Chapter 121

[English text for this chapter is available]

īśvara uvāca |
dhātrīcchāyāṃ samāśritya kuryātpiṃḍaṃ tu yo guha |
muktiṃ prayāṃti pitaraḥ prasādānmādhavasya tu || 1 ||
[Analyze grammar]

mūrdhni pāṇau mukhe caiva dehe caiva tu yo naraḥ |
dhatte dhātrīphalaṃ vatsa dhātrīphalavibhūṣitaḥ || 2 ||
[Analyze grammar]

dhātrīphalakṛtāhāro naro nārāyaṇo bhavet |
yaḥ kaścidvaiṣṇavo loke dhatte dhātrīphalaṃ guha || 3 ||
[Analyze grammar]

priyo bhavati devānāṃ manuṣyāṇaṃ ca kā kathā |
na jahyāttulasīmālāṃ dhātrīmālāṃ viśeṣataḥ || 4 ||
[Analyze grammar]

yāvattiṣṭhati kaṃṭhasthā dhātrīmālā narasya hi |
tāvattasya śarīre tu pratiṣṭhati ca keśavaḥ || 5 ||
[Analyze grammar]

dhātrīṃ phalaṃ tu tulasīmṛttikā dvārakodbhavā |
saphalaṃ jīvitaṃ tasya tritayaṃ yasya veśmani || 6 ||
[Analyze grammar]

yāvaddināni vahate dhātrīmālāṃ kalau naraḥ |
tāvadyugasahasrāṇi vaikuṃṭhe vasatirbhavet || 7 ||
[Analyze grammar]

mālāyugmaṃ vahedyastu dhātrītulasisaṃbhavam |
vahate kaṃṭhadeśe tu kalpakoṭiṃ divaṃ vaset || 8 ||
[Analyze grammar]

saṃniyamyeṃdriyagrāmaṃ śālagrāmaśilārcanam |
yaḥ kuryānmānavo bhaktyā puṣpepuṣpe'śvamedhajam || 9 ||
[Analyze grammar]

surāṇāṃ ca yathā viṣṇuḥ puṣpāṇāṃ tulasī tathā |
tulasyānudinaṃ devaṃ yo'rcayedgaruḍadhvajam || 10 ||
[Analyze grammar]

janmaduḥkhajarārogairmukto'sau muktimāpnuyāt |
tulasīmālayā viṣṇuḥ pūjito yena kārtike || 11 ||
[Analyze grammar]

yamākṣarakṛtāṃ mālāṃ sphuṭaṃ śauriḥ pramārjati |
śrīcaṃdanaṃ sakarpūramaguruṃ ca sakuṃkumam || 12 ||
[Analyze grammar]

ketakī dīpadānaṃ ca sarvadā keśavapriyam |
kārtike ketakīpuṣpaṃ dattaṃ yena kalau yuge || 13 ||
[Analyze grammar]

dīpadānaṃ mahāsena kulānāṃ tārayecchatam |
saroruhāṇi tulasī ketakī munipuṣpakam || 14 ||
[Analyze grammar]

kārtike ca dinānyeva dīpadānaṃ tu paṃcamam |
ketakīmālayā yena kārtike puṣpamaṃḍapam || 15 ||
[Analyze grammar]

keśavasya kṛtaṃ vatsa vasatirdivi tasya ca |
ketakīpuṣpakenaiva pūjito garuḍadhvajaḥ || 16 ||
[Analyze grammar]

samāḥ sahasraṃ suprīto jāyate madhusūdanaḥ |
arcayitvā hṛṣīkeśaṃ kusumaiḥ ketakībhavaiḥ || 17 ||
[Analyze grammar]

puṇyaṃ tadbhavanaṃ yāti keśavasya śivaṃ guha |
damanakenāpi deveśaṃ saṃprāpte madhumādhave || 18 ||
[Analyze grammar]

samabhyarcya muniśreṣṭha arcanāllabhate phalam |
agastikusumairdevaṃ yo'rcayeta janārdanam || 19 ||
[Analyze grammar]

darśanāttasya bho vipra narakāgniḥ praṇaśyati |
na tatkaroti viprarṣe tapasā toṣito hariḥ || 20 ||
[Analyze grammar]

yatkaroti mahāsena munipuṣpairalaṃkṛtaḥ |
vihāya sarvapuṣpāṇi munipuṣpeṇa keśavam || 21 ||
[Analyze grammar]

kārtike yo'rcayedbhaktyā vājimedhaphalaṃ labhet |
munipuṣpakṛtāṃ mālāṃ yo dadāti janārdane || 22 ||
[Analyze grammar]

deveṃdro'pi muniśreṣṭha kurute tasya satkathām |
gavāmayutadānena yatphalaṃ prāpyate guha || 23 ||
[Analyze grammar]

munipuṣpeṇa caikena kārtike labhate phalam |
kaustubhena yathā prīto yathā ca vanamālayā || 24 ||
[Analyze grammar]

tulasīdalena saṃprītaḥ kārtike ca tathā hariḥ |
siūta uvāca |
praśrayāvanataṃ dṛṣṭvā kumāraṃ bhaktitatparam || 25 ||
[Analyze grammar]

punaḥ provāca bhagavānmahādevo vṛṣadhvajaḥ |
īśvara uvāca |
śṛṇu dīpasya māhātmyaṃ kārtike śikhivāhana || 26 ||
[Analyze grammar]

pitaraścaiva vāṃcchaṃti sadā pitṛgaṇairvṛtāḥ |
bhaviṣyati kule'smākaṃ pitṛbhaktaḥ suputrakaḥ || 27 ||
[Analyze grammar]

kārtike dīpadānena yastoṣayati keśavam |
ghṛtena dīpako yasya tilatailena vā punaḥ || 28 ||
[Analyze grammar]

jvalate yasya senānīraśvamedhena tasya kim |
teneṣṭaṃ kratubhiḥ sarvaiḥ kṛtaṃ tīrthāvagāhanam || 29 ||
[Analyze grammar]

dīpadānaṃ kṛtaṃ yena kārtike keśavāgrataḥ |
kṛṣṇapakṣe viśeṣeṇa putra paṃcadināni ca || 30 ||
[Analyze grammar]

puṇyāni teṣu yo datte dīpaṃ so'kṣayamāpnuyāt |
ekādaśyāṃ parairdattaṃ dīpaṃ prajvālya mūṣikā || 31 ||
[Analyze grammar]

mānuṣyaṃ durllabhaṃ prāpya parāṃ gatimavāpa sā |
lubdhako'pi caturdaśyāṃ pūjayitvā maheśvaram || 32 ||
[Analyze grammar]

nirbhakṣaḥ paramaṃ prāpya viṣṇulokaṃ jagāma saḥ |
śvapākasyāśrayādvaiśyā dīpaṃ kṛtvā paraiḥ kṛtam || 33 ||
[Analyze grammar]

śuddhā līlāvatī bhūtvā jagāma svargamakṣayam |
gopaḥ kaścidamāvasyāṃ pūjāṃ dṛṣṭvā tu śārṅgiṇaḥ || 34 ||
[Analyze grammar]

muhurmuhurjayetyuktvā rājarājeśvaro'bhavat |
tasmāddīpāḥ pradātavyā rātrāvastamate ravau || 35 ||
[Analyze grammar]

gṛheṣu sarvagoṣṭheṣu sarveṣvāyataneṣu ca |
devālayeṣu devānāṃ śmaśāneṣu sarassu ca || 36 ||
[Analyze grammar]

ghṛtādinā śubhārthāya yāvatpaṃcadināni ca |
pāpinaḥ pitaro ye ca luptapiṃḍodakakriyāḥ |
tepi yāṃti parāṃ muktiṃ dīpadānasya puṇyataḥ || 37 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārttikamāhātmye dīpa gaṃdha dhātrī māhātmyavarṇano nāma ekaviṃśatyadhikaśatatamo'dhyāyaḥ || 121 ||
[Analyze grammar]