Chapter 30

śrīnaranārāyaṇa uvāca |
śṛṇu badrīpriye devi kathāṃ pratāriṇīstriyāḥ |
kṛṣṇanārāyaṇasaṃgānmokṣamārgaṃ tu sā gatā || 1 ||
[Analyze grammar]

āsīd grāme dhavalāre saurāṣṭre carmaṭhākule |
nāmnā nārī viṣalāṇī pratāraṇaparāyaṇā || 2 ||
[Analyze grammar]

putrapautrayutā'pyeṣā pratāraṇe kṛtaśramā |
vañcane sarvathā jñātrī vañcayitrīti viśrutā || 3 ||
[Analyze grammar]

vañcayitrī viṣalāṇī yathā nā'nyā tathā bhuvi |
sarvān sā vañcayatyeva kalayā ca chalena ca || 4 ||
[Analyze grammar]

sarvā nāryo viṣalāṇyā bibhyatyeva pure'nvaham |
yadgṛhaṃ viṣalāṇī sā yāti tatra viśeṣataḥ || 5 ||
[Analyze grammar]

yathākathañciddhāsyena vārtayā vacanena ca |
kṛtrimārthapradānādyaiḥ satyabhrāntikaraistathā || 6 ||
[Analyze grammar]

vastubhirbahudhā dṛṣṭirodhairdṛṣṭipravañcanaiḥ |
moḍanaibhrāmaṇairvyatikramairvinimayaistathā || 7 ||
[Analyze grammar]

ādānapratidānaiśca vañcayatyeva nityaśaḥ |
viśvāsinyastu bahvyo vañcanāṃ yānti tatra ha || 8 ||
[Analyze grammar]

vañcanākhyāṃ kalāṃ yasmānnisargajāṃ pravetti sā |
yadgṛhe yāti sā tatra vañcayitvā gṛhādhipām || 9 ||
[Analyze grammar]

pracchannalābhaṃ saṃgṛhya prayāti tu yathā satī |
vastuhānau vastvalābhe gṛheśī śaṃkate tu tām || 10 ||
[Analyze grammar]

tathā hṛtaṃ bhavedvastu vañcayivyā gṛhānmama |
evaṃ sā vañcanaparā grāmyajanairviniścitā || 11 ||
[Analyze grammar]

vañcanācāramātrajñā sarvacāturyahāriṇī |
vañcanādoṣayuktā sā daṇḍapātraṃ tu yadyapi || 12 ||
[Analyze grammar]

rājñā tathāpi kalayā yataḥ śreṣṭhā'numoditā |
mallānāṃ ca naṭānāṃ ca khelane bahurūpiṇām || 13 ||
[Analyze grammar]

raṅgamadhye samāgatya vañcayatyeva tānapi |
parājayaṃ prayāntyeva jayaṃ naivopayānti te || 14 ||
[Analyze grammar]

pāritoṣikadānādyaṃ vañcayitrī pravindati |
evaṃ sā vañcanaparā hyekadā gṛhato bahiḥ || 15 ||
[Analyze grammar]

yātā tayā vīkṣitaṃ vai sādhūnāṃ maṇḍalaṃ mahat |
śataṃ te sādhavaḥ sādhvyo nirvāṇapadabodhinaḥ || 16 ||
[Analyze grammar]

tasyā grāme gopurānte prākārānte vyadhuḥ sthitim |
atha grāmaprajāḥ sarvā militvā sādhubhojanam || 17 ||
[Analyze grammar]

daduścāpūpamauktikadugdhapākaprapolikāḥ |
caṇakāḥ śreṣṭhaśākāni dadurbhojanamuttamam || 18 ||
[Analyze grammar]

sādhavo bubhujuḥ sarve dṛṣṭvā tad bhojanottamam |
rasāsvādaparā vañcayitrī cā'cintayaddhṛdi || 19 ||
[Analyze grammar]

kenopāyena miṣṭānnaṃ milet tad bhakṣayāmyapi |
janā grāmyāḥ sādhavaśca jānīyurna yathā tathā || 20 ||
[Analyze grammar]

kṛtvā'tra vañcanaṃ bhuktvā tṛptā yāsyāmi me gṛham |
atha sā nijakeśānāṃ jaṭāṃ baddhvā'karojjaṭām || 21 ||
[Analyze grammar]

bhasmāḍhyāṃ tāṃ jaṭāṃ naijāṃ tanūṃ cāpyakarottadā |
dhṛtvā kāṣāyavastrāṇi kare triśūlamityapi || 22 ||
[Analyze grammar]

yoginī sādhvikā bhūtvā sādhvīmaṇḍalamāviśat |
bhuktavatīṣu sādhvīṣu sādhvīpaṃktau sthitā'bhavat || 23 ||
[Analyze grammar]

upaviṣṭā tathā tatra yathā na syāt parekṣaṇam |
bhuktvā pītvā prāpya tṛptiṃ śanairutthāya prasthitā || 24 ||
[Analyze grammar]

na jñātā khalu sādhvībhirgrāmasādhvīti sammatā |
na pṛṣṭā tarkitā kābhiścidiyaṃ grāmayoginī || 25 ||
[Analyze grammar]

grāmajanairvikṛtā sā na yathārthaṃ samīkṣitā |
evaṃ sā vañcanāveṣaṃ dhṛtvā bhuktvā prasādakam || 26 ||
[Analyze grammar]

gṛhaṃ gatvā punarveṣaṃ nijaṃ dhṛtvā'svapat sukham |
evaṃ nityaṃ prayātyeva bhuktvā pañcadināni sā || 27 ||
[Analyze grammar]

āyāti svagṛhaṃ tasyā yāthārthyaṃ na vidurjanāḥ |
sādhusādhvīkṛṣṇaprāsādikaṃ bhuktavatī tu sā || 28 ||
[Analyze grammar]

pāvanaṃ sarvapāpānāṃ kṣālakaṃ tu prasādajam |
jalamannaṃ dalaṃ vāpi phalaṃ śāśvatamuktidam || 29 ||
[Analyze grammar]

pāpino bahavaḥ santi pāpāt pretā bhavanti ca |
adhoyonigatāścāpi jāyante tu ghasāśinaḥ || 30 ||
[Analyze grammar]

vighasāśī sadā mukto bhavatyevā'gharāśibhiḥ |
hareryogaḥ satāṃ yogaḥ sādhvīyogo hi durlabhaḥ || 31 ||
[Analyze grammar]

satsaṃgo durlabhaścāti mileccenmokṣaṇaṃ drutam |
mahāpāpāni naśyanti prasādānnādibhojanāt || 32 ||
[Analyze grammar]

vañcanādiprapāpāni dahyanti śrīprasādataḥ |
ātmā śuddhyati sahasā mokṣayogyo bhavatyapi || 33 ||
[Analyze grammar]

śrībadrīramovāca |
pratāraṇaṃ tu yatkarma katidhā channameva vā |
yena syānnarake vāsastanme nigada keśava || 34 ||
[Analyze grammar]

śrīnaranārāyaṇa uvāca |
śṛṇu badrīpriye devi pratāraṇaṃ tu naikadhā |
yena dehī narakān vai yāni vañcanapāpakṛt || 35 ||
[Analyze grammar]

parameśakṛtaṃ dehaṃ prāpya dehena sevanam |
kuryānna parameśasya vañcitastena mādhavaḥ || 36 ||
[Analyze grammar]

ātmamokṣapradaṃ dehaṃ prāpya mokṣārthasādhanam |
yenā'rjitaṃ na vai tena tvātmā vai vañcito nijaḥ || 37 ||
[Analyze grammar]

sādhūnāṃ yogināṃ cāpi sādhvīnāṃ maṇḍalādiṣu |
bakabhakto bhavedyastu sādhvādyāstena vañcitāḥ || 38 ||
[Analyze grammar]

dhanastrītyāgavairāgyopadeṣṭā yastu mānavaḥ |
tyājayitvā svayaṃ bhuṃkte pratāraṇaṃ tu tanmahat || 39 ||
[Analyze grammar]

viśvāsya bahudhā lābhaṃ darśayitvā vibhinnakam |
snehaṃ kṛtvā kārayitvā dhanaṃ harati vañcanam || 40 ||
[Analyze grammar]

bālaṃ nārīṃ bālikāṃ vā yuvānaṃ dhaninaṃ tathā |
yuvatīṃ vastumātraṃ vā yatra harati vañcanam || 41 ||
[Analyze grammar]

sadṛśaṃ cobhayaṃ vastu nirmūlyaṃ bahumūlyakam |
datvā nirmūlyakaṃ bahumūlyaṃ harati vañcanam || 42 ||
[Analyze grammar]

kāryaṃ pūrṇaṃ kārayitvā paścād yatnaphalaṃ tu yaḥ |
na dadātyalpayatyeva chinatti taddhi vañcanam || 43 ||
[Analyze grammar]

karmaṇā manasā vācā lābhaṃ labdhvā tataḥ param |
na kāryaṃ niṣpādayati vañcako luñcakastu saḥ || 44 ||
[Analyze grammar]

sati dravye dharmakāryaṃ na karoti dadāti na |
na bhuṃkte sā vañcanā vai dravyakṛtā tu nārakī || 45 ||
[Analyze grammar]

tyāgī bhūtvā gṛhasthānāṃ bhogān bhuṃkte dadāti ca |
gṛhasthavaṃśakṛt syād yaḥ saṃsārastena vañcitaḥ || 46 ||
[Analyze grammar]

bhaktyā viśvāsya lokān yaścendriyāṇāṃ vaśo bhavet |
pratāritā tena bhaktirnirayāṇāṃ vidhāyinī || 47 ||
[Analyze grammar]

abhicārādikaṃ kṛtvā svādhīnaṃ prakaroti yaḥ |
punarvaśaṃ kṛtaṃ bhuṃkte dharmastena pratāritaḥ || 48 ||
[Analyze grammar]

yāni kāryāṇi yāvanti sudṛḍhāni bhavanti vai |
tathā teṣāṃ vidhātā na polampolavidhāyakaḥ || 49 ||
[Analyze grammar]

apūrṇakāryakartā ca kaniṣṭhavastuyojakaḥ |
pracchannalābhalobhāḍhyo vañcako nirayānugaḥ || 50 ||
[Analyze grammar]

ghṛtasthāne tu yastailaṃ jalaṃ takraṃ payastathā |
prayuṃkte ca śubhe'niṣṭaṃ vañcako nirayābhigaḥ || 51 ||
[Analyze grammar]

hastine yatra kariṇīṃ darśayitvā tu gartake |
pātayatyeva tadvastukartā pratārako mataḥ || 52 ||
[Analyze grammar]

kanyāṃ surūpāṃ yuvatīṃ pradarśya maṇḍape tu tām |
vihāyā'nyāṃ pradadyāt sa vañcako nirayānugaḥ || 53 ||
[Analyze grammar]

dugdhe pānīyamākṣipya rasavikrayakārakaḥ |
anne tu kaṃkarān dhūliṃ piṣṭe cūrṇaṃ sa vañcakaḥ || 54 ||
[Analyze grammar]

śilpakārye kalākārye saudhakārye ca setuṣu |
mahodyāne pattanādau yantramārge mahāpathe || 55 ||
[Analyze grammar]

kṣetre kūpe taḍāgādau prāpya dravyaṃ prapūrṇakam |
ardhavyayena sarvaṃ tat karoti cādṛḍhaṃ tathā || 56 ||
[Analyze grammar]

nirbalaṃ daragarbhaṃ ca vañcanā narakapradā |
kākānāṃ ca śṛgālānāṃ vānarāṇāṃ svabhāvavat || 57 ||
[Analyze grammar]

vartamāno naro loke vañcanāḍhyo bhavet khalu |
dṛṣṭiṃ dhyānaṃ matiṃ sāvadhānatāṃ praṇidhānatām || 58 ||
[Analyze grammar]

pracyāvya tābhyo harati kurute jayate ca vā |
anyā'niṣṭaṃ vidhatte sa vañcako nirayaṃgamaḥ || 59 ||
[Analyze grammar]

hastidantasamaṃ kāryaṃ bahirdarśanamātrakam |
antastvanyaccarvaṇārthaṃ dantavat svārthasādhakam || 60 ||
[Analyze grammar]

parahiṃsādrohakṛcca vañcanā nirayapradā |
evamādīni sarvāṇi vañcanāni bhavanti vai || 61 ||
[Analyze grammar]

śiṣyo bhūtvā guroḥ sevāṃ yo na karoti bhāvataḥ |
vañcanā sā mahāpāpakarī vai nirayapradā || 62 ||
[Analyze grammar]

patnī bhūtvā svāmino yā sevāṃ karoti naiva ha |
patirbhūtvā satīṃ naiva pālayatyeva vaṃcanā || 63 ||
[Analyze grammar]

kiṃkaro na karotyeva śreṣṭhikāryaṃ tu vañcanā |
garadā vahnidā nāśayogadā vañcakāstu te || 64 ||
[Analyze grammar]

stenakarmaratāḥ sarve vañcakā nirayaṃgamāḥ |
etādṛśānāmuddhāraḥ satāṃ samāgame bhavet || 65 ||
[Analyze grammar]

indro bhūtvā gautamābho'halyāmavañcayaddhi saḥ |
ahaṃ jālandharo bhūtvā vṛndāmavañcayaṃ purā || 66 ||
[Analyze grammar]

evaṃvidhā vañcanā vai badrike duḥkhadā matā |
śāpo vā duḥkhamevā'pi nirayo vā bhavettataḥ || 67 ||
[Analyze grammar]

yadyapyahaṃ sarvakartā sarvapatiḥ pareśvaraḥ |
nirdoṣaḥ pāvano māyāpāvakaḥ sarvamokṣakṛta || 68 ||
[Analyze grammar]

surakāryakṛte bhaktakṛte kvacittu vañcanām |
karomi daityanāśārthaṃ doṣo me naiva vidyate || 69 ||
[Analyze grammar]

jīvānāṃ karmabhogānāṃ doṣastatra prajāyate |
evaṃ sā chalanā proktā satāṃ saṃgena naśyati || 70 ||
[Analyze grammar]

sādhūnāṃ saṃgamo badri pāvanaḥ pāpanāśakaḥ |
viṣalāṇī satāṃ saṃgājjātā pāpādivarjitā || 71 ||
[Analyze grammar]

sādhūcchiाṣṭādanāt kāyakṛtāghaṃ saṃvinaśyati |
sādhusparśādiyogenendriyapāpaṃ vinaśyati || 72 ||
[Analyze grammar]

sādhusevābhāvabhaktyā manaḥpāpaṃ vinaśyati |
sādhvarpaṇena jīvasya sarvaṃ pāpaṃ vinaśyati || 73 ||
[Analyze grammar]

sādhuścāhamahaṃ sādhuḥ sādhuḥ śrīkṛṣṇamādhavaḥ |
mādhavīśaḥ svayaṃ sādhuḥ prabhuḥpatiḥ satāṃ patiḥ || 74 ||
[Analyze grammar]

evaṃ sā sādhupaṃktau vai bhojanena vipāpinī |
śuddhā jātā tataścāsyā vivekaḥ samapadyata || 75 ||
[Analyze grammar]

aho'haṃ vañcanākartrī sarvathā pāpakāriṇī |
yatra pāpāni naśyanti tatrāpi vañcanāparā || 76 ||
[Analyze grammar]

bhojanārthaṃ kṛtā pratāraṇā kiṃ kṣudrakarmaṇā |
mokṣakarma karomyadyā'dhunā cottarakālikam || 77 ||
[Analyze grammar]

sādhusevāṃ satīsevāṃ kṛtvā'parādhanāśanam |
vandanaṃ ca satāṃ mokṣaṃ yāsye vai paramaṃ padam || 78 ||
[Analyze grammar]

iti vicārya sahasā labdhvā dhanāmbarāṇi ca |
yayau sādhunivāsaṃ sā dadau tebhyo dhanāmbaram || 79 ||
[Analyze grammar]

bhojanaṃ pradadau cāpi pādasaṃvāhanaṃ vyadhāt |
satāṃ pādajalaṃ pītvā tuṣṭā'bhavad rajo nyadhāt || 80 ||
[Analyze grammar]

śirasyeva śarīre'pi vakṣasi śrīhariśritā |
uvāca sattamaṃ tatra guruṃ bhadrāyanaṃ hi sā || 81 ||
[Analyze grammar]

mokṣo me syād yathā yena vañcanāpāpasaṃkṣayaḥ |
punarjanma bhavennaiva tathā me kuru sadguro || 82 ||
[Analyze grammar]

śrutvā bhadrāyanaḥ sādhurvaiṣṇavottama uktavān |
oṃ namaḥ śrīkṛṣṇanārāyaṇāya pataye svāhā || 83 ||
[Analyze grammar]

raṭa mantraṃ sadā sādhvi kāṣāyāmbaradhāriṇī |
jaṭāyuktā bhasmayuktā nārāyaṇaparāyaṇā || 84 ||
[Analyze grammar]

yāhi śrīkuṃkumavāpīṃ yatra śrīkṛṣṇamāpatiḥ |
virājate hi bhagavān sākṣāt sarvāntaraḥ prabhuḥ || 85 ||
[Analyze grammar]

avatārī cākṣareśo yatrāste lomaśaḥ ṛṣiḥ |
aśvapaṭṭasarastīrthaṃ vartate pāvanaṃ param || 86 ||
[Analyze grammar]

yatra santi ca tīrthāni maharṣayo'pyanekaśaḥ |
sādhvyaśca sādhavaścāpi muktā muktānikāstathā || 87 ||
[Analyze grammar]

śrīrādhāmāṇikīkṛṣṇāramābhūkamalādikāḥ |
koṭyarbudābjasakhyaśca nārāyaṇasya patnikāḥ || 88 ||
[Analyze grammar]

surāḥ surāṇyo yoginyo vidyante yāhi tatra ha |
bhuktirmuktistava syātāṃ pāpānāṃ nāśanaṃ tathā || 89 ||
[Analyze grammar]

yadyapyatra hi sādhūnāṃ sevayā pāpanāśanam |
jātaṃ tava viśuddhiśca jātā mā khedamāvaha || 90 ||
[Analyze grammar]

tathāpi bhūtale kṛṣṇakāntaṃ prāpya sukhāśrayā |
divyā bhūtvā yāhi mokṣaṃ mā ciraṃ viṣalāṇike || 91 ||
[Analyze grammar]

ityuktā viṣalāṇī sā badrike drutameva hi |
padbhyāmāhiḍya mārgeṣu yayāvaśvasarovaram || 92 ||
[Analyze grammar]

snātvā''śramaṃ lomaśasya gatvā pādāvavandayat |
pādajalaṃ tataḥ pītvā natvā maharṣimaṇḍalam || 93 ||
[Analyze grammar]

āśramasya rajo dehe sammṛdya kīrtanaṃ hareḥ |
gāyamānā yayau kṛṣṇanārāyaṇaṃ prabhuṃ harim || 94 ||
[Analyze grammar]

anādiśrīkṛṣṇanārāyaṇaśrīvallabham prabhum |
pratyakṣaṃ śāntiyugrūpaṃ sundaraṃ puruṣottamam || 95 ||
[Analyze grammar]

dṛṣṭvā mumoha sahasā mūrtau stabdhā'bhavat kṣaṇam |
āsaktā dhyānamagnā ca kṛṣṇalīneva sā'bhavat || 96 ||
[Analyze grammar]

sendriyā'ntaḥkaraṇā sā sajīvā tanmayī tadā |
dehabhānavihīnā ca jātā sā yoginī yathā || 97 ||
[Analyze grammar]

badrike kṣaṇamātraṃ cen mūrtau me sarvathā sthitim |
niścalāṃ labhate kaścit pūto muktimavāpnuyāt || 98 ||
[Analyze grammar]

adhairyapreriyā drāk sā kṛṣṇapārśvamupāgatā |
kṛṣṇanārāyaṇaṃ cāṃke kṛtvā cucumba bhāvukī || 99 ||
[Analyze grammar]

haristāṃ cumbanaṃ datvā'pāvayat samatoṣayat |
sparśamātreṇa muktā sā bhavasāgarabandhanāt || 100 ||
[Analyze grammar]

badrike divyadehā sā rādheva samajāyata |
yuvatī sadguṇairyuktā vāsanādoṣavarjitā || 101 ||
[Analyze grammar]

sarvakarmavihīnā sā brāhmī strīḥ samajāyata |
jñānavatī divyadṛṣṭimatī śrīvallabham prabhum || 102 ||
[Analyze grammar]

astaut sādhvī pādajalaṃ payau harestato drutam |
vimānamāgataṃ divyaṃ kṛṣṇanārāyaṇecchayā || 103 ||
[Analyze grammar]

āruhya tvājñayā divyākṣaraṃ padaṃ yayau hi sā |
evaṃ pratāriṇī nārī viṣalāṇī satāṃ hareḥ || 104 ||
[Analyze grammar]

yogena pāvanī bhūtvā yayau mokṣapadaṃ param |
badrike śravaṇādasya vañcanā'ghaṃ praṇaśyati || 105 ||
[Analyze grammar]

itiśrīlakṣmīnārāyaṇīyasaṃhitāyāṃ caturthe tiṣyasantāne vañcayitryā viṣalāṇīnāmikāyāḥ satāṃ prāsādikānnajalabhojanādinā vivekodbhavaḥ tīrthe'nādikṛṣṇanārāyaṇaprāptyā mokṣaṇaṃ cetyādinirūpaṇanāmā triṃśo'dhyāyaḥ || 30 ||
[Analyze grammar]