Chapter 500

śrīnārāyaṇa uvāca |
śṛṇu lakṣmi kathāṃ karṇotpalāyā brahmayoṣitaḥ |
satyasandha iti khyātaḥ purā''sīt pṛthivīpatiḥ || 1 ||
[Analyze grammar]

tasya karṇotpalānāmnī kanyā''sīd dharmapālinī |
lakṣmyaṃśarūpā cihnaiśca rekhābhiḥ kamalāsamā || 2 ||
[Analyze grammar]

yuvatīṃ tāṃ varayogyāṃ dṛṣṭvā sa pṛthivīpatiḥ |
cintayāmāsa ca muhuḥ kasyemāṃ pradadāmyaham || 3 ||
[Analyze grammar]

na tasyāḥ sadṛśaḥ kaścid varo'tra dharaṇisthale |
na svarge na ca pātāle tasmād yāmi pitāmaham || 4 ||
[Analyze grammar]

brahmā'tra viṣaye'vaśyaṃ yaṃ varaṃ darśayiṣyati |
tasmai putrīṃ pradāsyāmi nānyasmai vai kathaṃcana || 5 ||
[Analyze grammar]

atha putrīṃ sahanītvā brahmalokaṃ jagāma saḥ |
brahmā cāsīt kṛṣṇapūjāparaṃ kṣaṇaṃ jagatpatiḥ || 6 ||
[Analyze grammar]

pūjānte satyasandhaḥ sa rājā brahmāṇamādarāt |
putryā saha namaskṛtya provāca vinayā'nvitaḥ || 7 ||
[Analyze grammar]

ahaṃ pitaḥ samāyāto martyalokāttavā'ntikam |
satyasandho mahīpāla ānartadeśaviśrutaḥ || 8 ||
[Analyze grammar]

iyaṃ karṇotpalānāmnī kamalāṃśā sutā mama |
asyā yogyaḥ patiḥ kaścinnānyaloke vilokyate || 9 ||
[Analyze grammar]

tasmānme brūhi bhartāramasyā yena dadāmyaham |
śrutvā brahmā ca taṃ prāha śṛṇu rājan vṛṣaṃ prati || 10 ||
[Analyze grammar]

ātmaśreṇīprasūtāya vayojyeṣṭhāya sarvathā |
kanyā deyā tu dharmāya yaśase kulavṛddhaye || 11 ||
[Analyze grammar]

seyaṃ tava sutā martye jyeṣṭhabhāvaṃ samāśritā |
sarveṣāṃ bhūmipālānāṃ vārdhakyamatra tacchṛṇu || 12 ||
[Analyze grammar]

mamā'ntikaṃ prapannasya tava jātaṃ yugatrayam |
atītā bhūtale martyā ye dṛṣṭā prāk tvayā nṛpa || 13 ||
[Analyze grammar]

anyā sṛṣṭiḥ samutpannā sāṃprataṃ dharaṇisthale |
mamātra satyaloke tu ye vartante maharṣayaḥ || 14 ||
[Analyze grammar]

na vai te mānuṣīṃ bhāryāṃ kurvanti hi kathaṃcana |
śleṣmamūtrapurīṣāṇāṃ saṃsthānamatigarhitām || 15 ||
[Analyze grammar]

tapasā kanyakā ceyaṃ kāyāntaraṃ karoti cet |
kāmadevo divyarūpāṃ grahīṣyati sutāṃ tava || 16 ||
[Analyze grammar]

nāmnā prītiṃ dvitīyāṃ vai bhāryāṃ ratyuttarāgatām |
tasmād rājendra bhūlokaṃ yāhi tvasutayā saha || 17 ||
[Analyze grammar]

kāmadevāya dātavyā tvayā kālāntare sutā |
ityuktaḥ sakanyakaḥ sa bhūtalaṃ prasamāyayau || 18 ||
[Analyze grammar]

yāvatpaśyati deśaṃ saḥ sthalasthāne jalāśayān |
jalasthāneṣu vai jātān sthalasaṃghān vicitrakān || 19 ||
[Analyze grammar]

anyān lokāṃstathā dharmān deśe tatra vyavasthitān |
pṛcchannapi na jānāti sambandhaṃ kenacit saha || 20 ||
[Analyze grammar]

putrāḥ pautrāstathā bhṛtyā hastyaśvādikamityapi |
te sarve nidhanaṃ prāptā yugāntare ca bāndhavāḥ || 21 ||
[Analyze grammar]

atha martyā'nilaspṛṣṭastatkṣaṇāt sa mahīpatiḥ |
sā ca kanyā jarāgrastau tāvubhau śvetamūrdhajau || 22 ||
[Analyze grammar]

śīrṇadantau balipūrṇī virūpau jarjarātmakau |
amanojñāvatijātau cipiṭākṣau purātanau || 23 ||
[Analyze grammar]

sa tu rājā tathābhūto vepamānaḥ pade pade |
papraccha mānavān ko'tra deśaḥ ko'yaṃ puraṃ ca kim || 24 ||
[Analyze grammar]

atha procurjanāstasya deśaścānartasaṃjñakaḥ |
bṛhadbalākhyo rājā'tra prāptipuraṃ ca pattanam || 25 ||
[Analyze grammar]

śubhramatī sariccaiṣā gartātīrthaṃ ca nāmataḥ |
iti śrutvā'nyanāmāni vismayaṃ tvāpa bhūpatiḥ || 26 ||
[Analyze grammar]

śuśoca vai kṣaṇaṃ paścāt snātvā nadyāṃ sa bhūpatiḥ |
vidyamānaṃ bṛhadbalaṃ prati yayau sakanyakaḥ || 27 ||
[Analyze grammar]

satyasandhastamuvāca rājan vṛttaṃ nibodha me |
ānartādhipatiścāhaṃ satyasandhaḥ purātviti || 28 ||
[Analyze grammar]

āsaṃ karṇotpalānāmnī sutā me guṇaśālinī |
seyaṃ mayā sahaivā''ste lakṣmītulyā ramākalā || 29 ||
[Analyze grammar]

so'hamasyāḥ pradānārthaṃ satyalokamito gataḥ |
praṣṭuṃ pitāmahaṃ devaṃ sthitastatra muhūrtakam || 30 ||
[Analyze grammar]

tāvadatra vyatītā vai yugā bahutarā nṛpa |
satyalokāt samāyāto yāvatpaśyāmi bhūtalam || 31 ||
[Analyze grammar]

sarvaṃ pariṇataṃ vāri sthalaṃ vanaṃ ca pattanam |
ajñātamiva me sarvaṃ lokyate kintu mānavaiḥ || 32 ||
[Analyze grammar]

tava nāma pradattaṃ tatsamāyāto'smi te'ntikam |
rājā bṛhadbalo lakṣmi śrutvā vaṃśaprapūrvajam || 33 ||
[Analyze grammar]

śrutaṃ satyagataṃ cātrā''yātaṃ dṛṣṭvā'tivihvalaḥ |
harṣāśrunayano bhūtvā papāta tasya pādayoḥ || 34 ||
[Analyze grammar]

uvāca svāgataṃ rājan bhūyaḥ susvāgataṃ pitaḥ |
idaṃ rājyaṃ nijaṃ bhūyo mayā bhṛtyena rakṣitam || 35 ||
[Analyze grammar]

svecchayā dehi dānāni kuru rājyaṃ nijaṃ pitaḥ |
tataḥ so'pi vaṃśajaṃ svaṃ samāliṃgya nṛpaṃ nṛpaḥ || 36 ||
[Analyze grammar]

śirasyāghrāyā'śrupūrṇanetrābhyāṃ taṃ siṣeca ca |
prāha rājyaṃ mayā cīrṇaṃ dattaṃ dānaṃ purā bahu || 37 ||
[Analyze grammar]

vājimedhamukhairyajñairiṣṭaṃ sampūrṇadakṣiṇaiḥ |
tasmāt tapaścariṣyāmi sutayā tvanayā saha || 38 ||
[Analyze grammar]

bṛhadbalastamuvāca yatheṣṭaṃ kuru pārthiva |
tavaivāsti mahadrājyaṃ gṛhāṇa vā tapaḥ kuru || 39 ||
[Analyze grammar]

pāramparyeṇa rājendra mayaitatsakalaṃ śrutam |
satyasandho mahīpālaḥ kanyāmādāya nirgataḥ || 40 ||
[Analyze grammar]

punaściraṃ sa nāyātastatastasya sumantribhiḥ |
abhiṣiktaḥ sutastasya suhayo nāma pārthivaḥ || 41 ||
[Analyze grammar]

tasyā'haṃ kramaśaḥ saptasaptatitamavaṃśajaḥ |
puruṣo'smi samuddhartā dhanyohaṃ darśanāttava || 42 ||
[Analyze grammar]

gartātīrthe kuru tapaḥ putryā samaṃ pitāmaha |
yena te caraṇau nityaṃ sevayiṣye sasevakaḥ || 43 ||
[Analyze grammar]

śreyaḥ prāpnomyasaṃndigdhaṃ prasādaḥ kriyatāmiti |
atha prajā brāhmaṇāśca narā nāryaśca rāṣṭrajāḥ || 44 ||
[Analyze grammar]

samāyayuḥ satyasandhaṃ draṣṭuṃ kutuhalānvitāḥ |
āśīrvādān prayuñjānāḥ pupūjustaṃ mudānvitāḥ || 45 ||
[Analyze grammar]

atha rājā tathā kanyā nadīṃ prāpya taṭe tadā |
kṛtvā parṇāśramaṃ tatra tepāte tapa uttamam || 46 ||
[Analyze grammar]

gaurīṃ tatra pratiṣṭhāpya karṇotpalā tu nityadā |
bhaktyā tvārādhayāmāsa rājā ca śaṃkaraṃ tataḥ || 47 ||
[Analyze grammar]

sākṣāttuṣṭo mahādevaḥ prasannāsyaḥ samāyayau |
rājānamāha tapasā vardhate puṇyamatyati || 48 ||
[Analyze grammar]

vada kiṃ te dadāmyatra rājā vavre pramokṣaṇam |
śaṃbhuḥ prāha paraṃ mokṣaṃ kṛṣṇanārāyaṇaḥ svayam || 49 ||
[Analyze grammar]

pradāsyati prabhustvāṃ tvaṃ gṛhāṇa tulasīsrajam |
oṃ namaḥ śrīkṛṣṇanārāyaṇāya svāmine namaḥ || 50 ||
[Analyze grammar]

mantraṃ gṛhāṇa cetyuktvā dadau mantraṃ ca mālikām |
śaṃbhustiro'bhavad rājā bheje jajāpa mādhavam || 51 ||
[Analyze grammar]

atha rājā vṛhadbalo hyavāpa nidhanaṃ tadā |
satyasandhena viprebhyo jīvikādyāḥ samarpitāḥ || 52 ||
[Analyze grammar]

evaṃ yāte dine gaurī santuṣṭā kanyakopari |
sākṣāt provāca te putri tuṣṭā'haṃ vāñcchitaṃ vada || 53 ||
[Analyze grammar]

karṇotpalā''ha tāto me madarthaṃ kaṣṭamāptavān |
mama patyurmārgaṇāya rājyād bhraṣṭaḥ kuṭumbataḥ || 54 ||
[Analyze grammar]

vairāgyeṇa tapastepe kanyā'haṃ vṛddhatāṃ gatā |
tataste kṛpayā gauri yathā'haṃ taruṇī navā || 55 ||
[Analyze grammar]

rūpayauvanasampannā sundarī syāṃ tathā kuru |
tathā bhavatu me bhartā kaścid devottamottamaḥ || 56 ||
[Analyze grammar]

rūpasampadyauvanādiyuktaściraṃprajīvanaḥ |
yathāpiturme santoṣo bhavenmātastathā kuru || 57 ||
[Analyze grammar]

gaurī provāca māghasya śuklasya tṛtīyātithau |
śanaiścaradine vasudaivatyarkṣe tu yauvanam || 58 ||
[Analyze grammar]

rūpaṃ saṃkalpya nadyāṃ ca snānaṃ kurvatra sundari |
tato divyaśarīrā tvaṃ navayauvanaśālinī || 59 ||
[Analyze grammar]

bhaviṣyasi na sandeho bhaja kṛṣṇanarāyaṇam |
oṃ namaḥ śrīkṛṣṇanārāyaṇāya pataye namaḥ || 60 ||
[Analyze grammar]

japa mantraṃ sadā tvenaṃ dhyānaṃ kuru harestathā |
sarvaṃ prāpsyasi tapasā bhaktyā'bhīṣṭaṃ kṣaṇaṃ kuru || 61 ||
[Analyze grammar]

evamuktvā kṛṣṇamantraṃ datvā ca tulasī srajam |
tirobabhūva gaurī ca kanyā yathoktamācarat || 62 ||
[Analyze grammar]

tṛtīyāyāṃ śaneryoge vasudevarkṣasaṃyute |
dhyātvā sārūpya saubhāgyayauvanāni navāni ca || 63 ||
[Analyze grammar]

viveśārdhaniśāyāṃ sā jale yāvattadaiva sā |
navayauvanarūpāḍhyā niṣkrāntā salilāt tadā || 64 ||
[Analyze grammar]

tāvacchrībrahmaṇā''jñaptaḥ kāmadevaḥ svayaṃ khalu |
patnyarthaṃ prītisaṃyuktaścā''jagāmā'bravīcca tām || 65 ||
[Analyze grammar]

brahmaṇā preṣitaścāhaṃ navayauvanarūpavān |
pārvatyānumataścātra tvadarthaṃ tvāgato'smyaham || 66 ||
[Analyze grammar]

asmyahaṃ kāmadevo vai ciraṃjīvī ratīśvaraḥ |
prītināmnī mama bhāryā śāśvatī bhava mā ciram || 67 ||
[Analyze grammar]

karṇotpalā''ha me tātaṃ gatvā prārthaya māṃ svayam |
kanyā nāsti kadācidvai svacchandā pitṛsannidhau || 68 ||
[Analyze grammar]

tatrāhaṃ pūrvato gatvā kanyā tiṣṭhāmi sundarī |
bhavānāgatya paścācca prārthayiṣyati māṃ mudā || 69 ||
[Analyze grammar]

ityuktvā taṃ praṇipatya kanyā svapitaraṃ yayau |
atha tāṃ sa samālokya pitā sutāṃ suyauvanām || 70 ||
[Analyze grammar]

āścaryamāpa papraccha kāraṇaṃ rūpayovane |
kanyā prāha pitargauryāḥ prasādāt snānamātrataḥ || 71 ||
[Analyze grammar]

nadyāṃ labdhavatīrūpaṃ yauvanaṃ ca navaṃ vapuḥ |
hariṃ cārādhya kāntaṃ śrīkṛṣṇanārāyaṇaṃ tathā || 72 ||
[Analyze grammar]

sarvamāptavatī devyā brahmaṇā ca madarthakaḥ |
patiḥ surūpalāvaṇyatejoyauvanaśobhitaḥ || 73 ||
[Analyze grammar]

preṣitaḥ sundaraḥ puṣpabāṇadhṛk so'pi te'ntikam |
samāyāti vilokyainaṃ samarpya māṃ sukhī bhava || 74 ||
[Analyze grammar]

ityuktaśca pitā putrīṃ vilokya kamalāsamām |
abravīdadya me putri saṃjātaṃ tapasaḥ phalam || 75 ||
[Analyze grammar]

etasminnantare kāmo rājño'ntikamupāgamat |
natvā'bravīt tava kanyāṃ dehi me bhūpa sundarīm || 76 ||
[Analyze grammar]

brahmaṇā'tra samādiṣṭaḥ pārvatyā'numatastathā |
varaṇārthaṃ svayaṃ samāgato'smi kāmadevakaḥ || 77 ||
[Analyze grammar]

tataḥ samarpayāmāsa tāṃ kanyāṃ vahnisannidhau |
sā ca rateranusthānā prītināmā'bhavat priyā || 78 ||
[Analyze grammar]

tāṃ ca nītvā yayau kāmaḥ kāmalokaṃ surājasam |
satyasandho 'pi hṛṣṭātmā sutāṃ dṛṣṭvā sukhānvitām || 79 ||
[Analyze grammar]

abhīṣṭapatinā yuktā kṛtakṛtyo babhūva ha |
dṛḍhaṃ padmāsanaṃ kṛtvā brahmadvāreṇa yogavit || 80 ||
[Analyze grammar]

dehānniḥsārayāmāsa cātmānaṃ brahmaṇā saha |
yayau yatrā'sti kanyā sā kāmaloke suputrikā || 81 ||
[Analyze grammar]

tasmāt kanyāṃ dvitīyāṃ tu tāṃ surūpādidhāriṇīm |
nītvā datvā caikarūpāṃ kāmāya tvaparāṃ tanum || 82 ||
[Analyze grammar]

rājā muktaḥ sutāṃ muktāṃ sahanītvā ca pārṣadaiḥ |
harermuktaiḥ saha dhāma golokaṃ prāpa śāśvatam || 83 ||
[Analyze grammar]

evaṃ karṇotpalā lakṣmi bhaktyā ca tapasā tathā |
prītirūpā kāmapatnī muktā ca mokṣagā'bhavat || 84 ||
[Analyze grammar]

bṛhadbalasya rājñyā ca kṛṣṇanārāyaṇaḥ prabhuḥ |
ārādhitaśca putrārthaṃ viprarūpeṇa mādhavaḥ || 85 ||
[Analyze grammar]

samāgatya dadau garbhaṃ mānasaṃ ca kṣaṇāntare |
jātismaro'bhavatputro nārāyaṇasamudbhavaḥ || 86 ||
[Analyze grammar]

viṃśativarṣakāyuṣko nārāyaṇasamo guṇaiḥ |
dhanurvidyāvedavidyācamatkārādiśevadhiḥ || 87 ||
[Analyze grammar]

aṭacandro'bhavannāmnā camatkāranarādhipaḥ |
ya etacchṛṇuyādvāpi śrāvayed bhaktibhāvataḥ || 88 ||
[Analyze grammar]

caturvargasya saṃsiddhiṃ labhate nātra saṃśayaḥ |
kanyā nārī ca saubhāgyaṃ labhate prītivat sadā || 89 ||
[Analyze grammar]

bhuktiṃ muktiṃ sampadaśca putraṃ dhānyaṃ dhanādikam |
saubhāgyaṃ puṇyapuñjaṃ ca labhate nātra saṃśayaḥ || 90 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne satyasandhanṛpateḥ kanyāyāḥ karṇotpalāyāḥ kamalāṃśāyāḥ patimārgaṇārthaṃ brahmalokagamanaṃ tataḥ pṛthivīmāgatya kāmadevapatnītvaṃ prītināmnā'tha ca mokṣaṇaṃ dvitīyarūpeṇetyādinirūpaṇanāmā pañcaśatatamo'dhyāyaḥ || 500 ||
[Analyze grammar]