Chapter 484

śrīnārāyaṇa uvāca |
śṛṇu lakṣmi ca rohiṇyā purā kṛtatapaḥparam |
yenā''ptā candrapatnīnāṃ maurdhanyaṃ sarvadā satī || 1 ||
[Analyze grammar]

abhīṣṭā sarvanārīṇāṃ bhartuścāpi viśeṣataḥ |
ekadā niścayībhūtā tapase sā pativratā || 2 ||
[Analyze grammar]

gatvā tu narmadātīre cakāra vipulaṃ tapaḥ |
ekarātraṃ dvirātraṃ ca ṣaḍ dvādaśa tathā'paraiḥ || 3 ||
[Analyze grammar]

pakṣamāsopavāsaiśca kṛśīkṛtakalevarā |
ārādhanaparā nityaṃ nārāyaṇagurorhareḥ || 4 ||
[Analyze grammar]

snātvā snātvā jale nityaṃ narmadāyā harau ratā |
pūjayati sma govindaṃ nārāyaṇīpatiṃ prabhum || 5 ||
[Analyze grammar]

prasanno bhagavānnārāyaṇīsvāmī narāyaṇaḥ |
uvācā'haṃ prasanno'smi vratena niyamaiśca te || 6 ||
[Analyze grammar]

dadāmyabhīpsitaṃ te'dya varaṃ vṛṇu mahāsati |
evaṃ śrutvā vacastasya natvā saṃpūjya bhāvataḥ || 7 ||
[Analyze grammar]

pādayostu jalaṃ pītvā bhūtvā darśanapāvanī |
varaṃ vavre rohiṇī sā dāsyaṃ te caraṇāmbuje || 8 ||
[Analyze grammar]

prathamaṃ tadvaraṃ dehi bhaktistvayi viśeṣiṇī |
atha dvitīyaṃ ca varaṃ loke candragṛhe sadā || 9 ||
[Analyze grammar]

sarvāsāṃ tu sapatnīnāmadhikā śaśinaḥ priyā |
yathā bhavāni hyacirāt tvatprasādāttathā kuru || 10 ||
[Analyze grammar]

hariḥ prāha svarūpe dve dhārayā'smatprasādataḥ |
ekena yāhi vaikuṇṭhaṃ dvitīyenātra saṃvasa || 11 ||
[Analyze grammar]

dvitīyena svarūpeṇa bhava tvaṃ śaśinaḥ priyā |
bhāryā pativratā sarvasapatnīnāṃ samagraṇīḥ || 12 ||
[Analyze grammar]

ityuktvā bhagavān kṛṣṇanārāyaṇo yayau svakam |
vaikuṇṭhaṃ tāṃ satīṃ nītvā vimānena vihāyasā || 13 ||
[Analyze grammar]

sā tu dvitīyarūpā ca yayau candramaso gṛham |
tata ārabhya sā jātā mūrdhanyā sarvayoṣitām || 14 ||
[Analyze grammar]

iti te kathitaṃ lakṣmi tapasaḥ phalamuttamam |
svargamokṣapradaṃ ramyaṃ mamā''rādhanarūpakam || 15 ||
[Analyze grammar]

athā'nyatte pravakṣyāmi muktidaṃ caritaṃ mama |
dakṣasya duhitā tvāsīt kumudā nāma viśrutā || 16 ||
[Analyze grammar]

somāya datvā tān dakṣo paramaṃ maudamāptavān |
tasyāṃ sa janayāmāsa putramamṛtanāmakam || 17 ||
[Analyze grammar]

atha jñātvā surā yajñaphalārthino yayuśca tam |
amṛtaṃ pītavantaste jñātvā daityāstato yayuḥ || 18 ||
[Analyze grammar]

candramasaṃ ca te prāhurdehi no'mṛtamuttamam |
pānārthaṃ tvanyathā tvāṃ vai bhakṣayiṣyāma eva yat || 19 ||
[Analyze grammar]

cando neyeṣa dātuṃ tvamṛtaṃ tebhyastato hi te |
taṃ candraṃ jagṛhuḥ svargātpātayāmāsurambarāt || 20 ||
[Analyze grammar]

hāhākāro mahān jātaḥ kumudā tasya kāminī |
pātivratyena dharmeṇa jalaṃ kṛtvā kare tadā || 21 ||
[Analyze grammar]

uvācā'haṃ patidharmā pativratā patisthitā |
pātivratyabalenaite dānavā yāntu saṃkṣayam || 22 ||
[Analyze grammar]

ityuktvā vāri cikṣepa dānaveṣu tatastu te |
bhasmībhūtāstadā jātāḥ śeṣāḥ śukraṃ guruṃ prati || 23 ||
[Analyze grammar]

yayurnivedayāmāsurdaityānāṃ bhasmabhāvanam |
śukrastatra samāgatya jīvayāmāsa cāsurān || 24 ||
[Analyze grammar]

nanāma kumudāṃ śukro daityā nemuryayurgṛham |
candraḥ kumudayā svasāmarthyenotthāpito bhuvaḥ || 25 ||
[Analyze grammar]

atha brahmamaheśādyairāgatya viśramīkṛtaḥ |
punaḥ saṃsthāpitaḥ svarge devā babhūvurajvarāḥ || 26 ||
[Analyze grammar]

iti te kathitaṃ lakṣmi pātivratyabalaṃ mahat |
sarvasampatkaraṃ vighnaharaṃ saubhāgyavardhanam || 27 ||
[Analyze grammar]

athā'nyamapi vakṣyāmi camatkāraṃ śṛṇu priye |
narmadāyāṃ catūsaṃge vartate yajñaparvataḥ || 28 ||
[Analyze grammar]

svayaṃbhuvā purā tasminniṣṭaḥ sautrāmaṇirmakhaḥ |
tatraiveṣṭaṃ maghavatā hayamedhena padmaje || 29 ||
[Analyze grammar]

niṣkrāntā parvatāttasmāccatūnāmamahānadī |
patitā narmadāyāṃ sā saṃgame yajñaparvate || 30 ||
[Analyze grammar]

ṛṣiḥ suparṇo yatrā''sījjābālirbrahmabījajaḥ |
puruhūtā tasya patnī dharmapatnī pativratā || 31 ||
[Analyze grammar]

pramādya tvabravīdvākyaṃ puruhūtā nijaṃ patim |
ṛtukāle parvaṇi māṃ bhajasva tvaṃ mahāmune || 32 ||
[Analyze grammar]

jāyate me yathā putraḥ sarvasantānapāvanaḥ |
putreṇa lokān jayati tṛpyanti pitṛdevatāḥ || 33 ||
[Analyze grammar]

aputrasya gatirnāsti tasmātputramajījanaḥ |
śrutvovāca suparṇastāmamāvāsyā'dya vidyate || 34 ||
[Analyze grammar]

kāmadevaḥ sadā patni varjanīyo hi parvaṇi |
akartavyaṃ vrate puṇye dine pitṛtithāvapi || 35 ||
[Analyze grammar]

gamanaṃ dampatībhyāṃ vai ṛtukāle'pi bhāmini |
pitarastasya tanmāṃsaṃ bhuñjate ṛtugāminaḥ || 36 ||
[Analyze grammar]

divyaṃ varṣasahasraṃ tu taptaṃ me duṣkaraṃ tapaḥ |
tacca sarvaṃ pravinaśyet parvaṇi saṃgamāttava || 37 ||
[Analyze grammar]

paśya snātvā kṣaṇamātrāccāṇḍālaṃ saṃgame'tra vai |
yāntaṃ vimānamārgeṇa svarge dhikkṛtya māṃ priye || 38 ||
[Analyze grammar]

tapaḥ karomi satataṃ dhikkārastena vai katham |
kṛto bhavediti cintāparo bhavāmi supriye || 39 ||
[Analyze grammar]

vadā'tra kāraṇaṃ sādhvi dhikkṛtastena vai katham |
paścātte saṃpradāsyāmi dharmaṃ cenmanyase sati || 40 ||
[Analyze grammar]

ṛtudānaṃ parvakāle yadi dharmo bhavet priye |
tāvat kācitsamāyātā niṣādī narmadātaṭe || 41 ||
[Analyze grammar]

dhikkāraṃ sā śrutavatī tadarthaṃ tvāha taṃ ṛṣim |
ahaṃkāravimūḍhātmā tvatsamo nāsti tāpasaḥ || 42 ||
[Analyze grammar]

na snānaṃ na japo homo na svādhyāyo'cyutārcanam |
na ca vā bhajanaṃ ceṣṭamantrasya vihitaṃ tvayā || 43 ||
[Analyze grammar]

niṣphalaṃ kleśamāpanno vāyubhakṣo nirāśrayaḥ |
tvattapodhyānayogaśca niṣphalaṃ svargadaṃ na vai || 44 ||
[Analyze grammar]

uvāca tāṃ niṣādīṃ ca tadā namragirā muhuḥ |
kā'si tvaṃ tīrthamāyātā niṣādīrūpamāśritā || 45 ||
[Analyze grammar]

umā sarasvatī gaṃgā māṃ jijñāsitumāgatā |
anugrahamimaṃ manye vada dharmaṃ sanātanam || 46 ||
[Analyze grammar]

niṣādyuvāca taṃ harṣāttadā dharmaṃ sanātanam |
viprāṇyahaṃ ca vipro me bhartā''sīnnaimiṣe vane || 47 ||
[Analyze grammar]

saṃsthitastapasi nityaṃ māṃ na spṛśati māsike |
kāmārtayā mayā ṛtusnātayā prārthitaḥ sa hi || 48 ||
[Analyze grammar]

amāvāsyādine putralabdhaye yācitaḥ patiḥ |
akāle yācamānā'haṃ tena śaptā mahātmanā || 49 ||
[Analyze grammar]

adharmaṃ yācamānā tvaṃ bhava śūdrā niṣādajā |
mayā śapto bhava tatra cāṇḍālo yatra cāpyaham || 50 ||
[Analyze grammar]

iti śāpābhibhūtau vai dampatī narmadābhavam |
lakṣmīnārāyaṇasahitāyāḥ śrutvā kathānakam || 51 ||
[Analyze grammar]

māhātmyamuttamaṃ divyaṃ tārakaṃ snānamātrataḥ |
samāgato patirme saḥ cāṇḍālaḥ svargamāptavān || 52 ||
[Analyze grammar]

ahaṃ niṣādī viprāṇī snātvā yāsyāmi mokṣaṇam |
tasmāttvaṃ bhaja govindaṃ tapasā saha sarvadā || 53 ||
[Analyze grammar]

sārthakaṃ te bhavet sarvamanyathā niṣphalaṃ tava |
haryarthaṃ kuru karmāṇi homajapyādikāni vai || 54 ||
[Analyze grammar]

yāsyase tvaṃ tu vaikuṇṭhaṃ kṛṣṇanārāyaṇāśritam |
ityuktvā narmadānīre snātvā svargaṃ yayau hi sā || 55 ||
[Analyze grammar]

yena mārgeṇa tadbhartā yayau sā tena saṃyayau |
etacchrutvā tu jābāliṃ suparṇaṃ svapatiṃ satī || 56 ||
[Analyze grammar]

puruhūtā praṇamyaiva yayāce vai kṣamāṃ tadā |
dharmaṃ sanātanaṃ jñātvā parvaṇyapi ṛtāvapi || 57 ||
[Analyze grammar]

maithunaṃ dampatīnāṃ vai yogyaṃ nāstyeva sarvathā |
evaṃ dharmaṃ paraṃ jñātvā dampatī tau tu vaiṣṇavau || 58 ||
[Analyze grammar]

bhajanaṃ śrīkṛṣṇanārāyaṇāya svāmine namaḥ |
kṛtvā nityaṃ ca japanaṃ patnīvratapativratau || 59 ||
[Analyze grammar]

yayau kālena vaikuṇṭhaṃ japadharmaparāyaṇau |
iti te kathitaṃ lakṣmi dharmajñānaṃ muneḥ striyāḥ || 60 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne rohiṇyāḥ kumudāyāstapaḥ puruhūtāyāśca narmadāsnānena mokṣaṇaṃ parvaṇi ṛtudānā'dānaṃ dharma ityādinirūpaṇanāmā caturaśītyadhikacatuśśatatamo'dhyāyaḥ || 484 ||
[Analyze grammar]