Chapter 483

śrīnārāyaṇa uvāca |
śṛṇu lakṣmi pravakṣyāmi tvanasūyāṃ pativratām |
atrirnāmnā'bhavattasyāḥ patirvai brahmaṇaḥ sutāḥ || 1 ||
[Analyze grammar]

agnihotrarato nityaṃ devatā'tithipūjakaḥ |
anasūyā'pi tatprāṇā patikāryahite ratā || 2 ||
[Analyze grammar]

pativratā patiṃ bheje kṛṣṇanārāyaṇaṃ yathā |
evaṃ kāle gate'patyaṃ dampatyornā'bhavattadā || 3 ||
[Analyze grammar]

sukhāsīnau pravadataḥ sukhaduḥkhāni karmabhiḥ |
atriḥ prāha priye kānte trailokye sacarācare || 4 ||
[Analyze grammar]

na tvayā sadṛśī loke sarvadā me hite ratā |
patiputrapriyā nārī lokāñjayati dustarān || 5 ||
[Analyze grammar]

putreṇa lokāñjayati putreṇa paramā gatiḥ |
nāsti putrasamo bandhuḥ pṛthivyāṃ cātra dṛśyate || 6 ||
[Analyze grammar]

asipatravane yāmye patantaṃ yo'bhirakṣati |
durbhikṣeṣvapi dainyādau vṛddhakāle'pi satsutaḥ || 7 ||
[Analyze grammar]

putraṃ vinā tu kiṃ bhadre yatirvāpi sutaḥ priye || 8 ||
[Analyze grammar]

lokalajjāpreritaśca tārayet pitarau hi saḥ |
putrahīne kathaṃ saukhyamiha loke paratra ca || 9 ||
[Analyze grammar]

divāniśaṃ cintayānaḥ śuṣyāmi śarma no labhe |
anasūyā'pi taṃ śrutvā prāhā'haṃ śocayāmi tat || 10 ||
[Analyze grammar]

tavodvegakaraṃ yacca māmudvejayati prabho |
yena putrā bhaveyurme yena tuṣyet prajāpatiḥ || 11 ||
[Analyze grammar]

atriḥ prāha mayā bhadre tapastaptaṃ sudāruṇam |
vratopavāsairniyamaiḥ śākāhārādibhiḥ priye || 12 ||
[Analyze grammar]

kṣīṇaṃ dehamaśakto'haṃ janmaprabhṛti tāpasaḥ |
vārdhakyaṃ dṛśyate dehe prasthānaṃ pāralaukikam || 13 ||
[Analyze grammar]

nā'tidūraṃ dṛśyate'tra tathyaṃ tubhyaṃ niveditam |
anasūyā'ha taṃ bhartarnārī pativratā'smi te || 14 ||
[Analyze grammar]

trivargasādhanā cā'smi patiputravivardhinī |
bhavatastvājñayā taptvā bhaviṣyāmi sutaprasūḥ || 15 ||
[Analyze grammar]

japastapastīrthayātrāputrejyāmantrasādhanam |
pativratāṃ vadantyeva guravo lokarakṣakāḥ || 16 ||
[Analyze grammar]

anujñātā ca duḥkhe'haṃ tapastapsyāmi dāruṇam |
putrārthinī bahudinānyahaṃ viṣṇuṃ prayāmi ca || 17 ||
[Analyze grammar]

atriḥ prāha samīcīnaṃ mama santoṣakārakam |
anujñātā mayā bhadre putrārthaṃ tapa ācara || 18 ||
[Analyze grammar]

ṛṇāni trīṇyapākṛtya mano mokṣe niyojayet |
devānāṃ ca manuṣyāṇāṃ pitṝṇāmanṛṇaṃ kuru || 19 ||
[Analyze grammar]

na bhāryāsadṛśaṃ potaṃ tārakaṃ tvaparaṃ matam |
nahi devāḥ praśaṃsanti sadbhāryārahitaṃ gṛham || 20 ||
[Analyze grammar]

śuṣkaṃ bhavati vai cānyad bhāryayā rahitaṃ sukham |
sammukhe sammukhā''yāti vilome tu parāṅmukhī || 21 ||
[Analyze grammar]

ato bhāryā praśaṃsāyā āspadaṃ gṛhamedhinām |
pativrate mahābhāge sarvadā hitakāriṇi || 22 ||
[Analyze grammar]

tapaścarasva saphalaṃ putrapradaṃ mamā''jñayā |
patyājñā viṣṇuvacanaṃ saphalaṃ syāt priye tvayi || 23 ||
[Analyze grammar]

tavecchā vartate sāpi drāk saphalayatu prabhuḥ |
evaṃ prasannatāṃ patyuḥ samāgṛhya pativratā || 24 ||
[Analyze grammar]

svakārye sabalā bhūtvā sāṣṭāṃgaṃ praṇatā'bravīt |
tvatprasādena viprendra sarvametadavāpnuyāt || 25 ||
[Analyze grammar]

āśīrvādairyojitā cānasūyā vai pativratā |
haṃsalīlāgatitīvrā prāptā'sau narmadātaṭam || 26 ||
[Analyze grammar]

narmadottaratīre sā'bhavatparṇāśanā tathā |
niyamasthā'bhavannityaṃ śākāhārā kvacit kvacit || 27 ||
[Analyze grammar]

stotraparā hṛdā devān śubhaiḥ stotraiśca saṃyatā |
grīṣmeṣu sā'bhavanmadhye pañcāgnitejasāṃ divā || 28 ||
[Analyze grammar]

varṣāyāṃ sā'varṇyacca cāndrāyaṇaṃ bahiḥ sthitā |
hemante jalavāsā cā'karot triṣavaṇaṃ satī || 29 ||
[Analyze grammar]

devānāṃ tarpaṇaṃ samarcanaṃ ca havanaṃ tathā |
naivedyaṃ sotsavaṃ puṣpāñjaliṃ stotraṃ kṣamārthanam || 30 ||
[Analyze grammar]

akarot sā vane nityahariṇyādisahāyinī |
evaṃ varṣaśate yāte viṣṇurudrapitāmahāḥ || 31 ||
[Analyze grammar]

kṣutkṣāmāṃ tāpasīṃ putrārthinīṃ jñātvā samāyayuḥ |
dvijarūpeṇa te devā eraṇḍyāḥ saṃgamasthale || 32 ||
[Analyze grammar]

āgatya vedamantrāṃścoccārayanti tapaḥsthale |
śrutvā vedasya mantrāṃścā'nasūyā premapūritā || 33 ||
[Analyze grammar]

īkṣamāṇā muhustāṃ tu diśāṃ samutthitā sthalāt |
dṛṣṭvā''śramagatān viprānatithīnarghyamādadau || 34 ||
[Analyze grammar]

teṣāṃ caraṇānprakṣālya papau śirasi cā'karot |
adya me saphalaṃ janma viprāṇāṃ darśanena vai || 35 ||
[Analyze grammar]

adya me saphalaṃ kāryaṃ tapo viprapradarśanāt |
adya me bhūmikā ceyaṃ saphalā brāhmaṇāgamāt || 36 ||
[Analyze grammar]

ityuktvā pādayornatvā cakre pradakṣiṇaṃ muhuḥ |
punaḥ sāṣṭāṃganamanaṃ kṛtvā satkāramabravīt || 37 ||
[Analyze grammar]

kandamūlaphalairdivyairadyāhaṃ tarpayāmi vaḥ |
parṇakuṭyāṃ ca viśrāntiṃ yāta darbhāsanādiṣu || 38 ||
[Analyze grammar]

iti śrutvā tu te viprā ūcustāṃ tāpasīṃ satīm |
tapasā cātitīvreṇa tava satyena suvrate || 39 ||
[Analyze grammar]

pātivratyena dharmeṇa tṛptāḥ sma tava darśanāt |
asmākaṃ kautukaṃ jātaṃ kimarthaṃ tapyate tvayā || 40 ||
[Analyze grammar]

svargaṃ vā lokasampattiṃ mokṣaṃ vā cānyadeva vā |
kimiṣyate tvayā sādhvi tapasā duṣkareṇa vai || 41 ||
[Analyze grammar]

tapasā siddhyati svargastapasā tu parā gatiḥ |
tapasā sarvakāmānāṃ siddhirbhavati puṣkalā || 42 ||
[Analyze grammar]

yauvane tu sadā bhogā bhoktavyā manasepsitā |
tāṃstu sarvān vihāyā'tra kuto hetorviśuṣyasi || 43 ||
[Analyze grammar]

anasūyā tu tacchrutvā provāca surapuṃgavān |
yuvatve tu tapaḥ kāryaṃ yuvatve paramā gatiḥ || 44 ||
[Analyze grammar]

yuvatve ca sutotpattirvṛddhatve sarvamapriyam |
ityuktā devavaryāste sādhu sādhviti cā'bruvan || 45 ||
[Analyze grammar]

viprarūpāṇi vivṛtya brahmaviṣṇumaheśvarāḥ |
trayaḥ sākṣāttu te bhūtvā varaṃ vṛṇviti cā'bruvan || 46 ||
[Analyze grammar]

yattvayā cābhilaṣitaṃ dadmaḥ sarvaṃ vadādhunā |
caturbhujo vāsudevaḥ śaṃkhacakragadādharaḥ || 47 ||
[Analyze grammar]

garuḍena sahitaśca śriyā ca sahito'bhavat |
prasannavadano brahmā caturvadanaśobhitaḥ || 48 ||
[Analyze grammar]

haṃsasāvitrikāyuktaścā'kṣamālākaro'bhavat |
vṛṣabhaṃ tu samārūḍhaḥ pārvatīsahitaḥ śivaḥ || 49 ||
[Analyze grammar]

pañcavaktrastrinetraśca daśabāhusamanvitaḥ |
ityetān pūjanīyāṃśca devān dṛṣṭvā ca tāpasī || 50 ||
[Analyze grammar]

ānanditā'bhavat tūrṇaṃ dṛṣṭvā natvā hyuvāca tān |
kiṃvyāpārāśca ke yūyaṃ viṣṇurudrapitāmahāḥ || 51 ||
[Analyze grammar]

tadahaṃ śrotumicchāmi vadatātra dayādavaḥ |
brahmovāca sati prāvṛṭkālo'haṃ ca jalaṃ tathā || 52 ||
[Analyze grammar]

megho'haṃ ca pravarṣāmi sandhyā'haṃ pūrvadaiśikī |
viṣṇuruvāca hemantaścāhaṃ puṣṇāmi sarvathā || 53 ||
[Analyze grammar]

pālanīyaṃ jagat sarvaṃ mamā'sti kāryamuttamam |
rudraḥ prāha sati cāhaṃ grīṣmakālaḥ kṣayaṃkaraḥ || 54 ||
[Analyze grammar]

śoṣayāmi jagatsarvaṃ rudrarūpastapasvini |
evaṃ vayaṃ trayo devāstrayaḥ kālāstrayo'gnayaḥ || 55 ||
[Analyze grammar]

tisraḥ sandhyā bhavāmaśca nityamekatvamāgatāḥ |
varaṃ dadmaśca te bhadre yatte manasi vartate || 56 ||
[Analyze grammar]

anasūyā samuvāca vandhyā'smi kiṃ vṛṇe surāḥ |
mama putrā bhavatā'tra brahmaviṣṇumaheśvarāḥ || 57 ||
[Analyze grammar]

viṣṇuruvāca tāṃ devīṃ bhadre na varadāḥ sutāḥ |
bhavanti kintu tattulyā bhavanti varadānataḥ || 58 ||
[Analyze grammar]

bhadre dadāmi tānputrān devatulyaparākramān |
pitṛtulyaguṇopetān somayājibahuśrutān || 59 ||
[Analyze grammar]

anasūyā ca tānprāha dātavyamīpsitaṃ mama |
varadānakṛte yogyā yadyasti yāta putratām || 60 ||
[Analyze grammar]

nānyathā tattu kartavyaṃ vasatā'dya mamodare |
viṣṇuruvāca tāṃ devīṃ garbhavāse na vai vayam || 61 ||
[Analyze grammar]

āyāmaḥ kintu vāyuste garbhe sthāsyati garbhavat |
sagarbhamudaraṃ te tu vāyuḥ pradarśayiṣyati || 62 ||
[Analyze grammar]

navamāsottare kāle prasūteśca gṛhe vayam |
āgamiṣyāma aiśvaryasahitāstvadgṛhe śubhe || 63 ||
[Analyze grammar]

vāyorniḥsaraṇe kāle vayaṃ bālasvarūpiṇaḥ |
traya eva bhaviṣyāmaścā'yonisaṃbhavāḥ sutāḥ || 64 ||
[Analyze grammar]

yonivāsaṃ tu vai devā naiva yānti śubhāśrayāḥ |
ityuktvā bālarūpāste'dṛśyanta vai kṣaṇaṃ tadā || 65 ||
[Analyze grammar]

atha yayuḥ svakaṃ dhāma divyavāhanasaṃśritāḥ |
prāptā varaṃ tu sā devī kṣīṇadehā yayau gṛham || 66 ||
[Analyze grammar]

śilātale niṣaṇṇaṃ sā'paśyat kāntaṃ mahāvratam |
nanāma praṇatā tasya pādau prakṣālya sā papau || 67 ||
[Analyze grammar]

kuśalaṃ pṛṣṭhā provāca kṛpayā te phalānvitā |
nirvighnā varamādāya sevāyāmāgatā'smi vai || 68 ||
[Analyze grammar]

patipuṇyena sādhyāśca phalanti tviṣṭapādapāḥ |
putratrayaṃ brahmaviṣṇumaheśākhyaṃ mayā'rjitam || 69 ||
[Analyze grammar]

bhagavatpādasevāyāḥ phalaṃ prāptaṃ cireṇa vai |
asādhyaścānyanārīṇāṃ varaḥ prāptaḥ sudurlabhaḥ || 70 ||
[Analyze grammar]

tenā'haṃ te prayacchāmi putrānṛṣitapodhanān |
ityuktā harṣitā samyakkāntasevāparā'bhavat || 71 ||
[Analyze grammar]

sā'lokayat patiṃ kāntaṃ kāntena sā'valokitā |
darśanādeva sañjātaṃ lalāṭe maṇḍalaṃ prabham || 72 ||
[Analyze grammar]

amūlaṃ dīrghamūlaṃ ca triraṃgaṃ golakaṃ śubham |
tejomayaṃ sahasrādiraśmijālasamāvṛtam || 73 ||
[Analyze grammar]

tasya madhye trayo devā hyabhāsanta kṣaṇāntare |
devairājñāpito vāyurgarbhasthāne'vasat sadā || 74 ||
[Analyze grammar]

anasūyā garbhavatī tejasā tvabhavacchubhā |
atha māseṣu navasu yāteṣu daśame yathā || 75 ||
[Analyze grammar]

yogye tu samaye sādhvī sūtikāgṛhamāviśat |
vāyurgarbhānniḥsasārā'bhavan devāstu bālakāḥ || 76 ||
[Analyze grammar]

hemavarṇaḥ pūrvaputro brahmā'bhavat pitāmahaḥ |
candramāḥ ṣoḍaśakalaḥ somaḥ poṣaṇadāyakaḥ || 77 ||
[Analyze grammar]

sa cā'yaṃ prathamaḥ putro'nasūyāyāstu nandanaḥ |
dvitīyastu mahābhāgaḥ svayaṃ sākṣānmaheśvaraḥ || 78 ||
[Analyze grammar]

sṛṣṭisaṃhārakaḥ soṃ'śo durvāso nāmato'bhavat |
tṛtīyastvabhavatputro viṣṇurnārāyaṇo hariḥ || 79 ||
[Analyze grammar]

dattātreyo mahāyogī bhagavān śrīpatiḥ prabhuḥ |
jagadvyāpī jagannāthaḥ svayaṃ devo janārdanaḥ || 80 ||
[Analyze grammar]

evaṃ prāpya satī pativratā putratrayaṃ varam |
kṛtakṛtyā'bhavat sā hi muniratristathaiva ca || 81 ||
[Analyze grammar]

trayaste jātamātrāstu yuvānaścābhavan priye |
satī lakṣmīśca sāvitrī divyāstatra samāgatāḥ || 82 ||
[Analyze grammar]

ravasvapatīnāṃ sevārthamanasūyāṃ praṇamya tāḥ |
vadhvaḥ siṣevire devān jalabhojanacandanaiḥ || 83 ||
[Analyze grammar]

trayaste darśanaṃ daduḥ pitrordivyasvarūpiṇaḥ |
sarvasmṛddhimayaṃ tvatrergṛhaṃ tairvai kṛtaṃ sadā || 84 ||
[Analyze grammar]

devāśca munayaḥ siddhāḥ ṛṣayaśca tapodhanāḥ |
devyaśca pārṣadā gaṇā nityamāyānti dṛṣṭaye || 85 ||
[Analyze grammar]

atrerāśramamākīrṇaṃ vartate devakoṭibhiḥ |
nityaṃ yajñāḥ pravartante tathotsavā dine dine || 86 ||
[Analyze grammar]

atha devāstrayastvete pitarāvāhurādarāt |
tapastaptuṃ samicchāmo yāsyāmo'to vanāntaram || 87 ||
[Analyze grammar]

mātā śrutvā śokamagnā hyabhavat putragardhinī |
uvāca putrāḥ saukhyārthaṃ tapastaptaṃ mayā yataḥ || 88 ||
[Analyze grammar]

lālanārthaṃ pālanārthaṃ saukhyārthaṃ traya eva hi |
darśanārthaṃ ca sevārthaṃ mayā devā sutīkṛtāḥ || 89 ||
[Analyze grammar]

kathaṃ te'smān vihāyaiva tapase yāsyathā'cyutāḥ |
sahiṣyate viyogo na tasmād gantavyameva naḥ || 90 ||
[Analyze grammar]

śrūtvā devāstrayo māturdadhū rūpadvayaṃ tataḥ |
divyarūpairyayuḥ tapaḥkaraṇārthaṃ sthalāntaram || 91 ||
[Analyze grammar]

durvāsāḥ saṃyayau naijaṃ kailāsaṃ śivasannidhau |
candramāḥ satyalokaṃ ca datto dvīpāntaraṃ yayau || 92 ||
[Analyze grammar]

atha bālasvarūpāste trayo bhūtvā gṛhe nije |
māturaṃke ramamāṇā vartante prākṛtā iva || 93 ||
[Analyze grammar]

pituraṃke ramamāṇā āśrame viharanti te |
hariṇānāṃ bālakaiste mṛgapakṣibhirityapi || 94 ||
[Analyze grammar]

tāpasaiḥ saha vartante prākṛtā bālakā iva |
bālakhelanakairdevapūjanaiḥ pitṛrañjanaiḥ || 95 ||
[Analyze grammar]

yāpayanti divasāṃste mātāpitṛsukhapradāḥ |
evaṃ vai tapasā prāptāstrayo devāḥ ṛṣeḥ sutāḥ || 96 ||
[Analyze grammar]

yajñopavītamāgṛhya vedādhyayanamācaran |
yajñakāryāṇi nityaṃ te cakruratreḥ purastrayaḥ || 97 ||
[Analyze grammar]

atrereva gṛhītaśca kṛṣṇanārāyaṇātmakaḥ |
mantraśca tulasīmālā taistu vaiṣṇavapuṃgavaiḥ || 98 ||
[Analyze grammar]

ciraṃjīvāstrayaste ca sarvalokagatikṛtaḥ |
vartante tārakā divyā vaiṣṇavāḥ kulatārakāḥ || 99 ||
[Analyze grammar]

etatte kathitaṃ lakṣmi divyākhyānaṃ paraṃ śubham |
paṭhanācchravaṇāccāpi svargadaṃ mokṣadaṃ matam || 100 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne'treḥ patnyā'nasūyayā tapasā brahmaviṣṇumaheśāḥ somadattadurvāsasaḥ putrā labdhāḥ pātivratyabalaṃcetyādinirūpaṇanāmā tryaśītyadhikacatuśśatatamo'dhyāyaḥ || 483 ||
[Analyze grammar]