Chapter 499

śrīnārāyaṇa uvāca |
śṛṇu lakṣmi bhadrikāyāḥ kathāṃ divyāṃ manoramām |
revatyāśca kathāṃ divyāṃ kathayāmi nibodha me || 1 ||
[Analyze grammar]

camatkārapure nāgā hāṭakeśvarabhaktitaḥ |
āgatya khalu pātālānnivasanti kvacitkvacit || 2 ||
[Analyze grammar]

ekadā nāgabālaṃ vai rudramālābhidhaṃ dvijaḥ |
kratho nāmā'hanannadyāṃ laguḍena vṛthā jale || 3 ||
[Analyze grammar]

hā hato'smītyuvācā'yaṃ sarpastasya prasūstadā |
tathā sarpāścāyayuśca manuṣyarūpadhāriṇaḥ || 4 ||
[Analyze grammar]

prāṇāṃstatyāja bālaḥ sa sarpāḥ kruddhā bhayaṃkarāḥ |
dudruvurvipranāśārthaṃ vipro dudrāva cāśramam || 5 ||
[Analyze grammar]

nāgā gatvā sakuṭumbaṃ bhakṣayāmāsurulbaṇāḥ |
tasya viprasya bhaginī bālavaidhavyaduḥkhitā || 6 ||
[Analyze grammar]

brahmacaryaparā sādhvī kṛṣṇabhaktiparāyaṇā |
tāpasī bhadrikānāmnī śaśāpa nāginīṃ tadā || 7 ||
[Analyze grammar]

nāgamātā revatī tvaṃ savaṃśaṃ nāśamāpnuhi |
revatī śāpamāpannā''rādhayāmāsa pārvatīm || 8 ||
[Analyze grammar]

tataḥ katipayāhasya tasyāstuṣṭā maheśvarī |
provāca varadā'smīti revatī varamārthayat || 9 ||
[Analyze grammar]

bhadrikāśāpanāśo me bhavatviti samārthayat |
pārvatī prāha śāpasya nāśo naiva bhavet kvacit || 10 ||
[Analyze grammar]

kintu sarpastakṣako vai saurāṣṭre raivato nṛpaḥ |
ānartaviṣaye bhāvī tasya kṣemaṃkarī priyā || 11 ||
[Analyze grammar]

bhaviṣyati tayoḥ putrī mānuṣī tvaṃ bhaviṣyasi |
tava bhartā tadā śeṣaḥ svayaṃ tatra bhaviṣyati || 12 ||
[Analyze grammar]

tava varasya lābhārthaṃ brahmāṇaṃ prati me gatiḥ |
kṣaṇamātraṃ bhāvinī vai tatra te vaṃśavistaraḥ || 13 ||
[Analyze grammar]

nāśameṣyati cetyevaṃ vaṃśanāśo bhaviṣyati |
punaste balarāmeṇa vivāhaḥ saṃbhaviṣyati || 14 ||
[Analyze grammar]

śrīkṛṣṇaśca svavaṃśasya nāśaṃ kariṣyati prabhuḥ |
kaṇvaśāpena vai tatra hyevaṃ śāpaḥ phaliṣyati || 15 ||
[Analyze grammar]

evamuktā revatī sā yayau pātālameva ca |
śeṣaṃ nivedayāmāsa vṛttāntaṃ nirvṛttaṃ bhuvi || 16 ||
[Analyze grammar]

atha sā brāhmaṇī nāmnā bhadrikā vidhavā satī |
kathāṃ śuśrāva śāstrāṇāṃ kṛṣṇanārāyaṇā''nanāt || 19 ||
[Analyze grammar]

devayātrāṃ tīrthayātrāṃ cakre bhaktiṃ narāyaṇe |
athaikadā takṣakaśca samāyayau bhuvastalam || 18 ||
[Analyze grammar]

nāgavatyāstaṭe dṛṣṭvā bhadrikāṃ tu surūpiṇīm |
nināya nararūpeṇa pātālaṃ bhadrikā ca tam || 19 ||
[Analyze grammar]

śaśāpa mānuṣo bhūtvā saha patnyā sutābhavam |
duḥkhaṃ vai prāpsyase vaṃśanāśasampādakaṃ tadā || 20 ||
[Analyze grammar]

takṣako bhayamāpannastuṣṭāva tāṃ tu bhadrikām |
bhadrikā prāha māṃ pṛthvyāṃ naya tatra sthale punaḥ || 21 ||
[Analyze grammar]

takṣakeṇa tadā''nītā camatkārapuraṃ prati |
atha lokāpavādena citāṃ sā praviveśa ha || 22 ||
[Analyze grammar]

paśyatāṃ janavṛddhānāṃ śuddhyarthaṃ bhadrikā yadā |
na dagdhā romaśo vāji janāstvāścaryamāgatā || 23 ||
[Analyze grammar]

vahnirvai śītalo jātaḥ śuddhā sā bhadrikā yataḥ |
papātātha mahāvṛṣṭiḥ kusumānāṃ nabhastalāt || 24 ||
[Analyze grammar]

devāḥ prāhuḥ paraṃ śuddhā vartase tvaṃ subhadrike |
na tvayā sadṛśī cānyā kācit satī bhaviṣyasi || 25 ||
[Analyze grammar]

tisraḥ koṭyo'rdhakoṭiśca yāni lomāni mānuṣe |
teṣāṃ madhye na te sādhvi pāpamekamapi kvacit || 26 ||
[Analyze grammar]

tvaṃ ca sādhvī satī kṛṣṇanārāyaṇapativratā |
bhūtvā ca tyāginī devī sāṃkhyayogamupāśritā || 27 ||
[Analyze grammar]

satāṃ sevāṃ kuru puṇyaṃ samārādhaya keśavam |
bhadrikā prārthayāmāsa śrutvā devaṃ janārdanam || 28 ||
[Analyze grammar]

tāvat kṛṣṇo dvijo bhūtvā'vātatāra bhuvastalam |
dadau tasyai śubhāṃ dīkṣāṃ tulasīmālikāṃ gale || 29 ||
[Analyze grammar]

oṃ namaḥ śrīkṛṣṇanārāyaṇāya pataye namaḥ |
ityuktvā triḥ karṇamantraṃ yayāvadṛśyatāṃ dvijaḥ || 30 ||
[Analyze grammar]

bhadrikā''rādhayāmāsa kṛṣṇanārāyaṇaṃ sadā |
tatra paraṃ tapaścakre bhikṣānnakṛtabhojanā || 31 ||
[Analyze grammar]

nāganadyāṃ ca tannāmnā bhadrikātīrthamuttamam |
camatkārakaraṃ jātaṃ snātvā niṣpāpatā bhavet || 32 ||
[Analyze grammar]

atha sā bhadrikā kālaṃ prāptā divyaśarīriṇī |
bhūtvā mokṣaṃ yayau dhāma kṛṣṇanārāyaṇasya vai || 33 ||
[Analyze grammar]

evaṃ satībalaṃ lakṣmi muktidaṃ pāpanāśanam |
kṛṣṇanārāyaṇabhaktyā bhavatyeva na saṃśayaḥ || 34 ||
[Analyze grammar]

paṭhanācchravaṇāccāsya kīrtanādapi padmaje |
bhuktiṃ muktiṃ labhet sampadvarāmārogyamīśatām || 35 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne bhadrikākhyabrāhmaṇyāḥ śāpena nāgamātuḥ revatītvaṃ takṣakasya mānuṣatvaṃ bhadrikāyāḥ kṛṣṇabhaktyā muktiścetyādinirūpaṇanāmā navanavatyadhikacatuśśatatamo'dhyāyaḥ || 499 ||
[Analyze grammar]