Chapter 6

saṃjaya uvāca |
hate droṇe maheṣvāse tasminnahani bhārata |
kṛte ca moghasaṃkalpe droṇaputre mahārathe || 1 ||
[Analyze grammar]

dravamāṇe mahārāja kauravāṇāṃ bale tathā |
vyūhya pārthaḥ svakaṃ sainyamatiṣṭhadbhrātṛbhiḥ saha || 2 ||
[Analyze grammar]

tamavasthitamājñāya putraste bharatarṣabha |
dravacca svabalaṃ dṛṣṭvā pauruṣeṇa nyavārayat || 3 ||
[Analyze grammar]

svamanīkamavasthāpya bāhuvīrye vyavasthitaḥ |
yuddhvā ca suciraṃ kālaṃ pāṇḍavaiḥ saha bhārata || 4 ||
[Analyze grammar]

labdhalakṣaiḥ parairhṛṣṭairvyāyacchadbhiściraṃ tadā |
saṃdhyākālaṃ samāsādya pratyāhāramakārayat || 5 ||
[Analyze grammar]

kṛtvāvahāraṃ sainyānāṃ praviśya śibiraṃ svakam |
kuravo''tmahitaṃ mantraṃ mantrayāṃ cakrire tadā || 6 ||
[Analyze grammar]

paryaṅkeṣu parārdhyeṣu spardhyāstaraṇavatsu ca |
varāsaneṣūpaviṣṭāḥ sukhaśayyāsvivāmarāḥ || 7 ||
[Analyze grammar]

tato duryodhano rājā sāmnā paramavalgunā |
tānābhāṣya maheṣvāsānprāptakālamabhāṣata || 8 ||
[Analyze grammar]

matiṃ matimatāṃ śreṣṭhāḥ sarve prabrūta māciram |
evaṃ gate tu yatkāryaṃ bhavetkāryakaraṃ nṛpāḥ || 9 ||
[Analyze grammar]

evamukte narendreṇa narasiṃhā yuyutsavaḥ |
cakrurnānāvidhāśceṣṭāḥ siṃhāsanagatāstadā || 10 ||
[Analyze grammar]

teṣāṃ niśamyeṅgitāni yuddhe prāṇāñjuhūṣatām |
samudvīkṣya mukhaṃ rājño bālārkasamavarcasaḥ |
ācāryaputro medhāvī vākyajño vākyamādade || 11 ||
[Analyze grammar]

rāgo yogastathā dākṣyaṃ nayaścetyarthasādhakāḥ |
upāyāḥ paṇḍitaiḥ proktāḥ sarve daivasamāśritāḥ || 12 ||
[Analyze grammar]

lokapravīrā ye'smākaṃ devakalpā mahārathāḥ |
nītimantastathā yuktā dakṣā raktāśca te hatāḥ || 13 ||
[Analyze grammar]

na tveva kāryaṃ nairāśyamasmābhirvijayaṃ prati |
sunītairiha sarvārthairdaivamapyanulomyate || 14 ||
[Analyze grammar]

te vayaṃ pravaraṃ nṝṇāṃ sarvairguṇagaṇairyutam |
karṇaṃ senāpatiṃ kṛtvā pramathiṣyāmahe ripūn || 15 ||
[Analyze grammar]

tato duryodhanaḥ prītaḥ priyaṃ śrutvā vacastadā |
prītisaṃskārasaṃyuktaṃ tathyamātmahitaṃ śubham || 16 ||
[Analyze grammar]

svaṃ manaḥ samavasthāpya bāhuvīryamupāśritaḥ |
duryodhano mahārāja rādheyamidamabravīt || 17 ||
[Analyze grammar]

karṇa jānāmi te vīryaṃ sauhṛdaṃ ca paraṃ mayi |
tathāpi tvāṃ mahābāho pravakṣyāmi hitaṃ vacaḥ || 18 ||
[Analyze grammar]

śrutvā yatheṣṭaṃ ca kuru vīra yattava rocate |
bhavānprājñatamo nityaṃ mama caiva parā gatiḥ || 19 ||
[Analyze grammar]

bhīṣmadroṇāvatirathau hatau senāpatī mama |
senāpatirbhavānastu tābhyāṃ draviṇavattaraḥ || 20 ||
[Analyze grammar]

vṛddhau ca tau maheṣvāsau sāpekṣau ca dhanaṃjaye |
mānitau ca mayā vīrau rādheya vacanāttava || 21 ||
[Analyze grammar]

pitāmahatvaṃ saṃprekṣya pāṇḍuputrā mahāraṇe |
rakṣitāstāta bhīṣmeṇa divasāni daśaiva ha || 22 ||
[Analyze grammar]

nyastaśastre ca bhavati hato bhīṣmaḥ pitāmahaḥ |
śikhaṇḍinaṃ puraskṛtya phalgunena mahāhave || 23 ||
[Analyze grammar]

hate tasminmahābhāge śaratalpagate tadā |
tvayokte puruṣavyāghra droṇo hyāsītpuraḥsaraḥ || 24 ||
[Analyze grammar]

tenāpi rakṣitāḥ pārthāḥ śiṣyatvādiha saṃyuge |
sa cāpi nihato vṛddho dhṛṣṭadyumnena satvaram || 25 ||
[Analyze grammar]

nihatābhyāṃ pradhānābhyāṃ tābhyāmamitavikrama |
tvatsamaṃ samare yodhaṃ nānyaṃ paśyāmi cintayan || 26 ||
[Analyze grammar]

bhavāneva tu naḥ śakto vijayāya na saṃśayaḥ |
pūrvaṃ madhye ca paścācca tavaiva viditaṃ hi tat || 27 ||
[Analyze grammar]

sa bhavāndhuryavatsaṃkhye dhuramudvoḍhumarhasi |
abhiṣecaya senānye svayamātmānamātmanā || 28 ||
[Analyze grammar]

devatānāṃ yathā skandaḥ senānīḥ prabhuravyayaḥ |
tathā bhavānimāṃ senāṃ dhārtarāṣṭrīṃ bibhartu me |
jahi śatrugaṇānsarvānmahendra iva dānavān || 29 ||
[Analyze grammar]

avasthitaṃ raṇe jñātvā pāṇḍavāstvāṃ mahāratham |
draviṣyanti sapāñcālā viṣṇuṃ dṛṣṭveva dānavāḥ |
tasmāttvaṃ puruṣavyāghra prakarṣethā mahācamūm || 30 ||
[Analyze grammar]

bhavatyavasthite yatte pāṇḍavā gatacetasaḥ |
bhaviṣyanti sahāmātyāḥ pāñcālaiḥ sṛñjayaiḥ saha || 31 ||
[Analyze grammar]

yathā hyabhyuditaḥ sūryaḥ pratapansvena tejasā |
vyapohati tamastīvraṃ tathā śatrūnvyapoha naḥ || 32 ||
[Analyze grammar]

karṇa uvāca |
uktametanmayā pūrvaṃ gāndhāre tava saṃnidhau |
jeṣyāmi pāṇḍavānrājansaputrānsajanārdanān || 33 ||
[Analyze grammar]

senāpatirbhaviṣyāmi tavāhaṃ nātra saṃśayaḥ |
sthiro bhava mahārāja jitānviddhi ca pāṇḍavān || 34 ||
[Analyze grammar]

saṃjaya uvāca |
evamukto mahātejāstato duryodhano nṛpaḥ |
uttasthau rājabhiḥ sārdhaṃ devairiva śatakratuḥ |
senāpatyena satkartuṃ karṇaṃ skandamivāmarāḥ || 35 ||
[Analyze grammar]

tato'bhiṣiṣicustūrṇaṃ vidhidṛṣṭena karmaṇā |
duryodhanamukhā rājanrājāno vijayaiṣiṇaḥ |
śātakaumbhamayaiḥ kumbhairmāheyaiścābhimantritaiḥ || 36 ||
[Analyze grammar]

toyapūrṇairviṣāṇaiśca dvīpikhaḍgamaharṣabhaiḥ |
maṇimuktāmayaiścānyaiḥ puṇyagandhaistathauṣadhaiḥ || 37 ||
[Analyze grammar]

audumbare samāsīnamāsane kṣaumasaṃvṛtam |
śāstradṛṣṭena vidhinā saṃbhāraiśca susaṃbhṛtaiḥ || 38 ||
[Analyze grammar]

jaya pārthānsagovindānsānugāṃstvaṃ mahāhave |
iti taṃ bandinaḥ prāhurdvijāśca bharatarṣabha || 39 ||
[Analyze grammar]

jahi pārthānsapāñcālānrādheya vijayāya naḥ |
udyanniva sadā bhānustamāṃsyugrairgabhastibhiḥ || 40 ||
[Analyze grammar]

na hyalaṃ tvadvisṛṣṭānāṃ śarāṇāṃ te sakeśavāḥ |
kṛtaghnāḥ sūryaraśmīnāṃ jvalatāmiva darśane || 41 ||
[Analyze grammar]

na hi pārthāḥ sapāñcālāḥ sthātuṃ śaktāstavāgrataḥ |
āttaśastrasya samare mahendrasyeva dānavāḥ || 42 ||
[Analyze grammar]

abhiṣiktastu rādheyaḥ prabhayā so'mitaprabhaḥ |
vyatyaricyata rūpeṇa divākara ivāparaḥ || 43 ||
[Analyze grammar]

senāpatyena rādheyamabhiṣicya sutastava |
amanyata tadātmānaṃ kṛtārthaṃ kālacoditaḥ || 44 ||
[Analyze grammar]

karṇo'pi rājansaṃprāpya senāpatyamariṃdamaḥ |
yogamājñāpayāmāsa sūryasyodayanaṃ prati || 45 ||
[Analyze grammar]

tava putrairvṛtaḥ karṇaḥ śuśubhe tatra bhārata |
devairiva yathā skandaḥ saṃgrāme tārakāmaye || 46 ||
[Analyze grammar]