Chapter 122

[English text for this chapter is available]

kārtikeya uvāca |
dīpāvaliphalaṃ nātha viśeṣādbrūhi sāṃpratam |
kimarthaṃ kriyate sā tu tasyāḥ kā devatā bhavet || 1 ||
[Analyze grammar]

kiṃ ca tatra bhaveddeyaṃ kiṃ na deyaṃ vada prabho |
praharṣaḥ ko'tra nirdiṣṭaḥ krīḍā kātra prakīrtitā || 2 ||
[Analyze grammar]

sūta uvāca |
iti skaṃdavacaḥ śrutvā bhagavānkāmaśoṣaṇaḥ |
sādhūktvā kārtikaṃ viprāḥ prahasannidamabravīt || 3 ||
[Analyze grammar]

śrīśiva uvāca |
kārtikasyāsite pakṣe trayodaśyāṃ tu pāvake |
yamadīpaṃ bahirdadyādapamṛtyurvinaśyati || 4 ||
[Analyze grammar]

mṛtyunā pāśahastena kālena bhāryayā saha |
trayodaśīdīpadānātsūryajaḥ prīyatāmiti || 5 ||
[Analyze grammar]

kārtike kṛṣṇapakṣe ca caturdaśyāṃ vidhūdaye |
avaśyameva karttavyaṃ snānaṃ ca pāpabhīrubhiḥ || 6 ||
[Analyze grammar]

pūrvaviddhā caturdaśyā kārtikasya sitetare |
pakṣe pratyūṣasamaye snānaṃ kuryādataṃdritaḥ || 7 ||
[Analyze grammar]

taile lakṣmīrjale gaṃgā dīpāvalyāṃ caturdaśīm |
prāptaḥ snānaṃ hi yaḥ kuryādyamalokaṃ na paśyati || 8 ||
[Analyze grammar]

apāmārgastathā tuṃbī prapunnāṭaṃ ca vāhvalam |
bhrāmayetsnānamadhye tu narakasya kṣayāya vai || 9 ||
[Analyze grammar]

sītāloṣṭasamāyukta sakaṃṭaka dalānvita |
hara pāpamapāmārga bhrāmyamāṇaḥ punaḥ punaḥ || 10 ||
[Analyze grammar]

apāmārgaṃ prapunnāṭaṃ bhrāmayecchirasopari |
tataśca tarpaṇaṃ kāryaṃ yamarājasya nāmabhiḥ || 11 ||
[Analyze grammar]

yamāya dharmarājāya mṛtyave cāṃtakāya ca |
vaivastāya kālāya sarvabhūtakṣayāya ca || 12 ||
[Analyze grammar]

auduṃbarāya dadhnāya nīlāya parameṣṭhine |
vṛkodarāya citrāya citraguptāya vai namaḥ || 13 ||
[Analyze grammar]

narakāya pradātavyo dīpaḥ saṃpūjya devatāḥ |
tataḥ pradoṣasamaye dīpāndadyānmanoharān || 14 ||
[Analyze grammar]

brahmaviṣṇuśivādīnāṃ bhavaneṣu viśeṣataḥ |
kūṭāgāreṣu caityeṣu sabhāsu ca nadīṣu ca || 15 ||
[Analyze grammar]

prākārodyānavāpīṣu pratolī niṣkuṭeṣu ca |
maṃdurāsu viviktāsu hastiśālāsu caiva hi || 16 ||
[Analyze grammar]

evaṃ prabhātasamaye hyamāvāsyāṃ tu pāvakaṃ |
snātvā devānpitṝnbhaktyā saṃpūjyātha praṇamya ca || 17 ||
[Analyze grammar]

kṛtvā tu pārvaṇaṃ śrāddhaṃ dadhikṣīraghṛtādibhiḥ |
bhojyairnānāvidhairviprānbhojayitvā kṣamāpayet || 18 ||
[Analyze grammar]

tatoparāhṇasamaye poṣayennāgarānpriya |
teṣāṃ goṣṭhīṃ ca mānaṃ ca kṛtvā saṃbhāṣaṇaṃ nṛpaḥ || 19 ||
[Analyze grammar]

vaktṛṇāṃ vatsaraṃ yāvatprītirutpadyate guha |
aprabuddhe harau pūrvaṃ strībhirlakṣmīḥ prabodhayet || 20 ||
[Analyze grammar]

prabodhasamaye lakṣmīṃ bodhayitvā tu sustriyā |
pumānvai vatsaraṃ yāvallakṣmīstaṃ naiva muṃcati || 21 ||
[Analyze grammar]

abhayaṃ prāpya viprebhyo viṣṇubhītā suradviṣaḥ |
suptaṃ kṣīrodadhau jñātvā lakṣmīṃ padmāśritāṃ tathā || 22 ||
[Analyze grammar]

tvaṃ jyotiḥ śrī raviścaṃdro vidyutsauvarṇatārakaḥ |
sarveṣāṃ jyotiṣāṃ jyotirdīpajyotiḥ sthitā tu yā || 23 ||
[Analyze grammar]

yā lakṣmīrdivase puṇye dīpāvalyāṃ ca bhūtale |
gavāṃ goṣṭhe tu kārtikyāṃ sā lakṣmīrvaradā mama || 24 ||
[Analyze grammar]

śaṃkaraśca bhavānī ca krīḍayā dyūtamāsthitau |
bhavānyābhyarcitā lakṣmīrdhenurūpeṇa saṃsthitā || 25 ||
[Analyze grammar]

gauryā jitvā purā śaṃbhurnagno dyūte visarjitaḥ |
ato'yaṃ śaṃkaro duḥkhī gaurī nityaṃ sukhesthitā || 26 ||
[Analyze grammar]

prathamaṃ vijayo yasya tasya saṃvatsaraṃ sukham |
evaṃ gate niśīthe tu jane nidrārdhalocane || 27 ||
[Analyze grammar]

tāvannagaranārībhistūrya ḍiṃḍimavādanaiḥ |
niṣkāsyate prahṛṣṭābhiralakṣmīśca gṛhāṃgaṇāt || 28 ||
[Analyze grammar]

parājaye viruddhaṃ syātpratipadyudite ravau |
prātargovarddhanaḥ pūjyo dyūtaṃ rātrau samācaret || 29 ||
[Analyze grammar]

bhūṣaṇīyāstathā gāvo varjyā vahanadohanāt |
govarddhanadharādhāra gokulatrāṇakāraka || 30 ||
[Analyze grammar]

viṣṇubāhukṛtocchrāya gavāṃ koṭiprado bhava |
yā lakṣmīrlokapālānāṃ dhenurūpeṇa saṃsthitā || 31 ||
[Analyze grammar]

ghṛtaṃ vahati yajñārthe mama pāpaṃ vyapohatu |
agrataḥ saṃtu me gāvo gāvo me saṃtu pṛṣṭhataḥ |
gāvo me hṛdaye saṃtu gavāṃ madhye vasāmyaham || 32 ||
[Analyze grammar]

itigovarddhanapūjā |
sadbhāvenaiva saṃtoṣya devānsatpuruṣānnarān |
itareṣāmannapānairvākyadānena paṃḍitān || 33 ||
[Analyze grammar]

vastraistāṃbūladīpaiśca puṣpakarpūrakuṃkumaiḥ |
bhakṣyairuccāvacairbhojyairaṃtaḥpura nivāsinaḥ || 34 ||
[Analyze grammar]

grāmarṣabhaṃ ca dānaiśca sāmaṃtānnṛpatirdhanaiḥ |
padātijanasaṃghāṃśca graiveyaiḥ kaṭakaiḥ śubhaiḥ || 35 ||
[Analyze grammar]

svānamātyāṃśca tānrājā toṣayetsvajanānpṛthak |
yathārthaṃ toṣayitvā tu tato mallānnaṭāṃstathā || 36 ||
[Analyze grammar]

vṛṣabhāṃśca mahokṣāṃśca yuddhymānānparaiḥ saha |
rājānyāṃścāpi yodhāṃśca padātīnsa samalaṃkṛtān || 37 ||
[Analyze grammar]

maṃcārūḍhaḥ svayaṃ paśyennaṭanartakacāraṇān |
yodhayedvāsayeccaiva gomahiṣyādikaṃ ca yat || 38 ||
[Analyze grammar]

vatsānākarṣayedgobhiruktipratyukti vādanāt |
tatoparāhṇasamaye pūrvasyāṃ diśi pāvake || 39 ||
[Analyze grammar]

mārgapāladyaṃ prabadhnīyāddurgastaṃbhe'tha pādape |
kuśakāśamayīṃ divyāṃ laṃbakairbahubhirguha || 40 ||
[Analyze grammar]

vīkṣayitvā gajānaśvānmārgapālyāstale nayet |
gāvairvṛṣāṃścamahiṣānmahiṣīrghaṃṭikotkaṭāḥ || 41 ||
[Analyze grammar]

kṛtahomairdvijeṃdraistu badhnīyānmārgapālikām |
namaskāraṃ tataḥ kuryānmaṃtreṇānena suvrataḥ || 42 ||
[Analyze grammar]

mārgapāli namastubhyaṃ sarvalokasukhaprade |
mārgapālītale skaṃda yāṃti gāvo mahāvṛṣāḥ || 43 ||
[Analyze grammar]

rājāno rājaputrāśca brāhmaṇāśca viśeṣataḥ |
mārgapāladyaṃ samullaṃghya nirujaḥ sukhino hi te || 44 ||
[Analyze grammar]

kṛtvaitatsarvameveha rātrau daityapaterbaleḥ |
pūjāṃ kuryāttataḥ sākṣādbhūmau maṃḍalake kṛte || 45 ||
[Analyze grammar]

balimālikhya daityeṃdraṃ varṇakaiḥ paṃcaraṃgakaiḥ |
sarvābharaṇasaṃpūrṇaṃ viṃdhyāvalisamanvitam || 46 ||
[Analyze grammar]

kūṣmāṃḍamaya jaṃbhoru madhudānavasaṃvṛtam |
saṃpūrṇaṃ hṛṣṭavadanaṃ kirīṭotkaṭakuṃḍalam || 47 ||
[Analyze grammar]

dvibhujaṃ daityarājānaṃ kārayitvā svake punaḥ |
gṛhasya madhye śālāyāṃ viśālāyāṃ tato'rcayet || 48 ||
[Analyze grammar]

mātṛbhrātṛjanaiḥ sārddhaṃ saṃtuṣṭo baṃdhubhiḥ saha |
kamalaiḥ kumudaiḥ puṣpaiḥ kalhārai raktakotpalaiḥ || 49 ||
[Analyze grammar]

gaṃdhapuṣpānnanaivedyaiḥ sakṣīrairguḍapāyasaiḥ |
madyamāṃsasurālehya coṣya bhakṣyopahārakaiḥ || 50 ||
[Analyze grammar]

maṃtreṇānena rājeṃdra saḥ maṃtrī sapurohitaḥ |
pūjāṃ kariṣyate yo vai saukhyaṃ syāttasya vatsaram || 51 ||
[Analyze grammar]

balirāja namastubhyaṃ virocanasuta prabho |
bhaviṣyeṃdra surārāte pūjeyaṃ pratigṛhyatām || 52 ||
[Analyze grammar]

evaṃ pūjāvidhiṃ kṛtvā rātrau jāgaraṇaṃ tataḥ |
kārayedvai kṣaṇaṃ rātrau naṭanartakagāyakaiḥ || 53 ||
[Analyze grammar]

lokaiścāpi gṛhasyāṃte saparyāṃ śuklataṃḍulaiḥ |
saṃsthāpya balirājānaṃ phalaiḥ puṣpaiśca pūjayet || 54 ||
[Analyze grammar]

balimuddiśya vai tatra kāryaṃ sarvaṃ ca pāvake |
yāni yānyakṣayānyāhu ṛṣayastatvadarśinaḥ || 55 ||
[Analyze grammar]

yadatra dīyate dānaṃ svalpaṃ vā yadi vā bahu |
tadakṣayaṃ bhavetsarvaṃ viṣṇoḥ prītikaraṃ śubham || 56 ||
[Analyze grammar]

rātrau ye na kariṣyaṃti tava pūjāṃ balernarāḥ |
teṣāmaśrotriyaṃ dharmaṃ sarvaṃ tvāmupatiṣṭhatu || 57 ||
[Analyze grammar]

viṣṇunā ca svayaṃ vatsa tuṣṭena balaye punaḥ |
upakārakaraṃ dattamasurāṇāṃ mahotsavam || 58 ||
[Analyze grammar]

tadā prabhṛti senāne pravṛttā kaumudī sadā |
sarvopadravavidrāvā sarvavighnavināśinī || 59 ||
[Analyze grammar]

lokaśokaharā kāmyā dhanapuṣṭisukhāvahā |
kuśabdena mahī jñeyā muda harṣe tato dvayam || 60 ||
[Analyze grammar]

dhātutve nigamaiścaiva tenaiṣā kaumudī smṛtā |
kaumodaṃ te janā yasmānnānābhāvaiḥ parasparam || 61 ||
[Analyze grammar]

hṛṣṭatuṣṭāḥ sukhāpannāstenaiṣā kaumudī smṛtā |
kumudāni baleryasyāṃ dīyaṃte tena ṣaṇmukha || 62 ||
[Analyze grammar]

aghārthaṃ pārthivaiḥ putra tenaiṣā kaumudī smṛtā |
ekamevamahorātraṃ varṣevarṣe ca kārtike || 63 ||
[Analyze grammar]

dattaṃ dānavarājasya ādarśamiva bhūtala |
yaḥ karoti nṛpo rājye tasya vyādhibhayaṃ kutaḥ || 64 ||
[Analyze grammar]

subhikṣaṃ kṣemamārogyaṃ tasya saṃpadanuttamā |
nīrujaśca janāḥ sarve sarvopadravavarjitāḥ || 65 ||
[Analyze grammar]

kaumudī kriyate tasmādbhāvaṃ kartuṃ mahītale |
yo yādṛśena bhāvena tiṣṭhatyasyāṃ ca ṣaṇmukha || 66 ||
[Analyze grammar]

harṣaduḥkhādibhāvena tasya varṣaṃ prayāti hi |
rudite rodate varṣaṃ hṛṣṭe varṣaṃ praharṣitam || 67 ||
[Analyze grammar]

bhukte bhoktā bhavedvarṣaṃ svasthe svasthaṃ bhaviṣyati |
tasmātprahṛṣṭaiḥ karttavyā kaumudī ca śubhairnaraiḥ || 68 ||
[Analyze grammar]

vaiṣṇavī dānavī ceyaṃ tithiḥ proktā ca kārtike || 69 ||
[Analyze grammar]

dīpotsavaṃjanita sarvajanaprasādaṃ kurvaṃti ye śubhatayā balirājapūjām |
dānopabhogasukhabuddhimatāṃ kulānāṃ harṣaṃ prayāti sakalaṃ prabhudaṃ ca varṣam || 70 ||
[Analyze grammar]

skaṃdaitāstithayo nūnaṃ dvitīyādyāśca viśrutāḥ |
māsaiścaturbhiśca tataḥprāvṛṭkāle śubhāvahāḥ || 71 ||
[Analyze grammar]

prathamā śrāvaṇe māsi tathā bhādrapade parā |
tṛtīyāśvayujemāsi caturthī kārtike bhavet || 72 ||
[Analyze grammar]

kaluṣā śrāvaṇe māsi tathā bhādrapademalā |
āśvine pretasaṃcārā kārtike yāmyakāmatā || 73 ||
[Analyze grammar]

guha uvāca |
kasmātsā kaluṣā proktā kasmātsā nirmalā matā |
kasmātsā pretasaṃcārā kasmādyāmyā prakīrtitā || 74 ||
[Analyze grammar]

sūta uvāca |
iti skaṃdavacaḥ śrutvā bhagavānbhūtabhāvanaḥ |
uvāca vacanaṃ ślakṣṇaṃ prahasanvṛṣabhadhvajaḥ || 75 ||
[Analyze grammar]

maheśa uvāca |
purā vṛtravadhe vṛtte prāpte rājye puraṃdare |
brahmahatyāpanodārthamaśvamedhaḥ pravartitaḥ || 76 ||
[Analyze grammar]

krodhādiṃdreṇa vajreṇa brahmahatyā niṣūditā |
ṣaḍvidhā sā kṣitau kṣiptā vṛkṣatoyamahītale || 77 ||
[Analyze grammar]

nāryāṃ bhrūṇahaṇivahnau saṃvibhajya yathākramam |
tatpāpaśravaṇātpūrvaṃ dvitīyāyā dinena ca || 78 ||
[Analyze grammar]

nārīvṛkṣanadībhūmivahnibhrūṇahanastathā |
kaluṣībhavanaṃ jāto hyatorthaṃ kaluṣā smṛtā || 79 ||
[Analyze grammar]

madhukaiṭabhayo rakte purā magnānu medinī |
aṣṭāṃgulā pavitrā sā nārīṇāṃ tu rajomalam || 80 ||
[Analyze grammar]

nadyaḥ prāvṛṇmalā sarvā vahnirūrdhvaṃ maṣīmalaḥ |
niryāsamalinā vṛkṣāḥ saṃgādbhrūṇahano malāḥ || 81 ||
[Analyze grammar]

kaluṣāni caraṃtyasyāṃ tenaiṣā kaluṣā matā |
devarṣipitṛdharmāṇāṃ niṃdakā nāstikāḥ śaṭhāḥ || 82 ||
[Analyze grammar]

teṣāṃ sā vāṅmalātpūtā dvitīyā tena nirmalā |
anadhyāyeṣu śāstrāṇi pāṭhayaṃti paṭhaṃti ca || 83 ||
[Analyze grammar]

sāṃkhyakāstārkikāḥ śrautāsteṣāṃ śabdāpaśabdajāt |
malātpūtā dvitīyāyāṃ tatorthe nirmalā ca sā || 84 ||
[Analyze grammar]

kṛṣṇasya janmanā vatsa trailokyaṃ pāvitaṃ bhavet |
nabhasyete vinirdiṣṭā nirmalā sā tithirbudhaiḥ || 85 ||
[Analyze grammar]

agniṣvāttā barhiṣada ājyapāḥ somapāstathā |
pitṝnpitāmahānpretasaṃcārātpretasaṃcarā || 86 ||
[Analyze grammar]

pretāstu pitaraḥ proktāsteṣāṃ tasyāṃ tu saṃcaraḥ |
putrapautrestudauhitraiḥ svadhāmaṃtraistu pūjitāḥ || 87 ||
[Analyze grammar]

śrāddhadānamakhaistṛptā yāṃtyataḥ pretasaṃcarā |
mahālaye tu pretānāṃ saṃcāro bhuvi dṛśyate || 88 ||
[Analyze grammar]

tenaiṣā pretasaṃcārā kīrtitā śikhivāhana |
yamasya kriyate pūjā yato'syā pāvake naraiḥ || 89 ||
[Analyze grammar]

tenaiṣā yāmyakā proktā satyaṃ satyaṃ mayoditam |
etatkārtikamāhātmyaṃ ye śṛṇvaṃti narottamāḥ || 90 ||
[Analyze grammar]

kārtikasnānajaṃ puṇyaṃ teṣāṃ bhavati niścitam || 91 ||
[Analyze grammar]

kārtike ca dvitīyāyāṃ pūrvāhṇe yamamarcayet |
bhānujāyāṃ naraḥ snātvā yamalokaṃ na paśyati || 92 ||
[Analyze grammar]

kārtike śuklapakṣe tu dvitīyāyāṃ tu śaunaka |
yamo yamunayā pūrvaṃ bhojitaḥ svagṛhe'citaḥ || 93 ||
[Analyze grammar]

dvitīyāyāṃ mahotsargo nārakīyāśca tarpitāḥ |
pāpebhyo viprayuktāste muktāḥ sarvanibaṃdhanāt || 94 ||
[Analyze grammar]

āśaṃsitāśca saṃtuṣṭāḥ sthitāḥ sarve yadṛcchayā |
teṣāṃ mahotsavo vṛtto yamarāṣṭrasukhāvahaḥ || 95 ||
[Analyze grammar]

ato yamadvitīyeyaṃ triṣulokeṣu viśrutā |
tasmānnijagṛhe vipra na bhoktavyaṃ tato budhaiḥ || 96 ||
[Analyze grammar]

snehena bhaginīhastādbhoktavyaṃ puṣṭivarddhanaṃ |
dānāni ca pradeyāni bhaginībhyo vidhānataḥ || 97 ||
[Analyze grammar]

svarṇālaṃkāravastrāṇi pūjāsatkārasaṃyutam |
bhoktavyaṃ saha jāyāśca bhaginyāhastataḥ param || 98 ||
[Analyze grammar]

sarvāsu bhaginīhastādbhoktavyaṃ balavarddhanam |
ūrje śukladvitīyāyāṃ pūjitastarpito yamaḥ || 99 ||
[Analyze grammar]

mahiṣāsanamārūḍho daṃḍamudgarabhṛtprabhuḥ |
veṣṭitaḥ kiṃkaraihṛṣṭaistasmai yāmyātmane namaḥ || 100 ||
[Analyze grammar]

yairbhaginyaḥ suvāsinyo vastradānādi toṣitāḥ |
na teṣāṃ vatsaraṃ yāvatkalaho na riporbhayam || 101 ||
[Analyze grammar]

dhanyaṃ yaśasyamāyuṣyaṃ dharmakāmārthasādhanam |
vyākhyātaṃ sakalaṃ putra sarahasyaṃ mayānagha || 102 ||
[Analyze grammar]

yasyāṃ tithau yamunayā yamarājadevaḥ saṃbhojitaḥ pratitithau svasṛsauhṛdena |
tasmātsvasuḥ karatalādiha yo bhunakti prāpnoti vittaśubhasaṃpadamuttamāṃ saḥ || 103 ||
[Analyze grammar]

iti śrīpādmemahāpurāṇe paṃcapaṃcāśatsasahasrasaṃhitāyāmuttarakhaṃḍe kārtikamāhātmye |
dvāviṃśatyadhikaśatatamo'dhyāyaḥ || 122 ||
[Analyze grammar]