Chapter 68

śrīnaranārāyaṇa uvāca |
śṛṇu badrīpriye devi kathāṃ cānyāṃ hitāvahām |
bharavāṭo'bhavadgrāme gundrake paramīrakaḥ || 1 ||
[Analyze grammar]

paramīrā'bhidhaḥ so'yamajāsahasrapālakaḥ |
ajāmātrapayovṛttyā tathorṇavikrayādibhiḥ || 2 ||
[Analyze grammar]

ajāvikrayavṛttyā ca jīvatyeva kuṭumbavān |
ajāmāṃsāśanaścāpi tathā'jābālabhakṣakaḥ || 3 ||
[Analyze grammar]

evaṃvidho'bhavat pāpī sadā'jāpaśujīvanaḥ |
cārayatyeva sarvā'jāḥ sīmakṣetrādiṣu nṛṇām || 4 ||
[Analyze grammar]

sasvāmikeṣu kṣetreṣu sasyaghāsatṛṇāni ca |
yāni tānyapi cauryeṇa cārayatyapi vai niśi || 5 ||
[Analyze grammar]

evaṃ doṣakaraścā'yaṃ bharavāṭo'ghasaṃbhṛtaḥ |
dharmakarmādihīnaḥ sa kālapāśavaśaṃgataḥ || 6 ||
[Analyze grammar]

yayau yamālayaṃ yāmyairnītaśca tatra raurave |
asipatravane kālapāśe sandaśake tathā || 7 ||
[Analyze grammar]

agnijvāle narakeṣu kṣipto lālāśane'pi ca |
yāmyaduḥkhānyanubhūya bhūtale śyenatāṃ gataḥ || 8 ||
[Analyze grammar]

araṇye śyenapakṣī sa jātaḥ pāpāvaśeṣataḥ |
sa tūḍḍīya vanād vanāntaraṃ sindhutaṭe'gamat || 9 ||
[Analyze grammar]

prāpto'yaṃ śarkarābhūmiṃ yatra kathā pravartate |
taruṣaṇḍeṣu viśrāntiṃ lebhe madhyāhnake tadā || 10 ||
[Analyze grammar]

tatra tatra ca caṭakā mārgayan tūtkare sthitāḥ |
bhakṣayantīścaṭakāḥ sa vyalokayat sudūrataḥ || 11 ||
[Analyze grammar]

sādhūcchiṣṭaudanakaṇān kṛṣṇaprasādarūpiṇaḥ |
bhakṣayantīrbhakṣyacittāścaṭakā vīkṣya vai drutam || 12 ||
[Analyze grammar]

utpapāta drumāttūrṇaṃ papāta caṭakopari |
sahasraśaścaṭakāstā uḍḍīya bhayato drutam || 13 ||
[Analyze grammar]

utpeturambaraṃ tvekāṃ dhṛtavān bhakṣyamuttamam |
cañcvā tāṃ mārayāmāsa tāvaccaṭakāvarṣmaṇaḥ || 14 ||
[Analyze grammar]

viniryayau divyanārī sarvābharaṇabhūṣitā |
svargasya devatā yadvat kanyā tejasvinī śubhā || 15 ||
[Analyze grammar]

puṣpamālāṃ kare dhṛtvā sā'psaraḥsundarī drutam |
kathāmaṇḍapamāgatya vyomamārgeṇa pūjanam || 16 ||
[Analyze grammar]

pracakre śrīprabhe badri saṃhitāyāḥ samutsukā |
vilokitā samastaiśca maṇḍapasthairjanaistadā || 17 ||
[Analyze grammar]

pṛṣṭā kā tvaṃ natā cāpi pratyuvāca janān prati |
caṭakā'haṃ prasādānnabhakṣaṇāt pāpavarjitā || 18 ||
[Analyze grammar]

pavitrā puṇyasaṃyuktā bhavāmyadya janāstviha |
satāmucchiṣṭamāsādyā'bhavaṃ svargāya devatā || 19 ||
[Analyze grammar]

apsarovaratāṃ prāptā svargaṃ prayāmi cādhunā |
caturyugaṃ divi sthitvā śrīsaṃhitā'rhaṇodbhavam || 20 ||
[Analyze grammar]

puṇyamāsādya yāsyāmi vaikuṣṭhaṃ muktavigrahā |
śyeno'yaṃ tu purā cāsīdbharavāṭo hyajāpatiḥ || 21 ||
[Analyze grammar]

ahamāsamajā tasya mṛtā'tra caṭakā'bhavam |
tena dhṛtā mṛtā cāsmi prayāmi svargamuttamam || 22 ||
[Analyze grammar]

anyāścaṭakā uḍḍīya prayātāścā'mbaraṃ drutam |
tā api bharavāṭasyā'bhavannajādimaṇḍalam || 23 ||
[Analyze grammar]

tāḥ sarvā api kālena prasādabhakṣikā yataḥ |
niṣpāpāḥ puṇyavatyaśca prayāsyanti paraṃ padam || 24 ||
[Analyze grammar]

śyeno'pi mama dehasya prasādapāvitasya vai |
bhakṣaṇena puṇyabalo bhaviṣyati na saṃśayaḥ || 25 ||
[Analyze grammar]

śanaiḥ śanaiḥ kaṇabhakṣī bhaviṣyatyutkare sthitaḥ |
prasādakaṇabhug bhūtvā vaikuṇṭhaṃ sa prayāsyati || 26 ||
[Analyze grammar]

ityuktvā caṭakā badri natvā saṃpūjya cāmṛtam |
vāri pītvā yayau svargaṃ sarveṣāṃ paśyatāṃ parī || 27 ||
[Analyze grammar]

mahāścaryamabhūtteṣāṃ paśyatāṃ dehināṃ tadā |
badrike cātha caṭakāṃ śyenaḥ sa bubhuje tadā || 28 ||
[Analyze grammar]

odanaṃ susugandhaṃ ca prasādocchiṣṭamityapi |
bubhuje'nyānnakaṇakān śṛtān svādūn sumodavān || 29 ||
[Analyze grammar]

miṣṭānnakhaṇḍakāṃścāpi ghṛtapakvān surandhitān |
kaccarasthān nityamevamāgatya śyena āda tān || 30 ||
[Analyze grammar]

pūtātmā cā'bhavacchyenastatyāja māṃsabhakṣaṇam |
jātismaro'bhavattena mokṣamaicchannijātmanaḥ || 31 ||
[Analyze grammar]

caṭakānāṃ tathā mokṣamaikṣat purā'jajanmanām |
nityaṃ śyenastaruṣaṇḍe pratīkṣan caṭakāgamam || 32 ||
[Analyze grammar]

pracchannastiṣṭhati kroḍe divase cotkaronmukhaḥ |
caṭakāśca samāyānti prasādocchiṣṭavāñcchayā || 33 ||
[Analyze grammar]

bhakṣayantyekacittāśca tāvatpatati pakṣirāṭa |
caṭakaṃ vā caṭakāṃ vā samādatte'danāya saḥ || 34 ||
[Analyze grammar]

caṭakā'pi mṛtā tūrṇaṃ devo vā devatā tadā |
bhūtvā yātyambaraṃ svargaṃ prayātyeva mudā'vyayam || 35 ||
[Analyze grammar]

evaṃ nityaṃ prakurvāṇaścaikadā''ha tarau sthitaḥ |
caṭakā yūyamevādāvajā āsta śubhā mama || 36 ||
[Analyze grammar]

karmayogena janmā'tra bhavatīnāṃ hi vartate |
mayā pūrvaṃ bhavatīnāṃ dugdhānyatithaye tathā || 37 ||
[Analyze grammar]

sādhubhyo dharmakāryārthaṃ nārāyaṇāya caikadā |
arpitāni śivarātryāṃ śivasnānārthamityataḥ || 38 ||
[Analyze grammar]

tena puṇyapratāpena bhavatyaścaṭakāstviha |
sañjātā api kṛṣṇasya prasādocchiṣṭabhakṣikāḥ || 39 ||
[Analyze grammar]

pavitrāḥ puṇyaśālinyo bhavathaiva divārthikāḥ |
smarantu pūrvajanmā'dya spṛṣṭvā māṃ bharavāṭakam || 40 ||
[Analyze grammar]

śyenātmānaṃ tato yāntu divaṃ vaikuṇṭhamityapi |
śrīsaṃhitākathāṃ śrutvā prapūjya vācakaṃ tathā || 41 ||
[Analyze grammar]

sādhūn sampūjya divyān vai mokṣadān yāntu mokṣaṇam |
ityevaṃ badrike jātismaraḥ śyeno jagāda tān || 42 ||
[Analyze grammar]

te'pi sarve caṭakāśca narā nāryastadā śubhām |
śyenagiraṃ samākarṇya mahāścaryapuraḥsarāḥ || 43 ||
[Analyze grammar]

sasmaruḥ pūrvajanmāni bharavāṭasya tā ajāḥ |
tadā viśvāsamāpannā nemuḥ śyenaṃ purā patim || 44 ||
[Analyze grammar]

śyeno'pi satkṛtastaiśca samāyayau tamutkaram |
militaścaṭakebhyaśca caṭakābhyaśca sādaram || 45 ||
[Analyze grammar]

jātismarāḥ samastāste vṛttāntān jagadurmithaḥ |
utsavaṃ menire tatra bubhujire prasādakam || 46 ||
[Analyze grammar]

ahiṃsāvratamāsthāya nyūṣustarugaṇe mithaḥ |
ucchiṣṭaṃ bhakṣayantaste śṛṇvantaśca kathāmṛtam || 47 ||
[Analyze grammar]

māsaṃ mitho'vasan tāvanmṛtyusteṣāmupāyayau |
sarve kṣapitakarmāṇo niṣpāpāścaṭakādayaḥ || 48 ||
[Analyze grammar]

vaiśākhakṛṣṇadvādaśyāṃ madhyāhnottarameva ha |
prasādocchiṣṭabhakṣāste śyenena sahasā saha || 49 ||
[Analyze grammar]

tyaktadehā abhavaṃśca babhūvurdevajātayaḥ |
sahasraśaḥ surā devyaḥ sarvābharaṇabhūṣitāḥ || 50 ||
[Analyze grammar]

tannetā bharavāṭo'pi deveśvaro vyajāyata |
gṛhītakaramālāste gṛhītakusumāstathā || 51 ||
[Analyze grammar]

saṃhitāṃ te prapūjyāpi vyāsaṃ prapūjya vai drutam |
dhṛtvā dhūliṃ kathābhūmerjanitvā''ścaryamuttamam || 52 ||
[Analyze grammar]

jayaśabdānuccaranto yayuḥ svargaṃ sahasraśaḥ |
badrike te divo'nte ca vaikuṇṭhaṃ dhāma śobhanam || 53 ||
[Analyze grammar]

prayāsyanti mahābhāgā muktā muktānikāstadā |
tatra nārāyaṇaṃ lakṣmīṃ prasevya kṛpayā hareḥ || 54 ||
[Analyze grammar]

golokaṃ saṃprayāsyanti rādhākṛṣṇakṛpālayāḥ |
tatra prasādya rādhāṃ ca kṛṣṇaṃ prasādya vai tataḥ || 55 ||
[Analyze grammar]

prayāsyantyakṣaraṃ dhāma paramaṃ śāśvataṃ sukham |
ityetat kathitaṃ tubhyaṃ māhātmyaṃ tu kathodbhavam || 56 ||
[Analyze grammar]

prasādasyāpi māhātmyaṃ yasya pāṭhācchruterapi |
bhuktirmuktirdivaṃ sveṣṭaṃ labhet kṛṣṇakṛpālavāt || 57 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne'jāpālabharavāṭasya śyenajanmani ajānāṃ caṭakājanmasu ca hareḥ sādhūnāṃ ca prasādocchiṣṭabhakṣaṇalābhena kathālābhena ca mokṣaṇa |
mityādinirūpaṇanāmā'ṣṭaṣaṣṭitamo'dhyāyaḥ || 68 ||
[Analyze grammar]