Chapter 440

śrīnārāyaṇa uvāca |
atha lakṣmi vṛṣāraṇye brāhmaṇādiprarakṣikāḥ |
pativratāmahāsatyo viṣṇusthāpitamātaraḥ || 1 ||
[Analyze grammar]

tāstu nārāyaṇabhaktāḥ sadā lokasya rakṣikāḥ |
pātivratyaparā devīrvakṣyāmi śṛṇu sādaram || 2 ||
[Analyze grammar]

sopākhyānāṃ kathāṃ tatra viprāṇāṃ yā purā'bhavat |
tāmapi saṃpravakṣyāmi śṛṇu dharmodbhavāṃ śubhām || 3 ||
[Analyze grammar]

purā golokadhāmni śrīkṛṣṇanārāyaṇaḥ prabhuḥ |
patnīvrataṃ sutaṃ vipraṃ svasmāt prāviścakāra ha || 4 ||
[Analyze grammar]

sa tu vipraḥ kṛṣṇanārāyaṇājñayā'tra golake |
ājagāma nijapatnyā pativratayā saṃyutaḥ || 5 ||
[Analyze grammar]

dharmāraṇye sahasrākṣaḥ sahasrāsyaḥ sahasrapāt |
patnīvrataḥ kṛtavān svasvarūpāṇi sahasraśaḥ || 6 ||
[Analyze grammar]

ta ete brāhmaṇāḥ sarve sadācārāḥ śubhavratāḥ |
aśeṣadharmakuśalāḥ sarvaśāstraviśāradāḥ || 7 ||
[Analyze grammar]

tapojñāne mahākhyātā brahmayajñaparāyaṇāḥ |
uṣitāḥ ṛṣayaḥ sarve trikālajñāḥ pratāpinaḥ || 8 ||
[Analyze grammar]

aṣṭādaśasahasrāṇi kṛṣṇanārāyaṇātmajāḥ |
caturviṃśatigotrāṇi prāvartantā'tra vai purā || 9 ||
[Analyze grammar]

bhāradvājastathā vatsaḥ kauśikaḥ kuśa ityapi |
śāṇḍilyaḥ kaśyapaścāpi gautamaḥ śāndhanastathā || 10 ||
[Analyze grammar]

jātūkarṇyastathā vātsyo vasiṣṭho dhāraṇastathā |
ātreyo bhāṇḍilaścāpi kṛṣṇāyanaśca laukikaḥ || 11 ||
[Analyze grammar]

upamanyuśca gārgyaśca mauṣako mudgalastathā |
gāṃgāsanaśca kauṇḍinyaḥ puṇyāsanaḥ parāśaraḥ || 12 ||
[Analyze grammar]

caturviṃśatiścaitāni prāvartanta purā yuge |
āṃgīrasaḥ śaunakaśca kāśyapaḥ jāmadagnyakaḥ || 13 ||
[Analyze grammar]

laugākṣasaśca māṇḍavyo babhūvurgotriṇastataḥ |
pravarāṇi tu jātāni tānyapi me niśāmaya || 14 ||
[Analyze grammar]

bhāradvājasagotreyāḥ pravaraiḥ pañcabhiryutāḥ |
āṅgīraso bārhaspatyo bhāradvājaśca sainyasaḥ || 15 ||
[Analyze grammar]

gārgyaścaiveti pravarāḥ pañca te vaiṣṇavā dvijāḥ |
vatsagotre dvijā lakṣmi pravarāḥ pañca te yathā || 16 ||
[Analyze grammar]

bhārgavaścyavanāpnuvānaurvaśca jamadagnikaḥ |
kauśikavaṃśe ye jātāḥ pravaratrayasaṃyutāḥ || 17 ||
[Analyze grammar]

viśvāmitro'ghamarṣī ca kauśikaśceti te trayaḥ |
kuśikagotre ye jātāḥ pravaraistribhiranvitāḥ || 18 ||
[Analyze grammar]

viśvāmitro devarāta audalaśceti te trayaḥ |
śāṇḍilyagotre ye jātāḥ pravaratrayasaṃyutāḥ || 19 ||
[Analyze grammar]

asito devalaścāpi śāṇḍilyaśceti te trayaḥ |
kaśyapā brāhmaṇā lakṣmi pravaratrayasaṃyutāḥ || 20 ||
[Analyze grammar]

kāśyapaścāpavatsāro naidhruvaśceti te trayaḥ |
gautamagotrajā ye tu pravarāḥ pañca eva te || 21 ||
[Analyze grammar]

kautso gārgyo pravahaścā'sito devala ityamī |
śāndhanasya tu naivāsīt svatantraḥ pravaraḥ sati || 22 ||
[Analyze grammar]

jātūkarṇyasyāpi tathā svatantraḥ pravaro na vai |
vātsyagotre bhavā viprāḥ pravaraiḥ pañcabhiryutāḥ || 23 ||
[Analyze grammar]

bhārgavacyavanāpnuvānaurvaśca jamadagnikaḥ |
atha vaśiṣṭhagotrotthāḥ pravaratrayasaṃyutāḥ || 24 ||
[Analyze grammar]

vasiṣṭho bhāradvājaśca indrapramada ityamī |
atha dhārīṇasagotre pravarāstraya eva te || 25 ||
[Analyze grammar]

agastirdarviśvetā ca dadhyavāhana ityamī |
ātreyagotre ye jātāḥ pañcapravarasaṃyutā || 26 ||
[Analyze grammar]

ātreyo'rcanānasaḥ śyāvāśva āṃgīraso'trikaḥ |
bhāṇḍīlasya tu naivāsīt svatantraḥ pravarastadā || 27 ||
[Analyze grammar]

tathā kṛṣṇāyanasyāpi svatantraḥ pravaro na vai |
laukikasyāpi ca tathā svatantraḥ pravaro na vai || 28 ||
[Analyze grammar]

upamanyusagotreyāḥ pravaratrayasaṃyutāḥ |
vasiṣṭhaśca bharadvājastvindrapramada ityamī || 29 ||
[Analyze grammar]

gārgyasya gotrajānāṃ tu pravarāstraya eva tu |
aṅgirāścāmbarīṣaśca yauvanāśvastṛtīyakaḥ || 30 ||
[Analyze grammar]

mauṣakasya tu naivāsīt svatantraḥ pravarastadā |
mudgalasyāpi ca tathā svatantraḥ pravaro na vai || 31 ||
[Analyze grammar]

gāṃgāsanasya tu gotre pravarāḥ pañca eva tu |
bhārgavaścāvanāpnuvānaurvāśca jāmadagnyakaḥ || 32 ||
[Analyze grammar]

ātreyo'rcanānasaśca śyāvāsyaśca trayo'pi te |
gāṃgāsane bhavantyete trayo'pi pravarāḥ kvacit || 33 ||
[Analyze grammar]

kauṇḍinyasya ca puṇyāsanasya parāśarasya ca |
gotre svatantrāḥ pravarā nāsan lakṣmi tadā purā || 34 ||
[Analyze grammar]

athā'nyāṃste kathayāmi jāmadagnyasya pañca tu |
bhārgavyaścyavanāpnuvānaurvaśca jamadagnikaḥ || 35 ||
[Analyze grammar]

māṇḍavyasya sagotre tu pravarāḥ pañca te yathā |
bhārgavaścyāvano'triścāpnuvānaurvasta eva hi || 36 ||
[Analyze grammar]

vātsyāyanasagotreyāḥ pravaraiḥ pañcabhiryutāḥ |
bhārgavaścyāvanāpnuvānaurvaśca jamadagnikaḥ || 37 ||
[Analyze grammar]

kaśyape gotrake cānye pravaratrayasaṃyutāḥ |
kāśyapaścāpavatsāro raibhyaśca viśrutāstrayaḥ || 38 ||
[Analyze grammar]

śonakaseṣu ye jātāḥ pravaratrayasaṃyutāḥ |
bhārgavaḥ śaunahotraśca gārtsyamada ititrayaḥ || 39 ||
[Analyze grammar]

jātā āṃgīrasagotre pravaratrayasaṃyutāḥ |
āṅgiraso'mbarīṣaśca yauvanāśca iti trayaḥ || 40 ||
[Analyze grammar]

atha patnīvratagotre devānīko dasāyakaḥ |
santakaśceti pravarā mahādānaparāyaṇāḥ || 41 ||
[Analyze grammar]

teṣāṃ śākhāḥ praśākhāśca putrapautrādayo dvijāḥ |
jajñire bahavo loke nūtnaśākhāvalambinaḥ || 42 ||
[Analyze grammar]

dharmasāvarṇigotrīyāḥ pravarā hyabhavaṃstrayaḥ |
vaitahavyaḥ sāvetaso bhāradvājaśca te hyamī || 43 ||
[Analyze grammar]

etān visṛjya ca viprā nūtnapravaramārgagāḥ |
bhaviṣyanti gate kāle sarvaṃ kālaviḍambanam || 44 ||
[Analyze grammar]

śṛṇu lakṣmi dvijānetān dharmāraṇye'nyabhūtale |
yakṣarakṣaḥpiśācādyā udvejayanti vai tadā || 45 ||
[Analyze grammar]

jṛmbhako nāma yakṣo'bhūd dharmāraṇyasamīpataḥ |
udvejayati nityaṃ sa dharmāraṇyanivāsinaḥ || 46 ||
[Analyze grammar]

tadduḥkhaṃ tairdvijāgryaiśca devebhyo viniveditam |
patnīvrataṃ puraḥ kṛtvā surā vedhaḥsabhāṃ yayuḥ || 47 ||
[Analyze grammar]

brahmā yayau tu golokaṃ śrīkṛṣṇaṃ tajjagāda ha |
śrīkṛṣṇena tadā gopyo lakṣaśastatra preṣitāḥ || 48 ||
[Analyze grammar]

tāstu divyāḥ kṛṣṇapatnyaḥ kṛṣṇājñāvartanāḥ priyāḥ |
kṛṣṇanārāyaṇapātivratyadharmāvagāhitāḥ || 49 ||
[Analyze grammar]

satyaḥ prasannā divyāṅgyaścāyayurvedhaso gṛham |
brahmājñayā ca tāḥ sarvā āyayuḥ kanyakā divam || 50 ||
[Analyze grammar]

tatra viśvāvasukanyāḥ mānasyaścā'bhavan kṣaṇāt |
jātismarā yuvatyaśca sutāḥ sarvāṃgasundarāḥ || 51 ||
[Analyze grammar]

brahmacaryadharmaparāḥ kṛṣṇapatnyaḥ kumārikāḥ |
rakṣaṇārthaṃ hi viprāṇāṃ lokānāṃ hitakāmyayā || 52 ||
[Analyze grammar]

yoginyo devagandharvaiḥ sthāpitā dharmabhūmiṣu |
gotrān pratitathaikaikā sthāpitā yoginī satī || 53 ||
[Analyze grammar]

yasya gotrasya yā śaktiḥ pālane rakṣaṇe kṣamā |
sā tasya kuladevīti sākṣāttatra babhūva ha || 54 ||
[Analyze grammar]

śrīmātrādyāḥ śṛṇu lakṣmi tāḥ sarvā dvādaśā'bdikāḥ |
śrīmātā tāraṇī āśāpurī cecchā''rtināśinī || 55 ||
[Analyze grammar]

pippalī vikarāvaśā jaganmātā tu saptamī |
mahāmātā tathā siddhā bhaṭṭārikā kadambikāḥ || 56 ||
[Analyze grammar]

vikarā miṣṭā suparṇā mātaṃgī vasujā tathā |
mahādevī tathā vāṇī bhadrī ca mukureśvarī || 57 ||
[Analyze grammar]

saṃhārī ca mahāśaktirmahābalā tathā punaḥ |
cāmuṇḍā tu mahādevī ityetā gotramātaraḥ || 58 ||
[Analyze grammar]

brahmaviṣṇumaheśādyaiḥ sthāpitā viprarakṣaṇe |
tāḥ pūjayanti viprendrā vaiṣṇavīrbhagavatsatīḥ || 59 ||
[Analyze grammar]

atha yajñeṣu gavyārthaṃ brahmā lokapitāmahaḥ |
sasmāra kāmadhenuṃ tu kāmadhenuḥ samāyayau || 60 ||
[Analyze grammar]

brahmā tāṃ kathayāmāsa gavyārthaṃ tu pratidvijam |
ekaikāṃ kāmadhenuṃ ca dehi mātaḥ prasīda me || 61 ||
[Analyze grammar]

tathetyuktvā kāmadhenuḥ prāviścakāra putrikāḥ |
nandinyo lakṣaśaḥ śvetāḥ prāvirbhūtāḥ suyauvanāḥ || 62 ||
[Analyze grammar]

saṃkalpamātrāt savatsā dogdhryo gavyapradāḥ śubhāḥ |
prāvartanta śubhā yajñā devāstṛptāḥ supāyasaiḥ || 63 ||
[Analyze grammar]

atha brāhmaṇavarṇānāṃ sevakāśca dvijātayaḥ |
brāhmaṇairmānasāstatrotpāditā vaṇijo'yutāḥ || 64 ||
[Analyze grammar]

sopavītāḥ saśikhāśca sarvatattvaviśāradāḥ |
dvijabhaktāḥ sadācārā yuvānaśca taponvitāḥ || 65 ||
[Analyze grammar]

ekaikasmai dvijāyaivā'rpitaṃ hyanucaradvayam |
vāḍavasya tu yadgotraṃ gotraṃ cānucarasya tat || 66 ||
[Analyze grammar]

brahmaṇā śiṣyatā tebhyaścopadiṣṭā hitāya hi |
kurudhvaṃ vacanaṃ tveṣāṃ dadadhvaṃ ca yadicchitam || 67 ||
[Analyze grammar]

samitpuṣpakuśādīni hyānayadhvaṃ dine dine |
anujñayaiṣāṃ vartadhvaṃ mā'vajñāṃ kuruta kvacit || 68 ||
[Analyze grammar]

ityevaṃ te vartamānā brahmacaryaparāyaṇāḥ |
sevante brāhmaṇān sarve vaiṣṇavā vrataśālinaḥ || 69 ||
[Analyze grammar]

parigrahārthaṃ teṣāṃ vai vedhasā ca vṛṣeṇa ca |
gandharvakanyakā ramyā dārāstatropakalpitāḥ || 70 ||
[Analyze grammar]

viśvāvasoḥ kanyakāstā vipravadhvaḥ pativratāḥ |
ṣaṣṭikanyāsahasrāṇi snuṣārūpāstadā'bhavan || 71 ||
[Analyze grammar]

śvaśrūrūpāstathā cānyā mātaro viprayoṣitaḥ |
catvāriṃśatsahasrāṇi kanyānāmabhavan priye || 72 ||
[Analyze grammar]

śreṣṭhādevyo'tha yoginyo mātṛrūpāśca rakṣikāḥ |
dharmāraṇye lakṣaśastāḥ striyaḥ kṛṣṇapativratāḥ || 73 ||
[Analyze grammar]

evaṃ gṛhasthā abhavan putrapautrādivistarāḥ |
sarvāḥ pativratā nāryaḥ patnīvratāśca pūruṣāḥ || 74 ||
[Analyze grammar]

evaṃ gṛhasthavipreṣu vasamāneṣvaraṇyake |
upadravaṃ paraṃ cakre rākṣaso lolajihvakaḥ || 75 ||
[Analyze grammar]

mahādaṃṣṭro mahākāyo vidyujjihvo bhayaṃkaraḥ |
taṃ tu nāśayituṃ devyo viprarakṣaṇatatparāḥ || 76 ||
[Analyze grammar]

triśūlavaradhāriṇyaḥ śaṃkhacakragadāyutāḥ |
kaśākhaṅgayutāścānyāḥ pāśāṃkuśayutāstathā || 77 ||
[Analyze grammar]

kāścit paraśuhastāśca divyāyudhadharāśca tāḥ |
yuyudhuḥ rākṣasenātra sasmaruśca narāyaṇam || 78 ||
[Analyze grammar]

viṣṇurāgatya cakreṇa mārayāmāsa rākṣasam |
viprāstu saṃhatāścaikanagare vāsamācaran || 79 ||
[Analyze grammar]

dharmāraṇyaṃ purā yattu satyamandirapattanam |
nagaraṃ vipravāsaṃ sudivyaṃ svargasamaṃ hyabhūt || 80 ||
[Analyze grammar]

anyā nagararakṣārthaṃ yoginyaḥ sthāpitā yathā |
madārikāyāṃ śrīmātā śāntā nandāpure tathā || 81 ||
[Analyze grammar]

sāvitrī jñānajā cāpi gātrāyī pakṣiṇī tathā |
chatrajā cūṭikā dvāravāsinī pippalā tathā || 82 ||
[Analyze grammar]

śīhorī śāpurī cetā raktavastrā bhayaṃkarāḥ |
ānandā ca tathauṃkārā tathā ca dharmaputrikā || 83 ||
[Analyze grammar]

śyāmalā ceti tā rakṣāṃ kurvanti dharmadeśitāḥ |
atha karṇāṭanāmā'bhūd rākṣaso viprapīḍakaḥ || 84 ||
[Analyze grammar]

yogamālinī taṃ vidrāvayāmāsa ca dakṣiṇām |
tannāmnā so'bhavad deśaḥ karṇāṭaka itiprathaḥ || 85 ||
[Analyze grammar]

tayā tūtpāditāḥ krūrā brahmacāriṇya eva tāḥ |
śākinī ḍākinī cāpi kākinī hākinī tathā || 86 ||
[Analyze grammar]

ekinī lākinī caitāḥ śaktayo daityanāśikāḥ |
dharmāraṇye prarakṣārthaṃ dharmadevena vāsitāḥ || 87 ||
[Analyze grammar]

etāḥ pativratāḥ sarvā rudrakāntasya sevikāḥ |
viprāṇāṃ rakṣikā nityaṃ satīvaṃśasya rakṣikāḥ || 88 ||
[Analyze grammar]

tayā cotpāditā lakṣmi tadanyāśca pativratāḥ |
rudravratā mahādevyo dharmāraṇyakṛtāśrayāḥ || 89 ||
[Analyze grammar]

tā etā brahmacāriṇyaḥ kanyakāḥ kuladevatāḥ |
rakṣyante sarvadā yābhirviprakulāni bhūtale || 90 ||
[Analyze grammar]

bhaṭṭārikī tathā chatrā auvikā jñānajā tathā |
bhadrakālī ca māheśī siṃhorī dhanamardinī || 91 ||
[Analyze grammar]

gātrā śāntā śeṣadevī vārāhī bhadrayoginī |
yogeśvarī mohalajjā kuleśī śakulācitā || 92 ||
[Analyze grammar]

tāraṇī kanakānandā cāmuṇḍā ca sureśvarī |
dārabhaṭṭāriketyādyāḥ pratyekāḥ śatadhā punaḥ || 93 ||
[Analyze grammar]

utpannāḥ śaktayaḥ sarvā dharmāraṇyādikāśrayāḥ |
atha dharmapitā cakre dharmāraṇye mahākratum || 94 ||
[Analyze grammar]

tatra devāśca pitaraḥ ṛṣayo munayo narāḥ |
manavādyāścaturdaśabhuvaneśāḥ samāyayuḥ || 95 ||
[Analyze grammar]

tatrācāryaṃ tvāṃgirasaṃ mārkaṇḍeyaṃ cakāra saḥ |
atriṃ ca kaśyapaṃ cāpi hotāraṃ samakalpayat || 96 ||
[Analyze grammar]

jamadagniṃ gautamaṃ ca adhvaryuṃ samakalpayat |
bharadvājaṃ vaśiṣṭhaṃ ca pratyadhvaryuṃ prakalpayat || 97 ||
[Analyze grammar]

nāradaṃ cāpi vālmīkiṃ preritāramakalpayat |
brahmāsane tu brahmāṇaṃ sthāpayāmāsa dharmarāṭ || 98 ||
[Analyze grammar]

krośacatuṣkamātrāṃ suvedīṃ kṛtvā suraistataḥ |
dvijāḥ sarve samāhūtā jāpakāḥ pāṭhakāstathā || 99 ||
[Analyze grammar]

dvārapālā gaṇeśaskandendrajayantakāḥ kṛtāḥ |
tato rakṣoghnamantreṇa hūyate havyavāhane || 100 ||
[Analyze grammar]

juhuvuste tadā devā vedamantrairhi padmaje |
tilāṃśca yavamiśrāṃśca madhvājyena sumiśritān || 101 ||
[Analyze grammar]

āghārāvājyabhāgau ca hutvā cāpi tataḥ param |
drākṣekṣupūganāriṅgajambīraṃ bījapūrakam || 102 ||
[Analyze grammar]

uttarato nārikelaṃ dāḍimaṃ ca yathākramam |
madhvājyaṃ payasā yuktaṃ kṛśaraṃ śarkarāyutam || 103 ||
[Analyze grammar]

taṇḍulaiḥ śatapatraiśca kṛtvā yajñaṃ sadakṣiṇam |
uttamaṃ ca śubhaṃ stomaṃ vaiṣṇavaṃ ca jagustadā || 104 ||
[Analyze grammar]

avāritā'nnamadadaddīnāndhakṛpaṇeṣvapi |
pāyasaṃ śarkarāyuktaṃ sājyaśākasamanvitam || 105 ||
[Analyze grammar]

maṇḍakā vaṭakāḥ pūpāstathā vai veṣṭikāḥ śubhāḥ |
sahasramodakāścāpi pheṇikā ghurghurādayaḥ || 106 ||
[Analyze grammar]

odanaśca tathā dālī āḍhakyādikṛtadravā |
tathaiva mudgadālīṃ ca parpaṭā vaṭikā tathā || 107 ||
[Analyze grammar]

sapippalīlavaṃgamarīcāni lohyakāni ca |
kulmāṣā vellakāścāpi komalā vālakāḥ śubhāḥ || 108 ||
[Analyze grammar]

karkariṭāścārdrakāśca maricena samanvitāḥ |
vividhāni suśākāni bhājāśca vidhidhāstathā || 109 ||
[Analyze grammar]

pāyasāni caikṣavāni godhūmāni sahasraśaḥ |
miṣṭānnāni caṇakānāṃ bhojayitvā dvijān vṛṣaḥ || 110 ||
[Analyze grammar]

aṣṭādaśapralakṣāṃśca tathā'nyān koṭiśo janān |
kṛtvā'vabhṛthakaṃ snānaṃ yajñaphalamavāpa saḥ || 111 ||
[Analyze grammar]

yajñaṃ kṛtvā yayuḥ sarve svasvasthānāni dehinaḥ |
śravaṇātpaṭhanāccāsya viṣṇuyāgaphalaṃ bhavet || 112 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne dharmāraṇye śrīkṛṣṇadāsīnāṃ pativratānāṃ gāndharvībhūtānāṃ kuladevīmaṇḍalatvaṃ tathā viprādīnāṃ gotrapravarādiḥ devīkṛto lolajihvarākṣasanāśaḥ yoginīnāṃ sthāpanā dharmadevakṛtayajñaścetyādinirūpaṇanāmā catvāriṃśadadhikacatuśśatatamo'dhyāyaḥ || 440 ||
[Analyze grammar]