Chapter 73

śrīkṛṣṇa uvāca |
śṛṇu tvaṃ rādhike cānyaṃ camatkāraṃ hareḥ śubham |
gaurjare vartate ramyā nadī dhrādharasaṃjñikā || 1 ||
[Analyze grammar]

tattaṭād dakṣiṇe cāste āmodanagaraṃ śubham |
bahuśreṣṭhijanāvāsaṃ devasevāparāyaṇam || 2 ||
[Analyze grammar]

vyavasāyaparairloṃkairadhiṣṭhitaṃ dhanānvitaiḥ |
mānavā bahudhā yatra dhrādharātīravāsinaḥ || 3 ||
[Analyze grammar]

nyūṣurbhaktāstatraśaṃbhoḥ śaṃbhubhaktiparā varāḥ |
dhrādharāyāstaṭe cānye pūjāpāṭhaparāyaṇāḥ || 4 ||
[Analyze grammar]

yāntyāyānti ca nagaraṃ kṛtvā śaṃbhośca darśanam |
vaiṣṇavaṃ mandiraṃ tatra dhrādharāyāstaṭe śubham || 5 ||
[Analyze grammar]

śriyā yukto hariryatra nārāyaṇo virājate |
pratimārūpadhārī sa pūjyate cārcyate janaiḥ || 6 ||
[Analyze grammar]

vandyate sevyate cāpi vaiṣṇavaiḥ sarvadā prage |
mandirasyā'bhitastatra vasanti sādhavo'malāḥ || 7 ||
[Analyze grammar]

tatprasaṃgādabhavacca vaiṣṇavaḥ sudhano vaṇik |
sudhanākhyo nityamādau snātvā samarcya devatāḥ || 8 ||
[Analyze grammar]

natvā ca vaiṣṇavān sādhūn yāti śaṃbhvālayaṃ tataḥ |
udyānavaryasaṃkulaṃ vṛkṣavallyādirājitam || 9 ||
[Analyze grammar]

phalapuṣpādisaṃśobhattaruvaryavirājitam |
jalavāpīyutaṃ stambasasyasmṛddhisuśobhitam || 10 ||
[Analyze grammar]

nirābādhaṃ ca bhaktānāṃ śāntidaṃ darśanādapi |
āmodeśvaraliṃgaṃ ca tadudyāne mahālaye || 11 ||
[Analyze grammar]

virājate susphaṭikadyuti divyaṃ manoharam |
tatsevāyāṃ vipravaryo maharṣirvarcakāyaniḥ || 12 ||
[Analyze grammar]

brahmacaryaparo yajñahomakāryaparāyaṇaḥ |
phalamātrāśano vyomaśayano divyadṛṣṭimān || 13 ||
[Analyze grammar]

vaiṣṇavaḥ paramaḥ śaṃbhau sevādharmaparāyaṇaḥ |
vedavedāṅgavidyādhiḥ kathākhyānaparāyaṇaḥ || 14 ||
[Analyze grammar]

vratena kṛtakārśyāptiśuṣkanāḍīkadehavān |
lakṣmīnārāyaṇasaṃhitāyāḥ kathāparāyaṇaḥ || 15 ||
[Analyze grammar]

nityaṃ sāyaṃ śivodyāne tarumaṇḍapasaṃśritaḥ |
kathāṃ karoti devāstāṃ śṛṇvanti mānavādayaḥ || 16 ||
[Analyze grammar]

narā nāryaḥ pakṣiṇaśca dehinastannivāsinaḥ |
tacchrotuṃ nityadā yāti sudhano bhaktibhāvanaḥ || 17 ||
[Analyze grammar]

tatra vai śrutavān kṛṣṇanārāyaṇaṃ śriyaḥ patim |
saurāṣṭre kuṃkumavāpīkṣetre śrīkambharāsutam || 18 ||
[Analyze grammar]

bālakṛṣṇaṃ parabrahma gopālakṛṣṇabālakam |
sarvasāmarthyayuktaṃ śrīrādhāramādisevitam || 19 ||
[Analyze grammar]

virājantaṃ cāśvapaṭṭasaro'ntikaṃ mahālaye |
lomaśasyā''śramaṃ cāpi tīrthāni ca bahūnyapi || 20 ||
[Analyze grammar]

tato'sya vaṇijo jātā sudhanasya śubhāśrayā |
sākṣādanādidevasya kṛṣṇanārāyaṇasya tu || 21 ||
[Analyze grammar]

dhṛtamānavanāṭyasya didṛkṣā mokṣadāyinī |
nityaṃ cintayate ramyaṃ bālakṛṣṇaṃ divāniśam || 22 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
mantraṃ jagrāha ca tasmādṛṣeḥ śrīvarcakāyaneḥ || 23 ||
[Analyze grammar]

jajāpa taṃ paramaṃ mantraṃ dadhyau mūrtiṃ hṛdantare |
satyāṃ cāpi didṛkṣāyāṃ dūradeśaṃ vicārya saḥ || 24 ||
[Analyze grammar]

gṛhe'rcāyāṃ tu santoṣaṃ hyamanyatā'rcanādibhiḥ |
nityaṃ pūjayate'nādikṛṣṇanārāyaṇaṃ harim || 25 ||
[Analyze grammar]

naivedyaṃ dadate prātarmadhyāhne ca niśāmukhe |
ārārtrikaṃ ca dadate stavaṃ jāpaṃ karotyapi || 26 ||
[Analyze grammar]

utsavān kurute cāpi nyāyāgatadhanaiḥ śubhān |
tatpatnīputrapautrādyā vaiṣṇavāḥ śrīhariśritāḥ || 27 ||
[Analyze grammar]

devasevāparā hyāsan sādhusevāparāyaṇāḥ |
kathāśravaparāścāsan kṛṣṇārpaṇātmabuddhayaḥ || 28 ||
[Analyze grammar]

sevante satataṃ kṛṣṇaṃ sādhūn sādhvīrdhanādibhiḥ |
yānavāhanabhojyādyaiḥ pādasaṃvāhanādibhiḥ || 29 ||
[Analyze grammar]

evaṃ vai vartamānasya sudhanasya gṛhe sadā |
anādiśrīkṛṣṇanārāyaṇamūrtau hariḥ svayam || 30 ||
[Analyze grammar]

prakaṭībhūya sākṣāttu gṛhṇātyannādi cārpitam |
prasādaṃ dadate cāsmai bhaktāya prahasaṃstataḥ || 31 ||
[Analyze grammar]

bālakṛṣṇastiro yāti mūrtau nityaṃ tathā'karot |
ekadā sudhanaḥ śreṣṭhī pautravivāhakāraṇāt || 32 ||
[Analyze grammar]

svavāhinīṃ pariṣkṛtya dhanabhūṣāmbarādibhiḥ |
naranārīvararājayuto gantryādivāhanaiḥ || 33 ||
[Analyze grammar]

āmodāttu yayau kanyānagaraṃ jāmbusārasam |
nāvānadīṃ samuttīrya gatvā ca jāmbusārasam || 34 ||
[Analyze grammar]

vidhiṃ vaivāhikaṃ kṛtvā pratyāvartata vai yadā |
dhrādharākhyanadītīre taskarā viṃśatiprathāḥ || 35 ||
[Analyze grammar]

āpeturugrarūpāstu saśastrā vṛkṣasaṃkule |
tāḍayāmāsurugrāste śakaṭīvāhakāṃstathā || 36 ||
[Analyze grammar]

vāhinīrakṣakāṃścāpi nijaghnuryaṣṭikādibhiḥ |
suvarṇaṃ ca vibhūṣāśca rūpyaṃ tathā'mbarādikam || 37 ||
[Analyze grammar]

śreṣṭhaṃ dhanaṃ samājahruścāśvavārā hi taskarāḥ |
bhojyādikaṃ cāpi jahruḥ sudhano duḥkhito'bhavat || 38 ||
[Analyze grammar]

kuṭumbaṃ cāpi tatsārthastadā'bhavad dhanojjhitaḥ |
bhūṣāhīnā yoṣitaśca śṛṃgārāmbaravarjitāḥ || 39 ||
[Analyze grammar]

abhavan śokasaṃmagnāḥ sambandhibāndhavāstathā |
mahīmānā dhanahīnā nistejaskā ca vāhinī || 40 ||
[Analyze grammar]

śokodvegaparo jāto vadhūjanaḥ sakhījanaḥ |
snuṣā cā'maṃgalagrastā vivāhe sati cā'bhavat || 41 ||
[Analyze grammar]

lakṣmīnāśo'bhavadbhāvidāridryasūcakaḥ khalu |
evaṃ vicārya sudhanaḥ kṛtvā sthairyaṃ hṛdi sthitaḥ || 42 ||
[Analyze grammar]

ātmanā''tmānamālambya sasmāra bālakṛṣṇakam |
anādiśrīkṛṣṇanārāyaṇaṃ sveṣṭaṃ pareśvaram || 43 ||
[Analyze grammar]

tuṣṭāva parayā prītyā sveṣṭadevaṃ pumuttamam |
kṛpānātha dayāsindho saṃsārārṇavatāraka || 44 ||
[Analyze grammar]

śaraṇāgatarakṣākṛt rakṣayātra vanāntare |
tvayā gajasya vai pūrvaṃ kṛtā rakṣā jalāntare || 45 ||
[Analyze grammar]

tvayā prahlādarakṣā ca kṛtā dānavamaṇḍale |
tvayā ca marutāṃ rakṣā kṛtā garbhagṛhāntare || 46 ||
[Analyze grammar]

tvaṃ pātā tvaṃ vidhātā ca paramātmā sanātanaḥ |
rakṣa rakṣa kṛpāvārdhe caurāṇāṃ trāsataḥ prabho || 47 ||
[Analyze grammar]

sarvasvaṃ saṃhṛtaṃ caurairjīvanaṃ gṛhamedhinām |
svarṇarūpyavibhūṣādi tataścoddhara duḥkhataḥ || 48 ||
[Analyze grammar]

gṛhasthānāṃ dhanaṃ dravyaṃ bhūṣā dravyaṃ tu yoṣitām |
śāntirdravyaṃ ca sādhūnāṃ bhaktadravyaṃ hariḥ svayam || 49 ||
[Analyze grammar]

vinā dravyaṃ tu loke'tra pratiṣṭhā naiva vidyate |
dhānyaṃ vastraṃ vyavahāro nātha dravye pratiṣṭhati || 50 ||
[Analyze grammar]

dravye doṣā bahavo'pi guṇā jīvanasampradāḥ |
dravye bhavanti satataṃ tataścālambanaṃ dhanam || 51 ||
[Analyze grammar]

tatrāpi vaṇijāṃ kṛṣṇa suvarṇabhūṣaṇādikam |
sarvasvaṃ vidyate tacca caurairhṛtaṃ samastakam || 52 ||
[Analyze grammar]

tava bhaktimatā nātha parābhavo'yamutkaṭaḥ |
abhaktānāṃ hāsyapātratāyā āspadatāṃ gatāḥ || 53 ||
[Analyze grammar]

āpadbhyaścoddhara kṛṣṇanārāyaṇapareśvara |
bhaktarakṣākaraśceti nāmasārthakamāvaha || 54 ||
[Analyze grammar]

anyathā tu janā āśābhaṃgena tvāṃ janārdana |
tyakṣyanti bhajanaṃ te te matvā cā'rakṣakaṃ prabhum || 55 ||
[Analyze grammar]

ārtā ārtiharaṃ kṛṣṇaṃ yāvadārtā bhajanti vai |
arthārthī cārthadaṃ kṛṣṇaṃ yāvadarthaṃ bhajanti ca || 56 ||
[Analyze grammar]

jijñāsavaśca yāvat syājjijñāsā tāvadeva ha |
bhajante śrīhariṃ jñātuṃ jñāte te viramanti hi || 57 ||
[Analyze grammar]

teṣā svārthaparāṇāṃ tu yathoddhāro bhavedapi |
yathākathaṃcidāśāvān tvāṃ yathā cā'valambate || 58 ||
[Analyze grammar]

tathā nātha svabhaktānāṃ vāñcchāṃ prapūrya cāpi vai |
bhaktiṃ kārayituṃ cāpi mama rakṣāṃ kuru prabho || 59 ||
[Analyze grammar]

ityabhyarthya vane tatra mumocā'śrūṇi duḥkhitaḥ |
śrutvā tvabhyarthanāṃ svāmī kṛṣṇanārāyaṇo hariḥ || 60 ||
[Analyze grammar]

vipraveṣeṇa vai śīghraṃ yatra caurāḥ samāyayau |
caurā nadyāstaṭe vṛkṣacchāyāyāṃ sanniṣadya ca || 61 ||
[Analyze grammar]

bhāgān cakruḥ suvarṇasya rūpyasya ca dhanasya ca |
bhūṣādīnāṃ vibhāge tu jāyamāne'tha bhikṣukaḥ || 62 ||
[Analyze grammar]

vicitto brāhmaṇo bhūtvā bālakṛṣṇaśca dīnavat |
aṭan dhūlisamavyāptadeho digambaro yathā || 63 ||
[Analyze grammar]

kaupīnamātravasano bhojanaṃ yācituṃ yayau |
bhikṣati bhojanaṃ me'tra bubhukṣitāya rocate || 64 ||
[Analyze grammar]

bhavanto bhāgyavanto me dadantāṃ śreṣṭhinaḥ śubhāḥ |
na me dravyaṃ vāñcchanīyaṃ bhojanaṃ samapekṣyate || 65 ||
[Analyze grammar]

caurāḥ prāhurdravyamatra vartate tadgṛhāṇa bhoḥ |
yadi te rocate tarhi dadmaste rūpyakaṃ vada || 66 ||
[Analyze grammar]

bhikṣukastu tadā prāha na me dravyaprayojanam |
dhane doṣā hi bahavo duḥkhadā vairakārakāḥ || 67 ||
[Analyze grammar]

dhanaṃ tyājayate dharmaṃ hiṃsāṃ kārayati drutam |
ākasmikī cāpadaṃ ca samāhvayati vai dhanam || 68 ||
[Analyze grammar]

dhanārjane prayāso'pi rakṣaṇe cintanaṃ mahat |
bhoge kṣayasya tu cintā caurahāryādidūṣaṇam || 69 ||
[Analyze grammar]

tasmāddhanaṃ na ceṣṭavyaṃ bhikṣukeṇa sukhaiṣiṇā |
bhavanto dhanavantaśca dadantāmatra bhojanam || 70 ||
[Analyze grammar]

rūpyako'pi yadagre'sti sukhaṃ nidrāṃ na yāti saḥ |
yena kena nimittena viyogasya bhayāt sadā || 71 ||
[Analyze grammar]

dhanahīnāḥ pakṣiṇaśca phalamātrasya bhikṣukāḥ |
bhuktvā śākhāsu tatraiva vibhramanti nirāmayāḥ || 72 ||
[Analyze grammar]

bālāśca bhojanaṃ bhuktvā sukhaṃ svapanti bhūtale |
cintā tu grasate vṛddhān yūno dhanina ityamūn || 73 ||
[Analyze grammar]

ratnāni mauktikādīni hīrakādyāḥ svabhāvataḥ |
pāṣāṇā api mṛtyostu nimantraṇakarā hi te || 74 ||
[Analyze grammar]

suvarṇaṃ rajataṃ bhūṣāścāmbarāṇi dhanāni ca |
pārthivāstaijasā vā'pi cintodvegakarāḥ sadā || 75 ||
[Analyze grammar]

ahaṃmamatvabaddhāśca rāgadveṣavidhāyakāḥ |
janmamṛtyupradāścānte vāsanālobhabhāvakāḥ || 76 ||
[Analyze grammar]

tanmayā neṣyate dravyaṃ paradravyaṃ vināśakṛt |
kasmāddhane'tra bahulaṃ dravyaṃ labdhaṃ mahājanāḥ || 77 ||
[Analyze grammar]

iti pṛṣṭāstathoktāśca yāhi yāhīti roṣataḥ |
prāhuste tatra kaścittu yaṣṭimādāya cāyasīm || 78 ||
[Analyze grammar]

tāḍayituṃ protthitaśca bhikṣukaṃ dīnavat sthitam |
tāvattu bhikṣukastasmāt sthānādadṛśyatāṃ yayau || 71 ||
[Analyze grammar]

vilokya caitadaiśvaryaṃ vismayaṃ te paraṃ yayuḥ |
kintu bhūtaṃ piśācaṃ vā menire māyayā hatāḥ || 80 ||
[Analyze grammar]

tāvat kākaḥ samāgatya drumopari jagāda ha |
śuṣkaśākhāsthitaścaitadamagalaṃ tadā'bhavat || 81 ||
[Analyze grammar]

atha te saṃvibhajyaiva svarṇadravyāṇi vai tataḥ |
hāramālādiratnāni vibhajante yadā tadā || 82 ||
[Analyze grammar]

śrīhariśca turagasthastathā'nye rājasevakāḥ |
aśvavārāḥ saśastrāśca pañcāśatsaṃkhyakā drutam || 83 ||
[Analyze grammar]

rājadūtādiveṣāste paritastatra cāyayuḥ |
kurvanto dhūṣkṛtīśabdān dharṣayantviti vādinaḥ || 84 ||
[Analyze grammar]

mārayantu pragṛhṇantu caurā ime bhavanti ca |
ityevaṃ vadamānāste cakruḥ prākāravat tadā || 85 ||
[Analyze grammar]

parito vyūhabandhaṃ ca tadā'śvavāraśobhitam |
caurā bhayamavāpuste dudruvuḥ paritastadā || 86 ||
[Analyze grammar]

svarṇarūpyāmbarahīrahārān vihāya tatkṣaṇam |
kintu mārgamanāsādyā'śaktāśca vyūhamabhyataḥ || 87 ||
[Analyze grammar]

nirgantuṃ te hastagatā bhaṭānāmabhavan khalu |
paravaśā hastakaṭā rajjupāśāḥ kṛtāśca taiḥ || 88 ||
[Analyze grammar]

yaṣṭibhistāḍitāḥ kecit kecit kaśābhirāhatāḥ |
kecid daṇḍena hastena pallatābhiśca tāḍitāḥ || 89 ||
[Analyze grammar]

kṛtadaṇḍā bhaṭaiste ca prārthayāmāsurīśvaram |
tṛṇānyādhāya danteṣu bhūsparśīkṛtamastakāḥ || 90 ||
[Analyze grammar]

dīnā gadgadahṛdayā doṣakṣamā yayācire |
dayālurbhagavāṃstebhyaḥ punardoṣanivṛttaye || 91 ||
[Analyze grammar]

upādideśa te sarve pratijñāṃ ca tadā vyadhuḥ |
vayaṃ cauryaṃ kadācinna kariṣyāmo'dya kālataḥ || 92 ||
[Analyze grammar]

kuru kṣamāṃ mahārāja vimocaya ca bandhanāt |
ityevaṃ yācamānān śrīkṛṣṇanārāyaṇaḥ prabhuḥ || 93 ||
[Analyze grammar]

haste jalaṃ pradāyaiva pratijñāṃ stenakarmaṇaḥ |
stainyaṃ naiva hi kartavyaṃ kārayāmāsa tādṛśīm || 94 ||
[Analyze grammar]

tatastān dhrādharānadyāstaṭe ramye manohare |
mocayāmāsa bhagavān jagrāha cāhṛtaṃ dhanam || 95 ||
[Analyze grammar]

suvarṇaṃ rajataṃ ratnāmbarabhūṣādi yaddhyabhūt |
tatsarvaṃ ca gṛhītvaiva sudhano yatra tiṣyati || 96 ||
[Analyze grammar]

sasaṃghastaṃ samāsādya sāśvavāraśca keśavaḥ |
sudhanāya dadau sarvaṃ caurahastāhṛtaṃ dhanam || 97 ||
[Analyze grammar]

sudhanastasya sārthāśca jahṛṣurdhanalābhataḥ |
rājabhaṭā daduḥ sarvaṃ sārthāya svarṇarūpyakam || 98 ||
[Analyze grammar]

bhūṣaṇānyambarādīni ratnamauktikahīrakān |
yeṣāṃ yānyabhavaṃstāni tebhyo dadurharerbhaṭāḥ || 99 ||
[Analyze grammar]

sudhanaśca dadātyebhyo dhanaṃ tu pāritoṣikam |
bhaṭādhipastadā prāha dharmo'sti pāritoṣikam || 100 ||
[Analyze grammar]

bhaktiṃ kuru sadā kṛṣṇanārāyaṇasya mokṣadām |
pāritoṣikamevā'tra vidyate na tato'nyathā || 101 ||
[Analyze grammar]

sudhanaḥ saṃśayaṃ prāptaḥ śrutvā kṛṣṇanarāyaṇe |
bhagavāneva rakṣārthaṃ tvāyāto vidyate kimu || 102 ||
[Analyze grammar]

iti sandihya cotthāya papāta pādayoḥ khalu |
anye'pi ca praṇemurvai gatānugatikā iti || 103 ||
[Analyze grammar]

aśvavāraiśca sahito bhaṭādhipastu vāhinīm |
saha nītvā nadīpāraṃ kārayāmāsa nirbhayām || 104 ||
[Analyze grammar]

prāpayāmāsa ramyaṃ tamudyānaṃ śaṃkarasya vai |
tataścā'dṛśyatāṃ prāptā bhaṭādhipabhaṭāstadā || 105 ||
[Analyze grammar]

na aśvā no rājabhaṭā nāsti bhaṭādhipastathā |
sudhanaśca janāstasya paramāścaryamāgatāḥ || 106 ||
[Analyze grammar]

sudhanastu tadā śīghraṃ samājuhāva taṃ prabhum |
vyomanādaṃ mahāntaṃ vai kṛtvā sarvabalena ha || 107 ||
[Analyze grammar]

he hare he kṛṣṇanārāyaṇasvāmin dayādhara |
kṛtā rakṣā tvayā'raṇye madbhāgyaṃ tvadya vardhate || 108 ||
[Analyze grammar]

te didṛkṣā'sti me kṛṣṇa darśanaṃ dehi me punaḥ |
ityevaṃ vyāharan pṛthvyāṃ dhūlikṣetre'luṭhanmuhuḥ || 109 ||
[Analyze grammar]

nṛtyan tālī vādayaṃśca punardhūlyā samāluṭhat |
anādiśrīkṛṣṇanārāyaṇo bhaktiṃ vilokya ca || 110 ||
[Analyze grammar]

bālakṛpṇo'bhavacchīghraṃ divyamūrtiḥ surūpavān |
koṭisūryāgnicandrāditejo'dhikaprabhāsvaraḥ || 111 ||
[Analyze grammar]

divyasvarṇavibhūṣaśca divyamukuṭakuṇḍalaḥ |
divyamālāmbaradharo divyavimānavāhanaḥ || 112 ||
[Analyze grammar]

rūpānurūpāvayavaḥ kaustubhādivirājitaḥ |
śrīrādhāmāṇikīpāravatīprabhādisevitaḥ || 113 ||
[Analyze grammar]

mañjulāsaguṇāhaṃsālalitāsujayārcitaḥ |
evaṃ bhūtvā'bhavat sākṣāddarśanīyo hariḥ svayam || 114 ||
[Analyze grammar]

sudhanādyairvīkṣitaścovāca yūyaṃ vimānake |
tiṣṭhatātreti tān kṛtvā vimāne kṣaṇamātrataḥ || 15 ||
[Analyze grammar]

kuṃkumavāpikākṣetraṃ prāsādaṃ pitarau ṛṣim |
sarastīrthāni sarvāṇi pradarśya kṣaṇamātrataḥ || 116 ||
[Analyze grammar]

vimānenā'prāpayacca tamudyānaṃ tiro'bhavat |
sudhanādyāḥ sukhaṃ prāpuḥ parameśvarayogataḥ || 117 ||
[Analyze grammar]

divyadṛṣṭimayā jātā divyabhaktiparāyaṇāḥ |
bhādre śukle kṛtāḥ sarve kṛtārthā hariṇā hi te || 118 ||
[Analyze grammar]

ekādaśyāṃ madhyadine dhrādharāyāstaṭe śubhe |
atha kālāntare tebhyaḥ paraṃdhāma dadau prabhuḥ || 119 ||
[Analyze grammar]

ityevaṃ rādhike bhaktarakṣā śrīhariṇā kṛtā |
paṭhanācchravaṇāccāsya bhuktirmuktirbhaved dhruvā || 120 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne āmodanagarasthasudhanākhyabhaktasya varcakāyanimaharṣiyogena prāptabhāgavatabhāvasya caurebhyo rakṣā bhagavatkṛtā prabhordivyadarśanādi cetinirūpaṇanāmā trisaptatitamo'dhyāyaḥ || 73 ||
[Analyze grammar]