Chapter 40

vaiśaṃpāyana uvāca |
gateṣu teṣu sarveṣu tapasviṣu mahātmasu |
pinākapāṇirbhagavānsarvapāpaharo haraḥ || 1 ||
[Analyze grammar]

kairātaṃ veṣamāsthāya kāñcanadrumasaṃnibham |
vibhrājamāno vapuṣā girirmerurivāparaḥ || 2 ||
[Analyze grammar]

śrīmaddhanurupādāya śarāṃścāśīviṣopamān |
niṣpapāta mahārciṣmāndahankakṣamivānalaḥ || 3 ||
[Analyze grammar]

devyā sahomayā śrīmānsamānavrataveṣayā |
nānāveṣadharairhṛṣṭairbhūtairanugatastadā || 4 ||
[Analyze grammar]

kirātaveṣapracchannaḥ strībhiścānu sahasraśaḥ |
aśobhata tadā rājansa devo'tīva bhārata || 5 ||
[Analyze grammar]

kṣaṇena tadvanaṃ sarvaṃ niḥśabdamabhavattadā |
nādaḥ prasravaṇānāṃ ca pakṣiṇāṃ cāpyupāramat || 6 ||
[Analyze grammar]

sa saṃnikarṣamāgamya pārthasyākliṣṭakarmaṇaḥ |
mūkaṃ nāma diteḥ putraṃ dadarśādbhutadarśanam || 7 ||
[Analyze grammar]

vārāhaṃ rūpamāsthāya tarkayantamivārjunam |
hantuṃ paramaduṣṭātmā tamuvācātha phalgunaḥ || 8 ||
[Analyze grammar]

gāṇḍīvaṃ dhanurādāya śarāṃścāśīviṣopamān |
sajyaṃ dhanurvaraṃ kṛtvā jyāghoṣeṇa ninādayan || 9 ||
[Analyze grammar]

yanmāṃ prārthayase hantumanāgasamihāgatam |
tasmāttvāṃ pūrvamevāhaṃ neṣyāmi yamasādanam || 10 ||
[Analyze grammar]

taṃ dṛṣṭvā prahariṣyantaṃ phalgunaṃ dṛḍhadhanvinam |
kirātarūpī sahasā vārayāmāsa śaṃkaraḥ || 11 ||
[Analyze grammar]

mayaiṣa prārthitaḥ pūrvaṃ nīlameghasamaprabhaḥ |
anādṛtyaiva tadvākyaṃ prajahārātha phalgunaḥ || 12 ||
[Analyze grammar]

kirātaśca samaṃ tasminnekalakṣye mahādyutiḥ |
pramumocāśaniprakhyaṃ śaramagniśikhopamam || 13 ||
[Analyze grammar]

tau muktau sāyakau tābhyāṃ samaṃ tatra nipetatuḥ |
mūkasya gātre vistīrṇe śailasaṃhanane tadā || 14 ||
[Analyze grammar]

yathāśaniviniṣpeṣo vajrasyeva ca parvate |
tathā tayoḥ saṃnipātaḥ śarayorabhavattadā || 15 ||
[Analyze grammar]

sa viddho bahubhirbāṇairdīptāsyaiḥ pannagairiva |
mamāra rākṣasaṃ rūpaṃ bhūyaḥ kṛtvā vibhīṣaṇam || 16 ||
[Analyze grammar]

dadarśātha tato jiṣṇuḥ puruṣaṃ kāñcanaprabham |
kirātaveṣapracchannaṃ strīsahāyamamitrahā |
tamabravītprītamanāḥ kaunteyaḥ prahasanniva || 17 ||
[Analyze grammar]

ko bhavānaṭate śūnye vane strīgaṇasaṃvṛtaḥ |
na tvamasminvane ghore bibheṣi kanakaprabha || 18 ||
[Analyze grammar]

kimarthaṃ ca tvayā viddho mṛgo'yaṃ matparigrahaḥ |
mayābhipannaḥ pūrvaṃ hi rākṣaso'yamihāgataḥ || 19 ||
[Analyze grammar]

kāmātparibhavādvāpi na me jīvanvimokṣyase |
na hyeṣa mṛgayādharmo yastvayādya kṛto mayi |
tena tvāṃ bhraṃśayiṣyāmi jīvitātparvatāśraya || 20 ||
[Analyze grammar]

ityuktaḥ pāṇḍaveyena kirātaḥ prahasanniva |
uvāca ślakṣṇayā vācā pāṇḍavaṃ savyasācinam || 21 ||
[Analyze grammar]

mamaivāyaṃ lakṣyabhūtaḥ pūrvameva parigrahaḥ |
mamaiva ca prahāreṇa jīvitādvyavaropitaḥ || 22 ||
[Analyze grammar]

doṣānsvānnārhase'nyasmai vaktuṃ svabaladarpitaḥ |
abhiṣakto'smi mandātmanna me jīvanvimokṣyase || 23 ||
[Analyze grammar]

sthiro bhavasva mokṣyāmi sāyakānaśanīniva |
ghaṭasva parayā śaktyā muñca tvamapi sāyakān || 24 ||
[Analyze grammar]

tatastau tatra saṃrabdhau garjamānau muhurmuhuḥ |
śarairāśīviṣākāraistatakṣāte parasparam || 25 ||
[Analyze grammar]

tato'rjunaḥ śaravarṣaṃ kirāte samavāsṛjat |
tatprasannena manasā pratijagrāha śaṃkaraḥ || 26 ||
[Analyze grammar]

muhūrtaṃ śaravarṣaṃ tatpratigṛhya pinākadhṛk |
akṣatena śarīreṇa tasthau giririvācalaḥ || 27 ||
[Analyze grammar]

sa dṛṣṭvā bāṇavarṣaṃ tanmoghībhūtaṃ dhanaṃjayaḥ |
paramaṃ vismayaṃ cakre sādhu sādhviti cābravīt || 28 ||
[Analyze grammar]

aho'yaṃ sukumārāṅgo himavacchikharālayaḥ |
gāṇḍīvamuktānnārācānpratigṛhṇātyavihvalaḥ || 29 ||
[Analyze grammar]

ko'yaṃ devo bhavetsākṣādrudro yakṣaḥ sureśvaraḥ |
vidyate hi giriśreṣṭhe tridaśānāṃ samāgamaḥ || 30 ||
[Analyze grammar]

na hi madbāṇajālānāmutsṛṣṭānāṃ sahasraśaḥ |
śakto'nyaḥ sahituṃ vegamṛte devaṃ pinākinam || 31 ||
[Analyze grammar]

devo vā yadi vā yakṣo rudrādanyo vyavasthitaḥ |
ahamenaṃ śaraistīkṣṇairnayāmi yamasādanam || 32 ||
[Analyze grammar]

tato hṛṣṭamanā jiṣṇurnārācānmarmabhedinaḥ |
vyasṛjacchatadhā rājanmayūkhāniva bhāskaraḥ || 33 ||
[Analyze grammar]

tānprasannena manasā bhagavāṃllokabhāvanaḥ |
śūlapāṇiḥ pratyagṛhṇācchilāvarṣamivācalaḥ || 34 ||
[Analyze grammar]

kṣaṇena kṣīṇabāṇo'tha saṃvṛttaḥ phalgunastadā |
vitrāsaṃ ca jagāmātha taṃ dṛṣṭvā śarasaṃkṣayam || 35 ||
[Analyze grammar]

cintayāmāsa jiṣṇustu bhagavantaṃ hutāśanam |
purastādakṣayau dattau tūṇau yenāsya khāṇḍave || 36 ||
[Analyze grammar]

kiṃ nu mokṣyāmi dhanuṣā yanme bāṇāḥ kṣayaṃ gatāḥ |
ayaṃ ca puruṣaḥ ko'pi bāṇāngrasati sarvaśaḥ || 37 ||
[Analyze grammar]

ahamenaṃ dhanuṣkoṭyā śūlāgreṇeva kuñjaram |
nayāmi daṇḍadhārasya yamasya sadanaṃ prati || 38 ||
[Analyze grammar]

saṃprāyudhyaddhanuṣkoṭyā kaunteyaḥ paravīrahā |
tadapyasya dhanurdivyaṃ jagrāsa girigocaraḥ || 39 ||
[Analyze grammar]

tato'rjuno grastadhanuḥ khaḍgapāṇiratiṣṭhata |
yuddhasyāntamabhīpsanvai vegenābhijagāma tam || 40 ||
[Analyze grammar]

tasya mūrdhni śitaṃ khaḍgamasaktaṃ parvateṣvapi |
mumoca bhujavīryeṇa vikramya kurunandanaḥ |
tasya mūrdhānamāsādya paphālāsivaro hi saḥ || 41 ||
[Analyze grammar]

tato vṛkṣaiḥ śilābhiśca yodhayāmāsa phalgunaḥ |
yathā vṛkṣānmahākāyaḥ pratyagṛhṇādatho śilāḥ || 42 ||
[Analyze grammar]

kirātarūpī bhagavāṃstataḥ pārtho mahābalaḥ |
muṣṭibhirvajrasaṃsparśairdhūmamutpādayanmukhe |
prajahāra durādharṣe kirātasamarūpiṇi || 43 ||
[Analyze grammar]

tataḥ śakrāśanisamairmuṣṭibhirbhṛśadāruṇaiḥ |
kirātarūpī bhagavānardayāmāsa phalgunam || 44 ||
[Analyze grammar]

tataścaṭacaṭāśabdaḥ sughoraḥ samajāyata |
pāṇḍavasya ca muṣṭīnāṃ kirātasya ca yudhyataḥ || 45 ||
[Analyze grammar]

sumuhūrtaṃ mahadyuddhamāsīttallomaharṣaṇam |
bhujaprahārasaṃyuktaṃ vṛtravāsavayoriva || 46 ||
[Analyze grammar]

jahārātha tato jiṣṇuḥ kirātamurasā balī |
pāṇḍavaṃ ca viceṣṭantaṃ kirāto'pyahanadbalāt || 47 ||
[Analyze grammar]

tayorbhujaviniṣpeṣātsaṃgharṣeṇorasostathā |
samajāyata gātreṣu pāvako'ṅgāradhūmavān || 48 ||
[Analyze grammar]

tata enaṃ mahādevaḥ pīḍya gātraiḥ supīḍitam |
tejasā vyākramadroṣāccetastasya vimohayan || 49 ||
[Analyze grammar]

tato nipīḍitairgātraiḥ piṇḍīkṛta ivābabhau |
phalguno gātrasaṃruddho devadevena bhārata || 50 ||
[Analyze grammar]

nirucchvāso'bhavaccaiva saṃniruddho mahātmanā |
tataḥ papāta saṃmūḍhastataḥ prīto'bhavadbhavaḥ || 51 ||
[Analyze grammar]

bhagavānuvāca |
bho bho phalguna tuṣṭo'smi karmaṇāpratimena te |
śauryeṇānena dhṛtyā ca kṣatriyo nāsti te samaḥ || 52 ||
[Analyze grammar]

samaṃ tejaśca vīryaṃ ca mamādya tava cānagha |
prītaste'haṃ mahābāho paśya māṃ puruṣarṣabha || 53 ||
[Analyze grammar]

dadāni te viśālākṣa cakṣuḥ pūrvaṛṣirbhavān |
vijeṣyasi raṇe śatrūnapi sarvāndivaukasaḥ || 54 ||
[Analyze grammar]

vaiśaṃpāyana uvāca |
tato devaṃ mahādevaṃ giriśaṃ śūlapāṇinam |
dadarśa phalgunastatra saha devyā mahādyutim || 55 ||
[Analyze grammar]

sa jānubhyāṃ mahīṃ gatvā śirasā praṇipatya ca |
prasādayāmāsa haraṃ pārthaḥ parapuraṃjayaḥ || 56 ||
[Analyze grammar]

arjuna uvāca |
kapardinsarvabhūteśa bhaganetranipātana |
vyatikramaṃ me bhagavankṣantumarhasi śaṃkara || 57 ||
[Analyze grammar]

bhavagaddarśanākāṅkṣī prāpto'smīmaṃ mahāgirim |
dayitaṃ tava deveśa tāpasālayamuttamam || 58 ||
[Analyze grammar]

prasādaye tvāṃ bhagavansarvabhūtanamaskṛta |
na me syādaparādho'yaṃ mahādevātisāhasāt || 59 ||
[Analyze grammar]

kṛto mayā yadajñānādvimardo'yaṃ tvayā saha |
śaraṇaṃ saṃprapannāya tatkṣamasvādya śaṃkara || 60 ||
[Analyze grammar]

vaiśaṃpāyana uvāca |
tamuvāca mahātejāḥ prahasya vṛṣabhadhvajaḥ |
pragṛhya ruciraṃ bāhuṃ kṣāntamityeva phalgunam || 61 ||
[Analyze grammar]