Chapter 74

śrīkṛṣṇa uvāca |
śṛṇu rāseśvari śrīmatkṛṣṇanārāyaṇotsave |
navame vatsare'ṣṭamyāṃ samājo'bhūt trilokinām || 1 ||
[Analyze grammar]

muktāstathā'vatārāśca muktānyo'dhīśvarāstathā |
īśvariṇyaḥ surā devyaḥ pitaro munayastathā || 2 ||
[Analyze grammar]

ārṣyaḥ kāśyapavaṃśāśca kāśyapyo mānavāstathā |
nāgā daityādayo vṛkṣā vallayaḥ paśupakṣiṇaḥ || 3 ||
[Analyze grammar]

jalajāḥ sthalajāścāpi sthāvarā jaṅgamā api |
āyayuḥ sādhavaḥ sādhvyaḥ kalā nadyaśca sāgarāḥ || 4 ||
[Analyze grammar]

ṛtavo vasavaścāpi parvatāstīrthakoṭayaḥ |
digīśvarāśca rājāno dīnāndhakṛpaṇādayaḥ || 5 ||
[Analyze grammar]

samāyayurbālakṛṣṇaṃ pūjayāmāsurādarāt |
āśīrvādān daduścāpyupadā nyadhuḥ puro hareḥ || 6 ||
[Analyze grammar]

lomaśena kṛtā pūjā tathānyairmunibhiḥ śubhā |
āgatānāṃ ca satkāraṃ cakre gopālakṛṣṇakaḥ || 7 ||
[Analyze grammar]

dadau miṣṭāmṛtabhojyabhakṣyalehyāni kambharā |
pānāni madhuparkādi jalatāmbūlakāni ca || 8 ||
[Analyze grammar]

sarvairnīrājanaṃ cāvartitaṃ śataikavartibhiḥ |
stutaḥ śrīmatkṛṣṇanārāyaṇasvāmī pareśvaraḥ || 9 ||
[Analyze grammar]

dadau prasādametebhyo viśramyāśīrvidhāya ca |
yayurvimānakairnaijān deśān lokān digantakān || 10 ||
[Analyze grammar]

athā''ścaryamabhūt sāyaṃ śṛṇu nīrājanottaram |
gurjare kimanadyāstu taṭe cottarataḥ śubhā || 11 ||
[Analyze grammar]

kuśāmbānāma nagarī cāturvarṇyajanāśritā |
āsīd yatra maharṣiśca kauśikāmbo mahāmuniḥ || 12 ||
[Analyze grammar]

devadhyānaparo yajñaparo yogakriyāparaḥ |
ākāśagatimāṃścāpi kumbhakāyāmaniṣṭhitaḥ || 13 ||
[Analyze grammar]

anādiśrīkṛṣṇanārāyaṇadhyānaparaḥ sa tu |
dadāti mokṣajñānaṃ ca śaraṇāgatavatsalaḥ || 14 ||
[Analyze grammar]

brāhmaṇāḥ kṣatriyā vaiśyāḥ śūdrāścāntyajajātayaḥ |
ye kecittu samāyānti svāśramaṃ tānabodhayat || 15 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
iti mantraṃ sadā prāptaśiṣyebhyaḥ pradadāti ca || 16 ||
[Analyze grammar]

ekadā tvantyajo nāmnā tryaṣṭakārustu nirdhanaḥ |
strīsaṃyuktaḥ samāyāto darśanārthamṛṣeḥ prage || 17 ||
[Analyze grammar]

anapatyo'bhavaccāpi jalodaraprapīḍitaḥ |
patnītasyā'bhavat kuṣṭharogavyāptā'tiduḥkhitā || 18 ||
[Analyze grammar]

kauśikāmbo maharṣiśca kathāṃ nityaṃ karoti hi |
lakṣmīnārāyaṇasaṃhitāyā yatra sabhāsthale || 19 ||
[Analyze grammar]

tatra gatvā'ntyajo vṛkṣacchāyāyāṃ niṣasāda ha |
kathāṃ śṛṇoti tatraiva bhāryayā saha bhāvataḥ || 20 ||
[Analyze grammar]

śrutaṃ tatra tu saurāṣṭre'nādikṛṣṇanarāyaṇaḥ |
paradhāmapatiḥ sarvasvāmī śrīpuruṣottamaḥ || 21 ||
[Analyze grammar]

vartate bālarūpeṇa śrīmadgopālanandanaḥ |
aśvapaṭṭasaraḥkṣetre parabrahma pumuttamaḥ || 2 ||
[Analyze grammar]

yasya vandanamātreṇa nāmamantragraheṇa ca |
rogā dainyaṃ ca dāridryaṃ cānapatyādikaṃ tathā || 23 ||
[Analyze grammar]

sarvaṃ layaṃ prayātyeva saubhāgyaṃ ca vivardhate |
iṣṭaprāptirbhavecchīghraṃ taccharaṇāgatasya vai || 24 ||
[Analyze grammar]

iti śrutvā kathānte ca prayāte śrotṛvargake |
āmadhyāhnaṃ cāśramānte vaṭo'dhaḥsaṃsthito'bhavat || 25 ||
[Analyze grammar]

cintayatyeva tadvākyaṃ kathaṃ pṛcchāmi taṃ munim |
antarveditvaśaktyā vai jñātvā tanmānasaṃ muniḥ || 26 ||
[Analyze grammar]

kauśāmbikastvantyajaṃ tam āhvayāmāsa cāstikam |
brahmabhaktaṃ sujijñāsuṃ jñātvā svāśramamāgatam || 27 ||
[Analyze grammar]

tīrthāgataṃ dadau tasmai bhojyaṃ jalaṃ phalādikam |
svāgataṃ cāpi satkāraṃ kṛtavān sarvamitrakaḥ || 28 ||
[Analyze grammar]

viśrāntaṃ taṃ tvantyajaṃ ca papraccha kuta eva ha |
kathaṃ cātrāgato bhakta vada yanmānase sthitam || 29 ||
[Analyze grammar]

bhaktaḥ sa tryaṣṭakāruśca prāha vinayamāvahan |
kṛtvā'tha daṇḍavat gṛṇan maharṣervijayo'stu vai || 30 ||
[Analyze grammar]

kṣemaṃ cāstu kuśalaṃ ca saukhyamṛṣeḥ sadā'stu vai |
ciraṃ jīvatu cittajña dayālo devadevate || 31 ||
[Analyze grammar]

bhavādṛśaḥ sādhavo'tra tārakāḥ pāpināṃ guro |
pāpakṣālanakāryārthaṃ yadahaṃ cātra saṃgataḥ || 32 ||
[Analyze grammar]

kāryaṃ me saphalaṃ jātaṃ tīrthaṃ me paramaṃ tathā |
sākṣād devasvarūpasya darśanāt kṛtakṛtyatā || 33 ||
[Analyze grammar]

kathālābhena me janmasāphalyaṃ tvadya vartate |
anugraheṇa bhavato bhāgyaṃ me'dya vivardhate || 34 ||
[Analyze grammar]

ahaṃ pāpī cāntyajo'smi tārito'haṃ tvayā guro |
ityuktvā cāśramadhūliṃ mastake dhṛtavān muhuḥ || 35 ||
[Analyze grammar]

paścāduvāca ca muniṃ yadyājñā bhavato'sti cet |
pracchāmi mānasaṃ yatra ramate me kathāśravāt || 36 ||
[Analyze grammar]

ṛṣiḥ prāha sukhaṃ pṛccha te jānāmi mumukṣutām |
nā'yamāpmā'ntyajaḥ kvāpi śuddhaḥ sattvamayaḥ sadā || 37 ||
[Analyze grammar]

śarīraṃ cāntyajaṃ pūrvakarmaṇā jāyate'sya vai |
evaṃ śrutvā'ntyajaḥ prāha kathaṃ cāhaṃ tathā'bhavam || 38 ||
[Analyze grammar]

anādiśrīkṛṣṇanārāyaṇaḥ kathamavāpyate |
kiṃ mayā mokṣasiddhyarthaṃ kartavyaṃ cātra daivikam || 39 ||
[Analyze grammar]

anapatyatvanāśārthaṃ roganāśārthamityapi |
kiṃ mama syādanuṣṭheyaṃ vada me kṛpayā prabho || 40 ||
[Analyze grammar]

iti pṛṣṭho muniḥ prāha śṛṇu cāntyaja karma te |
purā tvamabhavo vipraḥ saptapurādrivāsakṛt || 41 ||
[Analyze grammar]

nāmnā devapriyaśceyaṃ patnī te dyumatī tadā |
tatra viṣṇormandiraṃ ca lakṣmīnārāyaṇānvitam || 42 ||
[Analyze grammar]

vartate tatra pūjāṃ tvamakarordāsavat sadā |
patnī te pākaśālāṃ ca naivedyārthaṃ tadā'karot || 43 ||
[Analyze grammar]

śaitye snānaṃ vinā tvaṃ ca malino malināmbaraḥ |
mamārcanaṃ sparśanaṃ cā'karostvaṃ ca tava priyā || 44 ||
[Analyze grammar]

agālitasalilena pākādikaṃ tadā'karot |
asnātā cā'dhautavastrā naivedyaṃ cārpayattadā || 45 ||
[Analyze grammar]

agālitaṃ jalaṃ cāpi matpānārthaṃ samārpayat |
aśuddhadehā māṃ nityamaspṛśadbhāminī tava || 46 ||
[Analyze grammar]

rājasvalyādikaṃ ceyaṃ tadā nātīva manyate |
evaṃ tvaśuddhijaṃ pāpaṃ bhuktavantau yuvāṃ ciram || 47 ||
[Analyze grammar]

yamaloke vaitaraṇyāṃ tato mārjāratāṃ gatau |
tataścāntyajadehasthau stha idānīṃ daivasevayā || 48 ||
[Analyze grammar]

puṇyaśeṣeṇa ca sādhusaṃgatiṃ kurutho'naghau |
kālāntarakṛtā sevā pitrordevasya vā guroḥ || 49 ||
[Analyze grammar]

janmāntare tu sā śreyaskarī samupatiṣṭhati |
hutaṃ dattaṃ kṛtaṃ japtaṃ sarvaṃ yāti bhavāntare || 50 ||
[Analyze grammar]

hiṃsā pīḍā kṣatirnindā kāpaṭyaṃ chalamugratā |
vañcanā ghātanā sarvaṃ pratyāyāti bhavāntare || 51 ||
[Analyze grammar]

puṇyaṃ pāpaṃ svabhāvaśca saṃskāro vāsanā manaḥ |
indriyāṇi dveṣarāgau prayāntyeva bhavāntare || 52 ||
[Analyze grammar]

abhyāso japanaṃ bhaktiḥ sevā paropakāritā |
śīlaṃ vrataṃ prapattiśca prayāntyeva bhavāntare || 53 ||
[Analyze grammar]

jñānaṃ vijñānamāstikyaṃ viveko devapūjanam |
āśīrvādastathā śāpaḥ prayāntyeva bhavāntare || 54 ||
[Analyze grammar]

ṛṇaṃ pativratā patnī patiḥ patnīvratastathā |
śatravaścātirūḍhāśca prayāntyete bhavāntare || 55 ||
[Analyze grammar]

bhāgyaṃ ca sañcitaṃ karma paścād dattā jalāñjaliḥ |
śrāddhaṃ tapaśca santoṣaḥ prayāntyeva bhavāntare || 56 ||
[Analyze grammar]

yuvābhyāṃ tu kṛtā sevā bhaktirmālinyasaṃbhṛtā |
kālāntare phalaṃ tasyā labdhaṃ yajjanma mānuṣam || 57 ||
[Analyze grammar]

mālinyadoṣajaṃ janma cāntyajaṃ cābhavattataḥ |
rājasvalyādidoṣasya phalaṃ kuṣṭhaṃ hi yoṣitaḥ || 58 ||
[Analyze grammar]

agālitā'mbhasaḥ pānaṃ yadarpitaṃ tu mādhave |
jalodaraṃ tava jātaṃ sadā duḥkhataraṃ tava || 59 ||
[Analyze grammar]

asaṃskṛtānnanaivedyaṃ yadarpitaṃ tvayā harau |
tatphalaṃ tava loke'tra dāridryaṃ cātivartate || 60 ||
[Analyze grammar]

aśraddhāyāḥ phalaṃ pāpaṃ nāstikyamupajāyate |
nāstikyena ca te tatra śrāddhādihīnatā'bhavat || 61 ||
[Analyze grammar]

tena te'trā'napatyatvaṃ vartate cāntyajottama |
kathitastava vṛttāntaḥ pūrvago'trāpi saṃśṛṇu || 62 ||
[Analyze grammar]

antyajo'pi satāṃ sevāṃ tīrthayātrāṃ karoṣi yat |
kathāyāḥ śravaṇaṃ cāpi bhajanaṃ ca karoṣi yat || 63 ||
[Analyze grammar]

tena puṇyapratāpena gurvāśīrvādatastathā |
rogo'napatyatā cāpi dāridryaṃ duḥkhitā tathā || 64 ||
[Analyze grammar]

pīḍāścānyā drutaṃ nāśameṣyanti śrīpateḥ smṛteḥ |
āśrayaṃ śrīkṛṣṇanārāyaṇasya kuruta drutam || 65 ||
[Analyze grammar]

rājate kuṃkumavāpīkṣetre cāśvasarastaṭe |
kambharāśrīgṛhe bālaḥ kṛṣṇo gopālanandanaḥ || 66 ||
[Analyze grammar]

sarvāvatāradhartā ca sarvakāraṇakāraṇam |
sarveśānāṃ niyantā ca sarvāntaryāmisaṃsthitiḥ || 67 ||
[Analyze grammar]

sarvakarmaphalānāṃ sa pradātā mokṣadāyakaḥ |
kartumakartumanyathākartuṃ samartha eva saḥ || 68 ||
[Analyze grammar]

jñānaśaktikriyāśaktikāryakāraṇaśaktimān |
rādhālakṣmīprabhāpāravatīmāṇikyaśaktipaḥ || 69 ||
[Analyze grammar]

saguṇāmañjulāhaṃsālīlābhūdharaṇīśvaraḥ |
vṛndātulasīpadmeśaḥ śaktyaiśvaryavibhūtipaḥ || 70 ||
[Analyze grammar]

nandanāradaśaṃkarasanakādisatāṃ prabhuḥ |
dhātā nidhātā saṃhartā jagatāṃ bhaktamokṣakṛt || 71 ||
[Analyze grammar]

sarvakāmaḥ sarvarasaḥ sarvagandhaḥ samastadṛk |
sarvānandaḥ sarvapātā sarvapatiḥ satīpriyaḥ || 72 ||
[Analyze grammar]

sādhvīnāthaḥ sādhumitra tyāgivaryo gurorguruḥ |
śāśvataṃ paramaṃ tattvaṃ parabrahma sanātanaḥ || 73 ||
[Analyze grammar]

brahmacaryaparā devā nyāsino yoginastathā |
saṃyamino nirodhācca yaṃ prapaśyanti sūrayaḥ || 74 ||
[Analyze grammar]

taṃ prabhuṃ bālakṛṣṇaṃ tvaṃ bhaja patnyā sahā'nvaham |
anādiśrīkṛṣṇanārāyaṇaṃ śrīsvāminaṃ patim || 75 ||
[Analyze grammar]

ādyaṃ vai mānavaṃ rūpaṃ pārameśvarasaṃjñitam |
yuge yuge jāyamānaṃ tato bahusvarūpiṇam || 76 ||
[Analyze grammar]

kṛpārūpaṃ cograrūpaṃ jñānarūpaṃ vṛṣātmajam |
vidyārūpaṃ rājarūpaṃ śāsakaṃ tāpasaṃ ca vā || 77 ||
[Analyze grammar]

vyūharūpaṃ vibhavaṃ vā prātimaṃ cāntarasthitam |
svarūpaṃ sādhurūpaṃ vā bhaja taṃ puruṣottamam || 78 ||
[Analyze grammar]

aṃśarūpaṃ kalārūpamāveśātmakamityapi |
vibhūtiṃ vā pūrṇarūpaṃ paripūrṇaṃ pareśvaram || 79 ||
[Analyze grammar]

avatāraṃ caiśvaraṃ vā viṣṇuṃ mahāpraviṣṇukam |
ākṣaraṃ vā parabrahma paripūrṇāttamottamam || 80 ||
[Analyze grammar]

evaṃ bahuvidhaṃ cainamanādiśrīnarāyaṇam |
bhaja patnyā sahitastvaṃ tato nirvāṇameṣyasi || 81 ||
[Analyze grammar]

ehyāgaccha gṛhāṇedaṃ jalaṃ taccaraṇāmṛtam |
piba dhāraya śirasi dehe prokṣaṇamācara || 82 ||
[Analyze grammar]

pāpāni te vinaśyeyuḥ sastrīkasyātra satvaram |
evamuktvā dadau vāri pūjāprasādajaṃ śubham || 83 ||
[Analyze grammar]

tryaṣṭakāruḥ papau tasya bhāryā papau ca kuṣṭhinī |
jalapānādṛṣerātmabalāt kṛṣṇakṛpālavāt || 84 ||
[Analyze grammar]

jalodaraṃ ca dāridryaṃ kuṣṭhitā cānapatyatā |
catvāraste mahārogā niṣkrāntā dehato'bhavan || 85 ||
[Analyze grammar]

pārśve sthitvā ruruduste nemustaṃ kauśikāmbakam |
kva yāsyāmo vayaṃ vipra jīvanaṃ dehi cā''rthayan || 86 ||
[Analyze grammar]

ṛṣirjalodaraṃ pṛthvyai kadalyai śrīphalāya ca |
dadau vibhāgataścā'pyapeyapānakṛte'pi ca || 87 ||
[Analyze grammar]

satṛṣṇakāya lubdhāya dānasnānaviyogine |
dadau vyasanine cāpi dāridryaṃ lampaṭāya ca || 88 ||
[Analyze grammar]

viyonisaṃgalubdhāya varṇasāṃkaryakāriṇe |
dharmavidveṣiṇe stainyakāriṇe kuṣṭhitāṃ dadau || 89 ||
[Analyze grammar]

parā'patyādihantṛbhyo garbhapātādikāriṇe |
śāpitebhyo'napatyatvaṃ dadau śrāddhavilopine || 90 ||
[Analyze grammar]

ityuktāste caturdoṣā yayustādṛśapātrake |
antyajo nirmalo jātaḥ sastrīko rogavarjitaḥ || 91 ||
[Analyze grammar]

ṛṣistasmai dadau mantraṃ pāvanaṃ pārameśvaram |
oṃ namaḥ śrīkṛṣṇanārāyaṇāya svāmine svāhā || 92 ||
[Analyze grammar]

japaṃ kurvan tatastasthāvāśrame sevako yathā |
yathāyogyaṃ mārjanādi cakārodyānasevanam || 93 ||
[Analyze grammar]

kathāṃ śrutvā babhūvā'sau prakṣīṇakleśavāsanaḥ |
cāndre tu kārtike māse tadā kṛṣṇāṣṭamītithau || 94 ||
[Analyze grammar]

ṛṣirjanmotsavaṃ cakre kṛṣṇanārāyaṇasya vai |
tatra divyaṃ vimānaṃ tu śatasūryasamaprabham || 95 ||
[Analyze grammar]

samāyātaṃ yatra kṛṣṇanārāyaṇo virājate |
pārṣadāstatra divyāśca rādhādyā yoṣitastathā || 96 ||
[Analyze grammar]

virājante haristasmāt sahasā samavātarat |
ṛṣikṛtāṃ mahāpūjāṃ jagrāha bhagavān svayam || 97 ||
[Analyze grammar]

dadau prāsādikaṃ tasmai tryaṣṭakāruṃ ca tatstriyam |
ṛṣiṃ dhṛtvā vimāne ca kuṃkumavāpikāṃ yayo || 98 ||
[Analyze grammar]

hariścā'dṛśyatāṃ prāpto vimānaṃ vyomamaṇḍale |
kuṃkumavāpikākṣetravāsibhiḥ samalokitam || 99 ||
[Analyze grammar]

avā'tarad vimānaṃ taccāśvapaṭṭasarastaṭe |
sāyaṃ snānaṃ cāvatīrya tryaṣṭakārustadā'karot || 100 ||
[Analyze grammar]

tatpatnī cāpi vai snānaṃ sarasyeva tadā'karot |
tayordehau tu patitau divyadehau caturbhujau || 101 ||
[Analyze grammar]

babhūvatustau tatkālaṃ divyālaṃkārabhūṣaṇau |
divyadṛṣṭī divyagatī divyavijñānasaṃbhṛtau || 102 ||
[Analyze grammar]

tūrṇaṃ tau śrībālakṛṣṇaṃ mātaraṃ pitaraṃ tathā |
lomaśaṃ ca muniṃ dṛṣṭvā kṛtvā pūjāmalaukikīm || 103 ||
[Analyze grammar]

yayatustadvimānena brahmalokaṃ paraṃ padam |
ṛṣiḥ kṛṣṇecchayā tasthau kārtikāvadhimatra ca || 104 ||
[Analyze grammar]

paścāt kṛṣṇājñayā yātaḥ kuśāmbāṃ kimasannidhau |
bhaktānupadiśan lakṣavarṣāṇi vāsamācarat || 105 ||
[Analyze grammar]

pratisamvatsaraṃ cakre harerjanmotsavam ṛṣiḥ |
kimanadyāstaṭe gatvā tattīrthe śrīnarāyaṇaḥ || 106 ||
[Analyze grammar]

ṛṣikṛtāṃ samarhāṃ ca gṛhītvā tu sarijjale |
snātvā cāyāti divyena vimānena kṣaṇāntare || 107 ||
[Analyze grammar]

evaṃ tīrthaṃ kauśikāmbaṃ kimanadyāṃ virājate |
rādhike śrīkṛṣṇanārāyaṇāvataraṇodbhavam || 108 ||
[Analyze grammar]

ṛṣistato yayau dhāma paramaṃ pārameśvaram |
akṣarātparataścāpi paraṃ muktajanāśritam || 109 ||
[Analyze grammar]

ityevaṃ kathito rādhe camatkāro harestava |
paṭhanācchravaṇāccāsya paraṃ mokṣamavāpnuyāt || 110 ||
[Analyze grammar]

apatyadhanadārādeḥ phalaṃ mokṣo mahottamam |
tallabdhaṃ tena bhaktena kimapatyādibhiḥ khalu || 111 ||
[Analyze grammar]

itiśrīlakṣmīnārāyaṇīyasaṃhitāyāṃ dvitīye tretāsantāne kimanadyāstaṭe kuśāmbāpattanasthakauśikāmbarṣiyogenā'ntyajasya rogiṇastryaṣṭakāro sastrīkasya prabhorbhaktyā muktipadalābha ityādinirūpaṇanāmācatuḥsaptatitamo'dhyāyaḥ || 74 ||
[Analyze grammar]