Chapter 32

śrīnaranārāyaṇa uvāca |
śṛṇu badrīpriye devi phaṇāgrāmasya vāsinīm |
kulālīṃ kuṃbhakartrīṃ vai bhaktāṃ nāmnā sunāriṇīm || 1 ||
[Analyze grammar]

bhadrātīre phaṇāgrāme'vasat sā kuṃbhakāriṇī |
mṛttikānāṃ supātrāṇi nirmāya patinoditā || 2 ||
[Analyze grammar]

vikrīṇāti gṛhe naije na yāti sā bahiḥ kvacit |
patirnāmnā raṇastambo dhṛtvā pātrāṇi vāhane || 3 ||
[Analyze grammar]

pakkāni bahudhānyeva yāti grāmāntaraṃ kvacit |
vikrayārthaṃ tato mūlyaṃ cānnaṃ prāpya nijagṛham || 4 ||
[Analyze grammar]

prayātyeva sadā tvāyadravyād bhāgaṃ daśāṃśakam |
kṛṣṇārthaṃ sādhusādhvyarthaṃ vyayatyeṣo hi dhāmikaḥ || 5 ||
[Analyze grammar]

raṭate śrīkṛṣṇanārāyaṇaṃ śrīpuruṣottamam |
pātreṣu kṛṣṇakṛṣṇeti likhatyeṣaḥ śalākayā || 6 ||
[Analyze grammar]

gṛhe tena kṛtā mūrtiḥ kṛṣṇanārāyaṇasya hi |
badrike pūjanaṃ tasyāḥ karoti kuṃbhakṛt prage || 7 ||
[Analyze grammar]

sunāriṇī ca tatpatnī snātvā karoti pūjanam |
 roṭakaṃ cāpi takraṃ ca naivedye pradadāti vai || 8 ||
[Analyze grammar]

jalaṃ dīpaṃ mukhavāsaṃ pūgīphalaṃ dadāti ca |
natvā karoti kāryāṇi pratyahaṃ tadanantaram || 9 ||
[Analyze grammar]

madhyāhne'pi tathā tasmai nivedya bhojanādikam |
prāsādikaṃ sadā'śnāti kuṃbhakāro'pi vai tataḥ || 10 ||
[Analyze grammar]

karoti yātrikāṇāṃ ca sevāṃ satāṃ suyoginām |
sādhvīnāṃ ca yatīnāṃ ca bhaktibhāvena bhojanaiḥ || 11 ||
[Analyze grammar]

pādasaṃvāhanādyaiśca jalapānādibhistathā |
āvāsadānaiḥ satataṃ śuśrūṣayā muhurmuhuḥ || 12 ||
[Analyze grammar]

aputrayostayoricchā putrārthinī vyavartata |
sādhūnāmagratastau tu pṛcchamānau susādhubhiḥ || 13 ||
[Analyze grammar]

anapatyau jagadatuścāśīrvādāṃstu sādhavaḥ |
sā'patyau putrikāputravantau bhavatamityamū || 14 ||
[Analyze grammar]

yuñjantyeva sadā bhaktyā prasāditā mahāśayāḥ |
atha kālāntare putro'bhavanmānasarañjanaḥ || 15 ||
[Analyze grammar]

sādhudharmā sādhuvṛttiḥ sarvasampadvivardhanaḥ |
yasya kaṇṭhe'bhavaccihnaṃ mālāyāḥ śobhanaṃ param || 16 ||
[Analyze grammar]

dṛṣṭvā tu mumude mātā pitā cānye'pi darśakāḥ |
sādhavaśca tathā satyo vīkṣya mālāṃ mudaṃ yayuḥ || 17 ||
[Analyze grammar]

putro'pi satataṃ dhyānī nārāyaṇeti vāṅmayaḥ |
anabhyasto'pyatra dehe pūrvābhyāsena śikṣitaḥ || 18 ||
[Analyze grammar]

nārāyaṇeti vai nāma jagrāha kākalīgirā |
aho bhāgyamaho bhāgyaṃ yadgṛhe mālikāyutaḥ || 19 ||
[Analyze grammar]

suto nārāyaṇabhakto vyajāyata satāṃ kṛpā |
suto vyavardhata bhaktyā varṣmaṇā yaśasā dhiyā || 20 ||
[Analyze grammar]

āyānti viśrutaṃ draṣṭuṃ kīdṛṅmālāyuto hi saḥ |
sādhavo bahavaḥ satyo yātrālavo'pyanekaśaḥ || 21 ||
[Analyze grammar]

āyānti mānavāścāpi grāmanagaravāsinaḥ |
 deśagāścāpi saurāṣṭranaranāryaḥ sakautukāḥ || 22 ||
[Analyze grammar]

draṣṭumāyānti taṃ bālaṃ mālāyuktaṃ manoharam |
bālo nārāyaṇaṃ kṛṣṇaṃ bālakṛṣṇaṃ śriyaḥpatim || 23 ||
[Analyze grammar]

anādiśrīkṛṣṇanārāyaṇaṃ hariṃ raṭatyati |
śrutvā dṛṣṭvā kṣaṇaṃ sthitvā kṛtvā bālakavandanam || 24 ||
[Analyze grammar]

mahābhaktaṃ tu devāṃśaṃ matvā kṛṣṇāṃśameva vā |
datvopadā annavastramudrāsvarṇaphalāni ca || 25 ||
[Analyze grammar]

ratnamāṇikyapātrāṇi prayānti kṛtipāvanāḥ |
kuṃbhakāragṛhaṃ pūrṇaṃ smṛddhyā jātaṃ susampadā || 26 ||
[Analyze grammar]

janapravāhasaṃśobhaṃ sādhuvāsaistu mandiram |
putraprāptyā prasiddhaṃ ca tīrthaṃ sarvamanoharam || 27 ||
[Analyze grammar]

athaikadā ṛṣistatra sārāyaṇaḥ samāyayau |
sevitaḥ kuṃbhakārābhyāṃ prasāditaśca bhojanaiḥ || 28 ||
[Analyze grammar]

vanditaścāpi pṛṣṭaśca putrasya mālikāṃ prati |
kathaṃ mālāsamaṃ cihnaṃ kīdṛśaṃ bhāgyamasya tu || 29 ||
[Analyze grammar]

kīdṛśo'yaṃ ca kiṃkarmā kimāyuḥ kiṃvidho hyayam |
śrutvā sārāyaṇaḥ sādhurdṛṣṭvā rekhāṃ lalāṭajām || 30 ||
[Analyze grammar]

bhāgyaṃ kṣaṇena vai jñātvā vīkṣya prāgbhavajaṃ tathā |
uvāca kuṃbhakāraṃ taṃ raṇastambaṃ hitāvaham || 31 ||
[Analyze grammar]

raṇastamba bhavānāste bhaktarāṭ saha yoṣitā |
kṛṣṇanārāyaṇaḥ sākṣād bhagavān sevyate tvayā || 32 ||
[Analyze grammar]

mūrtirūpo gṛhe nityaṃ sevyante sādhavastathā |
sādhvyaśca tīrthatulyā vai sevyante tīrthayāyinaḥ || 33 ||
[Analyze grammar]

tava pātrāṇi sarvāṇi mṛjjātāni tu yāni vai |
tatra tvayā kṛṣṇakṛṣṇa likhyate smaryate hariḥ || 34 ||
[Analyze grammar]

pāvanaṃ hṛdayaṃ te'sti patnī te pāvanī sadā |
bhaktānī vartate sādhvī yathā muktānikā satī || 35 ||
[Analyze grammar]

sādhusādhvīyogiyatijanāśīrvādatastava |
gṛhe putro'yamutpanno nakṣatreśo hi candramāḥ || 36 ||
[Analyze grammar]

patnī te nityamevā'tra prātaḥ pūjanakāriṇī |
hariṃ cārthayate sādhvī putraṃ candranibhaṃ śubham || 37 ||
[Analyze grammar]

hareḥ kṛpayā sādhūnāmāśīrvādaistathā tava |
  nakṣatramālikākaṇṭhaḥ putro'yaṃ samajāyata || 38 ||
[Analyze grammar]

devatā candramāścāste putraste'yaṃ tu mānavaḥ |
 api devasamaścāste kṛṣyante yena mānavāḥ || 39 ||
[Analyze grammar]

candrāṃśaṃ taṃ sutaṃ prāpya labha svargasukhāni vai |
bhāvikāle sutaste'yaṃ mānavānāṃ mahān guruḥ || 40 ||
[Analyze grammar]

vaiṣṇavaḥ paramaḥ śreṣṭho bhaviṣyati na saṃśayaḥ |
candrastambeti tannāma khyātaṃ loke bhaviṣyati || 41 ||
[Analyze grammar]

putravān dhanavān bhūtvā tataḥ sādhurbhaviṣyati |
pitrormuktiṃ kārayitvā tyāgavān sa bhaviṣyati || 42 ||
[Analyze grammar]

ityuktvā ṛṣirāṭ sārāyaṇo yayau tu raivatam |
kuṃbhakārau samākarṇya prasannau hṛṣṭamānasau || 43 ||
[Analyze grammar]

candrapitarau svau jñātvā menāte bhāgyamuttamam |
candrastambaṃ devarūpamamanyetāṃ tataśca tau || 44 ||
[Analyze grammar]

bālaṃ saubhāgyasampannaṃ siddhiprasevitaṃ suram |
  candrajanmata ārabhya kuṃbhakāragṛhe'niśam || 45 ||
[Analyze grammar]

sampado vai samāyānti samāyānti vibhūtayaḥ |
annasatraṃ mahattena kuṃbhakāreṇa nirmitam || 46 ||
[Analyze grammar]

yatra nityaṃ sahasraṃ vai mānavānāṃ tathā'dhikam |
bhuṃkte miṣṭānnamutkṛṣṭaṃ rājādhirājarājyavat || 47 ||
[Analyze grammar]

raṇastambaścaikadā tu tīrthayātrāmiyeṣa ha |
sunāriṇīṃ priyāmāha yāsyāmo'kṣaratīrthakam || 48 ||
[Analyze grammar]

gururnau lomaśo yatra yatra śrīpuruṣottamaḥ |
parabrahma svayaṃ bālakṛṣṇa iṣṭo virājate || 49 ||
[Analyze grammar]

putrasya mantralabdhiḥ syād gurorhareśca darśanam |
satāṃ brahmapriyāṇāṃ ca darśanaṃ brahmavādinām || 50 ||
[Analyze grammar]

aśvapaṭṭasaraḥsnānaṃ devatīrthādidarśanam |
bhavecca putrasāphalyaṃ sarvasāphalyamityapi || 51 ||
[Analyze grammar]

ityevaṃ badrike kṛtvā niścayaṃ putrasārthakau |
sunāraṇīraṇastambau yayatuḥ kuṃkumasthalīm || 52 ||
[Analyze grammar]

candrastambo naikasaṃkhyamaṇiratnānnavastrayuk |
pitṛbhyāṃ sahitastadvat phaṇiprajājanaiḥ saha || 53 ||
[Analyze grammar]

śakaṭīyānavāhādyairaśvavṛṣakramelakaiḥ |
sahasramānavairnārīnaraiḥ saha yayau tathā || 54 ||
[Analyze grammar]

māghasya pūrṇimāyāṃ te cāśvapaṭṭasarovaram |
prāpuḥ śrīkuṃkumavāpītīrthavāri papurmudā || 55 ||
[Analyze grammar]

aśvapaṭṭasarovāri papuḥ snātvā dināntake |
sāyamārārtrikaṃ cakruḥ sarovarasya te tadā || 56 ||
[Analyze grammar]

śrībadrīpriyovāca |
ārārtrikaphalaṃ śrīmannaranārāyaṇaprabho |
lokānāṃ śreyase mahyaṃ brūhi mokṣapradaṃ param || 57 ||
[Analyze grammar]

śrīnaranārāyaṇa uvāca |
badrike vartikayā tvekayā dhenughṛtāktayā |
ārārtrikavidhātustu mahendrapadamuttamam || 58 ||
[Analyze grammar]

tisṛbhirvartikābhirvai sūryapadamanuttamam |
pañcabhirvartikābhistu bṛhaspateḥ padaṃ bhavet || 59 ||
[Analyze grammar]

saptabhirbrahmaṇaḥ sthānaṃ navabhiḥ śivamandiram |
ekādaśabhirvairājyaṃ trayodaśabhirhiraṇmayam || 60 ||
[Analyze grammar]

pañcadaśabhirmahābhaumaṃ bhavet padaṃ paraṃ tataḥ |
ekapaṃcāśadvartikābhirvāsudevadhāma ca || 61 ||
[Analyze grammar]

ekaśatavartikābhirvaikuṇṭhaṃ vai bhavettathā |
ekādhikaśatadvayavartikābhirnirājakaḥ || 62 ||
[Analyze grammar]

golokaṃ yāti badari śrīkṛṣṇaṃ sevate mudā |
ekādhikapañcaśatavartikābhirnirājakaḥ || 63 ||
[Analyze grammar]

akṣaraṃ paramaṃ dhāma prayātyeva na saṃśayaḥ |
ekādhikasahasravartikābhistu nīrājanam || 64 ||
[Analyze grammar]

yaḥ karoti sa vai tatrā'kṣare gatvottamottame |
anādiśrīkṛṣṇanārāyaṇasya caraṇadvaye || 65 ||
[Analyze grammar]

dāso vā dāsikā bhūtvā śāśvatānandamaśnute |
tādātmyayogamāsādya sarvasvāmitvamaśnute || 66 ||
[Analyze grammar]

sarvaiśvaryādhikāritvaṃ sarvādhikyaṃ samaśnute |
brahmapriyātvaṃ śaśvadvai haripriyātvamityapi || 67 ||
[Analyze grammar]

mahāmuktatvamevā'pi mahāmuktānikātvakam |
aśnute sarvakāmāṃśca saha śrīparabrahmaṇā || 68 ||
[Analyze grammar]

evaṃ phalaṃ badrike'śvapaṭṭārārtrikajaṃ śubham |
aśvapaṭṭajale devāḥ pitaraḥ siddhakoṭayaḥ || 69 ||
[Analyze grammar]

sādhavo munayo yogivaryā gaṇāśca pārṣadāḥ |
brahmavratāstāpasāśca nivasanti ca mātaraḥ || 70 ||
[Analyze grammar]

devyaḥ sarvā nivasanti tīrthānyapi vasanti ca |
rudrabrahmaharayaśca vasanti cāvatārakāḥ || 71 ||
[Analyze grammar]

tadārārtrikakaraṇāt sṛṣṭitrayanīrājanam |
kṛtaṃ bhavati tatpuṇyaṃ sarvaṃ kartuḥ prajāyate || 72 ||
[Analyze grammar]

kṛtvā cārārtrikaṃ paścāt sāndhyaṃ vidhiṃ vidhāya ca |
anādiśrīkṛṣṇanārāyaṇasya svarṇamandiram || 73 ||
[Analyze grammar]

yayurharerdarśanārthaṃ śrīpateḥ paramātmanaḥ |
divyagajāsane devairdevībhistu nirājitaḥ || 74 ||
[Analyze grammar]

pūjitaḥ siddhasaṃghaiśca brahmapriyābhirarcitaḥ |
muktairbhaktaiḥ śaktibhiśca tīrthairupāsito dvijaiḥ || 75 ||
[Analyze grammar]

sadbhirgīto maharṣyādyairvīkṣitastaiḥ pareśvaraḥ |
upadābhiḥ pūjitaśca phaṇāgrāmajanādibhiḥ || 76 ||
[Analyze grammar]

kumbhakāraistathā ratnamaṇyādibhiśca bhūṣaṇaiḥ |
satkṛtaḥ śrīharirbadri candrastambena cārcitaḥ || 77 ||
[Analyze grammar]

tadā candro'bhavaccandro mṛgavāhana ujjvalaḥ |
paśyatāṃ sarvalokānāmoṣadhīnāṃ patistu yaḥ || 78 ||
[Analyze grammar]

amṛtasya ghaṭaṃ śrīmatkṛṣṇanārāyaṇāya saḥ |
pradadāvupadārūpaṃ candrakāntamaṇiṃ tathā || 79 ||
[Analyze grammar]

harirjagrāha sahasā prasannastaṃ maṇiṃ ghaṭam |
dhārayāmāsa kaṇṭhe taṃ maṇiṃ ghaṭaṃ śriyai dadau || 8 ||
[Analyze grammar]

nīrājanaṃ vyadhuḥ kṛṣṇanārāyaṇasya te tataḥ |
hariścāpi dadau tebhyaḥ prāsādikaṃ nijāmṛtam || 81 ||
[Analyze grammar]

akṣarabrahmadhāmotthaṃ pāyayāmāsa tāṃstadā |
tṛptayāmāsa tān sarvān satkāraṃ pracakāra ca || 82 ||
[Analyze grammar]

kṛtakṛtyāśca te bhūtvā yayuḥ śrīlomaśāśramam |
pūjayāmāsurenaṃ te daduḥ phalādikaṃ śubham || 83 ||
[Analyze grammar]

nyūṣustatrāśrame rātrau viśāle sukhasāgare |
bhajanaṃ kīrtanaṃ cakrū rātrau śrīparamātmanaḥ || 84 ||
[Analyze grammar]

prātarmantraṃ jagṛhuśca guroḥ śrīlomaśānmuneḥ |
oṃ namaḥ śrīkṛṣṇanārāyaṇāya svāmine svāhā || 8 ||
[Analyze grammar]

tato nyūṣuḥ pakṣakālaṃ hyamāyāṃ niśi vai tataḥ |
āścaryaṃ darśayāmāsa candrastambo niśārdhake || 86 ||
[Analyze grammar]

pūrṇacandraḥ svayaṃ bhūtvā kaumudīṃ samavāsṛjat |
dugdhāyamānāṃ pṛthivīmambaraṃ ca sarovaram || 87 ||
[Analyze grammar]

kuṃkumavāpikākṣetraṃ samantāddhavalaṃ vyadhāt |
āprātastādṛśo bhūtvā tejastiro vyadhāttataḥ || 88 ||
[Analyze grammar]

kuṃbhakārasuto bhūtvā vyarājata janādiṣu |
evaṃ devaḥ svayaṃ bhaktagṛhe saurāṣṭrake sadā || 89 ||
[Analyze grammar]

bhūtvā tu mānavaścāste lokakalyāṇahetave |
tataścāntadine śrīmallomaśasyopadeśanam || 90 ||
[Analyze grammar]

śrutvā vairāgyavegena sarve tyaktvā gṛhāśramam |
tyāgāśramaṃ jagṛhuśca sādhvyaśca sādhavo'bhavan || 91 ||
[Analyze grammar]

candrastambāyananāmā'bhavaccandro hi sādhurāṭ |
raṇastambāyanasādhuḥ pitā'bhavattadaiva hi || 92 ||
[Analyze grammar]

sunāriṇī satī tatrā'bhavat sādhvī narāyaṇī |
anyā anye ca tatraiva tasthustvājīvanaṃ mudā || 93 ||
[Analyze grammar]

phaṇāgrāmajanāścāpi śrīkṛṣṇa hariyogataḥ |
muktimāpuḥ samayena mahākṣarapadaṃ yayuḥ || 94 ||
[Analyze grammar]

raṇastambo'pi kālena sunāraṇyā samaṃ tataḥ |
muktimavāpa paramā'kṣaradhāmni pade hareḥ || 95 ||
[Analyze grammar]

sevāṃ lebhe tataścandrastambāyano'pi muktarāṭ |
candrāṃśaṃ divi cotsṛtya dhṛtvā muktasvarūpakam || 96 ||
[Analyze grammar]

anādiśrīkṛṣṇanārāyaṇecchayā'kṣaraṃ padam |
yayau mukto mahān bhūtvā pādayoḥ paramātmanaḥ || 97 ||
[Analyze grammar]

kimu te mahimā badri kathayāmi hareriha |
māṇikīsvāminaḥ śrīmatkṛṣṇakāntasya cātmanaḥ || 98 ||
[Analyze grammar]

phaṇāgrāmastato jātaścandragrāmeti viśrutaḥ |
aśvapaṭṭasarovāritīrthaṃ cāndraṃ ca tatra tu || 99 ||
[Analyze grammar]

kaumudīnāmakaṃ tīrthaṃ tata ārabhya gīyate |
paṭhanācchravaṇāttasya badrike taijasaṃ vapuḥ || 100 ||
[Analyze grammar]

samprāpya muktatāṃ labdhvā mahāmokṣamavāpnuyāt |
naro nārī mahānīrājanapuṇyaṃ labheta ca || 101 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne saurāṣṭre phaṇāgrāmasthasya raṇastambākhyakuṃbhakārasya gṛhe sunāriṇīstrībhaktyā candrajanma candrastambādikṛtā kuṃkumavāpīyātrā tatra sarveṣāṃ vāso mokṣaṇaṃ cetyādinirūpaṇanāmā dvātriṃśo'dhyāyaḥ || 32 ||
[Analyze grammar]