Chapter 66

[English text for this chapter is available]

nāradauvāca |
yamasyārādhanaṃ brūhi maddhitārthaṃ surottama |
kathaṃ na gamyate deva nareṇa narakāṃtare || 1 ||
[Analyze grammar]

śrūyate yamaloke tu sadā vaitaraṇī nadī |
anādhṛṣyātvapārā ca dustarā bahuśoṇitā || 2 ||
[Analyze grammar]

dustarā sarvabhūtānāṃ sā kathaṃ sutarā bhavet |
bhayametanmahādeva yamalokaṃ prati prabho || 3 ||
[Analyze grammar]

tasya nirmocanārthāya brūhi kṛtyamaśeṣataḥ |
bhagavandevadeveśa kṛpāṃ kṛtvā mamopari || 4 ||
[Analyze grammar]

mahādeva uvāca |
dvāravatyāṃ purā vipra snāto'haṃ lavaṇāṃbhasi |
dadṛśe munimāyāṃtaṃ mudgalaṃ nāma vāḍava || 5 ||
[Analyze grammar]

jvalaṃtamivacādityaṃ tapasā dyotatāṃgakam |
māṃ praṇamya muniḥ prāha mudgalo vismayānvitaḥ || 6 ||
[Analyze grammar]

mudgala uvāca |
akasmānmūrcchito deva patito'smi dharātale |
prajvalaṃti mamāṃgāni gṛhīto yamakiṃkaraiḥ || 7 ||
[Analyze grammar]

balādākṛṣyamāṇo'haṃ puruṣaoṃguṣṭhamātrakaḥ |
baddho yamabhaṭairgāḍhaṃ nīto'smi śamanāṃtikam || 8 ||
[Analyze grammar]

kṣaṇātsabhāyāṃ paśyāmi yamaṃ piṃgalalocanam |
kṛṣṇamukhaṃ mahāraudraṃ mṛtyuvyādhiśatānvitam || 9 ||
[Analyze grammar]

vātapitta śleṣmadoṣairmūrtimadbhistu sevitam |
kāyaśoṣajvarātaṃka sphoṭikā lūtakādibhiḥ || 10 ||
[Analyze grammar]

jvālāṃgamardaśīrṣārti bhagaṃdara balakṣayaiḥ |
kaṃṭhamālākṣirogaiśca mūtrakṛcchrajvaravraṇaiḥ || 11 ||
[Analyze grammar]

vimūrcchikā galagrāha hṛdrogairbhūtataskaraiḥ |
itthaṃ bahuvidhai raudrairnānārūpairbhayaṃkaraiḥ || 12 ||
[Analyze grammar]

kapālaśirohastaiśca saṃgrāme narake tathā |
rākṣasairdānavairghorairupaviṣṭaiḥ puraḥ sthitaiḥ || 13 ||
[Analyze grammar]

dharmādhikāribhiścātra citraguptādi lekhakaiḥ |
vyāghra siṃha varāhaiśca śikhāsarpaiḥ sudurddharaiḥ || 14 ||
[Analyze grammar]

vṛścikairdaṃṣṭribhirbhūtaiḥ kīṭakairmatkuṇādibhiḥ |
vṛka citrādi śunakaiḥ kaṃkairgṛdhraiśca jaṃbukaiḥ || 15 ||
[Analyze grammar]

taskarairbhūtadāridrairmāribhirḍākinīgrahaiḥ |
muktakeśaiḥ śvāsakāsairbhrukuṭī kuṭilānanaiḥ || 16 ||
[Analyze grammar]

bṛhatpratāpairnobhītaiḥ śāsakaiḥ pāpakarmaṇām |
yamaḥ sabhāyāṃ śuśubhe sevyamānaḥ parigrahaiḥ || 17 ||
[Analyze grammar]

bhīmāṭavikajīvaiśca yathā vyālāṃjano giriḥ |
tato viśveśvaraḥ prāha samayaḥ kiṃkarānprati || 18 ||
[Analyze grammar]

nāmabhrāṃtairbhavadbhiśca samānītaḥ kathaṃ muniḥ |
bhīmakasyātmajo grāme kauṃḍinye mudgalābhidhaḥ || 19 ||
[Analyze grammar]

kṣīṇāyuḥ kṣatriyaḥ so'sti āneyo mucyatāmasau |
śrutvaitatte gatāstasmādāyātāḥ punareva te || 20 ||
[Analyze grammar]

dharmarājaṃ punaḥ prāhuḥ sarve te yamakiṃkarāḥ |
tatrāsmābhirgatairdehī kṣīṇāyurnopalakṣitaḥ || 21 ||
[Analyze grammar]

yama uvāca |
kiṃ kāraṇamadṛśyāste prāyeṇa bhavatāṃ narāḥ |
sukṛtā dvādaśīyaistu khyātā vaitaraṇī nadī || 22 ||
[Analyze grammar]

ujjayinyāṃ prayāge vā yamunāyāṃ ca ye mṛtāḥ |
tilahastihiraṇyādi dattaṃ yaistu gavāhnikam || 23 ||
[Analyze grammar]

dūtā ūcuḥ |
tadvrataṃ kīdṛśaṃ brahmanbrūhi sarvamaśeṣataḥ |
kiṃ tatra deva karttavyaṃ puruṣaistavatoṣadam || 24 ||
[Analyze grammar]

yena kṛtā naraśreṣṭha dvādaśī kṛṣṇapakṣajā |
upavāse ca tenaiva kathaṃ pāpātpramucyate || 25 ||
[Analyze grammar]

tadvrataṃ kena vidhinā karttavyaṃ ca yathā vada |
suprasannena vaktavyaṃ dayāṃ kṛtvā dayānidhe || 26 ||
[Analyze grammar]

śrīmudgala uvāca |
dūtānāṃ vacanaṃ śrutvā uvāca madhuraṃ tadā |
sarvaṃ vadāmi bho dūtā yathādṛṣṭaṃ yathāśrutam || 27 ||
[Analyze grammar]

yama uvāca |
mārgaśīrṣādi māse tu yā imāḥ kṛṣṇapakṣajāḥ |
tāsu pūrvāsu vidhivaddūtā vaitaraṇīvratam || 28 ||
[Analyze grammar]

pratimāsaṃ ca karttavyaṃ yāvadvarṣaṃ bhaveddhruvam |
yāṃ tu kṛtvā tu bho dūtā mucyate nātra saṃśayaḥ || 29 ||
[Analyze grammar]

upavāsasya niyamaḥ karttavyo viṣṇu tuṣṭidaḥ |
adya me devadeveśa upavāso bhaviṣyati || 30 ||
[Analyze grammar]

dvādaśyāṃ pūjya goviṃdaṃ bhaktibhāvasamanvitam |
svapneṃdriyasya vaikalyādbhojanaṃ yacca maithunam || 31 ||
[Analyze grammar]

tatsarvaṃ kṣama me deva kṛpāṃ kṛtvā mamopari |
evaṃ vai niyamaṃ kṛtvā madhyāhne tīrthamāvrajet || 32 ||
[Analyze grammar]

mṛdgomaya tilānnītvā gaṃtavyaṃ vidhipūrvakam |
snānaṃ tatra prakartavyaṃ vratasaṃpūrṇahetave || 33 ||
[Analyze grammar]

aśvakrāṃteti maṃtreṇa snānaṃ kuryādviśeṣataḥ |
aśvakrāṃte rathakrāṃte viṣṇukrāṃte vasuṃdhare || 34 ||
[Analyze grammar]

mṛttike hara me pāpaṃ yanmayā pūrvasaṃcitam |
tayā hatena pāpena sarvapāpaiḥ pramucyate || 35 ||
[Analyze grammar]

kāśyāṃ caiva tu saṃbhūtāstilā vai viṣṇurūpiṇaḥ |
tilasnānena goviṃdaḥ sarvaṃ pāpaṃ vyapohati || 36 ||
[Analyze grammar]

viṣṇudehodbhavā devi mahāpāpāpahāriṇī |
sarvaṃ pāpaṃ hara tvaṃ vai sarveṣāṃ hi namo'stu te || 37 ||
[Analyze grammar]

tulasīpatrakaṃ dhṛtvā nāmoccāraṇapūrvakam |
snānaṃ sukṛtibhiḥ proktaṃ kartavyaṃ vidhipūrvakam || 38 ||
[Analyze grammar]

evaṃ snātvā samuttīrya paridhāya suvāsasī |
tarpayitvā pitṝndevāṃstato viṣṇostu pūjanam || 39 ||
[Analyze grammar]

saṃsthāpya cāvraṇaṃ kuṃbhaṃ paṃcapallavasaṃyutam |
paṃcaratnasamopetaṃ divyasraggaṃdhavāsitam || 40 ||
[Analyze grammar]

jalapūrṇaṃ sadravyaṃca tāmrapātrasamanvitam |
tatrasthaṃ śrīdharaṃ devaṃ devadevaṃ taponidhim || 41 ||
[Analyze grammar]

pūrṇena vidhinā rājankuryātpūjāṃ garīyasīm |
mṛdgomayādiracitaṃ maṃḍalaṃ kārayecchubham || 42 ||
[Analyze grammar]

taṃḍulaiḥ śukladhautaiśca aśmapiṣṭaiśca kārayet |
dharmarājaḥ prakarttavyo hastādyava yavānvitaḥ || 43 ||
[Analyze grammar]

nadīṃ vaitaraṇīṃ tāmrāṃ sthāpayitvā tadagrataḥ |
pūjayecca pṛthaksamyaksamāvāhanapūrvakam || 44 ||
[Analyze grammar]

āvāhayāmi deveśaṃ yamaṃ vai viśvarūpiṇam |
ihābhyehi mahābhāga sānnidhyaṃ kuru keśava || 45 ||
[Analyze grammar]

idaṃ pādyaṃ śriyaḥ kāṃta sopaviṣṭaṃ hare prabho |
viśvodyānarato nityaṃ kṛpāṃ kuru mamopari || 46 ||
[Analyze grammar]

bhūtidāya namaḥ pādāvaśokāya ca jānunī |
urū namaḥ śivāyeti viśvamūrte namaḥ kaṭim || 47 ||
[Analyze grammar]

kaṃdarpāya namo meḍhramādityāya phalaṃ tathā |
dāmodarāya jaṭharaṃ vāsudevāya vai stanau || 48 ||
[Analyze grammar]

śrīdharāya mukhaṃ keśānkeśavāyeti vai namaḥ |
pṛṣṭhaṃ śārṅgadharāyeti caraṇau varadāya ca || 49 ||
[Analyze grammar]

svanāmnā śaṃkhacakrāsigadāparaśupāṇaye |
sarvātmane namastubhyaṃ śira ityabhidhīyate || 50 ||
[Analyze grammar]

matsyaṃ kūrmaṃ ca vārāhaṃ nārasiṃhaṃ ca vāmanam |
rāmaṃ rāmaṃ ca kṛṣṇaṃ ca budhaṃ kalkiṃ namo'stu te || 51 ||
[Analyze grammar]

sarvapāpaughanāśārthaṃ pūjayāmi namo namaḥ |
ebhiśca sarvaśo maṃtrairviṣṇuṃ dhyātvā prapūjayet || 52 ||
[Analyze grammar]

dharmarāja namaste'stu dharmarāja namo'stu te |
dakṣiṇāśāpate tubhyaṃ namo mahiṣavāhana || 53 ||
[Analyze grammar]

citragupta namastubhyaṃ vicitrāya namonamaḥ |
narakārtipraśāṃtyarthaṃ kāmānyaccha mamepsitān || 54 ||
[Analyze grammar]

yamāya dharmarājāya mṛtyave cāṃtakāya ca |
vaivasvatāya kālāya sarvabhūtakṣayāya ca || 55 ||
[Analyze grammar]

vṛkodarāya citrāya citraguptāya vai namaḥ |
nīlāya caiva dadhnāya nityaṃ kuryānnamo namaḥ || 56 ||
[Analyze grammar]

evaṃ dvādaśabhiḥ pūjyo nāmabhirdharmarāṭprabhuḥ |
vaitaraṇī suduḥpāre pāpaghni sarvakāmade || 57 ||
[Analyze grammar]

ihābhyehi mahābhāge gṛhāṇārghaṃ mayā kṛtam |
yamadvārapathe ghore khyātā vaitaraṇī nadī || 58 ||
[Analyze grammar]

tasyāmuddharaṇārthāya janmamṛtyujarātigā |
yā dustarā duṣkṛtibhiḥ sarvaprāṇibhayāpahā || 59 ||
[Analyze grammar]

yasyāṃ bhayātpramajjaṃti prāṇino yātanāparāḥ |
tartukāmastu tāṃ ghoraṃ jayā devi namonamaḥ || 60 ||
[Analyze grammar]

tasyāṃ devādhitiṣṭhaṃti yā sā vaitaraṇī nadī |
sā cāpi pūjitā bhaktyā prītyarthaṃ keśavasya ca || 61 ||
[Analyze grammar]

yasyāstaṭe praviśaṃti ṛṣayaḥ pitarastathā |
sā cāpi siṃdhurūpeṇa pūjitā pāpahārikā || 62 ||
[Analyze grammar]

tarītuṃ tāṃ pradāsyāmi sarvapāpavimuktaye |
puṇyārthaṃ saṃpravakṣyāmi tubhyaṃ vaitaraṇī nadīm || 63 ||
[Analyze grammar]

mayāsi pūjitā bhaktyā prītyarthaṃ keśavasya ca |
kṛṣṇakṛṣṇajagannātha saṃsārāduddharasva mām || 64 ||
[Analyze grammar]

nāmagrahaṇamātreṇa sarvaṃ pāpaṃ harasva me |
yajñopavītaṃ paramaṃ kāritaṃ navataṃtubhiḥ || 65 ||
[Analyze grammar]

pratigṛhṇīṣva deveśa prīto yaccha mamepsitam |
idaṃ tava ca tāṃbūlaṃ yathāśaktyā suśobhanam || 66 ||
[Analyze grammar]

pratigṛhṇīṣva deveśa māmuddhara bhavārṇavāt |
paṃcavartī pradīpo'yaṃ deveśārārtikaṃ tava || 67 ||
[Analyze grammar]

mohāṃdhakāradyumaṇe bhaktiyukto bhavārtihṛt |
paramānnaṃ supakvānnaṃ samastarasasaṃyutam || 68 ||
[Analyze grammar]

niveditaṃ mayā bhaktyā bhagavanpratigṛhyatām |
dvādaśākṣaramaṃtreṇa yathāsaṃkhya japena ca || 69 ||
[Analyze grammar]

prīyatāṃ me śriyaḥkāṃtaḥ prīto yacchatu vāṃchitam |
paṃca gāvaḥ samutpannā mathyamāne mahodadhau || 70 ||
[Analyze grammar]

tāsāṃ madhye tu yā naṃdā tasyai dhenvai namonamaḥ |
gāṃ saṃpūjya vidhānena arghyaṃ dadyātsamāhitaḥ || 71 ||
[Analyze grammar]

sarvakāmadughe devi sarvāṃtakanivāriṇī |
ārogyaṃ saṃtatiṃ dīrghāṃ dehi naṃdini me sadā || 72 ||
[Analyze grammar]

pūjitā ca vasiṣṭhena viśvāmitreṇa dhīmatā |
kapile hara me pāpaṃ yanmayā pūrvasaṃcitam || 73 ||
[Analyze grammar]

gāvo mamāgrataḥ saṃtu gāvo me saṃtu pṛṣṭhataḥ |
nāke māmupatiṣṭhaṃtu hemaśṛṃgī payomucaḥ || 74 ||
[Analyze grammar]

surabhyaḥ saurabheyāśca saritaḥ sāgarā yathā |
sarvadevamaye devi subhadre bhaktavatsale || 75 ||
[Analyze grammar]

evaṃ saṃpūjya vidhivaddadyādgoṣu gavāhnikam |
saurabheyaḥ sarvahitāḥ pavitrāḥ pāpanāśanāḥ || 76 ||
[Analyze grammar]

pratigṛhṇaṃtu me grāsaṃ gāvastrailokyamātaraḥ |
gaṃgadāyai namo bhūtyai sarvapāpaprahāṇaye || 77 ||
[Analyze grammar]

anenaiva tu maṃtreṇa gadāṃ vaidhārayedbudhaḥ |
paṃ namaḥ padmanābhāya padmaṃ vai dhārayetsudhīḥ || 78 ||
[Analyze grammar]

caṃ cakrarūpiṇe viṣṇo dhāraṇaṃ cakrajaṃ smṛtam |
śaṃ śaṃkharūpiṇe tubhyaṃ namo'stu sukhakāriṇe || 79 ||
[Analyze grammar]

maṃtreṇānena vai dūtā dhāraṇaṃ śaṃkhajaṃ smṛtam |
caturṇāmāyudhānāṃ tu dhāraṇaṃ munibhiḥ smṛtam || 80 ||
[Analyze grammar]

agnihotraṃ yathā nityaṃ vedasyādhyayanaṃ tathā |
brāhmaṇasya tathaivedaṃ taptamudrādi dhāraṇam || 81 ||
[Analyze grammar]

caṃdanena sugaṃdhena gopikācaṃdanena tu |
dhāraṇaṃ ca viśeṣeṇa brāhmaṇairvedapāragaiḥ || 82 ||
[Analyze grammar]

cāṃḍālo'pi bhavecchuddho dhāraṇācca na saṃśayaḥ |
ūrdhvaṃ puṃḍramṛjuṃ saumyaṃ sacihnaṃ dhārayedyadi || 83 ||
[Analyze grammar]

sa cāṃḍālo'pi śuddhātmā pūjya eva sadā dvijaiḥ |
cāṃḍālānāṃ gṛhe dūtāstulasī yatra dṛśyate || 84 ||
[Analyze grammar]

tatratyā tulasī grāhyā bhaktibhāvena cetasā || 85 ||
[Analyze grammar]

iti śrīpādme mahāpurāṇe uttarakhaṃḍe paṃcapaṃcāśatsāhasryāṃsaṃhitāyāmumāpatināradasaṃvāde yamārādhanaṃ nāma ṣaṭṣaṣṭitamo'dhyāyaḥ || 66 ||
[Analyze grammar]