Chapter 7

dhṛtarāṣṭra uvāca |
senāpatyaṃ tu saṃprāpya karṇo vaikartanastadā |
tathoktaśca svayaṃ rājñā snigdhaṃ bhrātṛsamaṃ vacaḥ || 1 ||
[Analyze grammar]

yogamājñāpya senāyā āditye'bhyudite tadā |
akarotkiṃ mahāprājñastanmamācakṣva saṃjaya || 2 ||
[Analyze grammar]

saṃjaya uvāca |
karṇasya matamājñāya putraste bharatarṣabha |
yogamājñāpayāmāsa nāndītūryapuraḥsaram || 3 ||
[Analyze grammar]

mahatyapararātre tu tava putrasya māriṣa |
yogo yogeti sahasā prādurāsīnmahāsvanaḥ || 4 ||
[Analyze grammar]

nāgānāṃ kalpamānānāṃ rathānāṃ ca varūthinām |
saṃnahyatāṃ padātīnāṃ vājināṃ ca viśāṃ pate || 5 ||
[Analyze grammar]

krośatāṃ cāpi yodhānāṃ tvaritānāṃ parasparam |
babhūva tumulaḥ śabdo divaspṛksumahāṃstadā || 6 ||
[Analyze grammar]

tataḥ śvetapatākena bālārkākāravājinā |
hemapṛṣṭhena dhanuṣā hastikakṣyeṇa ketunā || 7 ||
[Analyze grammar]

tūṇena śarapūrṇena sāṅgadena varūthinā |
śataghnīkiṅkiṇīśaktiśūlatomaradhāriṇā || 8 ||
[Analyze grammar]

kārmukeṇopapannena vimalādityavarcasā |
rathenātipatākena sūtaputro vyadṛśyata || 9 ||
[Analyze grammar]

dhamantaṃ vārijaṃ tāta hemajālavibhūṣitam |
vidhunvānaṃ mahaccāpaṃ kārtasvaravibhūṣitam || 10 ||
[Analyze grammar]

dṛṣṭvā karṇaṃ maheṣvāsaṃ rathasthaṃ rathināṃ varam |
bhānumantamivodyantaṃ tamo ghnantaṃ sahasraśaḥ || 11 ||
[Analyze grammar]

na bhīṣmavyasanaṃ kecinnāpi droṇasya māriṣa |
nānyeṣāṃ puruṣavyāghra menire tatra kauravāḥ || 12 ||
[Analyze grammar]

tatastu tvarayanyodhāñśaṅkhaśabdena māriṣa |
karṇo niṣkāsayāmāsa kauravāṇāṃ varūthinīm || 13 ||
[Analyze grammar]

vyūhaṃ vyūhya maheṣvāso mākaraṃ śatrutāpanaḥ |
pratyudyayau tadā karṇaḥ pāṇḍavānvijigīṣayā || 14 ||
[Analyze grammar]

makarasya tu tuṇḍe vai karṇo rājanvyavasthitaḥ |
netrābhyāṃ śakuniḥ śūra ulūkaśca mahārathaḥ || 15 ||
[Analyze grammar]

droṇaputrastu śirasi grīvāyāṃ sarvasodarāḥ |
madhye duryodhano rājā balena mahatā vṛtaḥ || 16 ||
[Analyze grammar]

vāme pāde tu rājendra kṛtavarmā vyavasthitaḥ |
nārāyaṇabalairyukto gopālairyuddhadurmadaḥ || 17 ||
[Analyze grammar]

pāde tu dakṣiṇe rājangautamaḥ satyavikramaḥ |
trigartaiśca maheṣvāsairdākṣiṇātyaiśca saṃvṛtaḥ || 18 ||
[Analyze grammar]

anupādastu yo vāmastatra śalyo vyavasthitaḥ |
mahatyā senayā sārdhaṃ madradeśasamutthayā || 19 ||
[Analyze grammar]

dakṣiṇe tu mahārāja suṣeṇaḥ satyasaṃgaraḥ |
vṛto rathasahasraiśca dantināṃ ca śataistathā || 20 ||
[Analyze grammar]

pucche āstāṃ mahāvīrau bhrātarau pārthivau tadā |
citrasenaśca citraśca mahatyā senayā vṛtau || 21 ||
[Analyze grammar]

tataḥ prayāte rājendra karṇe naravarottame |
dhanaṃjayamabhiprekṣya dharmarājo'bravīdidam || 22 ||
[Analyze grammar]

paśya pārtha mahāsenāṃ dhārtarāṣṭrasya saṃyuge |
karṇena nirmitāṃ vīra guptāṃ vīrairmahārathaiḥ || 23 ||
[Analyze grammar]

hatavīratamā hyeṣā dhārtarāṣṭrī mahācamūḥ |
phalguśeṣā mahābāho tṛṇaistulyā matā mama || 24 ||
[Analyze grammar]

eko hyatra maheṣvāsaḥ sūtaputro vyavasthitaḥ |
sadevāsuragandharvaiḥ sakiṃnaramahoragaiḥ |
carācaraistribhirlokairyo'jayyo rathināṃ varaḥ || 25 ||
[Analyze grammar]

taṃ hatvādya mahābāho vijayastava phalguna |
uddhṛtaśca bhavecchalyo mama dvādaśavārṣikaḥ |
evaṃ jñātvā mahābāho vyūhaṃ vyūha yathecchasi || 26 ||
[Analyze grammar]

bhrātustadvacanaṃ śrutvā pāṇḍavaḥ śvetavāhanaḥ |
ardhacandreṇa vyūhena pratyavyūhata tāṃ camūm || 27 ||
[Analyze grammar]

vāmapārśve'bhavadrājanbhīmaseno vyavasthitaḥ |
dakṣiṇe ca maheṣvāso dhṛṣṭadyumno mahābalaḥ || 28 ||
[Analyze grammar]

madhye vyūhasya sākṣāttu pāṇḍavaḥ kṛṣṇasārathiḥ |
nakulaḥ sahadevaśca dharmarājaśca pṛṣṭhataḥ || 29 ||
[Analyze grammar]

cakrarakṣau tu pāñcālyau yudhāmanyūttamaujasau |
nārjunaṃ jahaturyuddhe pālyamānau kirīṭinā || 30 ||
[Analyze grammar]

śeṣā nṛpatayo vīrāḥ sthitā vyūhasya daṃśitāḥ |
yathābhāvaṃ yathotsāhaṃ yathāsattvaṃ ca bhārata || 31 ||
[Analyze grammar]

evametanmahāvyūhaṃ vyūhya bhārata pāṇḍavāḥ |
tāvakāśca maheṣvāsā yuddhāyaiva mano dadhuḥ || 32 ||
[Analyze grammar]

dṛṣṭvā vyūḍhāṃ tava camūṃ sūtaputreṇa saṃyuge |
nihatānpāṇḍavānmene tava putraḥ sahānvayaḥ || 33 ||
[Analyze grammar]

tathaiva pāṇḍavīṃ senāṃ vyūḍhāṃ dṛṣṭvā yudhiṣṭhiraḥ |
dhārtarāṣṭrānhatānmene sakarṇānvai janādhipa || 34 ||
[Analyze grammar]

tataḥ śaṅkhāśca bheryaśca paṇavānakagomukhāḥ |
sahasaivābhyahanyanta saśabdāśca samantataḥ || 35 ||
[Analyze grammar]

senayorubhayo rājanprāvādyanta mahāsvanāḥ |
siṃhanādaśca saṃjajñe śūrāṇāṃ jayagṛddhinām || 36 ||
[Analyze grammar]

hayaheṣitaśabdāśca vāraṇānāṃ ca bṛṃhitam |
rathanemisvanāścogrāḥ saṃbabhūvurjanādhipa || 37 ||
[Analyze grammar]

na droṇavyasanaṃ kaścijjānīte bharatarṣabha |
dṛṣṭvā karṇaṃ maheṣvāsaṃ mukhe vyūhasya daṃśitam || 38 ||
[Analyze grammar]

ubhe sene mahāsattve prahṛṣṭanarakuñjare |
yoddhukāme sthite rājanhantumanyonyamañjasā || 39 ||
[Analyze grammar]

tatra yattau susaṃrabdhau dṛṣṭvānyonyaṃ vyavasthitau |
anīkamadhye rājendra rejatuḥ karṇapāṇḍavau || 40 ||
[Analyze grammar]

nṛtyamāne tu te sene sameyātāṃ parasparam |
tayoḥ pakṣaiḥ prapakṣaiśca nirjagmurvai yuyutsavaḥ || 41 ||
[Analyze grammar]

tataḥ pravavṛte yuddhaṃ naravāraṇavājinām |
rathināṃ ca mahārāja anyonyaṃ nighnatāṃ dṛḍham || 42 ||
[Analyze grammar]