇa tānsarvānnirayagaṇānpradarśayiṣyan || 19 ||
[Analyze grammar]

tato dhaneśvaraṃ nītvā nirayānpretapo'bravīt |
darśayiṣyaṃstu tānsarvānyamānujñākarastadā || 20 ||
[Analyze grammar]

pretapa uvāca |
paśyemānnirayānghorāndhaneśvara mahābhayān |
eṣu pāpakarā nityaṃ pacyaṃte yamakiṃkaraiḥ || 21 ||
[Analyze grammar]

akāmātpātakaṃ śuṣkaṃ kāmādārdramudāhṛtam |
ārdraśuṣkādibhiḥ pāpairdviprakārānavasthitān || 22 ||
[Analyze grammar]

caturāśītisaṃkhyākaiḥ pṛthagbhedairavasthitān |
yatprakīrṇamapāṃkteyaṃ malinīkaraṇaṃ tathā || 23 ||
[Analyze grammar]

jātibhraṃśakaraṃ tadvadupapātakasaṃjñakam |
atipāpaṃ mahāpāpaṃ saptadhā pātakaṃ smṛtam || 24 ||
[Analyze grammar]

ebhiḥ saptasu pacyaṃte nirayeṣu yathākramam |
kārtikavratibhiryasmātsaṃsargo hyabhavattava || 25 ||
[Analyze grammar]

tatpuṇyopacayādete nirhṛtā nirayāḥ khalu |
śrīkṛṣṇa uvāca |
darśayitveti nirayānpretapastamathāharat || 26 ||
[Analyze grammar]

dhaneśvaraṃ yakṣalokaṃ yakṣaścā'bhūtsa tatra hi |
dhanadasyā'nugaḥ so'yaṃ dhanayakṣeti viśrutaḥ || 27 ||
[Analyze grammar]

sūta uvāca |
ityuktvā vāsudevo'sau satyabhāmāmatipriyam |
sāyaṃsaṃdhyāvidhiṃ kartuṃ jagāma jananīgṛham || 28 ||
[Analyze grammar]

brahmovāca |
evaṃprabhāvaḥ khalu kārtiko'yaṃ muktiprado bhuktikaraśca yasmāt |
prayāṃtyanekā'rjitapātakāni vratasya saṃdarśayato'pi muktim || 29 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe kārtikamāsamāhātmye dhaneśvarayakṣajanmaprāptivarṇanaṃnāmaikonatriṃśo'dhyāyaḥ || 29 ||
[Analyze grammar]