Chapter 30

baḍivijñānaprāptirnāma sargaḥ |
triṃśaḥ sargaḥ |
vasiṣṭhaḥ |
athemamaparaṃ rāma vijñānādhigame kramam |
śṛṇu daityeśvaraḥ siddhaḥ prahlādaḥ svātmanā yathā || 1 ||
[Analyze grammar]

āsītpātālajaṭhare vidrāvitasuro'suraḥ |
hiraṇyakaśipurnāma nārāyaṇaparākramaḥ || 2 ||
[Analyze grammar]

ākrāntabhuvanābhogaḥ sa jahāra harerjagat |
ṣaṭpadasya bṛhatpattraṃ rājahaṃsa ivāmbujam || 3 ||
[Analyze grammar]

cakāra jagatāṃ rājyaṃ samākrāntasurāsuraḥ |
dantī nirastahaṃsaugho nalinyāmalināmiva || 4 ||
[Analyze grammar]

athāsāvasurādhīśaḥ kurvaṃstribhuvaneśatām |
kālena suṣuve putrānaṅkurāniva mādhavaḥ || 5 ||
[Analyze grammar]

te'vardhantācireṇaiva tejastarjitatārakāḥ |
daśārkāṃśuśatānīva vyomākrāntivilāsinaḥ || 6 ||
[Analyze grammar]

prahlādo nāma bhagavānpradhānātmā babhūva ha |
teṣāṃ madhye mahārhāṇāṃ maṇīnāmiva kaustubhaḥ || 7 ||
[Analyze grammar]

tenārājata putreṇa hiraṇyakaśipurbhṛśam |
sarvasaundaryayuktena vasanteneva vatsaraḥ || 8 ||
[Analyze grammar]

atha putrasahāyo'sau balakośasamanvitaḥ |
ājagāma madaṃ daityastrigaṇḍagalitebhavat || 9 ||
[Analyze grammar]

tatāpākrāntitāpena trijaganti vikāsinā |
kalpāntasūryagaṇavannavayaiva karaśriyā || 10 ||
[Analyze grammar]

akhidyantāsya tenātha sūryendupramukhāḥ surāḥ |
durvilāsavilolasya bālasyeva svabandhavaḥ || 11 ||
[Analyze grammar]

te'rthayāṃ cakrire śauriṃ daityendrebhapatervadhe |
na kṣamante mahānto'pi paunaḥpuṇyena duṣkriyām || 12 ||
[Analyze grammar]

tataḥ pralayaparyastajagadghargharajṛmbhitam |
digdantidaśanaprakhyanakhavajrāśrisūmbhitam || 13 ||
[Analyze grammar]

sthiravidyullatājālabhāsurordhvajamaṇḍalam |
daśadikkoṭarodvāntajvalajjvalanakuṇḍalam || 14 ||
[Analyze grammar]

samastakulaśailendrapiṇḍapīṭhodbhaṭodaram |
dordrumādhūnanoddhūtasphuṭadbrahmāṇḍakarparam || 15 ||
[Analyze grammar]

vadanodaraniṣkrāntavātotsāritaparvataṃ |
trijagaddahanodyuktakopakalpāgnigarvitam || 16 ||
[Analyze grammar]

saṭāvikaṭapīnāṃsaspandapreritabhāskaram |
romakūpalasadvahnipuñjapiñjaraparvatam || 17 ||
[Analyze grammar]

kulācalamahākuḍyakuṭṭanodbhaṭadṛkpuṭam |
sarvāvayavaniṣṭhyūtapaṭṭisaprāsatomaram || 18 ||
[Analyze grammar]

nārasiṃhaṃ vapuḥ kṛtvā mādhavo'hanmahāsuram |
lasatkaṭakaṭārāvaṃ turaṅgamamiva dvipaḥ || 19 ||
[Analyze grammar]

puramāsuramudvāntairdadāhekṣaṇavahnibhiḥ |
sasarvabhūtaṃ kalpānte jagajjālamivānalaḥ || 20 ||
[Analyze grammar]

nṛsiṃhamārute tasminbhṛśaṃ kṣobhamupāgate |
visphūrjati ghanāsphoṭairekārṇava ivākule || 21 ||
[Analyze grammar]

dudruvurdānavaughāste dikṣvalaṃ maṣakā iva |
upāyayuradṛśyatvaṃ dīpā iva gatatviṣaḥ || 22 ||
[Analyze grammar]

atha vidrutadaityendraṃ dagdhāntaḥpuramaṇḍalam |
babhūva pātālatalaṃ kalpakṣuṇṇajagatsamam || 23 ||
[Analyze grammar]

akālakalpāntavidhau śanaiḥ praśamite vibhau |
kvāpi yāte samāśvastasurasaṃrambhapūjite || 24 ||
[Analyze grammar]

mṛtaśiṣṭā danusutāḥ prahlādaparipālitāḥ |
dagdhaṃ svaṃ deśamājagmuḥ saraśśuṣkamivāṇḍajāḥ || 25 ||
[Analyze grammar]

tatra kālocitāṃ kṛtvā svanāśaparidevanām |
aurdhvadaihikasatkāraṃ cakruḥ prabhuṣu bandhuṣu || 26 ||
[Analyze grammar]

hṛtabandījanaṃ pluṣṭabandhubāndhavamaṇḍalam |
śanairāśvāsayāmāsurmṛtaśiṣṭaṃ svakaṃ janam || 27 ||
[Analyze grammar]

citrārpitopamadurākṛtayo nirīhā dīnāśayā himahatāmburuhopamānāḥ |
śokopataptamanaso'suranāyakāste dagdhadrumā iva nirastavikāsamāsan || 28 ||
[Analyze grammar]