Chapter 13

śaunaka uvāca |
kimarthaṃ rājaśārdūlaḥ sa rājā janamejayaḥ |
sarpasatreṇa sarpāṇāṃ gato'ntaṃ tadvadasva me || 1 ||
[Analyze grammar]

āstīkaśca dvijaśreṣṭhaḥ kimarthaṃ japatāṃ varaḥ |
mokṣayāmāsa bhujagāndīptāttasmāddhutāśanāt || 2 ||
[Analyze grammar]

kasya putraḥ sa rājāsītsarpasatraṃ ya āharat |
sa ca dvijātipravaraḥ kasya putro vadasva me || 3 ||
[Analyze grammar]

sūta uvāca |
mahadākhyānamāstīkaṃ yatraitatprocyate dvija |
sarvametadaśeṣeṇa śṛṇu me vadatāṃ vara || 4 ||
[Analyze grammar]

śaunaka uvāca |
śrotumicchāmyaśeṣeṇa kathāmetāṃ manoramām |
āstīkasya purāṇasya brāhmaṇasya yaśasvinaḥ || 5 ||
[Analyze grammar]

sūta uvāca |
itihāsamimaṃ vṛddhāḥ purāṇaṃ paricakṣate |
kṛṣṇadvaipāyanaproktaṃ naimiṣāraṇyavāsinaḥ || 6 ||
[Analyze grammar]

pūrvaṃ pracoditaḥ sūtaḥ pitā me lomaharṣaṇaḥ |
śiṣyo vyāsasya medhāvī brāhmaṇairidamuktavān || 7 ||
[Analyze grammar]

tasmādahamupaśrutya pravakṣyāmi yathātatham |
idamāstīkamākhyānaṃ tubhyaṃ śaunaka pṛcchate || 8 ||
[Analyze grammar]

āstīkasya pitā hyāsītprajāpatisamaḥ prabhuḥ |
brahmacārī yatāhārastapasyugre rataḥ sadā || 9 ||
[Analyze grammar]

jaratkāruriti khyāta ūrdhvaretā mahānṛṣiḥ |
yāyāvarāṇāṃ dharmajñaḥ pravaraḥ saṃśitavrataḥ || 10 ||
[Analyze grammar]

aṭamānaḥ kadācitsa svāndadarśa pitāmahān |
lambamānānmahāgarte pādairūrdhvairadhomukhān || 11 ||
[Analyze grammar]

tānabravītsa dṛṣṭvaiva jaratkāruḥ pitāmahān |
ke bhavanto'valambante garte'sminvā adhomukhāḥ || 12 ||
[Analyze grammar]

vīraṇastambake lagnāḥ sarvataḥ paribhakṣite |
mūṣakena nigūḍhena garte'sminnityavāsinā || 13 ||
[Analyze grammar]

pitara ūcuḥ |
yāyāvarā nāma vayamṛṣayaḥ saṃśitavratāḥ |
saṃtānaprakṣayādbrahmannadho gacchāma medinīm || 14 ||
[Analyze grammar]

asmākaṃ saṃtatistveko jaratkāruriti śrutaḥ |
mandabhāgyo'lpabhāgyānāṃ tapa eva samāsthitaḥ || 15 ||
[Analyze grammar]

na sa putrāñjanayituṃ dārānmūḍhaścikīrṣati |
tena lambāmahe garte saṃtānaprakṣayādiha || 16 ||
[Analyze grammar]

anāthāstena nāthena yathā duṣkṛtinastathā |
kastvaṃ bandhurivāsmākamanuśocasi sattama || 17 ||
[Analyze grammar]

jñātumicchāmahe brahmanko bhavāniha dhiṣṭhitaḥ |
kimarthaṃ caiva naḥ śocyānanukampitumarhasi || 18 ||
[Analyze grammar]

jaratkāruruvāca |
mama pūrve bhavanto vai pitaraḥ sapitāmahāḥ |
brūta kiṃ karavāṇyadya jaratkārurahaṃ svayam || 19 ||
[Analyze grammar]

pitara ūcuḥ |
yatasva yatnavāṃstāta saṃtānāya kulasya naḥ |
ātmano'rthe'smadarthe ca dharma ityeva cābhibho || 20 ||
[Analyze grammar]

na hi dharmaphalaistāta na tapobhiḥ susaṃcitaiḥ |
tāṃ gatiṃ prāpnuvantīha putriṇo yāṃ vrajanti ha || 21 ||
[Analyze grammar]

taddāragrahaṇe yatnaṃ saṃtatyāṃ ca manaḥ kuru |
putrakāsmanniyogāttvametannaḥ paramaṃ hitam || 22 ||
[Analyze grammar]

jaratkāruruvāca |
na dārānvai kariṣyāmi sadā me bhāvitaṃ manaḥ |
bhavatāṃ tu hitārthāya kariṣye dārasaṃgraham || 23 ||
[Analyze grammar]

samayena ca kartāhamanena vidhipūrvakam |
tathā yadyupalapsyāmi kariṣye nānyathā tvaham || 24 ||
[Analyze grammar]

sanāmnī yā bhavitrī me ditsitā caiva bandhubhiḥ |
bhaikṣavattāmahaṃ kanyāmupayaṃsye vidhānataḥ || 25 ||
[Analyze grammar]

daridrāya hi me bhāryāṃ ko dāsyati viśeṣataḥ |
pratigrahīṣye bhikṣāṃ tu yadi kaścitpradāsyati || 26 ||
[Analyze grammar]

evaṃ dārakriyāhetoḥ prayatiṣye pitāmahāḥ |
anena vidhinā śaśvanna kariṣye'hamanyathā || 27 ||
[Analyze grammar]

tatra cotpatsyate janturbhavatāṃ tāraṇāya vai |
śāśvataṃ sthānamāsādya modantāṃ pitaro mama || 28 ||
[Analyze grammar]

sūta uvāca |
tato niveśāya tadā sa vipraḥ saṃśitavrataḥ |
mahīṃ cacāra dārārthī na ca dārānavindata || 29 ||
[Analyze grammar]

sa kadācidvanaṃ gatvā vipraḥ pitṛvacaḥ smaran |
cukrośa kanyābhikṣārthī tisro vācaḥ śanairiva || 30 ||
[Analyze grammar]

taṃ vāsukiḥ pratyagṛhṇādudyamya bhaginīṃ tadā |
na sa tāṃ pratijagrāha na sanāmnīti cintayan || 31 ||
[Analyze grammar]

sanāmnīmudyatāṃ bhāryāṃ gṛhṇīyāmiti tasya hi |
mano niviṣṭamabhavajjaratkārormahātmanaḥ || 32 ||
[Analyze grammar]

tamuvāca mahāprājño jaratkārurmahātapāḥ |
kiṃnāmnī bhaginīyaṃ te brūhi satyaṃ bhujaṃgama || 33 ||
[Analyze grammar]

vāsukiruvāca |
jaratkāro jaratkāruḥ svaseyamanujā mama |
tvadarthaṃ rakṣitā pūrvaṃ pratīcchemāṃ dvijottama || 34 ||
[Analyze grammar]

sūta uvāca |
mātrā hi bhujagāḥ śaptāḥ pūrvaṃ brahmavidāṃ vara |
janamejayasya vo yajñe dhakṣyatyanilasārathiḥ || 35 ||
[Analyze grammar]

tasya śāpasya śāntyarthaṃ pradadau pannagottamaḥ |
svasāramṛṣaye tasmai suvratāya tapasvine || 36 ||
[Analyze grammar]

sa ca tāṃ pratijagrāha vidhidṛṣṭena karmaṇā |
āstīko nāma putraśca tasyāṃ jajñe mahātmanaḥ || 37 ||
[Analyze grammar]

tapasvī ca mahātmā ca vedavedāṅgapāragaḥ |
samaḥ sarvasya lokasya pitṛmātṛbhayāpahaḥ || 38 ||
[Analyze grammar]

atha kālasya mahataḥ pāṇḍaveyo narādhipaḥ |
ājahāra mahāyajñaṃ sarpasatramiti śrutiḥ || 39 ||
[Analyze grammar]

tasminpravṛtte satre tu sarpāṇāmantakāya vai |
mocayāmāsa taṃ śāpamāstīkaḥ sumahāyaśāḥ || 40 ||
[Analyze grammar]

nāgāṃśca mātulāṃścaiva tathā cānyānsa bāndhavān |
pitṝṃśca tārayāmāsa saṃtatyā tapasā tathā |
vrataiśca vividhairbrahmansvādhyāyaiścānṛṇo'bhavat || 41 ||
[Analyze grammar]

devāṃśca tarpayāmāsa yajñairvividhadakṣiṇaiḥ |
ṛṣīṃśca brahmacaryeṇa saṃtatyā ca pitāmahān || 42 ||
[Analyze grammar]

apahṛtya guruṃ bhāraṃ pitṝṇāṃ saṃśitavrataḥ |
jaratkārurgataḥ svargaṃ sahitaḥ svaiḥ pitāmahaiḥ || 43 ||
[Analyze grammar]

āstīkaṃ ca sutaṃ prāpya dharmaṃ cānuttamaṃ muniḥ |
jaratkāruḥ sumahatā kālena svargamīyivān || 44 ||
[Analyze grammar]

etadākhyānamāstīkaṃ yathāvatkīrtitaṃ mayā |
prabrūhi bhṛguśārdūla kiṃ bhūyaḥ kathyatāmiti || 45 ||
[Analyze grammar]